ជនជាតិ​ចិន​១៦៣​នាក់​ត្រូវ​ឃាត់​ខ្លួន​នៅ​សៀមរាប​ពាក់ព័ន្ធ​ការ​បើក​ល្បែង​តាម​អ៊ីនធឺណិត

ដោយ សន ចាន់រដ្ឋា
2019-03-29
អ៊ីម៉ែល
មតិ
Share
បោះពុម្ព
ជនជាតិ​ចិនដែលសមត្ថកិច្ច​ចុះ​ឃាត់ខ្លួន ដល់​កន្លែង​នៅ​ខេត្ត​សៀមរាប ដែលបើក​ការ​ភ្នាល់​ល្បែងស៊ីសង​តាម​អ៊ីនធឺណិត និង​បើក​ការ​ភ្នាល់​ទីផ្សារ​ភាគហ៊ុន នៅ​ប្រទេស​ចិន កាលពី​ថ្ងៃ​ទី​២៧ មីនា ២០១៩។
ជនជាតិ​ចិនដែលសមត្ថកិច្ច​ចុះ​ឃាត់ខ្លួន ដល់​កន្លែង​នៅ​ខេត្ត​សៀមរាប ដែលបើក​ការ​ភ្នាល់​ល្បែងស៊ីសង​តាម​អ៊ីនធឺណិត និង​បើក​ការ​ភ្នាល់​ទីផ្សារ​ភាគហ៊ុន នៅ​ប្រទេស​ចិន កាលពី​ថ្ងៃ​ទី​២៧ មីនា ២០១៩។
រូប​ពី​គេហទំព័រអគ្គស្នងការនគរបាលជាតិ

សមត្ថកិច្ច​ខេត្ត​សៀមរាប កំពុង​សាកសួរ​ជនជាតិ​ចិន ទាំង​១៦៣​នាក់ ដែល​ឃាត់ខ្លួន កាលពី​ថ្ងៃ​ទី​២៧ មីនា នៅ​ស្នងការ​នគរបាល​ខេត្ត។ សមត្ថកិច្ច​អះអាង​ថា មាន​ភស្តុតាង​បញ្ជាក់​ថា ជនសង្ស័យ ទាំងនោះ បាន​បើក​ការ​ភ្នាល់​ល្បែងស៊ីសង​តាម​អ៊ីនធឺណិត និង​បើក​ការ​ភ្នាល់​ទីផ្សារ​ភាគហ៊ុន នៅ​ប្រទេស​ចិន។ សង្គម​ស៊ីវិល ស្វាគមន៍​ចំណាត់​ការ​របស់​សមត្ថ​កិច្ច​ខេត្ត​សៀមរាប និង​ស្នើ​ឱ្យ​តាមដាន​រក​ខ្សែ​បណ្ដាញ​បន្ត​ទៀត។

ស្នងការ​រង​នគរបាល​ខេត្ត​សៀមរាប ទទួលបន្ទុក​ផែន​អន្តោប្រវេសន៍ លោក ជា គឹមសាន ប្រាប់​អាស៊ីសេរី ថា ដំបូង​ឡើយ តំណាង​អយ្យការ​បាន​ចោទប្រកាន់​ជនជាតិ​ចិន​ទាំងនោះ ពី​បទ​បើក​ការ​ភ្នាល់​ល្បែងស៊ីសង​តាម​អ៊ីនធឺណិត។ ក្រោយ​មក​សមត្ថកិច្ច រក​ឃើញ​ភស្តុតាង​ក្នុង​កុំព្យូទ័រ (Computer) ដែល​ដកហូត​បាន គឺ​ជនជាតិ​ចិន​ទាំងនោះ បើក​ការ​ភ្នាល់​ល្បែង​នេះ មិនមែន​សម្រាប់​នៅ​កម្ពុជា​ទេ គឺ​បើក​ភ្នាល់​តាម​អ៊ីនធឺណិត សម្រាប់​ប្រជាជន​នៅ​ប្រទេស​ចិន និង​មាន​ការ​បើក​ភ្នាល់​ទីផ្សារ​ភាគហ៊ុន​នៅ​ចិន​ថែមទៀត។ សមត្ថកិច្ច​ខេត្ត​សៀមរាប គ្រោង​នឹង​បញ្ចប់​នីតិវិធី​សាកសួរ នៅ​ល្ងាច​ថ្ងៃ​ទី​៣០ មីនា។

