ក្រសួង​ការងារ មិន​ទាន់​អាច​ផ្សះផ្សា​វិវាទ​ការងារ​រវាង​សហជីព និង​ក្រុមហ៊ុន​កាស៊ីណូ ណាហ្គា វើលដ៍

ដោយ មាន ឫទ្ធិ
2019-10-09
អ៊ីម៉ែល
មតិ
Share
បោះពុម្ព
អគារ​ថ្មី​នៃ​ក្រុមហ៊ុន​កាស៊ីណូ ណាហ្គា វើលដ៍ (Naga World) នា​រាជធានី​ភ្នំពេញ ឆ្នាំ​២០១៩។
អគារ​ថ្មី​នៃ​ក្រុមហ៊ុន​កាស៊ីណូ ណាហ្គា វើលដ៍ (Naga World) នា​រាជធានី​ភ្នំពេញ ឆ្នាំ​២០១៩។
RFA

ក្រសួង​ការងារ​ និង​បណ្ដុះបណ្ដាល​វិជ្ជាជីវៈ​ មិន​អាច​ផ្សះផ្សា​រវិ​វាទ​ការងារ​រវាង​ក្រុមហ៊ុន​កាស៊ីណូ ណាហ្គា វើលដ៍ (Naga World​)និង​សហជីព​ប្រចាំ​ក្រុមហ៊ុន​នេះ​បាន​នៅឡើយ​។ ក្រសួង​សម្រេច​ បញ្ជូន​សំណុំរឿង​ទៅ​បន្ត​ដោះ​ស្រាយ​នៅ​ក្រុម​ប្រឹក្សា​អាជ្ញា​កណ្ដាល។ សង្គម​ស៊ីវិល​ និង​សហជីព​ សោក​ស្ដាយ ដែល​ក្រសួង​ការងារ​មិន​អាច​ដោះ​ស្រាយ​រឿង​នេះ​បាន ហើយ​ហាក់​មាន​ជំហរ​លម្អៀង​ទៅ​រក​ក្រុមហ៊ុន។

បន្ទាប់ពី​ប្រជុំ​រក​ដំណោះស្រាយ​ជិត១ថ្ងៃ​នៅ​ក្រសួង​ការងារ​នៅ​ថ្ងៃ​ទី៧ ខែ​តុលា​នោះ​ ក្រុមហ៊ុន​កា​ស៊ី​ ណូ ណាហ្គា វើលដ៍​ នៅតែ​មិនព្រម​ទទួលយក​ប្រធាន​សហជីព​ប្រចាំ​ក្រុមហ៊ុន​នេះ​គឺ​កញ្ញា ឈឹម ស៊ីថរ ចូល​ធ្វើ​ការ​វិញ​នោះ​ទេ។ ចំណែក​សំណើ​ទាមទារ​ចំនួន ៣ទៀត របស់​កម្មករ​ ក៏​មិន​ទទួល​បាន​ដំណោះ​ស្រាយ​ដែរ ដូច​ជា​ក្រុមហ៊ុន មិន​អនុញ្ញាត​ឲ្យ​កម្មករ​ឈប់​សម្រាក​តាម​គោល​ការណ៍​ស្ម័គ្រចិត្ត​ នៅ​ថ្ងៃ​បុណ្យ​ជាតិ​ មិន​ព្រម​បញ្ឈប់​ប្រធានប្រតិបត្តិ​ការ​ផ្នែក​កាស៊ីណូ​ជា​ជន​បរទេស​ម្នាក់​ដែល​មាន​ចរិត​មិន​ល្អ និង​មិនព្រម​ដំឡើង​ប្រាក់​ឈ្នួល ៣០០ដុល្លារ​សម្រាប់​បុគ្គលិក​ផ្នែក​សណ្ឋាគារ​ និង ៥០០ដុល្លារ​ សម្រាប់​បុគ្គលិក​ផ្នែក​កាស៊ីណូ។

