ក្រុមហ៊ុនកាស៊ីណូចិន ម៉ាកាវ លីចិន ដេវីឡុបមេន (Macau Legend Development) ដែលមានបំណងសាងសង់រមណីយដ្ឋានចម្រុះខ្នាតធំមួយនៅខេត្តសៀមរាប ថ្លែងថា ដីដែលក្រុមហ៊ុនខ្លួនទិញបានស្ថិតក្នុងទីតាំងដ៏ល្អ ហើយថា គម្រោងវិនិយោគរបស់ខ្លួន អាចនឹងប្រព្រឹត្តទៅដោយមិនមានកាស៊ីណូ បើសិនជារដ្ឋាភិបាលកម្ពុជាមិនអនុញ្ញាតឱ្យមានកាស៊ីណូ នៅខេត្តសៀមរាបនោះទេ។
នាយកប្រតិបត្តិក្រុមហ៊ុន លីចិន ដេវីឡុបមេន លោក ស្យ៊ែលដុន ត្រេនន័រ (Sheldon Trainer) សារព័ត៌មាន Inside Asia Gambling ដកស្រង់សម្ដី នៅថ្ងៃទី២២ ឧសភា ថា ដីដែលក្រុមហ៊ុនខ្លួនទិញបាន មានចម្ងាយ ៥០គីឡូម៉ែត្រពីប្រាសាទអង្គរ ហើយស្ថិតនៅក្បែរទីតាំងអាកាសយានដ្ឋានអន្តរជាតិថ្មីរបស់ខេត្តសៀមរាប។ លោកចាត់ទុកទីតាំងនេះ ថា ជាតំបន់ដ៏ល្អ សម្រាប់គម្រោងសាងសង់រមណីយដ្ឋានចម្រុះ (integrated resort) របស់ក្រុមហ៊ុនលោក។
ជាទូទៅ រមណីយដ្ឋានចម្រុះ (integrated resort) ជាប្រភេទរមណីយដ្ឋានខ្នាតធំ ដែលមានកាស៊ីណូ សណ្ឋាគារ សាលមហោស្រព សួនកម្សាន្ត ភោជនីយដ្ឋាន និង ហាងលក់ទំនិញប្រណីតផ្សេងៗ។ នៅពេលក្រុមហ៊ុនកាស៊ីណូ លីចិន ដេវីឡុបមេន ប្រកាសពីបំណងវិនិយោគ នៅខេត្តសៀមរាបដំបូង កាលពីពាក់កណ្ដាលឆ្នាំ២០១៨ ក្រុមហ៊ុននេះមិនបានបញ្ជាក់ថាតើ រមណីយដ្ឋានចម្រុះនោះ នឹងមានរួមបញ្ចូលកាស៊ីណូ ឬយ៉ាងណានោះទេ។
ប៉ុន្តែនាយកប្រតិបត្តិក្រុមហ៊ុន លោក ស្យ៊ែលដុន ត្រេនន័រ (Sheldon Trainer) អះអាងប្រាប់សារព័ត៌មាន Inside Asia Gambling ថា ប្រសិនបើការសាងសង់កាស៊ីណូ ក្នុងខេត្តសៀមរាបត្រូវបានហាមឃាត់ គម្រោងរបស់ក្រុមហ៊ុនលោកនឹងប្រព្រឹត្តទៅដោយមិនចាំបាច់មានកាស៊ីណូ។
កាលពីដើមឆ្នាំ២០១៩នេះ ក្រុមហ៊ុនកាស៊ីណូ Macau Legend Development ដែលចុះបញ្ជីនៅផ្សារហ៊ុនហុងកុង បានប្រកាសថា ក្រុមហ៊ុនខ្លួនទទួលបានសិទ្ធិកាន់កាប់ដីសរុបប្រមាណ១.២០០ហិកតារក្នុងខេត្តសៀមរាប ពីក្រុមហ៊ុនមួយក្នុងប្រទេសកម្ពុជាឈ្មោះ ហូវីង (Howing) ក្នុងតម្លៃ ៩០លានដុល្លារអាមេរិក។ ក្រៅពីមានផែនការវិនិយោគនៅខេត្តសៀមរាប ក្រុមហ៊ុនប្រតិបត្តិការកាស៊ីណូនេះ ក៏មានបំណងពង្រីកអាជីវកម្មខ្លួននៅប្រទេសឡាវ និងវៀតណាមផងដែរ។