ស្នងការ​រង​រូប​នេះ ឱ្យ​ដឹង​ថា ប្រតិបត្តិ​ការ​លើក​នេះ ប៉ូលិស​មិនបាន​ទទួល​ដំណឹង ឬ​ការ​ស្នើសុំ​ពី​រដ្ឋាភិបាល​ចិន​ទេ តែ​ប៉ូលិស​សំងាត់​ខេត្ត​សៀមរាប បាន​តាមដាន ក្រុម​ជនជាតិ​ទាំងនោះ ចំនួន ៣​សប្ដាហ៍ មុន​ពេល​ប្រតិបត្តិ​ការ​បង្ក្រាប«យើង​ពិនិត្យ​ភស្តុតាង​លើ​កុំព្យូទ័រ​បាទ​​ពួក​គាត់​ឆ្លងឆ្លើយ​ទៅ ប្រទេស​ចិន តាម ប្រព័ន្ធ អ៊ីនធឺណេត មាន​ការ​លេង​ភ្នាល់​ភាគ​ហ៊ុន សមត្ថកិច្ច យើង​មាន​តម្រុយ​យើង​តាមដាន​អស់​រយៈ​ពេល​៣​សប្ដាហ៍​បាទ»

សមត្ថកិច្ច​ខេត្ត​សៀមរាប កាលពី​ថ្ងៃ​ទី​២៨ មីនា បាន​បើក​ប្រតិបត្តិការ ចុះ​បង្ក្រាប​បាន​ជនជាតិ បាន​ចំនួន ១៦៣​នាក់ មាន​ស្រី ៤០​នាក់ និង​កុំព្យូទ័រ ប្រមាណ ១៥០ គ្រឿង នៅ​ក្នុង​ទីតាំង​ពីរ​កន្លែង ក្នុង​ភូមិ​វិហារ​ចិន សង្កាត់​ស្វាយដង្គំ ក្រុង​សៀមរាប គឺ​បង្ក្រាប​បាន​ក្នុង​ពេល​ជនសង្ស័យ​ទាំងនោះ កំពុង​ប្រព្រឹត្ត​បទល្មើស។

ស្នងការ​រង​ខេត្ត​សៀមរាប លោក ជា គឹមសាន មិន​ដឹង​ថា ក្រោយ​បញ្ចប់​នីតិវិធី​ស៊ើបសួរ ជនជាតិ​ចិន​ទាំង​១៦៣​នាក់​នោះ នឹង​ត្រូវ​បញ្ជូន​ទៅ​ដាក់ទោស​នៅ​ប្រទេស​ចិន ឬ​កម្ពុជា​ទេ ព្រោះ​ត្រូវ​រង់ចាំ​មើល​ការ​សម្រេច​ពី​ថ្នាក់លើ។

អាស៊ីសេរី មិន​អាច​សុំ​ការ​បញ្ជាក់​ពី​នាំ​ពាក្យ​អគ្គស្នងការ​នគរបាល​ជាតិ លោក ឆាយ គឹមហឿន និង​អគ្គស្នងការ​នគរបាល​ជាតិ លោក នេត សាវឿន បាន​ទេ នៅ​ថ្ងៃ​ទី​២៩ មីនា ដោយសារ​មិន​មាន​អ្នក​លើក​ទូរស័ព្ទ។ ប៉ុន្តែ​កន្លងមក សមត្ថកិច្ច​កម្ពុជា តែងតែ​សហការ​ជាមួយ​រដ្ឋាភិបាល​ចិន បញ្ជូន​ជនជាតិ​ចិន ជា​ទ្រង់ទ្រាយ​ធំ​ទៅ​ប្រទេស​ចិន​ទាំងអស់។

ប្រធាន​មជ្ឈមណ្ឌល​ប្រជាពលរដ្ឋ​សម្រាប់​ការអភិវឌ្ឍន៍ និង​សន្តិភាព លោក យង់ គីមអេង សម្ដែង​ការ​សោកស្ដាយ​ចំពោះ​វត្តមាន​ជនជាតិ​ចិន ដែល​ចូលចិត្ត​យក​ទឹកដី​កម្ពុជា មក​ប្រព្រឹត្តិ​បទល្មើស​។ លោក​ថា ល្បែងភ្នាល់​តាម​អ៊ីនធឺណិត និង​ភ្នាល់​ទីផ្សារ​ភាគហ៊ុន នេះ ខុសច្បាប់ ទាំង​នៅ​កម្ពុជា និង​នៅ​ប្រទេស​ចិន។

