ក្រសួង​ការងារ​កំណត់​ប្រាក់​ឈ្នួល​កម្មករ​កាត់ដេរ ១៩០​ដុល្លារ សម្រាប់​ឆ្នាំ​២០២០

ដោយ ខែ សុណង
2019-09-20
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
Photo courtesy of SPM's Facebook page

ក្រសួង​ការងារ និង​បណ្ដុះបណ្ដាល​វិជ្ជាជីវៈ ប្រកាស​សេចក្ដី​សម្រេច​អំពី​ប្រាក់​ឈ្នួល​គោល ១៩០​ដុល្លារ សម្រាប់​កម្មករ​ក្នុង​វិស័យ​កាត់ដេរ​សំលៀកបំពាក់ និង​ស្បែកជើង​នៅ​ក្នុង​ឆ្នាំ​២០២០។ សហជីព​ឯករាជ្យ និង​កម្មករ​ចាត់​ទុក​ការដំឡើង​ប្រាក់​ឈ្នួល​ក្នុង​ចំនួន​នេះ​ថា មិន​អាច​ធ្វើ​ឱ្យ​កម្មករ​មាន​ជីវភាព​ប្រសើរ​ជាង​មុន​ទេ។

ប្រាក់​ឈ្នួល​គោល ១៩០​ដុល្លារ គឺ​បាន​មក​ពី​ក្រុម​ប្រឹក្សា​ជាតិ បោះឆ្នោត​ភាគច្រើន​យក​តួលេខ ១៨៧​ដុល្លារ ហើយ​ទទួល​បាន​ការ​បន្ថែម ៣​ដុល្លារ​ទៀត ពី​មេ​ដឹក​នាំ​​របប​ក្រុងភ្នំពេញ។

ប្រកាស​របស់​រដ្ឋមន្ត្រី​ក្រសួង​ការងារ និង​បណ្ដុះបណ្ដាល​វិជ្ជាជីវៈ លោក អ៊ិត សំហេង ចុះ​ថ្ងៃ​ទី​២០ ខែ​កញ្ញា សម្រេច​ថា កម្មករ និយោជិក​ផ្នែក​វាយនភណ្ឌ​កាត់ដេរ និង​ផលិត​ស្បែកជើង នឹង​ទទួល​បាន​ប្រាក់ខែ​គោល​ចំនួន ១៩០​ដុល្លារ​នេះ ចាប់ពី​ថ្ងៃ​ទី​១ ខែ​មករា ឆ្នាំ​២០២០ ទៅ​។ ប៉ុន្តែ​សម្រាប់ កម្មករ​និយោជិក ដែល​ស្ថិត​ក្នុង​ដំណាក់កាល​សាកល្បង ទទួល​បាន ១៨៥​ដុល្លារ​ក្នុង​មួយ​ខែ ហើយ​ពួកគេ នឹង​ទទួល​បាន​ប្រាក់​ឈ្នួល​អប្បបរមា ១៩០​ដុល្លារ​ដែរ នៅ​ពេល​ដែល​ពួកគេ​ចប់​រយៈពេល​សាកល្បង ក្លាយ​ជា​កម្មករ​និយោជិក​ពេញ​សិទ្ធិ។

ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា អ្នកស្រី ទូច សើ យល់ថា ការ​ដំឡើង​ប្រាក់​ឈ្នួល​គោល ចំនួន ១៩០​ដុល្លារ​នេះ មិនទាន់​អាច​ធ្វើ​ឱ្យ​កម្មករ​មាន​ជីវភាព​ល្អ​ប្រសើរ​ជាង​សព្វថ្ងៃ​ទេ ព្រោះ​ទំនិញ និង​ការ​ចំណាយ​ផ្សេងៗ បាន​ឡើងថ្លៃ លើស​ពី​ប្រាក់​ឈ្នួល​ដំឡើង​ឱ្យ​កម្មករ​ឆ្ងាយ​ណាស់​។ អ្នកស្រី​ប្រាប់​ថា សហជីព​ដែល​គាំទ្រ​រដ្ឋាភិបាល មិន​បោះឆ្នោត​យក​តួលេខ​ដាក់​ចេញ​ដោយ​តំណាង​សហជីព​ទេ គឺ​បោះឆ្នោត​គាំទ្រ​តួលេខ​របស់​រដ្ឋាភិបាល៖ «ពិបាក​ដែរ​ហ្នឹង​ណា ប្រាក់ខែ​នៅ​ស្រុក​ខ្មែរ​យើង មើល​ទៅ​ទូទៅ សូម្បីតែ​លុយ​ថ្លៃ​ផ្ទះ មិន​ដឹង​អ្វី​ផង គឺ​ ៥​ខែ​កំណត់​ឡើង​ម្ដង ៥​ខែ​ឡើង​ម្ដង​។ លុយ ចេះតែ​ថា​ឡើង​ប្រដេញ វា​មិន​ស្មើនឹង​កម្លាំង​ពលកម្ម​របស់​កម្មករ​។ វា​អ៊ីចេះ បើ​តាម​ពិតជា​ទូទៅ​ថា សហជីព​ខាង​រាជរដ្ឋាភិបាល គឺ​ច្រើន​អ៊ីចឹង​ណា​។ ម្ល៉ោះហើយ បើ​សិន​បោះ​ទៅ វា​អាច​ចាញ់​អ៊ីចឹង​ទៅ​។ យើង​គិត​មើល​ទៅ​ព្រោះ​អ្វី (សហជីព​)​ ខាង​រាជរដ្ឋាភិបាល គាត់​បង្កើត​ឡើង​លើសលប់»

ក្រុមប្រឹក្សា​ជាតិ​ប្រាក់​ឈ្នួល​អប្បបរមា ក្រុម​សហជីព​ទាំង​១៧ ដែល​បោះឆ្នោត​ជា​សម្ងាត់ បាន​សម្រេច​ដាក់​ចេញ​តួលេខ ១៩៥​ដុល្លារ ក្រុម​សមាគម​ថៅកែ​រោងចក្រ ១៨៦​ដុល្លារ និង​តួលេខ​របស់​ក្រសួង​ការងារ គឺ ១៨៧​ដុល្លារ។ ប៉ុន្តែ មានតែ​សហជីព​ចំនួន​៨ ប៉ុណ្ណោះ ដែល​បាន​បោះឆ្នោត​គាំទ្រ​តួលេខ ១៩៥​ដុល្លារ នេះ​។ ក្រៅ​ពី​នេះ គឺ​សហជីព​ចំនួន ៩​នាក់​ទៀត និង​ក្រុម​តំណាង​ថៅកែ ក្រសួង​ការងារ សុទ្ធតែ​បោះឆ្នោត​យក​តួលេខ ១៨៧​ដុល្លារ។

ប្រធាន​សហព័ន្ធ​សហជីព​ជាតិ​កម្ពុជា និង​ជា​អនុប្រធាន​តំណាង​អង្គការ​វិជ្ជាជីវៈ​របស់​កម្មករ​និយោជិក លោក សោម អូន ប្រាប់​អាស៊ីសេរី​ថា ប្រាក់​ឈ្នួល​គោល ១៩០​ដុល្លារ នឹង​ធ្វើ​ឱ្យ​កម្មករ​មាន​ជីវភាព​ប្រសើរ​ជាង​មុន។ លោក​ប្រាប់​ថា ក្រៅពី​ប្រាក់ខែ​គោល​នេះ​ហើយ កម្មករ​នឹង​ទទួល​បាន​ប្រាក់​អត្ថប្រយោជន៍​ផ្សេងទៀត រួមមាន ប្រាក់​ថ្លៃ​ធ្វើដំណើរ ប្រាក់​រង្វាន់ គឺ​សរុបទៅ ២០៧​ដុល្លារ​ក្នុង​មួយ​ខែ ដោយ​មិនទាន់​រាប់បញ្ចូល​ប្រាក់​ធ្វើការ​ថែម​ម៉ោង​នោះ​ផង។

