ពលរដ្ឋ​រស់នៅ​ខេត្ត​បាត់ដំបង រិះគន់​អាជ្ញាធរ​យក​ដី​សួនច្បារ​ទៅ​ធ្វើ​ផ្សារ​រាត្រី

ដោយ ឡេង ម៉ាលី
2022.11.29
Share on WhatsApp
Share on WhatsApp
ពលរដ្ឋ​រស់នៅ​ខេត្ត​បាត់ដំបង រិះគន់​អាជ្ញាធរ​យក​ដី​សួនច្បារ​ទៅ​ធ្វើ​ផ្សារ​រាត្រី អភិបាល​ខេត្ត​បាត់ដំបង លោក សុខ លូ។
រូប៖ ហ្វេសប៊ុក​រដ្ឋបាលខេត្ត​បាត់ដំបង

ពលរដ្ឋ​នៅ​ខេត្តបាត់ដំបង រិះគន់​អាជ្ញាធរ​ខេត្ត​នេះ យក​ដី​សួនច្បារ​សាធារណៈ​របស់​រដ្ឋ ទៅ​ធ្វើ​ជា​ផ្សារ​រាត្រី​។ ប្រតិកម្ម​របស់​ពលរដ្ឋ​នេះ ធ្វើឡើង​បន្ទាប់ពី​អាជ្ញាធរ​ខេត្ត​បាត់ដំបង រុះរើ​ដី​សួនច្បារ​មុខ​អតីត​សណ្ឋាគារ​តេអូ ដើម្បី​អភិវឌ្ឍន៍​ទៅជា​ផ្សារ​រាត្រី។ មន្ត្រី​សង្គម​ស៊ីវិល​យល់​ថា អាជ្ញាធរ​ខេត្ត​គួរ​គិតគូរ​ឡើង​វិញ អំពី​សំណូមពរ​របស់​ពលរដ្ឋ និង​គួរ​មាន​កិច្ច​ពិគ្រោះ​យោបល់​ជាមួយ​ពលរដ្ឋ​ជា​មុន​សិន។

ព្រះសង្ឃ ប្រជាពលរដ្ឋ និង​មន្ត្រី​សង្គម​ស៊ីវិល​រស់នៅ​ខេត្ត​បាត់ដំបង សោកស្ដាយ​សួន​សាធារណៈ​ដែល​អាជ្ញាធរ​ខេត្ត​បាន​រុះរើ កាប់ និង​គាស់​ដើម​ផ្កាចំប៉ី​នៅ​លើ​សួន​ចេញ ដែល​ស្ថិតនៅ ភូមិ​កម្មករ ឃុំ​ស្វាយប៉ោ ក្រុង​បាត់ដំបង។ ពួកគាត់​លើកឡើង​ថា កន្លង​មក​សួន​ច្បារ​នេះ តែង​មាន​ដាំ​ផ្កាចំប៉ី​ក្លិនក្រអូប និង​ផ្ដល់​ម្លប់​សម្រាប់​ពលរដ្ឋ​សម្រាក និង​ដើរ​លំហែ​ហាត់ប្រាណ​។ ពួកគាត់​ថា អាជ្ញាធរ​គួរ​គិត​គូ​ពី​ផ្លូវថ្នល់​ខូចខាត គុណភាព​លូ និង​ភ្លើង​បំភ្លឺ​ចរាចរណ៍ ប្រសើរ​ជាង​បំផ្លាញ​ស្នាដៃ​របស់​អភិបាលខេត្ត​ចាស់ៗ​ពីមុន​មក។

