ពលរដ្ឋ​ចាញ់​បោក​ឧកញ៉ា ជា សារ៉ន និង​ឧកញ៉ា ហ៊ី គឹមហុង លក់​ទ្រព្យសម្បត្តិ​សងបំណុល​ធនាគារ

0:00 / 0:00

ប្រជាពលរដ្ឋ​ដែល​បាន​ដាក់​លុយ​វិនិយោគ​ជាមួយ​ក្រុមហ៊ុន​អចលនទ្រព្យ​របស់​ឧកញ៉ា ជា សារ៉ន និង ឧកញ៉ា ហ៊ី គឹមហុង កំពុង​បារម្ភ​ម្ចាស់​បំណុល​រឹបអូស​ផ្ទះ ក្រោយ​សមត្ថកិច្ច​ចាប់​ខ្លួន​ឧកញ៉ា ទាំង​២​រូប​នេះ​។ ជុំវិញ​ករណី​នេះ​មន្ត្រី​សមាគម​មីក្រូហិរញ្ញវត្ថុ អំពាវនាវ​កុំ​ឱ្យ​ពលរដ្ឋ​ព្រួយបារម្ភ ដោយ​បញ្ជាក់​ថា ស្ថាប័ន​ផ្តល់​កម្ចី​នៅតែ​មាន​គោលការណ៍​សម្របសម្រួល​ជាមួយ​អតិថិជន​ដែល​មិន​មាន​លទ្ធភាព​សងបំណុល។

ប្រជាពលរដ្ឋ​ដែល​បាន​ដាក់​លុយ​វិនិយោគ​ជាមួយ​ក្រុម​ឧកញ៉ា​ធ្វើ​អាជីវកម្ម​លើ​វិស័យ​អចលនទ្រព្យ​ឱ្យ​ដឹង​ថា ពួកគាត់​កំពុង​រស់នៅ​ក្នុង​ស្ថានភាព​ភិតភ័យ ដោយ​លក់​ទ្រព្យសម្បត្តិ​អស់​ពី​ខ្លួន​ហើយ នៅ​មិន​គ្រប់​សម្រាប់​បង់​សង​ធនាគារ​ទៀត។

ពលរដ្ឋ​រស់នៅ​ក្នុង​ខេត្ត​កំពង់ឆ្នាំង​លោកស្រី កែវ រី ឱ្យដឹង​ថា លុយ​របស់​គាត់ ដាក់​នៅ​ក្រុមហ៊ុន​ពិភព​ដីមាស របស់​លោក ឧកញ៉ា ហ៊ី គឹមហុង ចំនួន ១​ម៉ឺន ៥​ពាន់​ដុល្លារ។ លោកស្រី កែវ រី វ័យ​៦១​ឆ្នាំ រស់នៅ​ជាមួយ​ប្តី​វ័យ​៦២​ឆ្នាំ ប្រកប​របរ​ធ្វើស្រែ​ចម្ការ​បាន​លុយ​តិចតួច​សម្រាប់​ចិញ្ចឹមជីវិត។

លោកស្រី​បន្ត​ថា លោកស្រី​មិន​មាន​លទ្ធភាព​បង់​សង​ធនាគារ​១​ខែ​ជាង​៣០០​ដុល្លារ​ទេ ទើប លោកស្រី​លក់ ម៉ូតូ និង​ដីស្រែ​ខ្លះ។

លោកស្រី កែវ រី៖ «អត់​អី​បង់​លក់​ម៉ូតូ​អស់​មួយ​។ ខ្ចី​លុយ​បងប្អូន​លក់​ស្រែ​លក់​អី​អ៊ីចឹង​ទៅ។ ពិបាក​អ៊ីចឹង​កូន​ឱ្យ​លក់​ស្រែ​មួយ​បង់​គេ​អ៊ីចឹង​ទៅ»។

ពលរដ្ឋ​ជា​កសិករ​ម្នាក់ទៀត​នៅ​ខេត្តកំពត​លោក អ៊ាវ លី បាន​ដាក់​លុយ​ជាមួយ​ក្រុមហ៊ុន​ពិភព​ដី​មាស ចំនួន ២​ម៉ឺន​ដុល្លារ​។ លោក​ថា ប៉ុន្មាន​ខែ​ចុងក្រោយ​នេះ លោក​លក់​ទ្រព្យសម្បត្តិ​ក្នុងផ្ទះ​ដើម្បី​សង ធនាគារ។

