រដ្ឋមន្ត្រីក្រសួងអប់រំយុវជន និងកីឡាអំពាវនាវដល់សិស្សកម្រិតមធ្យមសិក្សា ដែលចូលរួមប្រឡងសញ្ញាបត្រទុតិយភូមិ ដែលចាប់ផ្ដើមនៅថ្ងៃទី៥ ខែធ្នូនេះឱ្យត្រៀមខ្លួនសម្រាប់ការប្រឡង ក្នុងនោះរាប់តាំងពីការថែទាំសុខភាព ការរម្លឹកមេរៀន និងការគោរពតាមគោលការណ៍វិន័យរបស់ក្រសួងអប់រំ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានថ្លែងក្នុងវីដេអូខ្លីផ្សព្វផ្សាយកាលពីថ្ងៃទី៤ ខែធ្នូថា ការត្រៀមខ្លួនជាផ្នែកសំខាន់ក្នុងការប្រឡង ហើយលោកសង្ឃឹមថា បេក្ខជនជោគជ័យក្នុងការប្រឡងនេះ។
លោក ហង់ជួន ណារ៉ុន៖ «ខ្ញុំសូមអំពាវនាវសូមឱ្យបេក្ខជនទាំងអស់គោរពយ៉ាងម៉ឺងម៉ាត់នូវបទប្បញ្ញត្តិ និងកម្រិតវិន័យ ដែលបានដាក់ចេញដោយក្រសួងយុវជន និងកីឡា សម្រាប់ការប្រឡងសញ្ញាបត្រមធ្យមសិក្សាទុតិយភូមិនេះ។ ខ្ញុំសូមឱ្យក្មួយៗទទួលទានអាហារ ទឹក និងសម្រាកឱ្យបានគ្រប់គ្រាន់ ពិសេសទទួលទានដំណេកឱ្យបានគ្រប់គ្រាន់ ដើម្បីមានសុខភាពល្អសម្រាប់ចូលរួមការប្រឡង។ សូមឱ្យក្មួយៗ ចេះកាត់បន្ថយភាពតានតឹង ហើយត្រៀមលក្ខណៈឱ្យបានត្រឹមត្រូវឱ្យបានគ្រប់គ្រាន់ជាពិសេសឱ្យមើលរម្លឹកមេរៀនឡើងវិញ»។
គោលការណ៍ចម្បង៤សម្រាប់ការប្រឡងបាក់ឌុបរយៈពេល២ថ្ងៃ នៅថ្ងៃទី៥ និងថ្ងៃទី៦ ខែធ្នូនេះគឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
សេចក្ដីប្រកាសព័ត៌មានរបស់ក្រសួងអប់រំ កាលពីថ្ងៃទី២១ ខែកញ្ញា ឱ្យដឹងថា មានបេក្ខជនសរុបចំនួនជាង ១សែន ២ម៉ឺន៨ពាន់នាក់ (១២៨.១៣៤ នាក់) បានចុះឈ្មោះប្រឡង ក្នុងនោះមានស្រីចំនួនជិត ៧ម៉ឺននាក់ (៦៨.៧៧១នាក់)។
ជាមួយគ្នានេះក្រសួងបានកំណត់យកថ្ងៃទី២៧ ខែធ្នូ ពេលរសៀល សម្រាប់ប្រកាសលទ្ធផលប្រឡងនៅរាជធានីភ្នំពេញ និងខេត្តកណ្ដាល និងថ្ងៃទី២៨ ខែធ្នូ សម្រាប់ខេត្តផ្សេងៗនៅទូទាំងប្រទេស។
ក្រសួងបញ្ជាក់ទៀតថា ក្នុងករណីរកឃើញថា បេក្ខជនបានប្រព្រឹត្តផ្ទុយពីគោលការណ៍វិន័យពេលប្រឡង ពិសេសការលាក់ទុកជាប់ខ្លួននូវឧបករណ៍អេឡិចត្រូនិចគ្រប់ប្រភេទចូលក្នុងមណ្ឌល ឬបន្ទប់ប្រឡងជាដើម បេក្ខជននឹងត្រូវកំណត់ឱ្យធ្លាក់ជាស្វ័យប្រវត្តិ។
ប្រភពដដែលបញ្ជាក់ទៀតថា ក្រសួងអប់រំសហការស្អិតល្មួតជាមួយក្រសួងពាក់ព័ន្ធរួមមានក្រសួងមហាផ្ទៃ ក្រសួងសុខាភិបាល កងរាជអាវុធហត្ថលើផ្ទៃប្រទេស អង្គភាពប្រឆាំងអំពើពុករលួយ សហព័ន្ធសហភាពយុវជនកម្ពុជា និងអគ្គិសនីកម្ពុជា។
កាលពីឆ្នាំ២០២១កន្លងទៅមានបេក្ខជនប្រឡងជាប់បាក់ឌុបប្រមាណជាង ៧ម៉ឺននាក់ (៧២.០១៦នាក់) ក្នុងចំណោមបេក្ខជនប្រឡងសរុប ជាង ១សែននាក់ (១១៤.១៨៧នាក់)។ ក្នុងនោះមានអ្នកជាប់និទ្ទេសអេ (A) ចំនួនជាង ១ពាន់ ៧រយនាក់(១.៧៥៣នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។