អាជ្ញាធរស្រុកស្វាយលើខេត្តសៀមរាបបានអំពាវនាវឱ្យប្រជាពលរដ្ឋ ដែលចេញទៅធ្វើស្រែចំការ ប្រសិនបើប្រទះឃើញគ្រាប់ឬក៏យុទ្ធភណ្ឌមិនទាន់ផ្ទុះ សូមកុំប៉ះពាល់ និងត្រូវប្រាប់ឱ្យសមត្ថកិច្ចបានដឹងជាបន្ទាន់។
ការអំពាវនាវនេះធ្វើឡើងបន្ទាប់ពីកាលពីថ្ងៃទី២២ ខែកុម្ភៈ មានកុមារតូចៗ២នាក់ បានទៅរើសគ្រាប់សំណល់ពីសង្គ្រាមមកដំលេង បណ្ដាលឱ្យផ្ទុះស្លាប់ភ្លាមៗនៅនឹងកន្លែង។
យ៉ាងហោចណាស់មានកុមារតូចៗចំនួន២នាក់បានស្លាប់ ដោយសារតែគ្រាប់បែកដែលសល់ពីសម័យសង្គ្រាមបានផ្ទុះ នៅចំណុចត្រពាំងកូនទា ក្នុងភូមិគ្រញូង ឃុំតាសៀម ស្រុកស្វាយលើ ខេត្ដសៀមរាបកាលពីរសៀលថ្ងៃទី២២ ខែកុម្ភៈ។
គ្រាប់បែកសល់ពីសម័យសង្គ្រាម
មេភូមិគ្រញូង លោក ឌី សុខា ឱ្យដឹងថា ក្មេងប្រុសម្នាក់អាយុ២ឆ្នាំ និងក្មេងស្រីម្នាក់ អាយុ២ឆ្នាំដែរ ជាបងប្អូនជីដូនមួយនិងគ្នា បានស្លាប់ភ្លាមៗនៅឯខ្ទមស្រែ ដោយសារផ្ទុះគ្រាប់សេសសល់ពីសម័យសង្គ្រាម។ លោកថា អាជ្ញាធរមូលដ្ឋាន និងសមត្ថកិច្ចនៅមិនទាន់ដឹងឱ្យប្រាកដថា តើគ្រាប់ដែលផ្ទុះសម្លាប់កុមារទាំងពីរនាក់នោះ គឺពួកគេរើសមកពីទីណានៅឡើយទេ។
លោក ឌី សុខា៖ «ម្ដាយរបស់កុមាររងគ្រោះ កំពុងអង្គុយដាំបាយបែរមុខទៅទិសខាងជើង ហើយកូនតូចៗកំពុងលេងក្បែរកន្លែងដាំបាយលើខ្ទមស្រែនោះ។ ពេលនោះម្ដាយក៏ឮសម្លេងកូនដំរបស់អ្វីមួយដែរ ក៏ប៉ុន្តែមិនបានទៅមើលថា ជាអ្វី? ហើយតានិងឪពុករបស់ក្មេងក៏ដេកក្នុងអង្រឹងក្បែរកន្លែងកើតហេតុនោះប្រហែលជា ៤-៥ម៉ែត្រ ប៉ុន្តែមិនដឹងថា កូនលេងគ្រាប់ទេ ដល់ពេលឮសំឡេងផ្ទុះទើបបែរមកឃើញកូនដួលដេកទៅហើយ»។
អាជ្ញាធរភូមិគ្រញូងឱ្យដឹងថា កុមារតូចៗដែលស្លាប់ដោយសារផ្ទុះគ្រាប់នោះ គឺម្នាក់ជាកូនរបស់អ្នកភូមិគ្រញូង ចំណែកកុមារម្នាក់ទៀត មានឪពុកម្តាយជាអ្នករស់នៅក្នុងស្រុកបន្ទាយស្រី ខេត្តសៀមរាប ប៉ុន្តែបាននាំកូនទៅធ្វើចំការនៅកន្លែងកើតហេតុ។
អធិការនគរបាលស្រុកស្វាយលើ លោក យឹប យ៉ុងឈាង ឱ្យដឹងថា គ្រាប់ដែលផ្ទុះសម្លាប់កុមារពីរនាក់នោះ គឺជាបំណែកគ្រាប់ផ្លោងធុន ៦០មីលីម៉ែត្រ សល់ពីសម័យសង្គ្រាម។ លោកថា ហេតុការណ៍ផ្ទុះគ្រាប់នៅឃុំតាសៀមនោះ គឺកើតឡើងនៅក្នុងព្រៃ ជាតំបន់ចុងកាត់មាត់ញក ដែលជាតំបន់ធ្លាប់មានការប្រយុទ្ធគ្នារវាងកងទ័ពខ្មែរក្រហម និងកងទ័ពសាធារណរដ្ឋប្រជាមានិតកម្ពុជា នៅក្នុងអំឡុងទសវត្សរ៍ឆ្នាំ១៩៨០។ លោកបញ្ជាក់ថា សមត្ថកិច្ចតែងផ្សព្វផ្សាយឱ្យប្រជាពលរដ្ឋ ប្រុងប្រយ័ត្ននៅពេលចូលទៅធ្វើស្រែចំការនៅតំបន់នោះ។
