អភិបាលរាជធានីភ្នំពេញ លោក ប៉ា សុជាតិវង្ស ថ្លែងនៅថ្ងៃទី២២ ខែវិច្ឆិកា ឆ្នាំ២០១៣ ថា គណបក្សសង្គ្រោះជាតិ ដែលមិនចូលរួមប្រារព្ធខួប៣ឆ្នាំនៃព្រឹត្តិការណ៍ជាន់គ្នាស្លាប់នៅលើស្ពានពេជ្រ ជាមួយសាលារាជធានីភ្នំពេញ គឺជាការឆ្លៀតយកទុក្ខសោករបស់គ្រួសារអ្នកស្លាប់ ដើម្បីកេងចំណេញនយោបាយ។
លោកថ្លែងយ៉ាងដូច្នេះទៅកាន់ក្រុមគ្រួសារអ្នកស្លាប់ ក្នុងពេលសំណេះសំណាលក្រោយពិធីរាប់បាត្រព្រះសង្ឃ ដើម្បីឧទ្ទិសកុសលជូនវិញ្ញាណក្ខន្ធអ្នកបានស្លាប់ក្នុងព្រឹត្តិការណ៍រត់ជាន់គ្នា នៅលើស្ពានពេជ្រ៖ «រឿងតែមួយធ្វើពិធីបុណ្យពីរ។ រឿងតែមួយធ្វើឲ្យខ្លួនគេ និងសង្គម ចូលជាមួយនឹងបងប្អូនឲ្យបែកគ្នា អ៊ីចឹង នេះជាគោលដៅដើម្បីបំបែកបំបាក់នៅឯកភាពជាតិ»។
គណបក្សសង្គ្រោះជាតិ បានធ្វើពិធីគោរពវិញ្ញាណក្ខន្ធអ្នកស្លាប់ក្នុងព្រឹត្តិការណ៍រត់ជាន់គ្នានៅស្ពានពេជ្រនេះដែរ កាលពីរសៀលថ្ងៃទី២១ ខែវិច្ឆិកា គឺមួយថ្ងៃមុនថ្ងៃគម្រប់ខួបរយៈពេល ៣ឆ្នាំ ដែលកំពុងរៀបចំដោយសាលារាជធានីភ្នំពេញ។
កាលពីយប់ថ្ងៃទី២២ ខែវិច្ឆិកា ឆ្នាំ២០១០ ជាថ្ងៃចុងក្រោយនៃព្រះរាជពិធីបុណ្យអុំទូក បណ្ដែតប្រទីប អកអំបុក សំពះព្រះខែ មានមនុស្សរាប់លាននាក់សម្រុកចូលមកទីក្រុងភ្នំពេញ ដើម្បីចូលរួមកម្សាន្តបុណ្យជាតិនេះ។ ទន្ទឹមនោះ កោះពេជ្រជាតំបន់ពាណិជ្ជកម្មថ្មីមួយ ដែលប្រជាពលរដ្ឋបានល្បីថានឹងបង្កើតទីក្រុងនៅទីនោះ។ ពួកគេទាំងក្មេងចាស់ ចង់ទៅលេងកម្សាន្ត។ ពេលនោះ មនុស្សរាប់ពាន់នាក់ ដើរចេញពីកោះពេជ្រ និងរាប់ពាន់នាក់ ចូលទៅកាន់រមណីយដ្ឋានកោះពេជ្រ កាត់ស្ពានដែកដ៏តូចមួយ។ នៅម៉ោងជាង ៩យប់នោះ មានមនុស្សស្រែកបំភ័យថា ស្ពានពួកគេកំពុងឆ្លងកាត់នឹងដាច់ជាដើម ធ្វើឲ្យមនុស្សកំពុងឆ្លងកាត់ភ័យស្លន់ស្លោរត់ជាន់គ្នា បណ្ដាលឲ្យមានមនុស្សស្លាប់សរុប ៣៥៣នាក់ ក្នុងនោះមានស្រី ២២៣នាក់ ប្រុស ១៣០នាក់។ ក្រុមហ៊ុនធនាគារកាណាឌីយ៉ា (Canadina Bank) ជាអ្នកវិនិយោគកោះពេជ្រ និងសប្បុរសជន រួមទាំងរដ្ឋាភិបាល បានផ្តល់ថវិកាដល់គ្រួសារអ្នកស្លាប់ក្នុងសពម្នាក់ទទួលបានប្រាក់ជាង ១ម៉ឺនដុល្លារអាមេរិក ដើម្បីធ្វើបុណ្យជូនអ្នកស្លាប់ក្នុងព្រឹត្តិការណ៍នោះ។
