កម្ពុជា​ទទួល​ភ្ញៀវ​ទេសចរណ៍​ចិន ១,៧លាន​នាក់​ ក្នុង​រយ:​ពេល ៨ខែ​ដើម​ឆ្នាំ២០១៩ នេះ

ដោយ អូន ភាព
2019-10-09
អ៊ីម៉ែល
មតិ
Share
បោះពុម្ព
អ្នក​ទេសចរ​ជនជាតិ​ចិន នាំ​គ្នា​ទៅ​ទស្សនា​អង្គរវត្ត នៅ​ចំ​ថ្ងៃ​ទី​មួយ​នៃ​ពិធី​បុណ្យ​ចូល​ឆ្នាំ​ប្រពៃណី​ចិន កាល​ពី​ថ្ងៃ​ទី​១៨ ខែ​កុម្ភៈ ឆ្នាំ​២០១៥។
អ្នក​ទេសចរ​ជនជាតិ​ចិន នាំ​គ្នា​ទៅ​ទស្សនា​អង្គរវត្ត នៅ​ចំ​ថ្ងៃ​ទី​មួយ​នៃ​ពិធី​បុណ្យ​ចូល​ឆ្នាំ​ប្រពៃណី​ចិន កាល​ពី​ថ្ងៃ​ទី​១៨ ខែ​កុម្ភៈ ឆ្នាំ​២០១៥។
RFA

ក្រសួង​ទេសចរណ៍​បាន​អះ​អាង​ថា ភ្ញៀវ​ទេសចរ​ចិន ដែល​មក​លេង​ស្រុក​ខ្មែរ​នៅ​ឆ្នាំ​នេះ​មាន​ការ​កើន​ឡើង​ចំនួន ៣៣​ភាគ​រយ បើ​ប្រៀបធៀប​រយ:​ពេល​ដូច​គ្នា​ទៅ​នឹង​ឆ្នាំ​មុន ប៉ុន្តែ​សមាគម​មគ្គទេសក៍​អង្គរ​ខេត្ត​សៀមរាប បាន​អះអាង​ផ្ទុយ​ទៅ​វិញ​ថា ទាំង​ភ្ញៀវ​ទេសចរ​បស្ចិម​ប្រទេស និង​ភ្ញៀវ​ទេសចរចិន បាន​ថយ​ចុះ​ទៅ​វិញ។

របាយការណ៍​របស់​ក្រសួង​ទេសចរណ៍ ចេញ​កាល​ពី​ថ្ងៃ​ទី៨ ខែ​តុលា​ឲ្យ​ដឹង​ថា ប្រទេស​កម្ពុជា​បាន​ទទួល​ភ្ញៀវ​ទេស​ចរ​ចិន​ចំនួន ១,៧លាន​នាក់​ ក្នុង​រយៈ​ពេល ៨ខែ ដើម​ឆ្នាំ២០១៩ នេះ។

របាយការណ៍​បាន​បង្ហាញ​ថា ចំនួន​ភ្ញៀវ​ទេសចរ​ចិន​នៅ​តែ​នាំ​មុខ​គេ នៅ​អាស៊ី​អាគ្នេយ៍​ដែល​មាន​ចំនួន ៣៩ភាគ​រយ​នៃ​ចំនួន​ភ្ញៀវ​ទេសចរ​បរទេស​សរុប ដែល​មក​កាន់​ប្រទេស​កម្ពុជា ចាប់​ពី​ខែ​មករា​ដល់​ខែ​សីហា​ឆ្នាំ​នេះ។

រដ្ឋមន្ត្រី​ក្រសួង​ទេសចរណ៍ លោក ថោងខុន ​បាន​ប្រាប់​សារព័ត៌មាន​ចិន (Xinhua) ថា ប្រទេស​ចិន គឺ​ជា​ទីផ្សារ​ដ៏​ធំ​មួយ​សម្រាប់​ឧស្សាហកម្ម​ទេសចរណ៍​របស់​កម្ពុជា។

លោក ថោង​ ខុន បាន​មាន​ប្រសាសន៍​ថា កាល​ពី​ឆ្នាំ​មុន ប្រទេស​កម្ពុជា​បាន​ទទួល​ភ្ញៀវ​ទេសចរ​បរទេស​ចំនួន ៦,២លាន​នាក់ ក្នុង​នោះ​មាន​ជន​ជាតិ​ចិន ២លាន​នាក់ ដែល​មាន​ប្រាក់​ចំណូល​សរុប ៤,៣៥​ពាន់​លាន​ដុល្លារ​អាមេរិក។