លោក យឹម យ៉ុងឈាង៖ «តាមពិតនគរបាលប៉ុស្តិ៍រដ្ឋបាលជាមួយអាជ្ញាធរឃុំតាសៀម តែងផ្សព្វផ្សាយក្នុង ១ខែចំនួន៨ដង គឺកំពុងតែអនុវត្តរៀងរាល់ថ្ងៃ ប៉ុន្តែហេតុការណ៍ផ្ទុះគ្រាប់នេះគឺកើតឡើងនៅតំបន់ចុងកាត់មាត់ញក នៅក្នុងព្រៃ។ យើងមិនធ្លាប់គិតថា ហេតុការណ៍ផ្ទុះគ្រាប់នេះអាចកើតឡើងទេ ពីព្រោះសមត្ថកិច្ចបានផ្សព្វផ្សាយឱ្យប្រុងប្រយ័ត្នជាមួយគ្រាប់ និងយុទ្ធភណ្ឌមិនទាន់ផ្ទុះនេះស្ទើរតែរាល់ថ្ងៃ។ ប៉ុន្តែចៃដន្យមានអ្នកមកពីចម្ងាយមិនបានដឹងក៏កើតហេតុដូចនេះ។សមត្ថកិច្ចមានការសោកស្ដាយដែលខិតខំប្រឹងប្រែងការពារប្រជាពលរដ្ឋ កុំឱ្យគ្រោះថ្នាក់ដោយសារយុទ្ធភណ្ឌ និងគ្រាប់មិនទាន់ផ្ទុះ ក៏ប៉ុន្តែនៅតែកើតឡើងទាល់តែបាន»។
ទីតាំងផ្ទុះគ្រាប់នេះជាអតីតឃ្លាំងគ្រាប់
ប្រជាពលរដ្ឋរស់នៅឃុំតាសៀមខ្លះ អះអាងថា កន្លែងដែលគ្រាប់បែកផ្ទុះសម្លាប់កុមារតូចៗ២នាក់នោះ ក៏ធ្លាប់មានឃ្លាំងគ្រាប់នៅទីនោះដែរ។
បុរសអ្នកភូមិគ្រញូងម្នាក់ ដែលសុំមិនបញ្ចេញឈ្មោះ ដោយបារម្ភពីសុវត្ថិភាព បានបង្ហាញការព្រួយបារម្ភចំពោះគ្រោះថ្នាក់នៅពេលដែលអ្នកភូមិចេញទៅធ្វើស្រែចំការនៅតំបន់នោះម្ដងៗ។
បុរសអ្នកភូមិគ្រញូង៖ «ខ្ញុំធ្លាប់គិតថា ស្រុកនេះ ថ្វីបើជាតំបន់ដែលមានកងទ័ពធ្លាប់ស្នាក់នៅ ហើយខ្ញុំក៏ធ្លាប់គិតថាប្រហែលជាមិនមានដាក់មីនអ្វីទេ ប៉ុន្តែនៅពេលដែលកើតមានហេតុការណ៍ផ្ទុះគ្រាប់សេសសល់ពីសង្គ្រាមបែបនេះ បានធ្វើឱ្យខ្ញុំចាប់ផ្ដើមមានការព្រួយបារម្ភខ្លាំង។ អ្វីដែលខ្ញុំធ្លាប់គិតថា ជាតំបន់ដែលគ្មានគ្រាប់មីន បែរជានៅមានសំណល់គ្រាប់សល់ពីសង្គ្រាមហើយផ្ទុះធ្វើឱ្យមនុស្សស្លាប់ទៅវិញ»។
ជុំវិញបញ្ហានេះ ប្រធានកងឯកភាពកំចាត់មីនទី៤ប្រចាំខេត្តសៀមរាប លោក អ៊ុំ សុជាតិ សុំមិនពន្យល់ជុំវិញភូមិសាស្ត្រ និងគ្រោះថ្នាក់ដោយសារការផ្ទុះគ្រាប់នោះទេ ដោយលោកគ្រាន់តែបញ្ជាក់ថា លោកបានបញ្ជូនក្រុមអ្នកជំនាញទៅពិនិត្យទីនោះរួចហើយ។
របាយការណ៍របស់អាជ្ញាធរមីនកម្ពុជាឱ្យដឹងថា បច្ចុប្បន្ននេះខេត្តសៀមរាប គឺជាខេត្តមួយដែលនៅសេសសល់គ្រាប់មីនតិចតួចក្នុងចំណោមខេត្តចំនួន២ផ្សេងទៀត គឺខេត្តរតនគិរី និងខេត្តកំពង់ធំ។
ចាប់តាំងពីខែមករា ដល់ខែធ្នូឆ្នាំ២០២៤ កម្ពុជាមានជនរងគ្រោះដោយសារយុទ្ធភណ្ឌមិនទាន់ផ្ទុះ ដោយសារមីន និងគ្រាប់ផ្សេងទៀតចំនួន ៤៧នាក់។ ចំនួនអ្នករងគ្រោះនេះ កើនឡើង១៥នាក់ បើប្រៀបធៀបនិងឆ្នាំ២០២៣ ដែលមានជនរងគ្រោះចំនួន៣២នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។