ប្រធាន​សហជីព​ស្និទ្ធ​នឹង​រដ្ឋាភិបាល​រូប​នេះ អះអា​ងថា នឹង​ខិតខំ​បន្ថែម​ទៀត ដើម្បី​ដំឡើង​ប្រាក់​ឈ្នួល​ឱ្យ​កម្មករ​ជា​បន្តបន្ទាប់​ទៀត​។ តែ​លោក​លើក​ហេតុផល​ថា ប្រាក់​ឈ្នួល​នៅ​កម្ពុជា គឺ​ខ្ពស់​ជាង​ប្រទេស​នានា ក្នុង​តំបន់ ដូចជា ខ្ពស់​ជាង​នៅ​ប្រទេស​ស្រីលង្កា ឥណ្ឌា បង់ក្លាដេស ភូមា ឡាវ និង​តំបន់​ខ្លះ នៃ​ប្រទេស​វៀតណាម​។ លោក សោម អូន ថ្លែង​បន្ត​ថា ការដំឡើង​ប្រាក់​ឈ្នួល ១៩០​ដុល្លារ គឺ​សមរម្យ ព្រោះ​ត្រូវ​រក្សា​ការប្រកួតប្រជែង​ជាមួយ​ប្រទេស​ផ្សេង​ក្នុង​តំបន់ ដោយ​លោក​បារម្ភ​ថា ថៅកែ​រោងចក្រ អាច​នឹង​ឈប់​វិនិយោគ​នៅ​កម្ពុជា​បន្ត៖ «ទស្សនៈ​របស់ខ្ញុំ គឺ​យើង​ឃើញ​ថា ជា​ការ​ដំឡើង​មួយ វា​ប្រហាក់ប្រហែល​នឹង​ឆ្នាំមុន​ដែរ ហើយ​អ្វី​ដែល​ដំឡើង​នេះ គឺ​ក្រុមការងារ​ទាំងអស់​យើង​ផ្ដោត​ទៅ​លើ​កត្តា​២ គឺ​កត្តា​សេដ្ឋកិច្ច និង​កត្តា​សង្គម​។ ក្នុង​នោះ​យើង​មាន​ធាតុ​ផ្សំ​៧​ទៀត ហើយ​សហជីព​របស់​យើង គឺជា​មេរៀន​មួយ ដែល​ជា​យុទ្ធសាស្ត្រ​របស់ ILO ក៏ដូចជា​ក្រុមប្រឹក្សា​ប្រាក់​ឈ្នួល ដែល​យើង​បាន​ឯកភាព​គ្នា ហើយ​យើង​បាន​ប្រើ​តាំងពី​ឆ្នាំ​២០១៣​ មក​។ អ៊ីចឹង​ទេ ខ្ញុំ​យល់ថា ឆ្នាំ​២០២០​នេះ បងប្អូន​កម្មករ នឹង​មាន​ប្រាក់​ឈ្នួល​ល្អ​ប្រសើរ​ជាង​មុន»