ទោះបីក្រុមហ៊ុនបង្ហាញសុទិដ្ឋិនិយមចំពោះគម្រោងរបស់ខ្លួននៅខេត្តសៀមរាបក៏ដោយ ក៏មន្ត្រីរបបក្រុងភ្នំពេញអះអាងថា ខ្លួនមិនទាន់ទទួលបានសំណើសុំវិនិយោគពីក្រុមហ៊ុននោះនៅឡើយទេ។អនុប្រធានអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ ដែលគ្រប់គ្រងអាជីវកម្មកាស៊ីណូ លោក រស់ ភិរុណ ថ្លែងប្រាប់អាស៊ីសេរីនៅថ្ងៃទី២៣ ឧសភា ថា រហូតមកដល់ពេលនេះ ក្រសួងមិនទាន់ទទួលបានការស្នើសុំវិនិយោគពីក្រុមហ៊ុនកាស៊ីណូម៉ាកាវនោះនៅឡើយទេ។ លោកបញ្ជាក់ថា បច្ចុប្បន្នក្រសួងមិនមានគោលការណ៍អនុញ្ញាតឱ្យមានអាជីវកម្មល្បែងស៊ីសង ឬ កាស៊ីណូនៅខេត្តសៀមរាបឡើយ៖ «បាទ ! ពាក់ព័ន្ធទៅនឹងការប្រកបអចលនទ្រព្យអីផ្សេងៗ អាហ្នឹងមិនជាបញ្ហាទេ តែរឿងកាស៊ីណូ គឺមិនមានទេ»។
កិច្ចព្រមព្រៀងរបស់ក្រុមហ៊ុន Macau Legend Development និងក្រុមហ៊ុន Howing បញ្ជាក់ថា ផ្ទៃដីមួយផ្នែកដែលមានទំហំជិត ៨៤ហិកតារ (៨៣.៨៨) នៃផ្ទៃដីសរុប១.២០០ហិកតារ ដែលក្រុមហ៊ុនកាស៊ីណូម៉ាកាវ ទទួលបានសិទ្ធិកាន់កាប់នោះ គឺជាដីរបស់អាជ្ញាធរអប្សរា។ ក៏ប៉ុន្តែ អ្នកនាំពាក្យអាជ្ញាធរអប្សរា លោក ឡុង កុសល ថ្លែងថា លោកមិនដឹងអំពីរឿងនេះឡើយ៖ «ខ្ញុំសុំទោស ខ្ញុំអត់អាចមានយោបល់បានទេ ខ្ញុំអត់ដឹងរឿង»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បង្ហាញការសង្ស័យពីតម្លាភាពនៃគម្រោងវិនិយោគដ៏ធំនេះ៖ «ការវិនិយោគដែលសូម្បីតែរដ្ឋាភិបាលមិនទាន់មានព័ត៌មានច្បាស់លាស់ យើងមន្ទិលទៅលើទម្រង់នៃការវិនិយោគហ្នឹងថា តើរបៀបនៃការដំណើរការការវិនិយោគហ្នឹង ថាតើវាមានពាក់ព័ន្ធអីខ្លះជាមួយនឹងការវិនិយោគដែលមិនត្រឹមត្រូវ»។
លោក សន ជ័យ ជំរុញឱ្យរបបក្រុងភ្នំពេញ ពិនិត្យពិច័យឱ្យបានម៉ត់ចត់អំពីគម្រោងរបស់ក្រុមហ៊ុនកាស៊ីណូម៉ាកាវមួយនេះ៖ «ការវិនិយោគនៅខេត្តសៀមរាបនេះគឺ ចាំបាច់ត្រូវមានភាពច្បាស់លាស់នៃការមិនធ្វើឱ្យមានការប៉ះពាល់ដល់តំបន់អភិរក្ស តំបន់គ្រប់គ្រងរបស់អាជ្ញាធរអប្សរា។ អ៊ីចឹងខ្ញុំយល់ថា ការពិនិត្យពិច័យមុនឈានទៅដល់ការវិនិយោគគឺជាចំណុចចាំបាច់»។
បច្ចុប្បន្ន កម្ពុជាមានកាស៊ីណូដែលមានអាជ្ញាប័ណ្ណសរុបចំនួន១៦៣ នៅទូទាំងប្រទេស។ អាជីវកម្មកាស៊ីណូនេះ កំពុងរីកដូចផ្សិតជាពិសេសក្នុងក្រុងព្រះសីហនុ ដែលមានជាង១០០កន្លែងក្នុងនោះភាគច្រើនជាការវិនិយោគរបស់ជនជាតិចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។