ទោះ​បី​ជា​យ៉ាង​ណា ប្រធាន​សមាគម​មគ្គទេសក៍​អង្គរ ខេត្ត​សៀមរាប លោក ខៀវ ធី លើក​ឡើង​ផ្ទុយ​វិញ​ថា​ ភ្ញៀវ​ទេសចរ ដែល​មក​លេង​នៅ​ខេត្ត​សៀម​រាប​ មាន​ការ​ធ្លាក់​ចុះ​ចាប់តាំង​ពី​ខែ​ឧសភា ​មកដល់​ខែ​កញ្ញា ឆ្នាំ​នេះ ហើយ​ទេសចរ​ជន​ជាតិ​ចិន​ក៏​មាន​ការ​ធ្លាក់​ចុះ​ច្រើន​ដែរ ក្នុង​រយ:​ពេល​ដូច​គ្នា​នេះ។

លោក ខៀវ ធី បន្ត​ថា ភ្ញៀវ​ទេសចរ​ជន​ជាតិ​ចិន​ មិន​បាន​ផ្ដល់​ប្រ​យោជន៍​ច្រើន​ ដល់​ប្រជា​ពលរដ្ឋ​ខ្មែរ​ទេ ​ព្រោះ​ពួក​គេ​មក​ជា​ក្រុម​មាន​ចំនួន​ច្រើន ហើយ​ត្រូវ​ការ​មគ្គទេសក៍ និង​អ្នក​បើក​បរ​មាន​ចំនួន​តិចតួច។

លោក​ថា ភ្ញៀវ​ទេសចរ​ចិន និង​ទេសចរ​មក​ពី​បស្ចិម​ប្រទេស ​មាន​ភាព​ខុស​គ្នា ព្រោះ​ចិន​មក​ជា​ក្រុម​ធំៗ ដែល​មាន​ចំនួន ៤០នាក់​ឡើង​ទៅ ពួក​គាត់​ត្រូវ​ការ​មគ្គទេសក៍ តែ១​នាក់​និង​អ្នក​បើកបរ​រថយន្ត ១នាក់​ប៉ុណ្ណោះ វា​ខុស​ពី​អ្នក​ទេសចរណ៍​មកពី​បស្ចិម​ប្រទេស ព្រោះ​ពួក​គាត់​ច្រើនតែ​មក​ជា​គ្រួសារ ជា​មិត្តភ័ក្ដិ​ពីរបី​នាក់ ដូច្នេះ​បើ​ពួក​គាត់​មក​មាន​ចំនួន​ដូច​ជន​ជាតិ​ចិន​ដែរ ពួក​គាត់​ត្រូវ​ការ​មគ្គទេសក៍ និង​អ្នក​បើកបរ​រថយន្ត​មាន​រហូត​ដល់​ទៅ ២០នាក់​ឯ​ណោះ៖ «ជន​ជាតិ​ចិន​ គាត់​មក​ទៅ​ គាត់​ត្រូវ​ការ​ Guide ១ និង​តៃកុង​ឡាន ១នាក់ ហើយ​ដើរចូល​ទៅ​ញ៉ាំ​អាហារ ​ជន​ជាតិ​ចិន​របស់​គាត់​ ហើយ​ចូល​ទៅ​ Shopping នៅ​ហាង​ជន​ជាតិ​ចិន​របស់​គាត់ ហើយ​បើ​ជន​ជាតិ​មក​ពី​បស្ចិម​ប្រទេស និង​ជន​ជាតិ​មក​ពី​ប្រទេស​ដទៃ​ទៀត តែ​ង​តែ​ដើរ​មើល​ផ្សារ ដើរ​ទិញ​តាម​តូប​មួយៗ ទៅ គាត់​ជិះ​តាក់ស៊ី​ទៅ​ គឺ​វា​មាន​ការ​ខុស​គ្នា​អ៊ីចឹង»

លោក ​ខៀវ ​ធី ​និយាយ​ថា មគ្គទេសក៍​របស់​គាត់​ធ្លាប់​ដើរ​បម្រើ​ភ្ញៀវ​ ជា​ទូទៅ​ពី ១៥ ទៅ ១៨ថ្ងៃ​ ក្នុង​ ១ខែ កាល​ពី​ឆ្នាំ​មុន។ ប៉ុន្តែ​ឆ្នាំ​នេះ ដើរ​បាន​តែ​ពី ៥ ទៅ ៧ថ្ងៃ​យ៉ាង​ច្រើន​ ក្នុង ១ខែ។

បើ​តាម​របាយការណ៍ របស់​ក្រសួង​ទេសចរណ៍ បាន​ឲ្យដឹង​ថា ភ្ញៀវ​ទេសចរ​អន្តរជាតិ​សរុប​ចំនួន ៤,៣៦​លាន​នាក់ បាន​ធ្វើ​ដំណើរ​មក​ប្រទេស​កម្ពុជា ក្នុង​អំឡុង​ពេល ៨ខែ​ដើម​ឆ្នាំ​នេះ គឺ​កើន​ឡើង ១០,៤​ភាគ​រយ​ បើ​ប្រៀបធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល