អ្នកប្រើប្រាស់បណ្ដាញសង្គមហ្វេសប៊ុក (Facebook) និងអ្នកហ៊ានរិះគន់របបក្រុងភ្នំពេញនិយាយថា ការគំរាមក្រុមហ៊ុនឯកជន ពីសំណាក់ លោក ហ៊ុន ម៉ានិត កូនប្រុសលោក ហ៊ុន សែន គឺបានធ្វើឱ្យក្រុមហ៊ុនភ័យខ្លាច និងចេញលិខិតសុំទោសលោក ហ៊ុន ម៉ានិត ជាបន្ទាន់។ ការលើកឡើងនេះ ក្រោយពេលបុគ្គលិករបស់ក្រុមហ៊ុនលក់សម្ភារៈឯកជនមួយ បានធ្វើឱ្យថ្នាំងថ្នាក់ចិត្ត ដល់លោក ហ៊ុន មានិត ពេលចូលទៅរកទិញសម្ភារៈកីឡា។
អ្នកវិភាគនយោបាយ និងជាអ្នកហ៊ានរិះគន់របបឯកបក្សជាចំហ លោក គឹម សុខ យល់ថា កុំថាឡើយ ត្រឹមក្រុមហ៊ុនឯកជន បើទោះជាមន្ត្រីថ្នាក់ធំប៉ុណ្ណា ក៏មិនហ៊ានបដិសេធមិនសុំទោសត្រកូលហ៊ុនដែរ។ លោក គឹម សុខ ថា ការប្រើប្រាស់អំណាចឱ្យគេខ្លាច បែបនេះ នឹងជះឥទ្ធិពលមិនល្អ នៅពេលរបបលោក ហ៊ុន សែន អស់អំណាច៖ «បើត្រឹមតែអ្នករកស៊ីនៅកម្ពុជា អ្នកណាក៏ដោយ កម្រិតណាក៏ដោយ មិនអាចហ៊ានប៉ះក្រុមគ្រួសារត្រកូលហ៊ុន បានឡើយ។ កុំថាឡើយហ៊ានប៉ះប្រយោជន៍ សូម្បីត្រឹមប៉ះសំដីគ្នា នៅក្នុងរបៀបនៃការជជែកគ្នា ក៏មិនហ៊ានដែរ»។
ការលើកឡើងនេះ គឺក្រោយពេលក្រុមហ៊ុនលក់សម្ភារៈកីឡាឯកជនមួយឈ្មោះ ស៊ីរ៉ា ស្ពត ស៊ីស្ទែម ខេមបូឌា (SEARA Sport Systems (Cambodia)) ប្រចាំកម្ពុជា បានចេញលិខិតសុំទោស លោក ហ៊ុន ម៉ានិត ចំពោះទង្វើមិនសមរម្យ និងកំហុសឆ្គងពាក្យសំដី របស់បុគ្គលិកផ្នែកលក់មួយរូប។ ក្នុងលិខិតសុំទោសនោះក្រុមហ៊ុនលក់សម្ភារៈកីឡា អះអាងថា ដើម្បីជាការសុំទោស ក្រុមហ៊ុននឹងដាក់ពិន័យ ឬត្រូវបញ្ឈប់ពីការងារ ហើយប្រធានក្រុមហ៊ុននេះ ស្នើសុំជួបសុំទោសដោយផ្ទាល់ ជាមួយ លោក ហ៊ុន ម៉ានិត។
លោក ហ៊ុន ម៉ានិត បានសរសេរក្នុងបណ្ដាញសង្គមហ្វេសប៊ុក កាលពីថ្ងៃទី៤ មីនា និងត្រូវបានសារព័ត៌មានក្នុងស្រុកចែកផ្សាយបន្តថា លោកត្រូវបានបុគ្គលិកក្រុមហ៊ុនលក់សម្ភារៈកីឡាម្នាក់ ដៀលថា ល្ងង់ ពេលលោកចូលទៅរកឧបករណ៍ហាត់ប្រាណសម្រកគីឡូ។ ក្នុងសារនោះ លោកសរសេរថា បើបុគ្គលិករបៀបនេះ ក្រុមហ៊ុននឹងមានបញ្ហាមិនខាន។ តែនៅម៉ោងប្រមាណ៤ល្ងាច ថ្ងៃដដែល លោក ហ៊ុន មានិត បង្ហោះសារមួយទៀត ដោយបញ្ជាក់ថា មិនប្រកាន់ខឹងនឹងបុគ្គលិកផ្នែកលក់នោះទេ ហើយក៏បានធានា ដោយស្នើក្រុមហ៊ុនមិនឱ្យប៉ះពាល់ដល់ការងាររបស់អ្នកលក់ម្នាក់នោះ ដោយសារការបង្ហោះ (Post) របស់លោក គ្រាន់ជាការក្រើនរំលឹក និងពញ្ញាក់ស្មារតីដល់មិត្តភ័ក្ដិទេ។