ព្រះសង្ឃ​គង់​នៅ​វត្ត​ក្នុង​ក្រុង​បាត់ដំបង ព្រះ​ភិក្ខុ លួម សុគន្ធ ប្រាប់​វិទ្យុ​អាស៊ីសេរី​ថ្ងៃទី​២៨ វិច្ឆិកា ថា ព្រះអង្គ​សោកស្ដាយ​នូវ​ការបាត់បង់​សោភ័ណភាព​បរិស្ថាន​ធម្មជាតិ​ក្នុង​ខេត្ត នៅ​ពេល​មាន​ការ​ឈូស​ឆាយ​សួន​កម្សាន្ត ទៅ​ធ្វើ​ជា​ផ្សារ​រាត្រី​វិញ។ ព្រះអង្គ​មាន​ថេរ​ដីកា​ថា អាជ្ញាធរ​គួរតែ​រក​ដំណោះស្រាយ​ការ​ជួសជុល​ផ្លូវថ្នល់ ដែល​ខូចខាត​ជា ច្រើន​កន្លែង​ប្រសើរ​ជាង។ ព្រះអង្គ​អំពាវនាវ​ឱ្យ​អាជ្ញាធរ​ខេត្ត​នេះ ស្តា​ប្រព័ន្ធ​លូ និង​សិក្សា​រំដោះ​ទឹក​ហូរ​ចេញ​ឱ្យ​ទាន់​ពេលវេលា ជៀសវាង​ជន់​លិច​រៀងរាល់​ឆ្នាំ។

ព្រះ​ភិក្ខុ លួម សុគន្ធ៖ «គឺ​មាន​ការ​សោកស្ដាយ​យ៉ាង​ខ្លាំង​ពរ ដោយសារ​សួនច្បារ​ហ្នឹង​វា​ស្អាត វា​មាន​ធម្មជាតិ​អី​អ៊ីចឹង​ហាស ហើយ​ផ្សារ​នៅ​ខេត្តបាត់ដំបង គឺ​មាន​ច្រើន ដូច​ជា​មាន​ផ្សារ​រោងចក្រ ផ្សារ​នៅ​ផ្សារ​ទំនើប​នៅ​ជិត​វត្ត​ក៏​មាន ហើយ​នៅ​ផ្សារ​ហេង ឆៃលី ផ្សា​របឹង​ឈូក ផ្សារណាត់ អី​ច្រើន​ទៀត ដែល​មិនសូវ​ដំណើរការ​។ អ៊ីចឹង បើ​យើង​ធ្វើជា​ផ្សារ​រាត្រី​មួយទៀត វា​ឃើញថា​ផ្សារ​រាត្រី​ហ្នឹង​វា​ច្រើនពេក ទុកជា​សួន​ហ្នឹង​ល្អ​ពរ»

ស្រដៀង​គ្នា​នេះ​ដែរ ប្រជាពលរដ្ឋ​រស់នៅ​ក្រុង​បាត់ដំបង លោក គឹម សិទ្ធ ថ្លែង​ថា កន្លង​មក​លោក​តែងតែ​ទៅ​អង្គុយ​លេង​នៅមុខ​សួនច្បារ​ផ្កាចំប៉ី​នេះ​ជាប្រចាំ ដើម្បី​បន្ធូរ​អារម្មណ៍​តានតឹង​ពី​ការ​សិក្សា និង​ការងារ ។ លោក គឹម សិទ្ធ បារម្ភ​ពី​ការ​បាត់បង់​កន្លែង​កម្សាន្ត​ធម្មជាតិ​នៅ​ទីប្រជុំជន​នា​ពេល​អនាគត ព្រោះ​សួនច្បារ​សាធារណៈ​ក្នុង​ខេត្ត​មិន​មាន​ច្រើន ហើយ​ធ្វើ​ឱ្យ​សោភ័ណភាព​ខេត្ត​កាន់តែ​បាត់បង់។

