តុលាការ​ក្រុង​​ភ្នំពេញ​ឃុំ​ខ្លួន​កូដករ​ណាហ្គាវើលដ៍​​៣​នាក់​​ដាក់​ពន្ធនាគារ​ រឿង​រារាំង​​វិធាន​​សុខាភិបាល​​ប្រឆាំង​​ជំងឺ​កូវីដ​១៩

0:00 / 0:00

តុលាការ​ក្រុង​ភ្នំពេញ​​​ឃុំ​ខ្លួន​​កម្មករ​ណាហ្គាវើលដ៍​ (Naga World)​ ៣​នាក់​​ដែល​​ធ្វើ​កូដកម្ម​កន្លងមក ដាក់​ពន្ធនាគារ​ ពាក់​ព័ន្ធ​នឹង​ការ​រារាំង​វិធាន​សុខាភិបាល​ប្រឆាំង​ជំ​ងី​កូវីដ​១៩។ មន្ត្រី​អង្គការ​សង្គម​ស៊ីវិល​ចាត់​ទុក​ការ​ឃុំ​ខ្លួន​កម្មករ​ណាហ្គាវើលដ៍​បន្ថែម​ទៀត​នេះ ថា​មិន​មែន​ជា​ដំណោះស្រាយ​ ដែល​អាច​បញ្ចប់​វិវាទ​កា​រ​ងារ​​នៅ​​ក្រុមហ៊ុន​​បនល្បែង​មួយ​នេះ​បាន​ទេ។

ចៅ​ក្រម​ស៊ើប​សួរ​នៃ​សាលា​ដំបូង​រាជធានី​ភ្នំពេញអ្នកស្រី អ៊ុក រ៉េតគន្ធា ចេញ​ដីកា​ឃុំ​ខ្លួន​​កូដករ​ណាហ្គាវើលដ៍​​៣​​នាក់ បណ្ដោះ​អាសន្ន​ នៅពន្ធនាគារ​រាជធានី​ភ្នំពេញ ហៅ កាត់​ថា​ប៉េហ្ស៊ី (PJ) នៅ​រសៀល​ថ្ងៃ​ទី​៩ ខែកុម្ភៈ​ ក្រោម​បទ​ចោទ ​«រារាំង​វិធាន​សុខាភិបាល» ត្រង់​​មាត្រា​​១១ នៃ​ច្បាប់​ប្រយុទ្ធ​ប្រឆាំង​ជំងឺ​កូវីដ​-១៩។

វិទ្យុ​អាស៊ី​សេរី​មិន​អាច​សុំ​ការ​បញ្ជាក់​បន្ថែម​រឿង​នេះពី​​អ្នកនាំពាក្យ​តុលាការ​ក្រុង​ភ្នំពេញលោក អ៊ី រិន្ទ បាន​ទេ ដោយ​ហៅ​ទូរស័ព្ទ​តែ​ពុំ​មាន​អ្នក​ទទួល។

ទាក់​ទង​នឹង​រឿង​នេះ នាយក​រង​ទទួល​បន្ទុក​ផ្នែក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ ​(LICADHO)​ លោក អំ សំអាត​ មាន​​ប្រសាសន៍​ថា ការ​ឃុំ​ខ្លួន​ក្រុម​កូដករ​ណាហ្គាវើលដ៍​​៣​​នាក់​​ហើយ​បន្ត​ស្វែង​រក​មនុស្ស​ ៤ ​ទៀត​ ក្នុង​បទ​ចោទ​តែ​មួយ​បែប​នេះ ​មិន​មែន​ជា​ដំណោះស្រាយ​ដែល​អាច​បញ្ចប់​វិវាទ​ការងារ​នៅ​ក្រុមហ៊ុន​បន​ល្បែង​មួយ​នេះ​បាន​ទេ​ ផ្ទុយ​ទៅ​វិញ​ វា​ធ្វើ​ឲ្យ​វិវាទ​នេះ​កាន់​តែ​រីក​ធំឡើង​។