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​ នៃ​ក្រុមហ៊ុន​កាស៊ីណូ ណាហ្គា វើលដ៍ កញ្ញា​ ឈឹម ស៊ីថរ សម្ដែង​ការ​ខកចិត្ត​ដែល​ក្រសួង​ការងារ​ មិន​អាច​ជួយ​ផ្សះ​ផ្សារ​តាម​សំណើ​ទាមទារ​​ទាំង ៤ចំណុច​កម្មករ និង​សហជីព។ កញ្ញា​បន្ថែម​ថា អ្វី​ដែល​កាន់​តែ​ខក​ចិត្ត​ទៀត​នោះ គឺ​តំណាង​ក្រសួង​ការងារ ដែល​មាន​តួនាទី​ជា​អ្នក​សម្របសម្រួល​ បែរ​ជា​ព្យាយាម​ចាត់​ទុក​ករណី​ក្រុមហ៊ុន​ព្យួរ​ការងារ​របស់​កញ្ញា គឺ​ជា​រឿង​វិវាទ​បុគ្គល​ទៅ​វិញ ប៉ុន្តែ​សំណើ ៣ចំណុច​ទៀត គឺ​ជា​វិវាទ​រួម បាន​បញ្ជូន​ទៅ​បន្ត​ដោះ​ស្រាយ​នៅ​ក្រុម​ប្រឹក្សា​អាជ្ញាធរ​កណ្ដាល៖ «ក្រសួង​ការងារ​ ដែល​បុគ្គលិក​កម្មករ​ចាត់​ទុក​ជា​ម៉ែឪ​ នោះ​ មិន​បាន​យក​ចិត្ត​ទុក​ដាក់​លើ​ស្នាម​មេដៃ​ ដែល​បុគ្គលិក​ផ្ដិត​ជាង ៣ពាន់ (.០៥៥) នាក់​ទេ គឺ​ក្រសួង​មិន​ខ្វល់​តែ​ម្ដង​ ទើប​បាន​ជា​ចាត់​ទុក​ថា សំណុំរឿង​សហជីព​នេះ​ជា​រឿង​បុគ្គល។ គេ​ព្យួរ​​ការងារ​ខ្ញុំ​យប់​ថ្ងៃ​ទី២០ នេះ​ គឺ​ខ្ញុំ​បាន​ប្រើ​តួនាទី​ជា​ប្រធាន​សហជីព​ទៅ​សួរ​នាំ​រឿង​អាវ​យឺត ដែល​សមាជិក​របស់ខ្ញុំ​យក​ចូល​ ហើយ​ត្រូវ​បាន​សន្តិសុខ​ដក​ហូត​ ហើយ​ក្រុមហ៊ុន​ព្យួរ​ការងារ​ខ្ញុំ​ តែ​បែរ​ជា​ក្រសួង​នៅ​តែ​និយាយ​ថា ជា​វិវាទ​បុគ្គល។ យើង​មាន​ការ​ខក​ចិត្ត។ ទិដ្ឋភាព​មួយ​ទៀត​នោះ​ ការ​ចរ​ចារ​តាំង​ពី​ម៉ោង ១០ព្រឹក​ រហូត​ដល់​ម៉ោង ៣រសៀល​ គឺ​ឯកឧត្ដម​ ខៀវ សាវុធ ទទួល​បន្ទុក​ខាង​កូដកម្ម​បាតុកម្ម​ គ្រប់​មុខ​សញ្ញា​ បាន​និយាយ​ច្រើន​ ហើយ​ការ​បក​ស្រាយ​នោះ គឺ​និយាយ​ជំនួស​ក្រុមហ៊ុន​តែ​ម្ដង​ សឹង​តែ​ក្រុមហ៊ុន​ មិន​បាច់​លើក​ហេតុផល​អី​ទេ»

