សន្តិសុខក្នុងបុរីម្នាក់ដែលត្រូវចៅសង្កាត់ព្រែកប្រាកូតាពីបក្សកាន់អំណាច វាយឲ្យរបួសក្បាលធ្ងន់ធ្ងរ ស្ថិតនៅក្រោមការព្យាបាលនៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) ទៀត ក្រោយពីក្រុមគ្រូពេទ្យបញ្ចុះបញ្ចូលក្រុមគ្រួសារ និងម្ចាស់បុរី មិនឲ្យយកអ្នកជំងឺទៅព្យាបាលនៅវៀតណាម។
នៅរសៀលថ្ងៃទី២៥ តុលា ក្រុមគ្រួសារបុរសសន្តិសុខឈ្មោះ មាស ដុំដី និងម្ចាស់បុរី ស្នើមន្ទីរពេទ្យ ដើម្បីបញ្ជូនជនរងគ្រោះទៅព្យាបាលនៅប្រទេសវៀតណាម ដោយបារម្ភពីស្ថានភាពជំងឺរបស់ជនរងគ្រោះ។
ប៉ុន្តែក្រោយពេលក្រុមគ្រូពេទ្យរៀបចំដកម៉ាស៊ីនសម្រាប់ជំនួយដង្ហើម ខណៈថាមពលថ្នាំសន្លប់បានថយកម្លាំងផង អ្នកជំងឺក៏បន្តប្រកាច់ ដោយស្ថានភាពនៅធ្ងន់ធ្ងរនៅឡើយ។ ដោយស្ថិតក្នុងស្ថានភាពនេះ ក្រុមគ្រូពេទ្យក៏បញ្ចុះបញ្ចូលក្រុមគ្រួសារ និងម្ចាស់បុរី ឲ្យទុកអ្នកជំងឺនៅព្យាបាល និងតាមដានជំងឺបន្តទៀត ជាជាងបញ្ជូនទៅផ្លូវឆ្ងាយ ទាំងស្ថានភាពធ្ងន់ធ្ងរបែបនេះ។
បុរសសន្តិសុខរូបនេះឈ្មោះ មាស ដុំដី ត្រូវបានចៅសង្កាត់ព្រែកប្រា លោក ហួរ ហួត មកពីគណបក្សប្រជាជនកម្ពុជា វាយមួយដៃចំក្បាលទប់នឹងជញ្ជាំងថ្ម កាលពីយប់ថ្ងៃទី២៤ តុលា ហើយត្រូវបានបញ្ជូនមកព្យាបាលភ្លាមនៅពេទ្យបង្អែកច្បារអំពៅ និងបន្តមកមន្ទីរពេទ្យរុស្ស៊ី។
សូមស្ដាប់ព័ត៌មានពិស្ដារ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។