មជ្ឈមណ្ឌលជាតិកម្ចាត់មីនកម្ពុជា (CMAC) មានទិសដៅបោសសំអាតផ្ទៃដីមីន ឲ្យបានជាង១១០គីឡូម៉ែត្រការ៉េ ក្នុងឆ្នាំ២០១៨នេះ។
ថ្លែងនៅក្នុងកិច្ចប្រជុំបូកសរុបលទ្ធផលការងារប្រតិបត្តិការឆមាសទី២ ឆ្នាំ២០១៨ នៅមជ្ឈមណ្ឌលជាតិកម្ចាត់មីនកម្ពុជា កាលពីថ្ងៃទី៣ ខែធ្នូ ប្រធាន CMAC លោក ហេង រតនា ថ្លែងថា ក្នុងអំឡុង ១០ខែ ឆ្នាំ២០១៨នេះ គ្រាប់មីន និងយុទ្ធភណ្ឌមិនទាន់ផ្ទុះជាង ៣ម៉ឺនគ្រាប់ បានបោសសំអាចចេញលើផ្ទៃដីជាង ៧៥គីឡូម៉ែត្រការ៉េ និងបង្កាត់កូនសុនខ ហិតមីនបាន ៦៧ក្បាល ដើម្បីជួយការងារសំអាតមីន។
លោកថា នៅឆ្នាំ ២០១៩ ខាងមុខ CMAC នឹងមានគម្រោងថ្មីៗប្រហែល ៣០ទៀត ក្នុងនោះគម្រោងថ្មីៗចំនួន៥ នឹងអាចចាប់ផ្ដើមបាននៅដើមឆ្នាំក្រោយ ដោយមានថវិកាប្រមាណពី ១៤ ទៅ ១៥ លានដុល្លារអាមេរិក។
លោក ហេង រតនា បន្តថា តាមរយៈជំនួយថ្មីៗក្នុងឆ្នាំ២០១៩ ដែលមានទឹកប្រាក់ប្រមាណពី ១៦ ទៅ ១៨លានដុល្លារ CMAC នឹងអាចបន្ដបោសសំអាត ផ្ទៃដីបានចាប់ពី ១១០ ទៅ ១២០ គីឡូម៉ែត្រការ៉េ។
លោក ហេង រតនា ថ្លែងថា ជប៉ុនជាប្រទេសទី១ ដែលផ្ដល់ជំនួយដល់សកម្មភាពបោសសម្អាតមីននៅកម្ពុជាច្រើនជាងគេ ក្នុងចំណោមប្រទេសមួយចំនួនទៀត រួមទាំងសហរដ្ឋអាមេរិកផង។
បច្ចុប្បន្ន មជ្ឈមណ្ឌលសកម្មភាពកម្ចាត់មីនកម្ពុជា មានមន្ត្រីជំនាញប្រតិបត្តិការដោះមីន ជាង៤៥០នាក់ និងមានគ្រឿងចក្រកម្ទេចមីន ១១គ្រឿង ដែលអាចរំដោះផ្ទៃដីមានមីន បានជាង ២ ពាន់ ៧៥០ ហិកតារ ក្នុងមួយឆ្នាំ។
លោកបន្តថា ចាប់ពីឆ្នាំ ១៩៩២ មក បុគ្គលិក CMAC បានកម្ទេចគ្រាប់មីននិងយុទ្ធភណ្ឌមិនទាន់ផ្ទុះចំនួន ជាង ៣លានគ្រាប់ គឺប្រមាណ៧២% នៃគ្រាប់មីនដែលបន្សល់ទុក និង៥៣% នៃចំនួនផ្ទៃដីសរុប ដែលមានគ្រាប់មីននៅកម្ពុជា។
របាយការណ៍របស់ CMAC បង្ហាញថា ចាប់តាំងពីឆ្នាំ១៩៧៩ រហូតដល់ខែវិច្ឆិកាឆ្នាំ២០១៨ កម្ពុជាមានជនរងគ្រោះដោយសារមីនសរុប ជិត ៦ម៉ឺន ៥ពាន់នាក់ ក្នុងនោះជិត ២ម៉ឺននាក់ បានស្លាប់ ហើយអ្នករបួសដែលធ្លាក់ខ្លួនពិការ មានជាង ៤ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។