លោក គឹម សិទ្ធ៖ «បាត់ដំបង​យើង​វា​អត់​សូវ​មាន​សួនច្បារ​ទេ គឺ​មាន​តែ​សួន ស ខេង ហើយ​និង​សួន​កន្លែង​ហ្នឹង ទាល់​ឥឡូវ​គេ​រើចេញ​ជា​ផ្សារ​វិញ ។ សម្រាប់​ខ្ញុំ ខ្ញុំ​អត់​ពេញចិត្ត​នឹង​ហើយ​បង ដោយសារ​ម្ដុំ​ហ្នឹង​មាន​មន្ទីរពេទ្យ មាន​វត្ត​អារាម​ជិត​ហ្នឹង​ទៀត អ៊ីចឹង​យើង​ធ្វើ​ផ្សារ ធ្វើ​អី​ជិត​ហ្នឹង ក៏​វា​អត់​សូវ​ជា ដូច​អត់​ទំនង​ហាស​បង។ ខេត្ត​បាត់ដំបង​យើង គឺ​វា​មាន​ចន្លោះ​ខ្វះខាត​ច្រើន ដូចជា​ផ្លូវ ដូច​ការ​ដាក់​អំពូល​ភ្លើង​បំភ្លឺ​ផ្លូវ​ពេលយប់​អ៊ីចឹង​ហាស​បង ហើយ​ដី​បាត់ដំបង​គឺ​ធំ ហើយ​យើង​អាច​រើស​ទីតាំង​ផ្សេង​ទៅ​ធ្វើ​ផ្សារ​បាន​។ យើង​អត់​អាច​យក​សួន​ហ្នឹង​សម្រាប់​អ្នក​បាត់ដំបង​ភាគច្រើន​គឺ មិត្ត​ភ័ក្ដិ​ខ្ញុំ អ្នក​ស្គាល់​បងៗ​អី​អ៊ីចឹង គឺ​គេ​អត់​សប្បាយចិត្ត ព្រោះ​ចង់​និយាយ​ថា សួន​ហ្នឹង​ជួយ​លំអ​ក្រុង​ដែរ​អ៊ីចឹង​ហាស»

ចំណែក​យុវជន​ម្នាក់​ទៀត កញ្ញា​សុំ​មិន​បញ្ចេញ​ឈ្មោះ ឱ្យ​ដឹង​ថា កញ្ញា​គាំទ្រ លើ​ការអភិវឌ្ឍន៍ និង​សាងសង់​វិមានឯករាជ្យ ប៉ុន្តែ​សម្រាប់​ការ​ឈូស​ឆាយ​សួនច្បារ ធ្វើជា​ផ្សារ​រាត្រី កញ្ញា​មិន​គាំទ្រ​ឡើយ​។ កញ្ញា​បន្ត​ថា អាជ្ញាធរ​គួរ​កែលំអ​សួន និង​ធ្វើ​ផ្លូវ​ឱ្យ​បាន​ស្អាត ហើយ​មាន​ភ្លើង​បំភ្លឺ​តាម​ដងផ្លូវ​ក្នុង​ទី​ប្រជុំជន​គ្រប់​កន្លែង ទើប​ខេត្ត​មាន​សោភ័ណភាព​បន្ថែម​ទៀត។

«ដល់ពេល​យើង​ចង់​ហាម​ពួកគាត់​ក៏​អត់​ដឹង​ធ្វើ​ម៉េច​ដែរ ព្រោះ​អី ធម្មតា​យើង​ប្រជាជន​យើង​មិន​សូវ​មាន​សិទ្ធិ​ច្រើន​ទេ​បង​។ ហៃ​សម្រាប់​ខ្ញុំ​វិញ អត់​ចង់​ឱ្យ​មាន​ការសាងសង់​ធ្វើ​ផ្សារ​រាត្រី ធ្វើ​អី​ទេ ព្រោះ​ធម្មតា​ផ្សារ​នៅក្នុង​ក្រុង​យើង​វា​ច្រើន ហើយ​ចង់​ឱ្យ​តែ​អភិវឌ្ឍន៍​ផ្លូវ មិន​ថា​ផ្លូវ​ក្នុង​ក្រុង ឬក៏​តាមផ្លូវ​នៅក្នុង​ស្រុក​ឃុំ​មួយ​ចំនួន​ដែល​ខូចខាត​ច្រើន​។ អ៊ីចឹង​ចង់​មាន​សំណូមពរ​ឱ្យ​គាត់​គិតគូរ​រឿង​ហ្នឹង​ច្រើនជាង​រឿង​ធ្វើ​ផ្សារ​រាត្រី​ហ្នឹង»