ប្រធាន​សហជីព​រូប​នេះ​ ឲ្យដឹង​ដែរ​ថា ខាង​ក្រុមហ៊ុន លើក​មូលហេតុ​ថា ការ​ព្យួរ​ការងារ​នេះ​ដោយសារ​កញ្ញា​មាន​ចេតនា​ញុះញង់​ឲ្យ​បុគ្គលិក​ពាក់​អាវ​យឺត ដែល​មាន​សរសេរ​អក្សរ​ថា «ក្រុមហ៊ុន​រីក​ចម្រើន បុគ្គលិក​ត្រូវ​ការ​ប្រាក់​ខែ​រស់​នៅ​សមរម្យ» ដើម្បី​ធ្វើ​យុទ្ធនាការ​ ដែល​អាច​នាំ​ឱ្យ​ប៉ះ​ពាល់​ដល់​ក្រុមហ៊ុន។ កញ្ញា​ ឈឹម​ ស៊ីថរ លើក​ឡើង​ថា ក្នុង​វិស័យ​ការងារ​ មិន​អាច​ចេះ​តែ​ចោទ​ប្រកាន់​ពី​បទ​ញុះញង់​នោះ​ទេ ព្រោះ​អ្វី​ដែល​កញ្ញា​បាន​ធ្វើ​ គឺ​តំណាង​ឲ្យ​កម្មករ​ជាង ៤ពាន់​នាក់ ដើម្បី​ទាមទារ​លក្ខខណ្ឌ​ការងារ​ឲ្យ​ប្រសើរ​ឡើង និង​ការ​ដំឡើង​ប្រាក់​ឈ្នួល​សមរម្យ​សម្រាប់​បុគ្គលិក​កំពុង​បម្រើ​ការ​ងារ​ឲ្យ​ក្រុម​ហ៊ុន​ ណាហ្គា វើលដ៍៖ «ក្រុមហ៊ុន​អត់មាន​ចេតនា​ដោះស្រាយ​អី​ទេ ហើយ​អ្វី​ដែល​ខ្ញុំ​បាន​ជម្រាប កាលពី​លើក​មុន​ទាក់ទង​នឹង​ការ​ពន្យារ​ពេល​ដែល​យើង​បារម្ភ​ថា ចង់​ទាញ​រឿង​នេះ​ទៅជា​វិវាទ​បុគ្គល​ គឺ​ពេល​ចាប់​ផ្ដើម​ចេញ​បណ្ដើរៗ ហើយ​មានការ​គាំទ្រ​ដោយ​ក្រសួង ដែល​ជា​អ្នក​សម្របសម្រួល​ផ្សះ​ផ្សារ​ទៀត។ យើង​នឹង​បន្ត​នីតិវិធី​ទៅ​ក្រុមប្រឹក្សា​អាជ្ញា​កណ្ដាល ហើយ​បើ​នៅ​តែ​គ្មាន​ដំណោះ​ស្រាយ គឺ​យើង​នឹង​ប្រើ​សិទ្ធិ​របស់​យើង»

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​លោក វន់ ពៅ មាន​ប្រសាសន៍​ថា​ វិវាទ​ការងារ​នេះ​ មិន​មែន​ជា​វិវាទ​បុគ្គល​នោះ​ទេ ព្រោះ​ទង្វើ​របស់​កញ្ញា ឈឹម ស៊ីថរ គឺ​ធ្វើ​ក្នុង​នាម​ សហជីព​ ដើម្បី​ការពារ​សិទ្ធិ​ និង​ផល​ប្រយោជន៍​របស់​កម្មករ​ជា​សមាជិក។ លោក​យល់​ថា ក្រសួង​ការងារ​ គួរតែ​មាន​ជំហរ​កណ្ដាល​មួយ​ច្បាស់លាស់​ ក្នុង​ការ​ដោះ​ស្រាយ​ដើម្បី​ឲ្យ​ភាគី​ទាំង​សង​ខាង​ទទួល​យក​បាន​ និង​ដើម្បី​លើក​កម្ពស់​វិស័យ​ការងារ​ ជា​ពិសេស​សិទ្ធិ​សេរីភាព​ផ្នែក​សហជីព៖ «ធម្មតា​សហជីព គឺ​ការពារ​ផល​ប្រយោជន៍​របស់​កម្មករ។ សហជីព​មាន​សិទ្ធិ​ចរ​ចារ​ជា​សមូហភាព​ដូច​មាន​ចែង​ក្នុង​អនុសញ្ញា៨៧ និង​អនុសញ្ញា ៩៨ របស់​អង្គការ​ពលកម្ម​អន្តរជាតិ (ILO) គឺ​មាន​សិទ្ធិ​បង្កើត​មាន​សិទ្ធិ​តំណាង​ឲ្យ​សមាជិក​របស់​ខ្លួន ដើម្បី​ប្រយោជន៍​ជា​សមូហ​ ភាព​របស់​សមាជិក។ ការ​ចោទ​ប្រកាន់​របស់​ក្រុមហ៊ុន​មិន​ត្រឹមត្រូវ​ទេ។ ខ្ញុំ​មើល​ឃើញ​ថា ធម្មតា​ក្រុមហ៊ុន​និយោជក​មិន​សូវ​គាំទ្រ​សហជីព ដែល​គាំទ្រ​កម្មករ​នោះ​ទេ។ ខ្ញុំ​គិត​ថា នេះ​គឺ​ជា​ចេតនា​មិន​សហការ​របស់​និយោជក ជាមួយ​សហជីព​នោះ​ទេ»