លោក​កំពុង​ពិចារណា​លក់​ដីស្រែ និង​ដីចម្ការ​ដើម្បី​សង​ធនាគារ​បន្ត​ព្រោះ​បារម្ភ​ខ្លាច មាន​ការ រឹបអូស​ផ្ទះ​គ្មាន​កន្លែង​រស់នៅ។

លោក អ៊ាវ លី៖ «បើ​អត់​បង់​គេ​ធនាគារ គេ​ឡើង​ការ​អ៊ីចឹង​អាច មាន​ដីចម្ការ​ទុរេន​និង​ដីស្រែ​ដែរ​ចាំ​មើល​លក់​មួយ​ណា ចាំ​មើល​អា​មួយ​ណា​បញ្ចេញ​ស្រួល​ជាង កំពុង​រៀប​គម្រោង»។

គ្រូបង្រៀន​ម្នាក់​នៅ​ខេត្តកំពត លោក ពេជ្រ ម៉េង បាន​ដាក់​លុយ​ចំនួន​២​ម៉ឺន ៥​ពាន់​ដុល្លារ ជាមួយ ក្រុមហ៊ុន​អចលនទ្រព្យ​របស់​ឧកញ៉ា ជា សារ៉ន។ លោក​ថា ដំបូង​ឡើយ​លោក ស្ទាក់ស្ទើរ​ក្នុង​ការ​វិនិយោគ​នេះ ប៉ុន្តែ​ក្រោយ​ពេល​សាច់ញាតិ​បបួល​ញឹកញាប់ ហើយ​លោក​បាន​ទៅ​មើល គម្រោង​ដល់​ក្រុមហ៊ុន​ក៏​សម្រេចចិត្ត​ដាក់​លុយ​វិនិយោគ។

លោក ពេជ្រ ម៉េង ឱ្យ​ដឹង​ទៀត​ថា លោក​គិត​ច្រើន​ដេក​មិន​លក់​ទេ​រាល់​យប់ ដោយ​មិនមានលទ្ធភាព​រកលុយ​បង់​សង​ធនាគារ​ក្នុង ១​ខែ​ជាង ៥​រយ​ដុល្លារ។

លោក ពេជ្រ ម៉េង៖ «ពិបាក​ណាស់​បង​រាល់ថ្ងៃ​កំពុង​គិត​អត់​ចេញ។ ខ្ញុំ​សួរ​គេ​ថា មិនដឹង​ធ្វើ​ម៉េច​ដែរ​មាន​តែ​ត្រៀម​លុយ​ទុក​បង់​ក្រែង​ដោះស្រាយ​អត់​បាន។ គិត​រឿង​ហ្នឹង​ដេក​មិន​លក់​ស្មុគស្មាញ​ច្រើន។បើ​អ្នកខ្លះ​គាត់​យក​ច្រើន​ជាង​ខ្ញុំ យក​ដល់​ជិត ១០​ម៉ឺន​ដុល្លារ​អី​នោះ​យក​ពី​ធនាគារ។ ឡើង​ធ្ងន់​ក​ហើយ​ធនាគារ​គេ​មក​សួរនាំ​ច្រើន​អ៊ីចឹង​ទៅ»។

អតិថិជន​ដាក់​លុយ​នៅ​ក្រុមហ៊ុន ជា សារ៉ន ម្នាក់ទៀត​លោក ស៊ុន វ៉ាន់ ឱ្យ​ដឹង​ថា លោក​បាន​ដាក់​លុយ​ចំនួន ១​ម៉ឺន ៨​ពាន់​ដុល្លារ​។ លោក​បន្ត​ថា ក្រោយពេល​ក្រុមហ៊ុន​មិន​បង្វិល​លុយ​ឱ្យ លោក​បាន​លក់​មាស​ដែល​ទុក​សម្រាប់​ពង្រីក​អាជីវកម្ម​បាន​ជាង ១​ពាន់​ដុល្លារ​ហើយ​យក​ទៅ​សង​ធនាគារ។