ផ្ទុយ​ពី​ការ​អះអាង​នេះ ប្រធាន​សហភាព​ការងារ​កម្ពុជា លោក អាត់ ធន់ មិន​ពេញចិត្ត​ការដំឡើង​ប្រាក់​ឈ្នួល​ត្រឹម ៨​ដុល្លារ គឺ​ឡើង​ពី ១៨២ ដល់ ១៩០​ដុល្លារ​ឡើយ​។ លោក​អះអាង​ថា បើ​ប្រៀប​នឹង​ស្ថានភាព​ការ​ចំណាយ នៅ​ឆ្នាំ​២០២០ យ៉ាងហោចណាស់ រដ្ឋាភិបាល​ត្រូវ​ដំឡើង ១២ ទៅ ១៣​ដុល្លារ គឺ​ខ្ទង់ ១៩៥​ដុល្លារ ទើប​សម​ល្មម​នឹង​ការ​ចំណាយ​របស់​កម្មករ។ លោក អាត់ ធន់ ពន្យល់​ថា ការដំឡើង​ប្រាក់​ឈ្នួល​កម្មករ​នៅ​កម្ពុជា មិន​អាច​យក​ទៅ​ប្រៀប​ជាមួយ​ប្រទេស​ផ្សេង​ទេ ដោយសារ ស្ថានភាព​សេដ្ឋកិច្ច ថ្លៃ​ចំណាយ​របស់​កម្មករ​នៅ​ប្រទេស​នីមួយៗ មាន​ភាព​ខុសៗ​គ្នា​៖ «បច្ចុប្បន្ន តម្រូវ​ការរស់នៅ​ខ្ពស់​ជាង​មុន​។ អ៊ីចឹង​គាត់​ត្រូវ​ចំណាយ​ខ្ពស់ ហើយ​អតិផរណា ក៏​វា​កើន​ឡើង​៣%​។ អ៊ីចឹង ការដំឡើង​លុយ​ត្រឹម ៨​ដុល្លារ​នេះ វា​អាច​ជួយ​ដែរ តែ​វា​ជួយ​បាន​តិច​មែនទែន បើសិនជា​យើង​ប្រៀបធៀប ទៅ​នឹង​ឆ្នាំមុន គឺ​ឆ្នាំមុន​វា​អាច​ជួយ​បាន​ច្រើនជាង ដោយសារតែ​ចំនួន​ឡើង​ឆ្នាំមុន ទៅដល់​ ១២​ដុល្លារ។ ការ​ឡើង​នេះ បើ​យើង​មើល​ទៅ​គឺ វា​នៅ​កម្រិត​ទាប ពី​តម្រូវ​ការរស់នៅ ដែល​យើង​សិក្សា​ស្រាវជ្រាវ​តាម​ការ​ជាក់ស្ដែង ទាល់តែ​ចំណូល​ជាង​២០០ ទើប​ការរស់នៅ​រាង​ប្រសើរ»

លោក អាត់ ធន់ ប្រាប់​ថា ក្រុម​សហជីព​បាន​ស្នើ​សុំ​បន្ថែម ១៣​ចំណុច​ថែមទៀត ទាក់ទង​នឹង​ផលប្រយោជន៍​កម្មករ និយោជិក ដូចជា ការ​បន្ថែម​ប្រាក់​ធ្វើដំណើរ ១​ដុល្លារ​ក្នុង​ថ្ងៃ​ឈប់សម្រាក​របស់​កម្មករ​មក​វិញ​ខ្លះ សម្រួល​ឱ្យ​នីតិវិធី​បង្កើត​សហជីព​ប្រចាំ​រោងចក្រ មាន​ភាព​ងាយស្រួល​ជាមុន ជាដើម​។ ប៉ុន្តែ​រដ្ឋមន្ត្រី​ក្រសួង​ការងារ​ប្រាប់​ថា សំណើ​ទាំងនោះ នឹង​ត្រូវ​ជជែក​នៅ​ពេល​ក្រោយ។

ប្រាក់​ឈ្នួល​គោល​កម្មករ នៅ​ឆ្នាំ​២០១៩ គឺ ១៨២​ដុល្លារ​។ បើ​ទោះជា​របប​ក្រុងភ្នំពេញ បាន​ដំឡើង​ដល់ ១៩០​ដុល្លារ តែ​របប​នេះ បាន​លុបចោល​ថ្ងៃ​ឈប់​សម្រាក​​​របស់​​កម្មករ​ចំនួន ៦​ថ្ងៃ នៅ​ឆ្នាំ​២០២០​។ កម្មករ​ប្រាប់​ថា ការដំឡើង​ប្រាក់​ឈ្នួល ៨​ដុល្លារ​នេះ គឺ​ធ្វើ​ឱ្យ​តែ​ល្អមើល ខណៈ​ពួកគាត់​មិន​ពេញចិត្ត និង​ប្រាប់​ថា មិន​អាច​ទូទាត់​ស្មើ​ថ្ងៃ​ឈប់សម្រាក​ទាំង ៦​ថ្ងៃ ដែល​បាន​លុបចោល​ឡើយ។

កម្មករ​ម្នាក់ នៅ​រោងចក្រ​ប៊ូវឃ័រ (Bowker) នៅ​ស្រុក​អង្គស្នួល ខេត្ត​កណ្ដាល លោក ឡឹក សុភ័គ្រ ឱ្យ​ដឹង​ថា ការដំឡើង​ប្រាក់​ឈ្នួល ១៩០​ដុល្លារ មិន​អាច​ធ្វើ​ឱ្យ​ពួកគាត់ មាន​ជីវភាព​ល្អ​ប្រសើរ​ឡើយ​។ លោក​ថា កម្មករ​ភាគច្រើន ចង់បាន​ការដំឡើង​ខ្ពស់​ជាង​នេះ៖ «វា​មិន​អាច​គ្រប់គ្រាន់​ទេ​បង​។ ប៉ិន​ហ្នឹង​វា​តិច​ពេក​ណា​បង​។ ស្ថានភាព​(​ឡើង​) វា​តិច​ពេក តិច​ពេក​។ វា​អត់​ដូច​ឆ្នាំ មុនៗ ទៅ​វា​ឡើង​១០​រៀល​(​ដុល្លារ​)​អ្វី​ទៅ ឆ្នាំនេះ វា​ឡើង​តិច​ពេក»

សង្គម​ស៊ីវិល​ឃ្លាំមើល​សិទ្ធិ​ការងារ ហៅ​ការដំឡើង​ប្រាក់​ឈ្នួល ១៩០​ដុល្លារ ជា​សេណារីយ៉ូ ដែល​មាន​ការរៀបចំ​ទុកជាមុន និង​មិន​អាច​ប៉ះប៉ូវ​ថ្ងៃ​ឈប់សម្រាក​កម្មករ ដែល​រដ្ឋាភិបាល​បាន​លុបចោល​បានទេ។

អ្នក​សម្របសម្រួល​មជ្ឈមណ្ឌល​សម្ពន្ធភាព​ការងារ និង​សិទ្ធ​មនុស្ស ហៅ​អង្គការ​សង់ត្រាល់ (Central) លោក ឃុន ថារ៉ូ យល់ថា តួលេខ ១៩០​ដុល្លារ គ្មាន​តុល្យភាព​ទៅ​នឹង​អតិផរណា​ដែល​បាន​ព្យាករ​នៅ​ឆ្នាំ​២០២០ ទេ​។ ដូច្នេះ លោក​អះអាង​ថា ប្រាក់​ឈ្នួល ១៩០​ដុល្លារ មិន​អាច​ឱ្យ​កម្មករ​និយោជិក ទទួល​បាន​ជីវភាព​សមរម្យ និង​ដោយ​សេចក្ដីថ្លៃថ្នូរ​ឡើយ។

លោក ឃុន ថារ៉ូ ហៅ​ការដំឡើង​នេះ​ថា​ ជា​គោលនយោបាយ​អសមភាព​ក្នុង​ការ​បម្រើ​ផលប្រយោជន៍​កម្មករ តែ​ជា​ការ​បម្រើ​ផលប្រយោជន៍​វិស័យ​ឯកជន​តែមួយ​មុខ​។ អ្នកឃ្លាំមើល​សិទ្ធ​ការងារ​រូប​នេះ​យល់ថា កម្មករ នៅតែ​ជា​ឧបករណ៍​របស់​អ្នកនយោបាយ ខណៈ​ដែល​ចលនា​សហជីព​ឯករាជ្យ​ទទួលរង​ពី​ឥទ្ធិពល​នយោបាយ៖ «តួលេខ​ហ្នឹង គឺ​វា​អត់​មានការ​ឆ្លើយតប​ទៅ​នឹង​កំណើន​អប្បបរមា សម្រាប់​ឆ្នាំ​២០២០​។ ឆ្នាំ​២០២០ អាច​ចន្លោះ​ពី ២,៥ ទៅ​ ៥​ភាគរយ នៅ​ឆ្នាំ​២០២០​។ អ៊ីចឹង​នៅ​ក្នុង​ចន្លោះ នៃ​ការដំឡើង​ចំនួន​ ២,៥​ភាគរយ ដែល​ស្មើនឹង​៥​ដុល្លារ ដែល​លោកនាយក​រដ្ឋមន្ត្រី មិន​ទាន់​បាន​បន្ថែម​ហ្នឹង វា​អត់​មាន​សមតុល្យ​​នៅឡើយ​ទេ​។ ជាក់ស្ដែង​ប្រាក់​ឈ្នួល ដែល​បាន​កំណត់​ដោយ​ក្រុមប្រឹក្សា​ប្រាក់​ឈ្នួល​ជាតិ​ហ្នឹង គឺ​មិន​ទាន់​បាន​ឆ្លើយតប​ទៅ​នឹង​សេចក្ដី​ត្រូវការ​ជីវភាព​រស់នៅ​សមរម្យ សម្រាប់​កម្មករ​និយោជិក ដែល​ធានា​ដោយ​ច្បាប់​ស្ដីពី​ការងារ»

សង្គម​ស៊ីវិល និង​កម្មករ​និយាយ​ថា ស្ថានភាព​កម្មករ​ក្នុង​វិស័យ​កាត់ដេរ នៅ​ឆ្នាំ​២០២០ នឹង​ត្រូវ​ប្រឈមមុខ​ហានិភ័យ​ដដែល គឺ​ការ​ដួល​សន្លប់ គ្រោះថ្នាក់​ពេល​ធ្វើ​ដំណើរ​ទៅ​ធ្វើ​ការ ការ​ជំពាក់​បំណុល​ធនាគារ និង​ការ​បង្ខំចិត្ត​ថែម​ម៉ោង​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

he kies liars cheater with his old karma...fears EBA/GPS sanctions coming and freaken out Sam return home that cause him outragous

This lunatic always keep lies liars cheating u until the last day of his breath,time must be smart right now pple and stop this moron hang around with u all anymore and quick make a change ahead.

Sep 21, 2019 05:16 PM

tmil hun Sen fears his karma coming with do promise this or that to avoid pple hates him and oust him out in 2020

In fact tmil Hun Sen's playing tricks and treats to calm down with Khmer garment factory workers to avoid big mass rally on the streets to against its unofficial govm't who opposed the EBA/GPS sanctions coming,and fears with its own karma when heard the opposition party leaders coming home in day ahead.That why he tries to use any trick and treat to make them feel good rather than against his goodwill,100% is untrue at all,he just lies liars cheater with voodoo promise this or that with the same old song and the same old shits.

Sep 20, 2019 02:18 PM

tmil Hun Sen's labour ministry promise 3% decrease in 2020 after EBA/GPS sanctions coming if his unofficial election not rerelect him for another 7 terms in office

Aging dictator"HS" said if his unofficial election,or unofficial govm't win over without opposition top contender"CNRP"involve in 2020,his unofficial govm't will review the worker's salary gap to 3%,despite without the EBA/GPS sanctions coming.Otherwise,if CNRP win back to back over his unofficial election,or unofficial govm't in 2020,the comradeship China/Viet next door won't let me down,if they let me down i'll trade of my power and switch to my opposition party"CNRP" to responsible all the debts in the last 4 decades with Comrade of China with repayment.

Sep 20, 2019 02:02 PM

គេហទំព័រ​ទាំងមូល