អាស៊ី​សេរី​ មិន​ទាន់​អាច​សុំ​ការ​ឆ្លើយ​តប​ប្រធាន​គ្រប់គ្រង​ផ្នែក​ទំនាក់ទំនង​បុគ្គលិក​របស់​ក្រុមហ៊ុន​ កាស៊ីណូ ណាហ្គា វើលដ៍ (Naga World) អ្នកស្រី ឌី សីហា​ និង​អ្នកនាំពាក្យ​ក្រសួង​ការងារ លោក​ ហេង សួរ បាន​ទេ​នៅ​ថ្ងៃ​ទី៧ តុលា។

កាល​ពី​ថ្ងៃ​ទី៦ ខែ​តុលា អង្គការ សមាគម និង​សហព័ន្ធ​សហជីព​ជាង​២០ ដែល​ធ្វើ​ការងារ​លើកកម្ពស់​សិទ្ធិ​មនុស្ស និង​សិទ្ធិ​ការងារ ចេញ​សេចក្ដី​ថ្លែង​ការណ៍​រួមគ្នា​មួយ​ទាមទារ​ឱ្យ​ក្រុមហ៊ុន ណាហ្គា វើលដ៍ ទទួល​យក​បុគ្គលិក និង​ជា​ប្រធាន​សហជីព​ប្រចាំ​ក្រុមហ៊ុន ណាហ្គា វើលដ៍ កញ្ញា ឈឹម ស៊ីថរ ចូល​ធ្វើការ​វិញ​ដោយ​ឥត​លក្ខខណ្ឌ និង​ពិចារណា​លើ​សំណើ​សុំ​ដំឡើង​ប្រាក់​ឈ្នួល​សមរម្យ​ជូន​បុគ្គលិក​ដែល​កំពុង​បម្រើ​ការងារ​នៅ​ក្នុង​កាស៊ីណូ ណាហ្គា វើលដ៍។ អង្គការ សមាគម និង​សហជីព​ទាំងនេះ អះអាង​ថា ពួកគេ​បាន​តាម​ដាន​យ៉ាង​យក​ចិត្ត​ទុក​ដាក់ និង​បាន​សិក្សា​អំពី​ផ្លូវ​ច្បាប់​ឃើញ​ថា ការ សម្រេច​ចិត្ត​របស់​ក្រុមហ៊ុន​កាស៊ីណូ ណាហ្គា វើលដ៍ ក្នុង​ការ​ព្យួរ​ការងារ​មេ​ដឹក​នាំ​សហជីព​ដ៏​សកម្ម​ម្នាក់​នេះ ជា​រឿង​គ្មាន​មូលដ្ឋាន​ច្បាប់ និង​មិន​យុត្តិធម៌​នោះ​ទេ។ កញ្ញា ឈឹម ស៊ីថរ គ្រាន់​តែ​ប្រើប្រាស់​សិទ្ធិ​ជា​មូលដ្ឋាន និង​ប្រកប​ដោយ​វិជ្ជាជីវៈ​ឯករាជ្យ​តំណាង​ឱ្យ​កម្មករ​ជាង ៤ពាន់​នាក់ ទាមទារ​ធ្វើ​ឱ្យ​ប្រសើរ​ឡើង​នូវ​លក្ខខណ្ឌ​ការងារ និង​ដំឡើង​ប្រាក់​ឈ្នួល​សមរម្យ​សម្រាប់​បុគ្គលិក ណាហ្គា វើលដ៍៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល