ក្រុមមន្ត្រីតុលាការ និងសមត្ថកិច្ចជាង ១០នាក់ ដឹកនាំដោយព្រះរាជអាជ្ញារង ខាំ សុផារី នៅថ្ងៃទី០៥ មេសា បានចុះទៅអនុវត្តសាលក្រមបង្ខំឲ្យកាសែត ភ្នំពេញ ប៉ុស្តិ៍ បង់លុយជិត ៣០ម៉ឺនដុល្លារអាមេរិក ទៅឲ្យអតីតបុគ្គលិកម្នាក់ ដែលត្រូវបានកាសែតនេះបណ្ដេញចេញពីការងារ។ អតីតអគ្គនាយកកាសែត ភ្នំពេញ ប៉ុស្តិ៍ លោក គ្រីស ដេវ (Chris Dawe) បានដាក់ពាក្យប្ដឹងកាសែត ភ្នំពេញ ប៉ុស្តិ៍ ក្រោយពេលលោកត្រូវបានបណ្ដេញចេញពីតួនាទី ជាអគ្គនាយក កាលពីឆ្នាំ២០១៥ កន្លងទៅ។
តុលាការនៃរបបលោក ហ៊ុន សែន ទុកពេលចំនួន ២០ថ្ងៃឱ្យកាសែត ភ្នំពេញ ប៉ុស្តិ៍ ទូទាត់សំណង ២៦ម៉ឺនដុល្លារអាមេរិក ទៅឱ្យលោក គ្រីស ដេវ (Chris Dawe) ដែលតុលាការបានកាត់ឱ្យឈ្នះក្ដីក្នុងសំណុំរឿងមួយនេះ។ ប្រសិនបើក្នុងរយៈពេលនេះ កាសែត ភ្នំពេញ ប៉ុស្តិ៍ មិនអនុវត្តតាមសាលក្រមទេ នោះតុលាការនឹងរឹបអូសទ្រព្យសម្បត្តិរបស់ស្ថាប័នព័ត៌មានមួយនេះ ដាក់លក់ឡៃឡុង ដើម្បីទូទាត់សំណងឱ្យដើមបណ្ដឹង។
អាស៊ីសេរីមិនទាន់អាចទាក់ទងអគ្គនាយកកាសែត ភ្នំពេញ ប៉ុស្តិ៍ លោក ម៉ាគុស ហូម (Marcus Holmes) បានទេនៅថ្ងៃទី០៥ មេសា ដើម្បីសុំការឆ្លើយតបជុំវិញការអនុវត្តសាលក្រមរបស់មន្ត្រីតុលាការក្រុងភ្នំពេញនេះ។ វិធានការរបស់តុលាការនៅពេលកើតឡើងបន្ទាប់ពីព័ត៌មានថា កាសែតបរទេសមួយនេះ អាចប្រឈមនឹងការបិទទ្វារ ដោយសារការជំពាក់ពន្ធរដ្ឋជិត ៤លានដុល្លារ។ ប៉ុន្តែ ម្ចាស់កាសែតបរទេសមួយនេះ បានច្រានចោលព័ត៌មាននេះ ដោយអះអាងថា ការជំពាក់ពន្ធរដ្ឋជិត ៤លានដុល្លារនោះ មិនមានអ្វីពាក់ព័ន្ធនឹងរឿងនយោបាយ ឬការបង្ក្រាបលើសេរីភាពសារព័ត៌មានឡើយ ហើយកាសែតមួយនេះកំពុងចរចា និងធ្វើសវនកម្មពាក់ព័ន្ធនឹងប្រាក់ជំពាក់ពន្ធនោះជាមួយរបបក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។