លោក មុន្នី ថ្លែងទាំងទឹកភ្នែកថា កូនប្រុសតែម្នាក់គត់ឈ្មោះ ប៉ែន ទិត្យារិទ្ធ អាយុ ១៧ឆ្នាំ ជាសិស្សថ្នាក់ទី១០ វិទ្យាល័យសម្ដេច ជា ស៊ីម បឹងកេងកង បានស្លាប់នៅក្នុងព្រឹត្តិការណ៍ជាន់គ្នាលើស្ពានពេជ្រ៖ «សំណូមពរចំពោះថ្ងៃក្រោយ សូមកុំឲ្យមានការធ្វើមានជាស្ពានរំញោច ជាដែក ហើយសាងសង់នេះ គឺមិនបានព្យាករអំពីផលប៉ះពាល់។ អ៊ីចឹងហើយ ធ្វើប៉ះពាល់ចំពោះការបាត់ជីវិតមនុស្សរហូតដល់ ៣០០នាក់ជាង។ ខ្ញុំមានការសោកស្ដាយបំផុត ដែលមានកូនម្នាក់គត់ហើយជាកូនដ៏ល្អ»។
លោកស្រី អេង លក្ខិណា ជាម្តាយយុវជនឈ្មោះ ខឹម ដារ៉ារស្មី អាយុ ១៨ឆ្នាំ សិស្សថ្នាក់ទី១១ ភាសាខ្មែរ និងបានបញ្ចប់សាលាភាសាចិន បានស្លាប់នៅកោះពេជ្រ ថ្ងៃទី២២ ខែវិច្ឆិកា ឆ្នាំ២០១០ ថ្លែងថា ក្រោយពីបាត់បង់កូនប្រុសជាទីស្រឡាញ់ក្នុងព្រឹត្តិការណ៍រត់ជាន់គ្នាលើស្ពានពេជ្រ មក គាត់មិនដែលមកមើលកោះពេជ្រ ទេ។ ទើបតែចៅសង្កាត់អញ្ជើញគាត់ឲ្យមកចូលរួមពិធីបុណ្យបង្សុកូលអ្នកស្លាប់ ដែលរៀបចំដោយសាលារាជធានីភ្នំពេញ ទើបគាត់មានវត្តមានលើកទី១ នៅថ្ងៃនេះ៖ «មូលហេតុរឿងកូនហ្នឹង ខ្ញុំទទួលយកអត់បាន នឹកកូនពេក ហើយកន្លែងហ្នឹង ខ្ញុំមិនដែលមកទេ។ ទើបមកថ្ងៃហ្នឹងទេនេះ»។
លោក ចែម ប៊ុនថា ឪពុកយុវជនឈ្មោះ យង់ សុខចំរើន ហៅ យ៉ា អាយុ ១៧ឆ្នាំ សិស្សថ្នាក់ទី១១ វិទ្យាល័យ ឥន្ទ្រ ទេវី ថ្លែងទាំងទឹកភ្នែកថា លោកអរគុណអាជ្ញាធរសាលារាជធានីភ្នំពេញ បានធ្វើបុណ្យជូនកូនគាត់ ដែលបានស្លាប់នោះ៖ «គឺថាបួងសួង សុំឲ្យកូនខ្ញុំទៅកើតសុគតិភព ឲ្យបានខ្ពង់ខ្ពស់ ធ្វើម៉េចបើនៅជាមួយខ្ញុំ វាបានតែប៉ុណ្ណឹង»។
យុវជន ជឹម សាម៉េត មកពីខេត្តព្រៃវែង ឈរកាន់ផ្កាឈូកទាំងក្រៀមក្រំថា បងស្រីឈ្មោះ ជឹម សារឹម ជាកម្មការិនីរោងចក្រកាត់ដេរ បានស្លាប់នៅកោះពេជ្រ នេះ កាលពីថ្ងៃទី២២ ខែវិច្ឆិកា ឆ្នាំ២០១០។ លោកថា ថវិកាដែលក្រុមហ៊ុនសប្បុរសជន និងរដ្ឋាភិបាលផ្តល់ឲ្យជាង ១ម៉ឺន ២ពាន់ដុល្លារ គាត់បានធ្វើបុណ្យ និងព្យាបាលជំងឺឪពុក ដែលពិបាកចិត្តនឹកកូនស្រីដែលស្លាប់។
