ក្រសួង​មហាផ្ទៃ​ទទួល​យក​លិខិត​ស្នើសុំ​ស៊ើប​អង្កេត​គ្រោះថ្នាក់​ចរាចរណ៍​ស្លាប់​លោក រ៉ុង បញ្ញា

ដោយ ជុន ច័ន្ទបុត្រ
2019-03-20
អ៊ីម៉ែល
មតិ
Share
បោះពុម្ព
លោក រ៉ុង បញ្ញា ​មន្ត្រី​សហជីព​នៃ​សហព័ន្ធ​សហជីព​កម្ពុជា និង​ជា​ក្មួយ​ប្រុស​របស់​ លោក រ៉ុង ឈុន។
លោក រ៉ុង បញ្ញា ​មន្ត្រី​សហជីព​នៃ​សហព័ន្ធ​សហជីព​កម្ពុជា និង​ជា​ក្មួយ​ប្រុស​របស់​ លោក រ៉ុង ឈុន។
screenshot

ប្រធាន​សហព័ន្ធ​សហជីព​កម្ពុជា អ្នកស្រី យ៉ាង សុភ័ណ្ឌ ប្រាប់​ថា មន្ត្រី​រដ្ឋបាល​នៃ​ក្រសួងមហាផ្ទៃ នៅ​ថ្ងៃ​ទី​២០ មីនា បាន​ទទួលយក​លិខិត​ស្នើសុំ​របស់​សហព័ន្ធ​។ លិខិត​នោះ គឺ សហព័ន្ធ​សហជីព និង​គ្រួសារ​សព លោក រ៉ុង បញ្ញា ស្នើសុំ​ឱ្យ​រដ្ឋមន្ត្រី​ក្រសួង​មហាផ្ទៃ លោក ស ខេង ជួយ​អន្តរាគមន៍​ស៊ើបអង្កេត ករណី​គ្រោះថ្នាក់​ចរាចរណ៍​ស្លាប់ មន្ត្រី​សហជីព លោក រ៉ុង បញ្ញា។ អ្នកស្រី យ៉ាង សុភ័ណ្ឌ ប្រាប់​ថា មន្ត្រី​រដ្ឋបាល​គ្រាន់តែ​ទទួលយក​លិខិត ប៉ុន្តែ​មិនបាន​ប្រាប់​ថា នឹង​ឆ្លើយតប​លិខិត​វិញ នៅ​ពេល​ណា​ទេ៖ «យើង​ចង់បាន​ភាព​ត្រឹមត្រូវ​។ យើង​មិន​ទៅ​ចង់បាន​អ្វី​ហួសហេតុ​ទេ​។ និយាយ​ឱ្យ​ចំ​ទៅ យើង​គ្រាន់តែ​ចង់បាន​ភាព​យុត្តិធម៌ ភាព​ត្រឹមត្រូវ ដើម្បី​ឱ្យ​យើង​ជា​ក្រុម​គ្រួសារ ឬ​ក្រុមការងារ​ហ្នឹង ទទួល​យក​បាន​នូវ​អ្វី​ដែល​ជា​ការ​កើតហេតុ​ពិតប្រាកដ នៃ​ការ​គ្រោះថ្នាក់​ហ្នឹង»

ការ​ដាក់​លិខិត​ទៅ​ក្រសួងមហាផ្ទៃ ធ្វើ​ឡើង​ក្រោយ​ពេល សហព័ន្ធ​សហជីព​កម្ពុជា និង​គ្រួសារ​សព​លោក រ៉ុង បញ្ញា សង្ស័យ​លទ្ធផល​សន្និដ្ឋាន​របស់​មន្ត្រី​ប៉ូលិស​នៅ​កន្លែង​កើត​ហេតុ។

លោក រ៉ុង បញ្ញា ជា​មន្ត្រី​សហជីព​នៃ​សហព័ន្ធ​សហជីព​កម្ពុជា និង​ជា​ក្មួយប្រុស​របស់ លោក រ៉ុង ឈុន ប្រធាន​សហភាព​សហជីព​កម្ពុជា​។ លោក រ៉ុង បញ្ញា ទទួល​មរណភាព នៅ​ព្រឹក​ថ្ងៃ​ទី​៩ មីនា ក្នុង​ពេល​លោក បើក​ម៉ូតូ ធ្វើដំណើរ នៅ​លើ​ផ្លូវជាតិ​លេខ​៤ ចន្លោះ​គីឡូម៉ែត្រ​លេខ​៧៧ ទៅ​៧៨ នៅ​ភូមិ​ត្រពាំង​ស្ដុក​គ្រូ ឃុំ​អូរ ស្រុក​ភ្នំស្រួច ខេត្ត​កំពង់ស្ពឺ ដោយ​គ្រោះថ្នាក់​ចរាចរណ៍​ជាមួយ​ឡាន​ដឹក​ភ្ញៀវ​ទេសចរណ៍​របស់​ក្រុមហ៊ុន​ឯកជន ឈ្មោះ ប៊ីអេស (BS)​។ បន្ទាប់​គ្រោះថ្នាក់​ចរាចរណ៍​នោះ អាជ្ញាធរ អះអាង​ថា អ្នកបើកបរ​ឡាន បាន​រត់​បាត់។