អាស៊ីសេរី មិនអាចសុំការបញ្ជាក់ពីខាងភាគីក្រុមហ៊ុន លក់សម្ភារៈកីឡា ស៊ីរ៉ា ស្ពត ស៊ីស្ទែម ខេមបូឌា បានទេ នៅថ្ងៃទី៧ មីនា ដោយសារ ទូរស័ព្ទមិនចូល។
បើទោះបែបណា អ្នកប្រើប្រាស់បណ្ដាញសង្គមហ្វេសប៊ុក រិះគន់ថា បើមិនមែនជាកូនរបស់នាយករដ្ឋមន្ត្រីទេ គ្មានក្រុមហ៊ុនណា ចេញលិខិតសុំទោសបែបនេះទេ។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វ៉ន់ ពៅ សង្កេតឃើញថា ករណីអ្នកលក់ប្រើសំដី ឬអាកប្បកិរិយា មិនសមរម្យកើតឡើងច្រើនដែរ ប៉ុន្តែគ្មានការចេញលិខិតសុំទោសបែបនេះទេ។ សង្គមស៊ីវិលជំរុញឱ្យក្រុមហ៊ុនទាំងអស់ ហ៊ានសុំទោសអតិថិជនធម្មតា ដូចករណីសុំទោសអ្នកមានអំណាចដែរ៖ «ខ្ញុំសង្កេតឃើញមិនដែលឃើញមាននរណាចេញលិខិតសុំទោសជាសាធារណៈអ្វីទេ ក្រៅពីអ្នកធំ។ អាហ្នឹង បង្ហាញថា នៅស្រុកខ្មែរយើង បើសិនមិនមែនជាអ្នកធំអ្វីទេ គេមិនយកចិត្តទុកដាក់ទេ។ អ្នកដែលផ្ដល់សេវា តែចំពោះអ្នកធំ គេខ្វល់យកចិត្តទុកដាក់»។
លោក គឹម សុខ ថា បើក្រុមហ៊ុនឯកជន មិនធ្វើតាមបែបនេះទេ ក្រុមហ៊ុននោះ មិនត្រឹមតែឈរជើងមិនបានទេ ម្ចាស់ក្រុមហ៊ុននោះ មិនអាចរស់នៅបានសុខទេ។ លោក គឹម សុខ អះអាងថា នៅកម្ពុជា អំណាចរបស់គ្រួសារ លោក ហ៊ុន សែន មិនមែនមានត្រឹមតែកូនបង្កើតទេ សូម្បីសាច់ញាតិ និងអ្នកក្រោមបង្គាប់ ជិតស្និទ្ធនឹងគ្រួសារ ត្រកូល ហ៊ុន ក៏មានអំណាចប្រហាក់ប្រហែលគ្នា អាចឱ្យធ្វើឱ្យពលរដ្ឋ ឬអ្នករកស៊ីសាមញ្ញ រស់នៅ មិនបានសុខដែរ។
ករណីជាក់ស្ដែង កន្លងមក ក្មួយប្រុសបង្កើត២នាក់ របស់លោក ហ៊ុន សែន ខាងឪពុក គឺ លោក ហ៊ុន តូ និង លោក ហ៊ុន ជា បានបាញ់រះ ឡើងលើ និងបង្ករបួសស្នាម មិនដែលជាប់ពន្ធនាគារយូរទេ និងទាល់តែមានបញ្ជាពីលោក ហ៊ុន សែន ទើបសមត្ថកិច្ចហ៊ានចាប់។ ចំណែក សាច់ញាតិខាងម្ដាយ គឺ លោក ឌី ចូច មិនមានអង្គភាពណាហ៊ានស៊ើបអង្កេតទេ បើទោះធ្លាប់ល្បីល្បាញខាងរកស៊ីឈើខុសច្បាប់ និង អ្នកស្រី ឌី ប្រឹម ត្រូវបានតែងតាំងជាឧកញ៉ាវិញនៅឆ្នាំ២០១៣ ក្រោយតុលាការផ្ដន្ទាទោសកំបាំងមុខឱ្យជាប់ពន្ធនាគារ ២ឆ្នាំកន្លះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។