ចំណែកលោកស្រី រស់ ផាត មកពីស្រុកបរសេដ្ឋ ខេត្តកំពង់ស្ពឺ ថ្លែងថា ថវិកាដែលរដ្ឋាភិបាល និងសប្បុរសជនផ្តល់ឲ្យគាត់នោះ បានធ្វើបុណ្យជូនកូនស្រីឈ្មោះ នួន ស្រីកុល កម្មការិនីកាត់ដេរស្លាប់នៅកោះពេជ្រ នាថ្ងៃទី២២ ខែវិច្ឆិកា ឆ្នាំ២០១០ និងបានជួយកែប្រែជីវភាពរបស់គ្រួសារគាត់។
គិតមកដល់ពេលនេះ រដ្ឋាភិបាលបានសម្រេចផ្អាកព្រះរាជពិធីបុណ្យអុំទូក បណ្ដែតប្រទីប អកអំបុក សំពះព្រះខែ ក្នុងរយៈពេល ៣ឆ្នាំមកហើយដែរ គឺបន្ទាប់ពីមានព្រឹត្តិការណ៍ជាន់គ្នាស្លាប់នៅកោះពេជ្រ នោះ៕
២៣-វិច្ឆិកា-២០១០: នៅមន្ទីរពេទ្យព្រះកុសុមៈ ប្រជាពលរដ្ឋនាំគ្នាមករកសាច់ញាតិដែលស្លាប់ និងរបួស។ RFA/Khe Sonorng
២៣-វិច្ឆិកា-២០១០: សាកសពជនរងគ្រោះដែលបានស្លាប់ក្នុងឧបទ្ទវហេតុនៅតំបន់កោះពេជ្រ តម្កល់ទុកនៅមន្ទីរពេទ្យព្រះកុសុមៈ ដើម្បីរង់ចាំសាច់ញាតិមកទទួលយក។ RFA/Khe Sonorng
២៣-វិច្ឆិកា-២០១០: សាច់ញាតិជនរងគ្រោះរកមើលសាច់ញាតិខ្លួនដែលបានស្លាប់ នៅមន្ទីរពេទ្យព្រះកុសុមៈ។ RFA/Khe Sonorng
២៣-វិច្ឆិកា-២០១០: អាជ្ញាធរមានសមត្ថកិច្ចបំពេញបែបបទដើម្បីផ្ដល់សាកសពជូនសាច់ញាតិ នៅមន្ទីរពេទ្យកាល់ម៉ែត។ RFA/Tin Zakariya
២៣-វិច្ឆិកា-២០១០: សាកសពជនរងគ្រោះដែលស្លាប់តម្កល់ទុកនៅមន្ទីរពេទ្យកាល់ម៉ែត។ RFA/Tin Zakariya
២៣-វិច្ឆិកា-២០១០: ជនរងគ្រោះដែលបានរួចផុតជីវិតកំពុងសម្រាកព្យាបាលនៅមន្ទីរពេទ្យកាល់ម៉ែត។ RFA/Tin Zakariya
២៣-វិច្ឆិកា-២០១០: ប៉ូលិសរកអត្តសញ្ញាណអ្នកដែលបានស្លាប់នៅមន្ទីរពេទ្យព្រះកេតុមាលា។ RFA/Ouk Savborey
២៣-វិច្ឆិកា-២០១០: ប្រជាពលរដ្ឋរកមើលបញ្ជីឈ្មោះសាច់ញាតិរបស់ខ្លួន នៅក្នុងមន្ទីរពេទ្យព្រះកេតុមាលា។ RFA/Ouk Savborey
អាជ្ញាធរមានសមត្ថកិច្ចធ្វើបញ្ជីស្នាមដើម្បីប្រគល់សាកសពជូនសាច់ញាតិជនរងគ្រោះ នៅមន្ទីរពេទ្យព្រះកេតុមាលា។ RFA/Ouk Savborey
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។