លោក យង់ គីមអេង ស្វាគមន៍​ចំណាត់​ការ​បង្ក្រាប​ជន​ជាតិ​ចិន​ទាំងនេះ និង​បន្ត​បង្ក្រាប​ឱ្យ​អស់​បទល្មើស​នេះ​នៅ​កម្ពុជា​។ លោក យង់ គឹមអេង ពន្យល់​ថា នៅ​ពេល​ជនជាតិ​ចិន​ទាំងនោះ​បើក​រកស៊ី ឬ​លេងល្បែង​ខុសច្បាប់ ពួកគេ​អាច​ធ្លាក់ខ្លួន​ជំពាក់​បំណុល​ហើយ ត្រូវ​បង្ខំចិត្ត​ប្រព្រឹត្តិ​បទល្មើស​បន្ថែម​ទៀត ដើម្បី​រកលុយ ដូច​ករណី​ចាប់ជំរិត​ជនជាតិ​ចិន​គ្នាឯង នៅ​ខេត្ត​ព្រះសីហនុ ឬ​ឆក់​ប្លន់ ពលរដ្ឋ​ខ្មែរ ឬ​ជនបរទេស​ផ្សេងទៀត ដែល​កំពុង​ស្នាក់នៅ​កម្ពុជា«ខ្ញុំ​ថា​រឿង​ដែរ​សំខាន់​ខ្ញុំ​គិត​ថា ចិន​គេ​មាន​ច្បាប់​ទម្លាប់​ប្រហែល​ជា​គេ​តឹងរឹង​ដែរ​ទើប​យើង​កំពុង​ពិភាក្សា​គ្នា​គួរ​តែ​បញ្ជូន​ទៅ​វិញ​ឲ្យបាន​លឿន​ព្រោះ​បើ​ទុក​ពួកគាត់​ទាំង​អស់​នៅ​ទីនេះ គឺ​វា​មាន​ការ​លំបាក​ដល់​យើង។ ខាង​យើង​ត្រូវ​ចំណាយ​លុយ​ហូបចុក ថ្លៃ​ធ្វើដំណើរ​យើង​ត្រូវការ​ដឹក​គាត់​ទៅ​តុលាការ​បង់ខាត​ច្រើន​ណាស់​បាទ​អ៊ីចឹង​មាន​តែ​ប្រញាប់​បញ្ជូន​ពួកគាត់​ទៅ​ប្រទេស​គាត់​វិញ»

អាជ្ញាធរ​កម្ពុជា កាល​ពី​ឆ្នាំ​២០១៨ បាន​បណ្ដេញ​ជនជាតិ​ចិន ជាង ៧​រយ (៧០០)​នាក់ ចេញពី​កម្ពុជា ក្នុង​ចំណោម​ជនបរទេស ដែល​ត្រូវ​បណ្ដេញ​ចេញ ជិត ១​ម៉ឺន ៥​ពាន់ (១៤.៩៦៥)​នាក់ នៃ ៩១​សញ្ជាតិ។ ជនជាតិ​ចិន ដែល​បណ្ដេញ​ជា​ទ្រង់ទ្រាយ​ធំ ចុងក្រោយ ចេញពី​កម្ពុជា គឺ​កាល​ពី​ដើម​ខែ​ធ្នូ ឆ្នាំ​២០១៨ មាន​ចំនួន ជាង​ពីរ​រយ សាប​សិប (២៣៥) នាក់ ជាប់ចោទ​ពី​បទ​ឧក្រិដ្ឋកម្ម​ចាប់ជំរិត តាម​ប្រព័ន្ធ​អ៊ីនធឺណិត ពី​ខេត្ត​តាកែវ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

Rfa khmer you should take down this comment box or let hun sen government help you to check the comments first before you post it. Because whatsoever people comment about the articles, you almost never post it. Be brave like rasmeinews, they took it down. Take it down! Also, sometimes, the message said the filling is not correct. What is not correct? Why can you show what wrong?

Mar 30, 2019 11:16 PM

អ្នក​អាន​អនាមិក

Rfa khmer you should take down this comment box or let hun sen government help you to check the comments first before you post it. Because whatsoever people comment about the articles, you almost never post it. Be brave like rasmeinews, they took it down. Take it down!

Mar 30, 2019 11:12 PM

គេហទំព័រ​ទាំងមូល