ប្រជាពលរដ្ឋប្រមាណ ៥០គ្រួសារតំណាងឱ្យពលរដ្ឋជិត ២រយគ្រួសាររស់នៅភូមិឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង នៅថ្ងៃទី៤ ខែកុម្ភៈ បានប្រមូលផ្ដុំគ្នាស្រែតវ៉ានៅតាមតំបន់ច្រាំងបឹងទន្លេសាប ដោយអ្នកខ្លះបានលុតជង្គង់លើកដៃសំពះអង្វរលោកនាយករដ្ឋមន្ត្រី ហ៊ុន ម៉ាណែត ដើម្បីជួយអន្តរាគមន៍ពាក់ព័ន្ធនឹងកម្លាំងអាជ្ញាធរ និងទាហានហាមឃាត់មិនឱ្យពួកគាត់បន្តប្រកបរបររាវលៀស និងខ្យងខ្ចៅលក់ចិញ្ចឹមជីវិត និងដោះស្រាយបញ្ហាបំណុលធនាគារ។
ការតវ៉ារបស់អ្នកភូមិឆ្នុកទ្រូ ក្នុងខេត្តកំពង់ឆ្នាំង ផ្ទុះឡើងបន្ទាប់ពីមន្ត្រីអាជ្ញាធរ និងកងកម្លាំងទាហានប្រដាប់ដោយកាំភ្លើងម៉ាកអាកា (AK) បានចុះរឹបអូសលៀសពីពលរដ្ឋ និងឈ្លួញជាច្រើនការ៉ុង ដោយចោទប្រកាន់ថា ពលរដ្ឋ ដែលប្រកបរបររាវលៀសនោះប្រព្រឹត្តបទល្មើសនេសាទខុសច្បាប់។ អាជ្ញាធរខេត្តកំពង់ឆ្នាំង ហាមប្រាមមិនឱ្យពលរដ្ឋបន្តរកស៊ីរាវលៀសតាមដងទន្លេសាបទៀតទេ។
អ្នកស្រុកបរិបូរណ៍ឱ្យដឹងថា ពលរដ្ឋជាច្រើនរស់នៅតំបន់ឆ្នុកទ្រូបានប្រកបរបររាវលៀស ដើម្បីបានប្រាក់ចិញ្ចឹមគ្រួសារច្រើនជំនាន់មកហើយ និងពុំបានប្រព្រឹត្តបទល្មើសនេសាទ ឬបង្កផលប៉ះពាល់ដល់ពូជត្រីពងកូននោះទេ ហើយថា អាជ្ញាធរមិនគួរចុះមកព្រមាន និងហាមឃាត់មិនឱ្យពលរដ្ឋបន្តរកស៊ីរាវលៀសបែបនេះឡើយ។
តំណាងពលរដ្ឋរស់នៅភូមិឆ្នុកទ្រូ ស្រុកបរិបូរណ៍ថ្លែង សុំមិនបញ្ចេញឈ្មោះដោយបារម្ភពីបញ្ហាសុវត្ថិភាពប្រាប់វិទ្យុអាស៊ីសេរីថា កម្លាំងអាជ្ញាធរ និងទាហាននៅព្រឹកថ្ងៃទី៤ ខែកុម្ភៈ បានចាប់យកលៀសពលរដ្ឋ និងឈ្មួញអ្នកទិញជាច្រើនការ៉ុង ដោយបញ្ជាក់ហេតុផលថា គឺជាការបង្ក្រាបបទល្មើសនេសាទ និងព្រមានមិនឱ្យពលរដ្ឋរាវលៀសតាមផ្ទៃទន្លេសាបទៀតឡើយ។ តំណាងពលរដ្ឋរូបនេះចាត់ទុកការបង្ក្រាបរបស់អាជ្ញាធរថា ជាការបំបិទឆ្នាំងបាយពលរដ្ឋ ដោយសារតែអ្នកភូមិស្ទើរតែទាំងអស់រស់នៅភូមិឆ្នុកទ្រូចាត់ទុករបររកលៀស និងខ្យងខ្ចៅនេះជាអាយុជីវិត។
ពលរដ្ឋលាក់ឈ្មោះ៖«ចង់សុំទាមទារឱ្យប្រជាជនរករបរហ្នឹងតទៀត សុំរកតែកាណូតមួយក៏បានដែរលក្ខណៈគ្រួសារឱ្យតែថា ឱ្យបានប្រជាជនបានរកតែនេះគាត់ដាក់វិធានការមកក្ដៅថា អត់ឱ្យរកសោះឱ្យបិទ ហើយប្រជាជនបិទអត់បានអត់បានរកអត់មានលុយបង់អង្គការ អត់មានលុយចិញ្ចឹមកូនទេ អស់ពីខ្លួនហើយបើបិទរបរហ្នឹងនោះ។ អ៊ីចឹង បានប្រជាជនចេះតែស្រែកតវ៉ា លួចថតធ្វើម៉េចឱ្យដល់ថ្នាក់ដឹកនាំជួយមើលឱ្យបានឃើញដល់ថ្នាក់ដឹកនាំជួយផ្សាយបានដឹងដល់អ្នកធ្វើការនៅលើៗ ឱ្យគេជួយដោះស្រាយ ដើម្បីឱ្យយើងបានរកតទៅទៀត។ បើបិទរបរហ្នឹងពួកខ្ញុំដឹងតែស្លាប់ហើយ»។