លោក​ស្នើ​សុំ​តុលាការ​ពិនិត្យ​រឿង​នេះ​ឡើង​វិញ ហើយ​ទម្លាក់​ចោល​ការ​ចោទ​ប្រកាន់​ និង​ដោះលែង​ពួកគេ​ឲ្យ​មាន​សេរីភាព​វិញ ព្រោះ​ពួកគេ​បាន​ចូល​រួម​សហការ​តាម​សេចក្ដី​ប្រកាស​របស់​ក្រសួង​សុខាភិបាល ដែល​តម្រូវ​ឲ្យ​ទៅ​ផ្ដល់​សំណាក​ស្វែង​រក​ជំងឺ​កូវីដ​១៩ កាល​ពី​ពេល​កន្លង​មក៖ «ដំណោះស្រាយ​ដែល​ល្អ​បំផុត​សម្រាប់រដ្ឋាភិបាល​ ក៏​ដូច​ជា​ក្រសួង​ស្ថាប័ន​ពាក់​ព័ន្ធ គឺ​ដោះលែង​តំណាង​របស់​កូដករ​ទាំង​អស់​ ទាំង​មុន​ទាំង​ក្រោយ​១១​នាក់​ហ្នឹង។ ហើយ​ដោយ​គ្មាន​លក្ខខណ្ឌ ហើយ​វិល​មក​រក​ការ​ចរចា​ដើម្បី​បញ្ចប់​វិវាទ​ការងារ​រវាង​ក្រុមហ៊ុន​ណាហ្គាវើលដ៍ និង​ក្រុម​កូដករ​ ហ្នឹង​ជា​ដំណោះស្រាយ​ល្អ​បំផុត ដើម្បី​បញ្ចប់​វិវាទ​ហ្នឹង​ដោយ​សន្តិវិធី។ មិន​មានការ​រិះ​គន់​ ហើយ​ពួកគាត់​ក៏​មិន​ត្រូវ​បាន​ទទួល​រក​ភាព​អយុត្តិធម៌​បន្ត​ទៀត​ដែរ»

កាល​ពី​ថ្ងៃ​ទី៥ ខែកុម្ភៈ​ ព្រះ​រាជអាជ្ញា​រង​នៃ​សាលា​ដំបូង​រាជធានី​ភ្នំពេញលោក​ សេង ហៀង​ បាន​ចេញ​ដីកា​បង្គាប់​ឲ្យ​សមត្ថកិច្ច​នាំ​ខ្លួន​កម្មករ​ណាហ្គាវើលដ៍​​ដែល​ធ្វើ​កូដកម្ម ចំនួន​៧​នាក់ ទៅ​សាក​សួរ​នៅ​ការិយាល័យ​ប្រឆាំង​ភេវកម្ម និង​ឧក្រិដ្ឋកម្ម​ឆ្លង​ដែន នៃ​ស្នងការដ្ឋាន​នគរបាល​រាជធានី​ភ្នំពេញ ​ឲ្យ​បាន​មុន​ថ្ងៃ​ទី​១៩ ខែកុម្ភៈ​ ដើម្បី​សាក​សួរ​ពី​ដំណើរ​រឿង​ រារាំង​ដល់​ការ​អនុវត្ត​វិធានការ​សុខាភិបាល។

ការ​ចេញ​ដីកា​នាំ​ខ្លួន​ក្រុម​កូដករ​នេះ ធ្វើ​ឡើង​ស្រប​ពេល​ក្រសួង​សុខាភិបាល​តម្រូវ​ឲ្យ​ក្រុម​កម្មករ​ណាហ្គាវើលដ៍​ដែល​ធ្វើ​កូដកម្ម​ទៅ​ផ្ដល់​សំណាក​ឲ្យ​ក្រុម​គ្រូពេទ្យ​នៅ​កោះ​ពេជ្រ​ រយៈពេល​៣​ថ្ងៃ​ ចាប់​ពី​ថ្ងៃ​ទី​៥ ដល់​ទី​៧ ខែកុម្ភៈ​ កន្លង​មក។

សមត្ថកិច្ច​រាជធានី​ភ្នំពេញ​បាន​ចាប់​ខ្លួន​លោក ជួប ចាន់ណាត ​លោក សេង វណ្ណារិទ្ធ និង​លោក​ សៅ សម្បត្តិ នៅ​យប់​ថ្ងៃ​ទី​៥ ខែកុម្ភៈ​ ក្រោយ​ពេល​ពួក​គេ​ចេញ​ពី​កន្លែង​ផ្ដល់​សំណាក​រក​ជំងឺ​កូវីដ​១៩​ នៅ​មជ្ឈមណ្ឌល​កោះ​ពេជ្រ។ សមត្ថកិច្ច​​កំពុង​ស្វែង​រកចាប់​ខ្លួន​ស្ត្រី​កូដករ​៤​នាក់​ទៀត មាន​កញ្ញា​ អ៊ុក សុភ័ក្រម៉ូលីកា កញ្ញា ម៉េង កាន់នីកា កញ្ញា អេង ស្រីបូ និង​លោក​ស្រី ខេង ចិន្តា។

