អ្នក​ប្រើប្រាស់​ហ្វេសប៊ុក​ស្នើ​ឲ្យ​មាន​ការ​ស៊ើប​អង្កេត​ករណី​ឃាតកម្ម​លើ​លោក កែម ឡី

លោក​បណ្ឌិត កែម ឡី អ្នក​ស្រាវជ្រាវ​ការ​អភិវឌ្ឍ​សង្គម ត្រូវ​បាន​ខ្មាន់​កាំភ្លើង​បាញ់​សម្លាប់​នៅ​ព្រឹក​ថ្ងៃ​ទី​១០ ខែ​កក្កដា ឆ្នាំ​២០១៦ នៅ​ឯ​ស្ដារ​ម៉ាត (Star Mart) ក្នុង​ស្ថានីយ​លក់​ប្រេង​ឥន្ធនៈ​កាល់តិច (Caltex) ក្រុង​ភ្នំពេញ។ បន្ទាប់​ពី​ឃាតកម្ម​លើ​បណ្ឌិត កែម ឡី ដែល​ជា​អ្នក​រិះគន់​ភាព​អវិជ្ជមាន​របស់​រដ្ឋាភិបាល​ឥត​សំចៃ​មាត់​នោះ មហាជន​អ្នក​ប្រើប្រាស់​បណ្ដាញ​សង្គម​ហ្វេសប៊ុក​ជាច្រើន (Facebook) បញ្ចេញ​ប្រតិកម្ម​ជា​បន្តបន្ទាប់។

អ្នក​ប្រើប្រាស់​បណ្ដាញ​សង្គម​ហ្វេសប៊ុក (Facebook) សម្ដែង​ការ​សោកស្ដាយ និង​ថ្កោលទោស​ដល់​ការ​បាញ់​សម្លាប់​បណ្ឌិត កែម ឡី ព្រម​ទាំង​ស្នើ​ឲ្យ​មាន​ការ​ស៊ើប​អង្កេត​ឯករាជ្យ​លើ​ឃាតកម្ម​ ដើម្បី​ផ្តល់​ភាព​យុត្តិធម៌​ជូន​រូប​លោក។

អ្នក​ប្រើប្រាស់​បណ្ដាញ​សង្គម​ហ្វេសប៊ុក​ឈ្មោះ Nhem Makara ចាត់​ទុក​ថា លោក កែម ឡី គឺ​ជា​មនុស្ស​ស្លូត​ត្រង់ មាន​ឧត្តម​គតិ ជា​ធនធាន​ដ៏​កម្រ​សម្រាប់​វឌ្ឍនភាព​សង្គម​ខ្មែរ។ លោក​ហៅ​ថា​ការ​បាត់បង់​លោក កែម ឡី ពិត​ជា​រន្ធត់​ចិត្ត​ខ្លាំង​ណាស់។

អ្នក​ប្រើប្រាស់​បណ្ដាញ​សង្គម​ហ្វេសប៊ុក​ឈ្មោះ កែវ មនោ (Keo Muno) ចាត់​ទុក​ថា ការ​បាត់បង់​លោក​បណ្ឌិត កែម ឡី គឺ​ជា​សោកនាដកម្ម​របស់​ប្រជាជន​ខ្មែរ​គ្រប់​រូប។ លោក​ថា លោក កែម ឡី នៅ​តែ​ស្ថិត​ក្នុង​ក្រអៅ​បេះដូង​ប្រជាជន​ខ្មែរ​ទាំង​ក្នុង​ប្រទេស និង​ក្រៅ​ប្រទេស អំពី​វីរភាព​របស់​លោក​ជា​រៀង​រហូត។

ទន្ទឹម​គ្នា​នេះ ម្ចាស់​គណនី​ហ្វេសប៊ុក​ឈ្មោះ Angkor Khmer លើក​ឡើង​ដែរ​ថា លោក​បណ្ឌិត កែម ឡី គឺ​ជា​មនុស្ស​ដែល​មាន​ការ​ត្រិះរិះ​ពិចារណា​យ៉ាង​ល្អិតល្អន់ ចេះ​គិត​ចេះ​វិភាគ​រក​ហេតុផល​បាន​ស៊ី​ជម្រៅ​ជូន​ដល់​ប្រជាពលរដ្ឋ​ខ្មែរ និង​សង្គម។

អ្នក​ប្រើប្រាស់​ហ្វេសប៊ុក​ឈ្មោះ ថាវ រី ចូលចិត្តខ្មែរ បាន​ចោទ​ជា​សំណួរ​ថា ហេតុ​អ្វី​ពាក្យ​ពិត​មិន​អាច​និយាយ​បាន​នៅ​ក្នុង​សង្គម​បច្ចុប្បន្ន​នេះ? ហេតុ​អ្វី​គ្រាន់​តែ​លោក កែម ឡី គាត់​និយាយ​តែ​ពាក្យ​ពិត ទើប​ត្រូវ​គេ​បាញ់​សម្លាប់​ដោយ​គ្មាន​មេត្តា? ហើយ​សម្លាប់​តែ​អ្នក​ចេះ ទុក​តែ​អ្នក​ល្ងង់​នេះ ហើយ​សង្គម​ផ្ដាច់ការ ប្រជាធិបតេយ្យ​ក្លែងក្លាយ អ្នក​ដែល​ធ្វើ​អំពើ​អាក្រក់​កុំ​ភ្លេច​ថា​លើ​លោក​នេះ​កម្មពៀរ​ពិត​ជា​មាន​មែន។

មិន​តែ​ប៉ុណ្ណោះ អ្នក​ប្រើប្រាស់​បណ្ដាញ​សង្គម​ហ្វេសប៊ុក​ឈ្មោះ Phon Phoung និយាយ​ដែរ​ថា តើ​ឲ្យ​ប្រជាពលរដ្ឋ​ខ្មែរ​រំពឹង​ស្អី​ទៀត បើ​អ្នក​ចេះ​ដឹង​ស្នេហា​ជាតិ​គិត​តែ​បាញ់​សម្លាប់​ចោល​បែប​ហ្នឹង។

ករណី​នេះ​ដែរ ម្ចាស់​គណនី​ហ្វេសប៊ុក ច័ន្ទ សុធាវុធ (Sotheavuth Chan) សំណូមពរ​ឲ្យ​អ្នក​នយោបាយ​គ្រប់​និន្នាការ ពិសេស​លោក​នាយក​រដ្ឋមន្ត្រី ហ៊ុន សែន គិតគូរ​ជីវភាព​ក្រុម​គ្រួសារ​លោក កែម ឡី។ ជួយ​ផ្គត់ផ្គង់​ការ​សិក្សា​របស់​កូន​លោក ឬ​អាច​ជំរុញ​ឲ្យ​ក្រុម​គ្រួសារ​លោក​ទទួល​បាន​សិទ្ធិ​ជ្រក​កោន​ផ្នែក​នយោបាយ​នៅ​បរទេស។

អ្នក​ប្រើប្រាស់​បណ្ដាញ​សង្គម​ហ្វេសប៊ុក​ម្នាក់​ទៀត​ឈ្មោះ Huy Sovan Panha ចាត់​ទុក​រឿង​នេះ​ជា​រឿង​នយោបាយ និង​ជា​រឿង​ឃាតកម្ម​គិត​ទុក​មុន ព្រោះ​ការ​បាញ់​សម្លាប់​លោក កែម ឡី កើត​ឡើង​ស្រប​ពេល​ស្ថានការណ៍​នយោបាយ​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ កំពុង​តានតឹង មុន​នឹង​ការ​បោះឆ្នោត​ឃុំ-សង្កាត់ និង​បោះឆ្នោត​ជាតិ​មក​ដល់​នៅ​ឆ្នាំ​២០១៧ និង​ឆ្នាំ​២០១៨ ខាង​មុខ។

រឿង​ឃាតកម្ម​ការ​បាញ់​សម្លាប់​ទៅ​លើ​លោក​បណ្ឌិត កែម ឡី កាល​ពី​ថ្ងៃ​អាទិត្យ នោះ អ្នក​ប្រើប្រាស់​បណ្ដាញ​សង្គម​ម្នាក់​ទៀត​ឈ្មោះ Channy Cambo Kh ដាក់​ការ​សង្ស័យ​ថា ករណី​ឃាតកម្ម​ទៅ​លើ​លោក កែម ឡី ក៏​អាច​ទាក់ទង​នឹង​របាយការណ៍​របស់​ក្រុមហ៊ុន Global Witness ដែល​លោក​បណ្ឌិត កែម ឡី តាមដាន​ស៊ើប​អង្កេត​ដោយ​យក​ចិត្ត​ទុក​ដាក់​ទៅ​លើ​សំណុំ​រឿង​របស់​ក្រុមហ៊ុន​ស៊ើប​អង្កេត​រឿង​ត្រកូល ហ៊ុន មាន​ការ​ពុក​រលួយ​ជា​លក្ខណៈ​ប្រព័ន្ធ​នៅ​ក្នុង​ជួរ​រដ្ឋាភិបាល អំពី​រឿង​លុយ​រាប់​សិប​លាន​ដុល្លារ។

ចំណែក​គណនី​ហ្វេសប៊ុក​ឈ្មោះ Kim Da ឯណោះ​វិញ​យល់​ថា អំពើ​ឃាតកម្ម​នេះ​ជា​ការ​គ្រោង​ទុក​ជា​មុន មិន​មែន​ជា​រឿង​ជំពាក់​ប្រាក់​នោះ​ឡើយ ពិសេស​គឺ​ដោយសារ​ការ​និយាយ​ចំៗ​របស់​លោក កែម ឡី កាល​ពី​ពេល​កន្លង​មក។ ម្ចាស់​គណនី​ហ្វេសប៊ុក​រូប​នេះ​យល់​ថា ពន្លឺ​យុត្តិធម៌​ពិត​ប្រាកដ គឺ​សង្ឃឹម​តិចតួច​ណាស់​សម្រាប់​អ្នក​វិភាគ និង​អ្នក​សិក្សា​សង្គម​រូប​នេះ ប្រសិន​បើ​ពឹង​ផ្អែក​លើ​ការ​ផ្តល់​ជូន​ពី​រាជ​រដ្ឋាភិបាល​កម្ពុជា នោះ។ ម្ចាស់​គណនី​ហ្វេសប៊ុក​រូប​នេះ ចង់​ឲ្យ​ស្ថាប័ន​អន្តរជាតិ​ស៊ើប​អង្កេត​បាន​ល្អិតល្អន់​រក​មុខ​ជន​ដៃ​ដល់​នៅ​ពី​ក្រោយ​ខ្នង​ឲ្យ​ឃើញ ដើម្បី​ធានា​បាន​យុត្តិធម៌​ពិត​ប្រាកដ​ជូន​ក្រុម​គ្រួសារ​សព។

ទន្ទឹម​គ្នា​នេះ​ដែរ ម្ចាស់​គណនី​ហ្វេសប៊ុក​ឈ្មោះ Sokam Ousakphea បាន​អំពាវនាវ​ឲ្យ​ស្ថាប័ន​អន្តរជាតិ​ចូលរួម​ស៊ើប​អង្កេត ព្រោះ​អ្នក​ប្រើប្រាស់​ហ្វេសប៊ុក​ម្នាក់​នេះ​យល់​ថា តុលាការ​ស្រុក​ខ្មែរ​ធ្វើ​ការ​យឺតយ៉ាវ ដូចជា​ករណី​បាញ់​សម្លាប់​លោកស្រី ពិសិដ្ឋ ពីលិកា លោក ឈុត វុទ្ធី និង​លោក ជា វិជ្ជា ជាដើម ហើយ​លោក​ក៏​គ្មាន​ជំនឿ​លើ​តុលាការ​ស្រុក​ខ្មែរ​ថា​អាច​រក​មុខ​ឃាតក​ឃើញ​ឡើយ។

ភ្លាមៗ​បន្ទាប់​ពី​ខ្មាន់​កាំភ្លើង​បាញ់​សម្លាប់​បណ្ឌិត កែម ឡី ដែល​ជា​អ្នក​វិភាគ​សង្គម​តែង​រិះគន់​ភាព​អសកម្ម និង​អវិជ្ជមាន​របស់​រដ្ឋាភិបាល​កម្ពុជា នោះ អ្នក​ប្រើប្រាស់​បណ្ដាញ​សង្គម​ហ្វេសប៊ុក​ជាច្រើន ក្រៅ​ពី​បាន​សរសេរ​រៀបរាប់​ពី​គុណ​សម្បត្តិ​របស់​លោក​នៅ​ក្នុង​គណនី​ហ្វេសប៊ុក​របស់​ខ្លួន​ហើយ ពួក​គេ​ក៏​បាន​ផ្លាស់ប្ដូរ Profile របស់​ខ្លួន ជំនួស​ដោយ​រូប​លោក កែម ឡី ដើម្បី​កាន់​ទុក្ខ​ចំពោះ​លោក កែម ឡី។ មិន​តែ​ប៉ុណ្ណោះ មាន​អ្នក​ប្រើប្រាស់​ហ្វេសប៊ុក​ជាច្រើន​ទៀត ក៏​បាន​និពន្ធ​កំណាព្យ និង​ចម្រៀង​រៀបរាប់​ពី​ស្នាដៃ​របស់​លោក កែម ឡី ទុក​សម្រាប់​ក្មេង​ជំនាន់​ក្រោយ​ថែម​ទៀត។

ក្រៅ​ពី​អ្នក​ប្រើប្រាស់​បណ្ដាញ​សង្គម​ហ្វេសប៊ុក​ជាច្រើន​បង្ហាញ​ការ​សោកស្ដាយ​នោះ គេ​ក៏​សង្កេត​ឃើញ​បណ្ដា​អង្គការ​សង្គម​ស៊ីវិល គណបក្ស​ប្រឆាំង និង​ស្ថានទូត​បរទេស ព្រម​ទាំង​លោក​នាយក​រដ្ឋមន្ត្រី ហ៊ុន សែន ក៏​បាន​សម្ដែង​ការ​សោកស្ដាយ និង​ថ្កោលទោស​ចំពោះ​ករណី​ឃាតកម្ម​លើ​លោក កែម ឡី នេះ​ដែរ។

អ្នក​ប្រើប្រាស់​បណ្ដាញ​សង្គម​ហ្វេសប៊ុក (Facebook) នៅ​តែ​ទទូច​ឲ្យ​ស្ថាប័ន​ឯករាជ្យ ទាំង​ជាតិ និង​អន្តរជាតិ បើក​ការ​ស៊ើប​អង្កេត​ដោយ​ឯករាជ្យ និង​តម្លាភាព​លើ​អំពើ​ឃាតកម្ម​ដើម្បី​ផ្តល់​ភាព​យុត្តិធម៌​ដល់​លោក កែម ឡី។ ក្រៅ​ពី​នេះ អ្នក​ប្រើប្រាស់​បណ្ដាញ​សង្គម​ហ្វេសប៊ុក​មួយ​ចំនួន ក៏​ស្នើ​ឲ្យ​មាន​ការ​សាងសង់​រូប​សំណាក​លោក​នៅ​ទី​សាធារណ: និង​ប្រមូល​ចងក្រង​រាល់​ស្នាដៃ​របស់​លោក កែម ឡី ទុក​ជា​ឯកសារ​សម្រាប់​ជា​ប្រយោជន៍​សង្គម​ជាតិ។

លោក កែម ឡី ត្រូវ​បាន​ឃាតក​បាញ់​ឲ្យ​ស្លាប់​នៅ​ព្រឹក​ថ្ងៃ​អាទិត្យ ទី​១០ ខែ​កក្កដា ក្នុង​ហាង​លក់​ទំនិញ​ស្ដារ​ម៉ាត (Star Mart) ជិត​ស្ថានីយ​ប្រេង​ឥន្ធនៈ​កាល់តិច (Caltex) ក្បែរ​ភ្លើង​ស្តុប​បូកគោ។ ភ្លាមៗ​ក្រោយ​ហេតុការណ៍​បាញ់​សម្លាប់​លោក កែម ឡី សមត្ថកិច្ច​បាន​ចាប់​ជន​សង្ស័យ​មួយ​រូប​ដែល​អះអាង​ថា ខ្លួន​ឈ្មោះ ជួប សម្លាប់។ បណ្ឌិត កែម ឡី ដែល​ទទួលមរណភាព​ក្នុង​វ័យ ៥០​ឆ្នាំ បាន​បន្សល់​ទុក​កូន​ប្រុស ៤​នាក់ និង​ប្រពន្ធ​ដែល​កំពុង​មាន​ផ្ទៃពោះ ៥​ខែ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។