មន្ត្រី​សង្គម​ស៊ីវិល​ទទូច​ដល់​អាជ្ញាធរ​ឲ្យ​ស្វែងរក​ជន​បង្ក​ដែល​បើកឡាន​បុក​មនុស្ស​ស្លាប់​ឲ្យ​បាន​ឆាប់

ដោយ ខាន់ លក្ខិណា
2023.12.30
មន្ត្រី​សង្គម​ស៊ីវិល​ទទូច​ដល់​អាជ្ញាធរ​ឲ្យ​ស្វែងរក​ជន​បង្ក​ដែល​បើកឡាន​បុក​មនុស្ស​ស្លាប់​ឲ្យ​បាន​ឆាប់ រថយន្តហាំម័រ (Hummer) ដែលម្ចាស់បានទុកចោល ក្រោយអ្នកបើកបររថយន្ត​បុកមនុស្សស្លាប់ និងគេចខ្លួន កាលពីថ្ងៃទី២៥ ធ្នូ​ ២០២៣។
រូប៖ ហ្វេសប៊ុកស្នងការនគរបាលរាជធានីភ្នំពេញ

មន្ត្រី​អង្គការ​សង្គម​ស៊ីវិល ទទូច​ដល់​អាជ្ញាធរ​ពន្លឿន​ការស្រាវជ្រាវ​ស្វែងរក​ជន​បង្ក​គ្រោះថ្នាក់​ចរាចរណ៍ ដែល​បាន​បើកឡាន​ទំនើប​បុក​មនុស្ស​ស្លាប់ ដើម្បី​ស្វែងរក​យុត្តិធម៌​ដល់​ក្រុម​គ្រួសារ​ជនរងគ្រោះ ។ ការ​លើកឡើង​នេះ ក្រោយពី​អាជ្ញាធរ​បាន​ឃាត់​រថយន្ត​បង្ក តែ​នៅ​ពុំ​ទាន់​ឃាត់ខ្លួន​អ្នក​បើកបរ​បាន​នៅ​ឡើយ។

គិត​ត្រឹម​ថ្ងៃទី​២៩ ខែធ្នូ​នេះ គឺ​រយៈពេល ៤​ថ្ងៃ​មក​ហើយ បន្ទាប់​ពី​ករណី​គ្រោះថ្នាក់​ចរាចរណ៍ ដែល​បង្កឡើង​ដោយ​រថយន្ត​ទំនើប​ម៉ាក​ហាំម័រ (Hummer) បាន​បើកបរ​ក្នុង​ល្បឿន​លឿន និង​ជ្រុល​បុក​អ្នក​ជិះ​ម៉ូតូ បណ្តាល​ឱ្យ​ស្ត្រី​ម្នាក់ និង​កុមារ​តូច​ម្នាក់​ស្លាប់ ហើយ​បុរស​ដែល​ជា​អ្នក​បើក​ម៉ូតូ រង​របួស​ធ្ងន់ នៅ​សង្កាត់​ស្រះចក ខណ្ឌ​ដូនពេញ កាល​ពី​ថ្ងៃទី​២៤ ឈាន​ចូល​ថ្ងៃទី​២៥ ធ្នូ។ ប៉ុន្តែ​អាជ្ញាធរ​នៅ​ពុំ​ទាន់​បង្ហាញ​អត្តសញ្ញាណ​ជន​បង្ក​នៅ​ឡើយ​ទេ។

នាយក​ទទួលបន្ទុក​កិច្ចការ​ទូទៅ នៃ​អង្គការសិទ្ធិមនុស្ស​លីកាដូ (LICADHO) លោក អំ សំអាត ប្រាប់​វិទ្យុ​អាស៊ីសេរី នៅ​ថ្ងៃទី​២៩ ខែ​ធ្នូ ថា នៅ​ពេល​អាជ្ញាធរ​ឃាត់​រថយន្ត​បង្ក​បាន នោះ​ក៏​អាច​កំណត់​អត្តសញ្ញាណ​ម្ចាស់​រថយន្ត និង​អ្នក​ទទួលខុសត្រូវ​បាន​ដែរ តាមរយៈ​ការ​អនុវត្ត​នីតិវិធី ដោយ​មាន​ការ​ដឹកនាំ​ផ្ទាល់​ពី​ព្រះរាជអាជ្ញា។

