សកម្មជន​អាមេរិកាំង​ដើម​កំណើត​អាស៊ី​គ្រោង​ប្រមូល​ផ្ដុំ​តាម​ទីក្រុង​ធំៗ​តវ៉ា​ប្រឆាំង​ការ​បណ្ដេញ​ចេញ

ដោយ មាន ឫទ្ធិ
2019-10-01
អ៊ីម៉ែល
មតិ
Share
បោះពុម្ព

សកម្មជន​អាមេរិកាំង​ដើមកំណើត​អាស៊ី គ្រោង​ប្រមូល​ផ្តុំ​គ្នា​នៅ​តាម​បណ្ដា​ទីក្រុង​ធំៗ នៅ​សហរដ្ឋអាមេរិក នៅ​ដើម​សប្ដាហ៍​នេះ ដើម្បី​ធ្វើការ​តវ៉ា​ប្រឆាំង​នឹង​ការ​ចាប់​បញ្ជូន ឬ​បណ្ដេញ​ចេញ ពលរដ្ឋ​ដើម​កំណើត​ខ្មែរ ដែល​ធ្លាប់​បាន​ប្រព្រឹត្តិ​ល្មើសច្បាប់​នៅ​សហរដ្ឋអាមេរិក ត្រលប់​ទៅ​កម្ពុជា​វិញ។ ការ​គ្រោង​ប្រមូល​ផ្តុំ​តវ៉ា​នេះ មាន​នៅ​តាម​ទីក្រុង​បូស្តុន (Boston) នៃ​រដ្ឋ​ម៉ាសាឈូសេត (Massachusetts) ទីក្រុង​សាន់ហ្វ្រាន់ស៊ីស្កូ (San Francisco) និង​សាក្រាមែនតូ (Sacramento) នៃ​រដ្ឋ​កាលីហ្វ័រញ៉ា (California)

ការ​គ្រោង​ប្រមូល​ផ្តុំ​គ្នា​តវ៉ា​នេះ ធ្វើឡើង​បន្ទាប់​ពី​មាន​ពលរដ្ឋ​ដើមកំណើត​ខ្មែរ​ជាច្រើន​នាក់ ដែល​ធ្លាប់​បាន​ប្រព្រឹត្តិ​បទឧក្រិដ្ឋ​កាល​ពី​ពេល​អតីតកាល ហើយ​ពួកគេ​ពុំ​មាន​សញ្ជាតិ​អាមេរិកាំង ត្រូវ​បាន​ភ្នាក់ងារ​អនុវត្ត​ច្បាប់​អន្តោប្រវេសន៍ និង​គយ ឬ​ហៅ​កាត់​ថា ICE ជូនដំណឹង​ទៅ​ពួកគេ​អំពី​ការ​បណ្ដេញ​ចេញ​ពី​សហរដ្ឋ​អាមេរិក ដែល​នឹង​ត្រូវ​ធ្វើឡើង​ក្នុង​សប្ដាហ៍​នេះ។

សារព័ត៌មាន អេ.ភី (AP) របស់​អាមេរិក រាយការណ៍​កាលពី​ថ្ងៃ​ទី​២៨ កញ្ញា ឱ្យ​ដឹង​ថា យ៉ាងហោចណាស់​មាន​មនុស្ស​ជាង​២០​នាក់ នៅ​រដ្ឋ​កាលីហ្វ័រញ៉ា ១០​នាក់ នៅ​រដ្ឋ​ម៉ាសាឈូសេត ត្រូវ​បាន​ជូនដំណឹង​អំពី​ការ​បណ្ដេញ​ចេញ​នេះ​។ ក្រៅ​ពី​នេះ ក៏​មាន​ពលរដ្ឋ​ខ្មែរ​រស់នៅ​រដ្ឋ​មីនីសូតា (Minnesota) តិចសាស (Texas) រូដអាយឡែន (Rhode Island) វ៉ាស៊ីងតោន State (Washington) និង​រដ្ឋ​វីសខុនសិន (Wisconsin) ជាដើម។

សកម្មជន​អាមេរិកាំង​ដើមកំណើត​អាស៊ី​ទាំងនេះ និយាយ​ប្រាប់​កាសែត​ក្នុង​រដ្ឋ​របស់​ពួកគេ​ថា ពួកគេ​អំពាវនាវ​ឱ្យ​មានការ​បញ្ឈប់​សកម្មភាព​ចាប់​បញ្ជូន​ត្រលប់​ទៅ​កម្ពុជា​វិញ​នេះ ហើយ​ពួកគេ​ជំរុញ​ឱ្យ​មន្ត្រី​ជាប់ឆ្នោត និង​សមាជិកសភា​អាមេរិកាំង ផ្ដល់​ការ​គាំទ្រ​ជា​សាធារណៈ​ដល់​សហគមន៍​អាស៊ីអាគ្នេយ៍។

ផ្អែក​តាម​ទិន្នន័យ​របស់​ទីភ្នាក់ងារ​អនុវត្ត​ច្បាប់​អន្តោប្រវេសន៍ និង​គយ (ICE) ឱ្យ​ដឹង​ថា ក្នុង​ឆ្នាំ​២០១៨ មាន​ពលរដ្ឋ​ដើមកំណើត​ខ្មែរ​សរុប​ចំនួន ១១០​នាក់ ត្រូវ​បាន​បញ្ជូន​មក​កម្ពុជា​វិញ។ តួលេខ​នេះ កើន​ឡើង​ដល់​ទៅ​២៨០% ប្រៀបធៀប​នឹង​ឆ្នាំ​២០១៧ ដែល​មាន​សរុប​ត្រឹមតែ ២៩​នាក់។ បច្ចុប្បន្ន មាន​ពលរដ្ឋ​ដើមកំណើត​ខ្មែរ​សរុប​ដល់​ទៅ ១​ពាន់ ៨​រយ​នាក់ មាន​ដីកា​បណ្ដេញ​ចេញពី​សហរដ្ឋ​អាមេរិក ជា​ស្ថាពរ។ ពួកគេ​ភាគច្រើន ធ្លាប់​បាន​ផ្ដន្ទាទោស​ពី​បទ​ឧក្រិដ្ឋ ក៏ប៉ុន្តែ​ត្រូវ​បាន​ដោះលែង​ក្រោម​ការ​ឃ្លាំមើល ហើយ​មិន​ស្ថិត​ក្រោម​ការ​ឃុំ​ខ្លួន​ឡើយ។

ពលរដ្ឋ​ដើមកំណើត​ខ្មែរ​ទាំងនេះ ពុំ​មាន​សញ្ជាតិ​អាមេរិកាំង​ទេ។ ពួកគេ​ភាគច្រើន​ជា​អតីតជន​ភៀសខ្លួន ធ្លាប់​បាន​ប្រព្រឹត្តិ​បទឧក្រិដ្ឋ​កាល​ពី​ពេល​អតីតកាល ហើយ​មាន​ប្រពន្ធ​កូន​ជា​ជនជាតិ​អាមេរិកាំង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Samy

ពី U.S.A.

If you do not commit any crime ICE will not send you back to Cambodia. Please respect the law and stop blaming ICE.

Oct 01, 2019 06:35 PM

Samy

ពី U.S.A.

If you do not commit any crime ICE will not send you back to Cambodia. Please respect the law and stop blaming ICE.

Oct 01, 2019 06:34 PM

គេហទំព័រ​ទាំងមូល