ប៉ុន្តែ​ស្ត្រី​កូដករ​ទាំង​៤​នាក់​នេះ បាន​ចេញ​មុខ​ឆ្លើយតប​រឿង​នេះ ថា​ពួកគេ​មិន​បាន​គេចវេះ​ការ​តាម​ចាប់​ខ្លួន​ពី​ខាង​សមត្ថកិច្ច​ទេ។ ពួកគេ​អះអាង​ថា​ នឹង​ចូល​ខ្លួន​​បំភ្លឺ​នៅ​ស្នង​ការដ្ឋាន​នគរបាល​រាជធានី​ភ្នំពេញ តាម​ដីកា​បង្គាប់​របស់​តុលាការ ក្រោយ​ធ្វើ​ចត្តាឡីស័ក​​នៅ​ផ្ទះ​រួចរាល់​តាម​វិធាន​សុខាភិបាល។

ក្រុម​កូដករ​ណាហ្គាវើលដ៍​ជិត​១​ពាន់​នាក់​បាន​ផ្ដល់​សំណាក​រក​ជំងឺ​កូវីដ​១៩ ឲ្យ​ក្រុម​គ្រូពេទ្យ​នៃ​ក្រសួង​សុខាភិបាល​រួច​រាល់​អស់​ហើយ។ ពួក​គេ​កំពុង​ធ្វើ​ចត្តាឡីស័ក​នៅ​ផ្ទះ​ រយៈពេល​១០​​ថ្ងៃ​តាម​ការណែនាំ​របស់​គ្រូពេទ្យ។ ចំណែក​កម្មករ​៣៣​នាក់​ដែល​បាន​ធ្វើ​តេស្ត​រក​ឃើញ​​ជំងឺ​កូវីដ​១៩​ ក្នុង​នោះ​៣០​នាក់​ត្រូវ​បាន​បញ្ជូន​ទៅ​ព្យាបាល​នៅ​មណ្ឌល​ចត្តាឡីស័ក​អូឡាំពិក ហើយ​៣​នាក់​សម្រាក​ព្យាបាល​នៅ​ផ្ទះ។

ក្រុម​កូដករ​ ដែល​ជា​បុគ្គលិក​កម្មករ នៅ​ក្រុមហ៊ុន​បនល្បែង​ណាហ្គាវើលដ៍​ ឲ្យ​ដឹង​ថា ​ពួកគេ​មិន​បាន​រារាំង​វិធានការ​របស់​អាជ្ញាធរ​ឡើយ។ កម្មករ​ អះអាង​ថា នឹង​ជួប​ជុំ​គ្នា​​ធ្វើ​កូដកម្ម​ដោយ​អហិង្សា​បន្ត​ទៀត ​ក្រោយ​ពី​​ធ្វើ​ចត្តាឡីស័ក​នៅ​ផ្ទះ​ចប់​តាម​ការ​ណែនាំ​របស់​ក្រសួង​សុខាភិបាល។

ពួកគេ​ បញ្ជាក់​ថា ការ​តវ៉ា​នៅ​ពេល​ខាង​មុខ​នេះ គឺ​ទាមទារ​អោយ​មាន​ការ​ដោះលែង​តំណាង​សហជីព៨នាក់​ ដែល​កំពុង​ជាប់​ពន្ធនាគារ និង​ទម្លាក់​បទ​ចោទ​ហើយ​ដោះលែង​កូដករ​៧​នាក់​ទៀត ដើម្បី​ឲ្យ​ពួកគេ​វិល​ចូល​តុចរចា​ដោះស្រាយ​បញ្ចប់​វិវាទ​ការងារ​ជាមួយ​ក្រុមហ៊ុន ​ត្រឹមត្រូវ​តាម​ច្បាប់ ​ដោយ​ភាព​ស្មោះ​ត្រង់ យុត្តិធម៌ និង​តម្លាភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។