តំណាងពលរដ្ឋរូបនេះព្រមានថា ពលរដ្ឋនឹងនាំគ្នាឡើងតវ៉ាទ្រង់ទ្រាយធំនៅរាជធានីភ្នំពេញ ដើម្បីស្នើសុំឱ្យលោក ហ៊ុន សែន និងលោក ហ៊ុន ម៉ាណែត ជួយអន្តរាគមន៍ប្រសិនបើអាជ្ញាធរ និងក្រុមទាហានចុះមកហាមឃាត់ពលរដ្ឋមិនឱ្យប្រកបរបររាវលៀស និងខ្យងខ្ចៅតាមដងទន្លេសាប។
ចំណែកពលរដ្ឋសុំលាក់ឈ្មោះម្នាក់ទៀតថ្លែងថា លោកស្រីមិនចង់នាំកូនចៅចំណាកស្រុកខុសច្បាប់ធ្វើការនៅក្រៅប្រទេសនោះទេ។ លោកស្រីបញ្ជាក់ថា មុខរបរនេះបានជួយឱ្យគ្រួសារ និងពលរដ្ឋក្នុងភូមិឆ្នុកទ្រូអាចទាញបានប្រាក់ចំណូល ដើម្បីដោះស្រាយបញ្ហាជីវភាពគ្រួសារ ហើយប្រសិនបើអាជ្ញាធរខេត្តកំពង់ឆ្នាំងមិនអនុញ្ញាតឱ្យបន្តរកលៀស និងខ្យងខ្ចៅនោះ ពលរដ្ឋក៏គ្មានរបរអ្វីដែរ ព្រោះពលរដ្ឋភាគច្រើនគ្មានដីស្រែចម្ការដាំដុះដំណាំកសិកម្ម។
ពលរដ្ឋលាក់ឈ្មោះ៖«ខ្ញុំបំផ្លាស់ទីគេដេញពីក្រោម[រស់នៅលើទឹកទន្លេ]ឡើងលើ ដីស្រែក៏អត់មាន ចម្ការក៏អត់មាន ខ្ញុំបានអី? ខ្ញុំបានតែទៅលើនេសាទរាវលៀស។ បើរាវអត់កើត ខ្ញុំមិនដឹងធ្វើអីទេ មានតែរឿងចំណាកស្រុកទៅរកស៊ីស្រុកគេមិនដឹងទេ បើខ្ញុំជំពាក់លុយរដ្ឋបែបនេះ។ អ៊ីចឹង ខ្ញុំសុំឱ្យថ្នាក់ដឹកនាំសម្ដេច ហ៊ុន សែន សម្ដេចហ៊ុន ម៉ាណែត ឱ្យជួយដោះស្រាយខ្ញុំជាប្រជាពលរដ្ឋក្នុងភូមិឆ្នុកទ្រូផង ព្រោះខ្ញុំដាច់បាយហើយ មិនឱ្យខ្ញុំរាវលៀសកេរ្តិ៍តំណពីដូនតាខ្ញុំ។ បើផ្ដាច់មុខរបររាវលៀសហ្នឹង ខ្ញុំបានអីរកទៀត ហើយកូនរៀន ក៏អត់មានលុយដែរ មានតែឱ្យកូនបញ្ឈប់ការសិក្សា»។
កាលពីយប់ថ្ងៃទី៣ ខែកុម្ភៈ កងកម្លាំងសមត្ថកិច្ចចម្រុះខេត្តកំពង់ឆ្នាំង និងកម្លាំងទាហាននៃបញ្ជាការដ្ឋានទ័ពពិសេស៩១១ បានរឹបអូសលៀសពីឈ្មួញដែលទិញពីពលរដ្ឋក្នុងភូមិឆ្នុកទ្រូជាច្រើនតោន។ រហូតដល់ព្រឹកថ្ងៃទី៤ ខែកុម្ភៈ កម្លាំងបញ្ជាការដ្ឋានទ័ពពិសេស៩១១ និងសមត្ថកិច្ចមូលដ្ឋានបន្តចុះឃាត់ទូកប្រជាពលរដ្ឋជាច្រើនគ្រួសារបន្ថែមទៀត រួមទាំងរឹបអូសលៀសពីពលរដ្ឋជាច្រើនការ៉ុង និងបញ្ជាក់ហេតុផលប្រាប់ពលរដ្ឋថា នេះគឺជាការបង្ក្រាបបទល្មើសនេសាទ ដើម្បីការពារធនធានធម្មជាតិ។
វិទ្យុអាស៊ីសេរីមិនអាចទាក់ទងអធិការរងនគរបាលស្រុកបរិបូរណ៍លោក ឈិន សុភក្តិ និងលោក ឈឹម ឆេងឡាយ ដើម្បីសាកសួរបន្ថែមជុំវិញរឿងនេះបានទេ នៅថ្ងៃទី៤ ខែកុម្ភៈ។ ចំណែកអ្នកនាំពាក្យក្រសួងកសិកម្ម កញ្ញា អឹម រចនា ក៏វិទ្យុអាស៊ីសេរីមិនអាចទាក់ទងបានដែរ នៅថ្ងៃដដែលនេះ។
តំណាងពលរដ្ឋឱ្យដឹងទៀតថា ហេតុផលសំខាន់មួយទៀតដែលកម្លាំងទាហាន និងសមត្ថកិច្ចចុះហាមប្រាមពលរដ្ឋមិនឱ្យបន្តរាវលៀសនេះ អាជ្ញាធរបានអះអាងថា គឺដើម្បីបញ្ចៀសផលប៉ះពាល់ដល់ត្រីពងកូន។ ទោះជាយ៉ាងណាក្ដី ក្រុមពលរដ្ឋដែលប្រកបរបរនេះបញ្ជាក់ថា ពួកគាត់តែងតែស្ដាប់ការណែនាំរបស់អាជ្ញាធរមូលដ្ឋាន ហើយកន្លងមកពលរដ្ឋក៏មិនដែលហ៊ានល្មើសទៅរាវលៀសនៅរដូវត្រីពងកូនដែរ។ ក្រៅពីនេះ តំណាងពលរដ្ឋបញ្ជាក់ថា ពលរដ្ឋក៏បានប្ដូរកាណូតខ្នាតតូចៗ និងអួនសាច់ក្រឡាធំ តាមការណែនាំរបស់អាជ្ញាធរ ដើម្បីរាវលៀសខ្យងខ្ចៅតាមបឹងទន្លេសាប ដើម្បីបញ្ចៀសផលប៉ះពាល់ដល់ធនធានធម្មជាតិដែរ តែអាជ្ញាធរនៅតែមិនអនុញ្ញាតឱ្យអ្នកភូមិបន្តរកស៊ីលើរបរមួយនេះ។
ជុំវិញរឿងនេះ អ្នកតាមដាន និងឃ្លាំមើលវិស័យកសិកម្ម លោក សៀក ចំណាប់ លើកឡើងថា ប្រសិនបើរបររាវលៀសរបស់ពលរដ្ឋអាចប៉ះពាល់ដល់ធនធានធម្មជាតិ អាជ្ញាធរជំនាញគួរចុះណែនាំប្រាប់ពលរដ្ឋ ដើម្បីស្វែងរកដំណោះស្រាយកាត់បន្ថយបញ្ហាប្រឈម ដោយពុំគួរមានកម្លាំងទៅគំរាមកំហែង និងហាមមិនឱ្យពលរដ្ឋរកចំណូលលើរបររាវលៀសនោះទេ។
លោក សៀក ចំណាប់៖«ប្រជាពលរដ្ឋអាស្រ័យផលរកលៀសនេះខ្ញុំគិតថា មិនមែនជាទង្វើអីធ្ងន់ធ្ងរទេ។ អ៊ីចឹង អាជ្ញាធរគួរពិនិត្យឡើងវិញថា តើគួរទុកលទ្ធភាពរបៀបម៉េច ដើម្បីឱ្យប្រជាពលរដ្ឋគាត់អាចប្រកបរបរចិញ្ចឹមជីវិតបាន ព្រោះដូចដឹងហើយថា បច្ចុប្បន្ននេះសេដ្ឋកិច្ចមិនមានភាពល្អប្រសើរទេ។ អ៊ីចឹង ប្រជាពលរដ្ឋគ្រាន់តែចង់ធ្វើម៉េចឱ្យមានមុខរបរ ដើម្បីចិញ្ចឹមជីវិត។ ខ្ញុំមើលទៅដូចជាមិនធ្ងន់ធ្ងរអីទេ ប្រសិនជាការរាវលៀសមែន។ ប៉ុន្តែក្រែងថា មានជាប់ពាក់ព័ន្ធបទល្មើសនេសាទអីផ្សេងៗ ខ្ញុំក៏មិនដឹងដែរ ប៉ុន្តែ បើពិតជាត្រឹមរាវលៀស ដើម្បីធ្វើជារបរចិញ្ចឹមជីវិត ខ្ញុំគិតថា ដូចជាមិនមានអីខុសច្បាប់ទេ»។
អ្នកភូមិឆ្នុកទ្រូឱ្យដឹងទៀតថា ការហាមប្រាមរបស់អាជ្ញាធរឱ្យពលរដ្ឋបញ្ឈប់មុខរបររាវលៀស និងខ្យងខ្ចៅនេះមិនត្រឹមតែប៉ះពាល់ដល់ចំណូល និងជីវភាពអ្នកប្រកបរបររាវលៀសប៉ុណ្ណោះទេ ថែមទាំងប៉ះពាល់ដល់ចំណូលពលរដ្ឋក្នុងភូមិរាប់រយនាក់ទៀត ដែលជាកម្មករស៊ីឈ្នួលតាមទូករើសលៀសលក់ឱ្យឈ្មួញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។