លោក​បន្ត​ថា ពេលនេះ​លោក​អស់ពី​ខ្លួន​ហើយ មិន​មាន​លទ្ធភាព​រក​ចំណូល​សងបំណុល​ក្នុង ១​ខែ​ជាង​៤០០​ដុល្លារ​ទេ ខណៈ​លោក​ត្រូវ​ផ្គត់ផ្គង់​កូន​២​នាក់​កំពុង​រៀន​នៅ​សាលា​ចំណេះដឹង​ទូទៅ​។ ក្រោយ​ពេល​ប្រឹង​អស់​លទ្ធភាព លោក ស៊ុន វ៉ាន់ ថ្លែង​ទាំងអស់​សង្ឃឹមថា បើសិនជា ធនាគារ​រឹបអូស​ផ្ទះ​ក៏​លោក​មិន​ដឹង​ថា ត្រូវ​តវ៉ា​យ៉ាងម៉េច​ដែរ។

លោក ស៊ុន វ៉ាន់៖ «បើ​គេ​អូស​ក៏​មិនដឹង​ធ្វើ​ម៉េច​ដែរ​ឱ្យ​តែ​គេ​រឹបអូស​ទាំងអស់គ្នា។ ដូច​ខ្ញុំ​ប្រសិនបើ​ដំណោះស្រាយ​អត់​មាន​ប្រសិទ្ធភាព​ដឹង​តែ​បំណុល​កើន​ច្រើន​ទៅៗ​ដឹង​តែ​អស់​ដី​អស់​ផ្ទះ​នៅ​ហើយ»។

សមត្ថកិច្ច​ខេត្តកំពត​បាន​ចាប់ខ្លួន​ឧកញ៉ា ជា សារ៉ន ប្រធាន​ក្រុមហ៊ុន​ជា សារ៉ន និង​បក្ខពួក​មួយចំនួន​ទៀត នៅក្នុង​ខែ​មេសា ចំណែក​ឧកញ៉ា ហ៊ី គឹមហុង ប្រធាន​ក្រុមហ៊ុន​ពិភព​ដី​មាស និង​បក្ខពួក​ខ្លះទៀត​ក៏​ត្រូវ​បាន​សមត្ថកិច្ច​រាជ​ធានី​ភ្នំពេញ ចាប់ខ្លួន​នៅ​ក្នុង​ខែ​សីហា។

ក្រុមហ៊ុន​ទាំង​២​មាន​ទម្រង់​អាជីវកម្ម ប្រហាក់ប្រហែល​គ្នា គឺ​ឱ្យ​ប្រជា​ពលរដ្ឋ​ទិញ​ដី ឬ​ដាក់​លុយ​ឱ្យ​ក្រុម​ហ៊ុនខ្ចី ដើម្បី​ទទួល​បាន​ការប្រាក់ ឬ​ប្រាក់​ចំណេញ​ចន្លោះ ពី​៣ ទៅ​៤ ភាគរយ​នៃ​ចំនួន លុយ​ដែល​បាន​ដាក់។ ប៉ុន្តែ​ចាប់ពី​ដើម​ឆ្នាំ​២០២៣​មក​ក្រុមហ៊ុន​ទាំង​២​នេះ មិន​បាន​ប្រគល់​ប្រាក់ ចំណេញ​ឱ្យ​ពលរដ្ឋ​ទៀងទាត់​នោះ​ទេ។