លោក​ទទូច​ដល់​អាជ្ញាធរ​ពន្លឿន​ការ​អនុវត្ត​នីតិវិធី​ឲ្យ​បាន​លឿន ដើម្បី​រក​យុត្តិធម៌​ដល់​ជន​រងគ្រោះ ហើយ​ការ​អនុវត្ត​នោះ មិន​ត្រូវ​រង់ចាំ​តែ​បទបញ្ជា​ពី​ថ្នាក់ដឹកនាំ​ប្រទេស​នោះ​ទេ ពោល​គឺ​ត្រូវ​អនុវត្ត​ទៅ​តាម​ច្បាប់។

ការ​លើក​ឡើង​នេះ ធ្វើឡើង​បន្ទាប់​ពី​ស្នងការដ្ឋាន​នគរបាល​រាជធានី​ភ្នំពេញ កាលពី​ថ្ងៃទី​២៧ ខែធ្នូ បាន​ចុះផ្សាយ​នៅ​លើ​ទំព័រ​ហ្វេសប៊ុក​ផ្លូវការ​ថា អាជ្ញាធរ​បាន​រក​ឃើញ​រថយន្ត​បង្កហេតុ ម៉ាក ហាំម័រ (Hummer) ប៉ុន្តែ​អាជ្ញាធរ មិន​បាន​បញ្ជាក់​ពី​ទីតាំង ដែល​បាន​រក​ឃើញ​រថយន្ត​នោះ​ទេ​។ មួយ​វិញ​ទៀត រថយន្ត​នោះ ក៏​បាន​បាត់​ស្លាក​លេខ​ផង​ដែរ​។ អាជ្ញាធរ​បាន​អំពាវនាវ​ឲ្យ​ជន​បង្ក​ចូលខ្លួន​សារភាព​កំហុស។

វិទ្យុ​អាស៊ីសេរី​មិន​ទាន់​អាច​ទាក់ទង ស្នងការ​នគរបាល​រាជធានី​ភ្នំពេញ លោក ជួន ណារិន្ទ និង​អ្នកនាំពាក្យ​ស្នងការ​នគរបាល​រាជធានី​ភ្នំពេញ លោក សាន សុខសីហា ដើម្បី​សុំ​ការ​អត្ថាធិប្បាយ​ជុំវិញ​បញ្ហា​នេះ បាន​នៅ​ឡើយ​ទេ នៅ​ថ្ងៃទី​២៩ ខែធ្នូ ដោយ​ទូរស័ព្ទ​ចូល តែ​គ្មាន​អ្នក​ទទួល។

លោក ជួន ណារិន្ទ ប្រាប់​សារព័ត៌មាន​ហ្វ្រេសញូវ (FreshNews) ដែល​ស្និទ្ធ​នឹង​រដ្ឋាភិបាល​កាល​ពី​ថ្ងៃទី​២៧ ខែ​ធ្នូ ថា រថយន្ត ហាំម័រ បុក​មនុស្ស​២​នាក់​បណ្ដាល​ឲ្យ​ស្លាប់ ហើយ​រត់គេច​នោះ សមត្ថកិច្ច​ជំនាញ បាន​រក​ឃើញ​រថយន្ត​ហើយ ។ លោក​បាន​បញ្ជា​ឲ្យ​ស្រាវជ្រាវ​ដោយ​យកចិត្តទុកដាក់​បន្ត​ទៀត ដើម្បី​ស្វែងរក​អ្នកបើកបរ​មក​ផ្ដន្ទាទោស​តាមច្បាប់។

ទាក់ទង​នឹង​បញ្ហា​នេះ លោកនាយក​រដ្ឋមន្ត្រី ហ៊ុន ម៉ាណែត កាលពី​ថ្ងៃទី​២១ ធ្នូ បាន​ចេញ​បញ្ជា​ទៅកាន់​មន្ត្រី​នគរបាល​ចរាចរណ៍ ត្រូវ​ឃាត់ខ្លួន អ្នក​បើករថយន្ត ដែល​បុក​មនុស្ស​បណ្ដាល​ឱ្យ​ស្លាប់​នៅ​នឹង​កន្លែង ដោយ​មិន​ចាំបាច់​រង់ចាំ​បញ្ជា​ពី​ថ្នាក់លើ​នោះ​ទេ​។ លោក ហ៊ុន ម៉ា​ណែត បន្ត​ថា លោក​នឹង​ការពារ​តួនាទី​មន្ត្រី ដែល​ហ៊ាន​ធ្វើ​បែបនេះ ប្រសិន​បើ​មន្ត្រី​ថ្នាក់លើ ឬ​ជនបង្ក​គំរាមកំហែង​ដក​តួនាទី​មន្ត្រី​នគរបាល​ដែល​អនុវត្ត​ច្បាប់។

ជុំវិញ​រឿង​នេះ ប្រធាន​អង្គការ​តម្លាភាព​កម្ពុជា លោក ប៉ិច ពិសី មាន​ប្រសាសន៍​ថា រដ្ឋាភិបាល គួរតែ​រឹត​បន្តឹង​ការ​អនុវត្ត​ច្បាប់​ចរាចរណ៍​ឲ្យ​បាន​ម៉ឺងម៉ាត់ និង​មិន​លែង​ដល់​ជន​ណា​ទាំងអស់​ទោះជា​ជន​បង្ក និង​អ្នក​ពាក់ព័ន្ធ​មាន​លុយ​មាន​អំណាច​ក៏ដោយ ដើម្បី​កសាង​ទំនុកចិត្ត​ពី​ពលរដ្ឋ ចំពោះ​ការ​ដឹកនាំ​របស់​រដ្ឋាភិបាល និង​កាត់បន្ថយ​អត្រា​មរណភាព របស់​ប្រជាជន​បណ្ដាលមកពី​គ្រោះថ្នាក់​ចរាចរណ៍។

ជនរងគ្រោះ​ទាំង​៣​នាក់ ក្នុង​ហេតុការណ៍​គ្រោះថ្នាក់​ចរាចរណ៍​នោះ រួមមាន​លោកស្រី គ្រួច សាមិត្ត អាយុ ២០​ឆ្នាំ ស្នាក់នៅ​ភូមិ ដីថុយ ឃុំ​ដីថុយ ស្រុក​បាភ្នំ ខេត្តព្រៃវែង និង​កូនក្មេង​អាយុ​២​ឆ្នាំ បាន​បាត់​បង់ជីវិត​នៅ​កន្លែង​កើតហេតុ ស្ថិតនៅ​សង្កាត់​ស្រះចក ខណ្ឌដូនពេញ កាលពី​ថ្ងៃទី​២៤ ឈាន​ចូល​ថ្ងៃទី​២៥ ធ្នូ។ ចំណែកឯ អ្នកបើកបរ​វិញ ត្រូវ​បាន​បញ្ជូន​ទៅ​សង្គ្រោះ​នៅ​មន្ទីរពេទ្យ​កាល់ម៉ែត។

មន្ត្រី​អង្គការ​សង្គម​ស៊ីវិល នៅតែ​ស្នើ​យ៉ាង​ទទូច​ដល់​អាជ្ញាធរ ឲ្យ​ស្វែងរក​ជន​បង្ក​មក​ផ្ដន្ទាទោស​តាម​ច្បាប់ ដើម្បី​ផ្ដល់​យុត្តិធម៌​ដល់​ជនរងគ្រោះ និង​យុត្តិធម៌​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
សង្គម
អ្នក​ឃ្លាំ​មើល​សង្គម​ថា រដ្ឋាភិបាល​លាក់បាំង​គម្រោង​អ្នក​វិនិយោគិន​ក្នុង​ស្រុក​ករណី​ព្រែកជីក​ហ្វូណន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។