អ្នកនាំពាក្យ​ក្រសួងមហាផ្ទៃ លោក ខៀវ សុភ័គ្គ មិន​ទទួល​ទូរស័ព្ទ អាស៊ីសេរី នៅ​ថ្ងៃទី២០ មីនា​។ ប៉ុន្តែ​មន្ត្រី​ប៉ូលិស​ស្រុក​ភ្នំស្រួច ខេត្ត​កំពង់ស្ពឺ ដែល​ចុះ​ទៅ​ពិនិត្យ ទីតាំង​កើតហេតុ ពេល​មាន​គ្រោះថ្នាក់ លោក ង៉ុយ ធុល ធ្លាប់​ប្រាប់​អាស៊ីសេរី ថា តាម​ការពិនិត្យ​ជាក់ស្ដែង​នៅ​កន្លែង​កើត​ហេតុ គឺ ភាគី​ខាង​ម៉ូតូ​រំលោភ​ផ្លូវ​របស់​រថយន្ត​។ ប៉ុន្តែ របាយការណ៍ និង​ការ​សន្និដ្ឋាន​បែប​ណា​នោះ គឺ​បាន​បញ្ជូន​ទៅ​មន្ត្រី​ចរាចរណ៍​ខេត្ត​កំពង់ស្ពឺ អស់​ហើយ។

ប្អូនប្រុស​របស់​សព លោក រ៉ុង បញ្ញា គឺ លោក រ៉ុង វិជ្ជា ប្រាប់​ថា គ្រួសារ​ក៏​មាន​មន្ទិលសង្ស័យ​នៃ​ការ​ស្លាប់​នេះ​ដែរ ហើយ​បាន​ប្រគល់​សិទ្ធិ​ដាក់ពាក្យ​ស្នើសុំ​អន្តរាគមន៍ ទៅ​ខាង​សហព័ន្ធ​សហជីព​។ ចំណែក​ក្រុម​គ្រួសារ​កំពុង​រក​មេធា​វី ដើម្បី​រៀបចំ​ឯកសារ ដាក់ពាក្យ​ប្ដឹង ទៅ​តំណាង​អយ្យការ​អម​តុលាការ​ដំបូង​ខេត្ត​កំពង់ស្ពឺ។

សហជីព និង​គ្រួសារ​របស់​សព ថា ករណី​នេះ មាន​ភាព​សង្ស័យ​ច្រើន ព្រោះ​សមត្ថកិច្ច អះអាង​ថា តៃកុង​ឡាន ដឹក​ភ្ញៀវ​ទេសចរណ៍ នៃ​ក្រុមហ៊ុន ប៊ី​អេស (BS) ព្យាយាម​ចាប់​ហ្វ្រាំង ពេល​កើតហេតុ ប៉ុន្តែ​សព​របស់​មន្ត្រី​សហជីព លោក រ៉ុង បញ្ញា រង​ការ​បុក​ខ្ទាត​ចេញពី​កន្លែង​កើត​ហេតុ​ប្រវែង​៣៩​ម៉ែត្រ​។ ចំណែក​របាយការណ៍​របស់​មន្ត្រី​ប៉ូលិស​ស្រុក​ភ្នំស្រួច អះអាង​ឃើញ ថា ម៉ូតូ​របស់​មន្ត្រី​សហជីព​បាន​រំលោភ​ចូល​ផ្លូវ​រថយន្ត និង​ប្រាប់​ថា សំណុំ​រឿង​នេះ ត្រូវ​បញ្ជូន​ទៅ​ថ្នាក់​ខេត្ត​ហើយ ខណៈ​មន្ត្រី​ប៉ូលិស​ថ្នាក់​ខេត្ត មិន​ផ្ដល់​ព័ត៌មាន​លំអិត​ទេ។

កាលពី​ឆ្នាំ​២០១២ យុវជន រ៉ុង បញ្ញា ធ្លាប់​ត្រូវ​បាន​សមត្ថកិច្ច​ខណ្ឌ​ដូនពេញ វាយ​បែក​ក្បាល​ហូរ​ឈាម​ពេញមុខ​ម្ដង និង​ត្រូវ​ចាប់ខ្លួន ទៅ​ស្នងការ​រាជធានី​ភ្នំពេញ នៅ​ពេល​លោក ចូលរួម ជាមួយ​កម្មករ​រោងចក្រ​ប៉ៃ​យ៉ាង នៅ​ឃុំ​បែក​ចាន ស្រុក​អង្គស្នួល ដាក់​ញត្តិ​សុំ​ដំណោះស្រាយ នៅ​ខុទ្ទកាល័យ មេដឹកនាំ​របប​ក្រុងភ្នំពេញ លោក ហ៊ុន សែន។ លោក​ត្រូវ​បាន​សមត្ថកិច្ច​ដោះលែង នៅ​ម៉ោង​ប្រមាណ​១២​យប់ នៅ​ពេល​កម្មករ​ជាច្រើន​នាក់ ប្រមូលផ្ដុំ នៅមុខ​ស្នងការ​នគរបាល​ជាតិ ទាមទារ​ឱ្យ​ដោះលែង លោក រ៉ុង បញ្ញា។ លោក​ត្រូវ​បាន​ដោះលែង​បន្ទាប់ពី​ត្រូវ​បង្ខំ​ឱ្យ​ធ្វើ​កិច្ចសន្យា​ទទួលស្គាល់​កំហុស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល