សង្គមស៊ីវិលបារម្ភការស៊ើបអង្កេតករណីកម្មករអូសរទេះបាតុកម្មនៅប៉ោយប៉ែតគ្មានតម្លាភាព
2015.06.04
មន្ត្រីអង្គការសង្គមស៊ីវិល បារម្ភអំពីការស៊ើបអង្កេតរបស់សមត្ថកិច្ចលើករណីបាតុកម្មរបស់កម្មករអូសរទេះនៅក្រុងប៉ោយប៉ែត ដែលបង្កឲ្យមនុស្ស ២នាក់របួសកាលពីចុងខែឧសភា អាចគ្មានតម្លាភាព។ ការបារម្ភនេះ ដោយសារក្រុមសង្គមស៊ីវិលរកឃើញឈ្មោះមន្ត្រីតុលាការខេត្តបន្ទាយមានជ័យ ក្នុងលិខិតអញ្ជើញរបស់អាជ្ញាធរខេត្ត ឲ្យចូលរួមការស៊ើបអង្កេត។ ប៉ុន្តែមន្ត្រីតុលាការខេត្តបញ្ជាក់ថា ពុំមានពាក់ព័ន្ធក្នុងកិច្ចការស៊ើបអង្កេតជាមួយសមត្ថកិច្ចនោះឡើយ។
មន្ត្រីសមាគមសេដ្ឋកិច្ចក្រៅប្រព័ន្ធក្រុងប៉ោយប៉ែត និងមន្ត្រីសមាគមការពារសិទ្ធិមនុស្សអាដហុក (Adhoc) ស្នើឲ្យសមត្ថកិច្ចខេត្តបន្ទាយមានជ័យ និងមន្ត្រីពាក់ព័ន្ធ ស៊ើបអង្កេតករណីកម្មករអូសរទេះធ្វើបាតុកម្មតវ៉ាមិនឲ្យមន្ត្រីគយ និងរដ្ឋាករក្រុងប៉ោយប៉ែត យកពន្ធថ្លៃនោះ ដោយអព្យាក្រឹត និងមិនលម្អៀង។
មន្ត្រីសង្គមស៊ីវិល លើកឡើងនេះបន្ទាប់ពីសមត្ថកិច្ចខេត្តបន្ទាយមានជ័យ ប្រជុំសមត្ថកិច្ចពាក់ព័ន្ធបើកការស៊ើបអង្កេតករណីកម្មករធ្វើបាតុកម្មនេះនៅសាលាខេត្ត កាលពីថ្ងៃទី២ មិថុនា កន្លងទៅ។ ប្រធានសមាគមសេដ្ឋកិច្ចក្រៅប្រព័ន្ធក្រុងប៉ោយប៉ែត លោក ឌិន ពុទ្ធី មានប្រសាសន៍នៅថ្ងៃទី៣ មិថុនា ថា លោកមានការព្រួយបារម្ភករណីសមត្ថកិច្ចបើកការស៊ើបអង្កេតពាក់ព័ន្ធការប៉ះទង្គិចគ្នាដោយហិង្សា រវាងកម្មករអូសរទេះ និងសមត្ថកិច្ចនៅក្រុងប៉ោយប៉ែត កាលពីចុងខែឧសភា កន្លងទៅ មិនអាចដោះស្រាយឲ្យក្រុមកម្មករបាននោះទេ ប្រសិនបើការស៊ើបអង្កេតនោះប្រកាន់បក្ខពួកនិយម មិនឯករាជ្យ និងការទម្លាក់កំហុសដាក់គ្នាទៅវិញទៅមកនោះ៖ «អាជ្ញាធរធ្វើការស៊ើបអង្កេតនេះជាការបញ្ចៀសពីការទទួលខុសត្រូវរបស់ខ្លួន ដើម្បីរកមេខ្លោងទៅដោះស្រាយជាមួយថ្នាក់លើរបស់គេឲ្យរួចផុតពីការស្ដីបន្ទោស»។
ទាក់ទងនឹងបញ្ហានេះ ស្នងការរងខេត្តបន្ទាយមានជ័យ ទទួលបន្ទុកផ្នែកព្រហ្មទណ្ឌ លោក សិទ្ធិ ឡោះ មានប្រសាសន៍យ៉ាងខ្លីថា លោកពុំទទួលដំណឹងជុំវិញបញ្ហានេះថាយ៉ាងណានៅឡើយទេ៖ «ការងារនេះខ្ញុំអត់បានដឹងទេ ពីព្រោះខ្ញុំបានទៅចូលរួមប្រជុំពាក់ព័ន្ធនឹងការស៊ើបអង្កេតនៅសាលានោះទេ»។
ទោះយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា សមត្ថកិច្ចខេត្តបន្ទាយមានជ័យ បានប្រជុំមន្ត្រីពាក់ព័ន្ធ រួមទាំងមន្ត្រីតុលាការខេត្តផង ដើម្បីពន្លឿនស៊ើបអង្កេតលើករណីកម្មករអូសរទេះធ្វើបាតុកម្មនៅក្រុងប៉ោយប៉ែត នោះ។ លោកថា ការស៊ើបអង្កេតនេះមិនឯករាជ្យ និងមិនអព្យាក្រឹតនោះទេ ពីព្រោះមន្ត្រីតុលាការមានឈ្មោះក្នុងលិខិតអញ្ជើញចូលរួមប្រជុំ ពីសំណាក់អាជ្ញាធរខេត្តនោះដែរ៖ «លើកទី១ទាក់ទងករណីដីធ្លី លើកទី២ នេះ ចូលរួមដោះស្រាយជាមួយសមត្ថកិច្ចពាក់ព័ន្ធនឹងការធ្វើបាតុកម្មរបស់ក្រុមកម្មករអូសរទេះនៅក្រុងប៉ោយប៉ែត ទៅវិញ។ ស្ថាប័នឯករាជ្យមួយបែបស្ថិតក្នុងគណៈកម្មការស៊ើបអង្កេត តុលាការគួរស្ថិតនៅឯករាជ្យ»។
ឆ្លើយតបនឹងបញ្ហានេះ ព្រះរាជអាជ្ញាអមសាលាដំបូងខេត្តបន្ទាយមានជ័យ លោក ផាន់ វណ្ណរ័ត្ន មានប្រសាសន៍បញ្ជាក់ថា លោកកំពុងដំណើរការស៊ើបអង្កេតជុំវិញបញ្ហានេះជាមួយមន្ត្រីគយ និងរដ្ឋាករក្រុងប៉ោយប៉ែត ធ្វើឡើងដោយឯករាជ្យ ហើយពុំពាក់ព័ន្ធនឹងការចូលរួមប្រជុំជាមួយសមត្ថកិច្ចខេត្តនោះទេ៖ «ខ្ញុំទទួលស្គាល់មានលិខិតអញ្ជើញពីសមត្ថកិច្ចខេត្តបន្ទាយមានជ័យ មែន ប៉ុន្តែខាងខ្ញុំនេះអត់បានទៅចូលរួមជាមួយសមត្ថកិច្ចនោះទេ ព្រោះខ្ញុំធ្វើការងារត្រឹមតែអំណាចដែលមានប៉ុណ្ណោះ»។
អាជ្ញាធរខេត្តបន្ទាយមានជ័យ បើកការស៊ើបអង្កេតទៅលើសំណុំរឿងកម្មករអូសរទេះធ្វើបាតុកម្មនេះ ធ្វើឡើងបន្ទាប់ពីលោកឧបនាយករដ្ឋមន្ត្រី កែ គឹមយ៉ាន ថ្លែងក្នុងពិធីចុះសួរសុខទុក្ខប្រជាពលរដ្ឋនៅឃុំចំណោម ស្រុកមង្គលបុរី ខេត្តបន្ទាយមានជ័យ កាលពីថ្ងៃទី១ មិថុនា ដែលកាសែតក្នុងស្រុកបានស្រង់សម្ដីលោកថា ការធ្វើបាតុកម្មនៅក្រុងប៉ោយប៉ែត របស់កម្មករអូសរទេះនោះ គឺលោកសំដៅលើសមាជិកគណបក្សសង្គ្រោះជាតិ នៅពីក្រោយខ្នង ដែលគណបក្សនេះប្រើប្រាស់វប្បធម៌សន្ទនាប្រែក្លាយទៅជាវប្បធម៌ញុះញង់ បំផ្លាញទ្រព្យសម្បត្តិរដ្ឋ។
កន្លងទៅ អភិបាលក្រុងប៉ោយប៉ែត ធ្លាប់ចេញរបាយការណ៍មួយចោទប្រកាន់ លោក ចៅ វាសនា ចៅសង្កាត់រងទី២ មកពីគណបក្ស សម រង្ស៊ី និងលោក ឌិន ពិទ្ធី ប្រធានសមាគមសេដ្ឋកិច្ចក្រៅប្រព័ន្ធក្រុងប៉ោយប៉ែត និងបក្ខពួកមួយចំនួនទៀត ថាជាអ្នកនៅពីក្រោយខ្នង ញុះញង់ឲ្យកម្មករធ្វើបាតុកម្មដែលបង្កការខូចខាតរថយន្តគយចំនួន ៧គ្រឿង និងរងបួសមន្ត្រីសន្តិសុខគយម្នាក់ និងកម្មករអូសរទេះម្នាក់រងរបួសធ្ងន់។ រហូតមកទល់ពេលនេះ សមត្ថកិច្ចខេត្តបន្ទាយមានជ័យ ពុំទាន់ចាប់អ្នកបង្កមកផ្ដន្ទាទោស និងដោះស្រាយបញ្ហាដល់ក្រុមកម្មករនៅឡើយ៕