ក្រោយពេល​ចាប់ខ្លួន​ឧកញ៉ា​ទាំង​២​រូប​នេះ​ហើយ ពលរដ្ឋ​រាប់ពាន់​នាក់​ដាក់​ពាក្យ​ប្តឹង ទាមទារ​ឱ្យ​អាជ្ញាធរ​ជួយ​អន្តរាគមន៍​ទារ​លុយ​ពី​ក្រុមហ៊ុន​ប្រគល់​ឱ្យ​ពួកគាត់​វិញ​ដើម្បី​យក​ទៅ​បង់​សង​ធនាគារ​។ តាម​ប្រភព​ពលរដ្ឋ​ដែល​ប្រាប់​វិទ្យុ​អាស៊ីសេរី​ឱ្យ​ដឹង​ថា ពលរដ្ឋ​ដាក់​លុយ​វិនិយោគ​ជាមួយ ក្រុម ហ៊ុន ទាំង​២​នេះ​ម្នាក់ៗ​ចន្លោះ​ពី​១​ម៉ឺន ទៅ​ជិត ១០​ម៉ឺន​ដុល្លារ ជា​លុយ​ខ្ចី​ពី​ធនាគារ។

របាយការណ៍​បឋម​របស់​អាជ្ញាធរ​ខេត្តកំពត​ឱ្យ​ដឹង​ថា ពលរដ្ឋ​ជាង​២​ពាន់​នាក់​ប្តឹង​ក្រុមហ៊ុន ជា សារ៉ន ទាមទារ​ប្រាក់​សរុប​ប្រមាណ ៤០​លាន​ដុល្លារ​។ របាយការណ៍​ដដែល​ឱ្យ​ដឹង​ថា ពលរដ្ឋ​ជាង ១​ពាន់ នាក់​ប្តឹង​ក្រុមហ៊ុន​ពិភព​ដី​មាស​ទាមទារ​ប្រាក់​ជាង ២០​លាន​ដុល្លារ។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​សាលាដំបូង​រាជធានី​ភ្នំពេញ​លោក អ៊ី រិន្ទ ដើម្បី​សាកសួរ ពី​សំណុំរឿង​លោក ហ៊ី គឹមហុង បាន​ទេ នៅ​ថ្ងៃទី​១៧ ខែ​សីហា។

ចំណែក អ្នកនាំពាក្យ​សាលាដំបូង​ខេត្តកំពត លោក ម៉ាន់ រេត ឆ្លើយតប​យ៉ាង​ខ្លី​ថា សំណុំរឿង​លោក ជា សារ៉ន ស្ថិត​នៅ​ក្នុង​ដំណាក់កាល​ស៊ើបអង្កេត ហើយ​លោក​ក៏​មិន​ដឹង​ថា នឹង​ចប់​នៅ​ពេល​ណា​ទេ។

សមត្ថកិច្ច​ចាប់ខ្លួន​ឧកញ៉ា​ទាំង​២​រូប​ពី​បទ​ឆបោក ក្រោយ​ទទួល​បណ្តឹង​ពី​ពលរដ្ឋ។ មាត្រា​៣៧៨​នៃ ក្រមព្រហ្មទណ្ឌ​ចែងថា អំពើ​ឆបោក​ត្រូវ​ផ្ដន្ទាទោស​ដាក់​ពន្ធនាគារ​ពី ៦ (​ប្រាំមួយ​) ខែ ទៅ ៣ (​បី​) ឆ្នាំ និង​ពិន័យ​ជា​ប្រាក់​ពី ១ ០០០ ០០០ (​មួយ​លាន​) រៀល ទៅ ៦ ០០០ ០០០ (​ប្រាំមួយ លាន​) រៀល។

ប្រជាពលរដ្ឋ​ដែល​ដាក់​លុយ​ជាមួយ​ក្រុមហ៊ុន​ទាំង​២​នេះ​បារម្ភ​ថា បើ​ការ​ដោះស្រាយ នៅតែ​អូស បន្លាយ​យូរ​ទៀត ធនាគារ​ចេះតែ​គុណ​ការប្រាក់​បន្ថែម​រហូត​នោះ ពួកគាត់​មុខជា​មិន​មាន​លទ្ធភាព សង​ហើយ​អាច​ធនាគារ​រឹបអូស​ដី​និង​ផ្ទះ​របស់​ពួកគាត់។

នាយក​ទទួលបន្ទុក​កិច្ចការ​ទូទៅ​នៃ​អង្គការ​លីកាដូ (Licadho) លោក អំ សំអាត មាន​ប្រសាសន៍​ថា បច្ចុប្បន្ន ប្រជាពលរដ្ឋ​គ្រប់កន្លែង​កំពុង​ជួប​ការ​លំបាក​ក្នុង​ការ​រក​ចំណូល​សម្រាប់​ចំណាយ​ក្នុង​គ្រួសារ​និង​សង​បំណុល។ លោក​បន្ត​ថា ចំពោះ​ពលរដ្ឋ​ដែល​ដាក់​ទុន​វិនិយោគ​ជាមួយ​ក្រុមហ៊ុន​អចលនទ្រព្យ ហើយ​មាន​បញ្ហា​នោះ​កាន់តែ​រង​សម្ពាធ​ខ្លាំង ដែល​ស្ថាប័ន​ពាក់ព័ន្ធ​ត្រូវ​ពន្លឿន​ជួយ​រក​ដំណោះស្រាយ។

លោក អំ សំអាត៖ «ការ​បង់​រំលស់​ទៅលើ​ដី​និង​ផ្ទះ​ហើយ​មិន​ទទួល​បាន​ដី​និង​ផ្ទះ ធ្វើ​ឱ្យ​ពួកគាត់​ជាប់បំណុល​។ ហើយ​បញ្ហា​សេដ្ឋកិច្ច​របស់​គាត់​លំបាក​ទៀត។ ទាំងអស់​ហ្នឹង​ធ្វើ​គាត់​ផុង និង​បំណុល​និង​មិនអាច​ធ្វើ​ការ​សង​ស្រឡប់​ទៅវិញ​បាន។ ចំណុច​ហ្នឹង​រាជរដ្ឋាភិបាល​និង​មីក្រូហិរញ្ញវត្ថុ​ឬ​ធនាគារ​គួរតែ​ពិនិត្យ​និង​ពិចារណា​សម្រាប់​ពួកគាត់»។

ជុំវិញ​បញ្ហា​នេះ អ្នកនាំពាក្យ​សមាគម​មីក្រូហិរញ្ញវត្ថុ​កម្ពុជា លោក កាំង តុងងឺ មាន​ប្រសាសន៍​ថា ពលរដ្ឋ​ដែល​មិន​មាន​លទ្ធភាព​សងបំណុល​អាច​ជួប​ជាមួយ​ស្ថាប័ន​ដែល​ពួកគាត់​ខ្ចី​នោះ​ដើម្បី​រក​ដំណោះស្រាយ​។ លោក​ក៏បាន​អំពាវនាវ​កុំឱ្យ​ពលរដ្ឋ​មាន​ការ​ព្រួយបារម្ភ ព្រោះ​លោក​ថា មុននឹង​ឈាន​ដល់​ធនាគារ​រឹបអូស​ទ្រព្យ​បញ្ចាំ​វា​ត្រូវ​ឆ្លងកាត់​នីតិវិធី​ជាច្រើន​ទៀត។

លោក កាំង តុងងឺ៖ «នៅ​កម្ពុជា​មិន​មាន​គ្រឹះស្ថាន​មីក្រូហិរញ្ញវត្ថុ ដែល​អាច​រឹបអូស​ទ្រព្យ​បញ្ចាំ ឬ​អចលន​ទ្រ​ព​របស់​អតិថិជន​បាន​ឡើយ។ ការ​រឹបអូស​ទាំងឡាយ​ណា​គឺ​ត្រូវតែ​ឆ្លងកាត់​នីតិវិធី​តុលាការ»។

ទោះជា​យ៉ាងណា នៅក្នុង​ដំណាក់​កាលដែល​តុលាការ​កំពុង​ស្រាវជ្រាវ​បន្ថែម​លើ​សំណុំរឿង លោក ជា សារ៉ន និង លោក ហ៊ី គឹមហុង ពលរដ្ឋ​មួយចំនួន​ដែល​ដាក់​លុយ​វិនិយោគ ជាមួយ​ឧកញ៉ា ទាំង​២​រូប​នេះ អះអាង​ថា ពួកគាត់​នៅតែ​រង​សម្ពាធ​ពី​មន្ត្រី​ធនាគារ​ទារ​លុយ ខណៈ​ពួកគាត់​រក​ចំណូល សម្រាប់​ចិញ្ចឹមជីវិត​ស្ទើរ​មិន​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។