អ្នកភូមិនៅសំឡូតចោទក្រុមទាហានថាប្លន់
2009.12.17
សមត្ថកិច្ចប៉ូលិស និងជនរងគ្រោះបានថ្លែងថា ក្រុមទាហានចំនួន ៥នាក់ ក្នុងឯកសណ្ឋានកងយោធពលខេមរភូមិន្ទ ប្រដាប់ដោយអាវុធអាកាបត់ចំនួន ៤ដើម បានចូលទៅភ្ជង់ ហើយប្លន់ទ្រព្យសម្បត្តិ អ្នកភូមិមួយគ្រួសារនៅស្រុកសំឡូត ខេត្តបាត់ដំបង។
ជនរងគ្រោះឈ្មោះ ឈូក ម៉េង នៅក្រុមទី ២ ភូមិស្រែស្តៅ ស្រុកសំឡូតជាបុគ្គលិកមណ្ឌលសុខភាពឃុំ បានថ្លែងកាលពីថ្ងៃព្រហស្បតិ៍ ទី១៧ ខែធ្នូ ថា នៅវេលាម៉ោង ៧:៣០នាទី ល្ងាចថ្ងៃពុធ ជនមិនស្គាល់មុខ ៥នាក់មានឯកសណ្ឋានកងទ័ពបានយកអាវុធអាកាបត់ ៤ដើមភ្ជង់ហើយចាប់មនុស្ស៨នាក់ចងស្លាបសេក ប្លន់យកលុយអស់ ២៥លានរៀល មាស ២តម្លឹកន្លះ និងទូរស័ព្ទដៃ ៤គ្រឿង។
លោក ឈូក ម៉េង បញ្ជាក់ថា ៖ «គ្នា៥នាក់អាវុធអាកាបត់ ៤ដើម កន្ត្រៃកាត់ដែកធំ១ ឯកសណ្ឋានទាហានមានខោប៉ារ៉ា ១ ក្រៅពីនឹងខោអាវទាហានធម្មតា វាភ្ជង់ចងទាំងអស់»។
លោកបន្តថា ចោរប្លន់ឯកសណ្ឋានកងទ័ពទាំង ៥នាក់មុនដំបូងបានចូលទៅគំរាមថា មេបញ្ជាការពួកគេបញ្ជាឲ្យមកឆែកឆេររកកាំភ្លើងអាកា ១ដើម និងកាំភ្លើងខ្លី ១ដើមនៅក្នុងផ្ទះជនរងគ្រោះហើយប្លន់តែម្តង។ លោកបន្ថែមថា ក្រោយពីប្លន់រួចចោរឯកសណ្ឋានកងទ័ពបានគេចខ្លួនទៅតាមក្រោយផ្ទះ។
លោក យ៉ែម យ៉ន មេឃុំមានជ័យ បានថ្លែងអះអាងបន្ថែមថា ក្រុមចោរប្លន់ប្រដាប់អាវុធ គឺចេញពីជួរកងទ័ពតែអាជ្ញាធរមូលដ្ឋានមិនទាន់សន្និដ្ឋានថា ចេញមកពីអង្គភាព ឬកងពលមួយណាទេ ដោយលោកថ្លែងថា ៖ «ខាងខ្ញុំកំណត់អត់បានទេ ប៉ុន្តែគ្រាន់តែដឹងថា វាមានប្រដាប់អាវុធធុនអាកា ៤ដើម ចូលប្លន់ល្ងាចមិញ»។
លោក លី ប៊ួយ អធិការនគរបាលស្រុកសំឡូតមានប្រសាសន៍ថា កម្លាំងសមត្ថកិច្ចប៉ូលិស ប៉េអឹមបានចុះព្រឹត្តិការណ៍ភ្លាមៗក្រោយពីទទួល ដំណឹង ប៉ុន្តែក្រុមចោរប្លន់បានគេចខ្លួនអស់។
លោកសន្និដ្ឋានថា ក្រុមចោរប្លន់ទាំង ៥នាក់ គឺចេញមកពីជួរកងទ័ព ៖ «ការសន្និដ្ឋានរបស់យើង វាអត់មានទាហានណាក្រៅពីទាហាននៅហ្នឹងទេ ខាងកងទ័ពគឺថា កាំភ្លើងគាត់ស្ពាយគ្រប់គ្នាអ៊ីចឹង យើងមិនអាចនេះបានទេ គាត់មានកើតហេតុខ្មែរ-ថៃដល់ពេលអ៊ីចឹងទៅតាំងពីថ្ងៃហ្នឹង មកទៅណាមកណ គឺកាំភ្លើងគាត់ស្ពាយរហូតកាំភ្លើងខ្លី កាំភ្លើងវែងពេញទឹកពេញដីហ្នឹងឯង»។
លោក ជឹម ភើយ មេបញ្ជាការកងពលតូចថ្មើរជើងលេខ ៥២ ប្រចាំទិសសំឡូតប៉ៃលិន មិនអាចទាក់ទងសុំការបញ្ជាក់បានទេ ប៉ុន្តែលោក ទុយ ប៊ុនលី មេបញ្ជាការរងយោធភូមិភាគ ៥ ប្រចាំទិសសំឡូត បានច្រានចោលចំពោះការចោទប្រកាន់មកលើក្រុមទាហានក្នុងបទប្រព្រឹត្តអំពើចោរកម្មថា ៖ «ថាក្រុមទាហាននៅណា? និយាយក្រុមទាហាននិយាយម៉េចកើត! ទាហានវាមានកងឯកភាព ហើយទាហានខាងខ្ញុំឈរខាងបន្ទាត់ព្រំដែនទេ ឯចំណុចភូមិសាស្ត្រខាងក្រៅខ្ញុំមិនបានឈរទេ»។
មកដល់ពេលនេះក្រុមសមត្ថកិច្ចមូលដ្ឋានកំពុងធ្វើការស្រាវជ្រាវជុំវិញការចោទប្រកាន់ទៅលើក្រុមប្រដាប់អាវុធដែលចេញពីជួរកងទ័ពក្នុងការប្រព្រឹត្តអំពើប្លន់នេះ៕
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
ព័ត៌មានថ្មីៗ
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័នសំខាន់ៗនៅកម្ពុជា
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ក្រសួងមហាផ្ទៃចាត់ទុកព័ត៌មានដែលថា កម្ពុជាលាក់រឿងផ្ដល់សញ្ជាតិឲ្យជនបរទេស ជាការមួលបង្កាច់