ពលរដ្ឋ​ថា​គាំទ្រ​ឱ្យ​មាន​ការ​អភិវឌ្ឍ ប៉ុន្តែ​ទីតាំង​ដី​ត្រូវ​អភិវឌ្ឍន៍​មាន​ច្រើនណាស់​មិន​គួរ​យក​ដី​សួនច្បារ​សាធារណ​:​របស់​រដ្ឋ ដែល​តែង​ផ្ដល់​ជាទី​កម្សាន្ត និង​ជាទី​ទាក់ទាញ​ភ្ញៀវ​ទេសចរណ៍​ជាតិ​និង​អន្តរជាតិ​ឡើយ​។ ពួកគាត់​យល់​ថា អាជ្ញាធរ​គួរ​ថែរក្សា កែលំអ និង​អភិរក្ស​អោយ​ដូច​ដើម្បី ទុកជា​តំបន់​ប្រវត្តិសាស្ត្រ​ប្រចាំ​ខេត្ត ហើយ​ចៀសវាង​ការបំផ្លាញ​ស្នាដៃ​អ្នក​ចាស់ និង​ថវិកាជាតិ​ដោយ​សាងសង់ និង​អភិវឌ្ឍន៍​តែ​កន្លែង​ដដែលៗ។

ឆ្លើយតប​រឿង​នេះ អ្នកនាំពាក្យ​សាលា​ខេត្ត​បាត់ដំបង លោក សឿម ប៊ុនរិទ្ធិ បដិសេធ​មិន​ធ្វើ​អត្ថាធិប្បាយ​ជុំ​រឿង​នេះ​ទេ ដោយ​លោក​ឆ្លើយ​ថា កំពុង​ជាប់​រវល់​ប្រជុំ។

លោក សឿម ប៊ុនរិទ្ធិ៖ «អា​ឡូ​ជម្រាប​សួរ! បាទៗ ខ្ញុំ​ជាប់​ប្រជុំ​ជាមួយ​ឯកឧត្ដម​អភិបាល​ខេត្ត​មាន​អី ។ កំពុង​រវល់​បន្តិច​បង កំពុង​រវល់ ! ខ្ញុំ​កំពុង​រវល់!»

ការអភិវឌ្ឍន៍​របស់​អាជ្ញាធរ​នៅ​ទូទាំង​ប្រទេស​ភាគច្រើន មិន​ដែល​ធ្វើ​ប្រជាមតិ ឬ​សិក្សា​ពី​ផល​ប៉ះពាល់​ទាំង​អារម្មណ៍ និង​អចលនវត្ថុ​ផ្សេងៗ​របស់​ពលរដ្ឋ​ពាក់ព័ន្ធ និង​ការអភិវឌ្ឍន៍​ឡើយ។

ជុំវិញ​រឿង​នេះ អ្នកសម្របសម្រួល​ផ្នែក​ឃ្លាំមើល​ការរំលោភ​សិទ្ធិមនុស្ស​នៃ​អង្គការ​លីកាដូ (Licadho) ប្រចាំ​នៅ​ខេត្ត​បាត់ដំបង លោក អ៊ិន គង់ជិត មាន​ប្រសាសន៍​ថា គម្រោង​របស់​រដ្ឋបាល​ខេត្តបាត់ដំបង ដែល​រៀបចំ​ធ្វើ​ផ្សារ​រាត្រី ដើម្បីអោយ​អាជីវករ​មួយចំនួន​នៅ​ផ្សារ​ចាស់ និង​អាជីវករ​លក់ដូរ​នៅ​តាម​មាត់​ស្ទឹង​មក​លក់​នៅ​ផ្សារ​មួយ​នេះ​។ លោក​ថា ពលរដ្ឋ​មាន​សិទ្ធិ​លើកឡើង​ពី​បញ្ហា​ណាមួយ ដែល​ពួកគាត់​មិន​ពេញចិត្ត និង​ចូលរួម​ផ្ដល់​គំនិត​ក្នុង​ការ​អភិវឌ្ឍន៍​សោភ័ណភាព​ខេត្ត​។ លោក​ចាត់ទុក​ការ​លើកឡើង​របស់​ពលរដ្ឋ​រស់នៅ​ខេត្តបាត់ដំបង ជា​រឿង​សម​ហេតុផល ព្រោះ​កន្លងមក​ពលរដ្ឋ​នៅ​តាម​បណ្ដា​ស្រុក​តែង​មក​កម្សាន្ត និង​លំហែ​នៅ​តាម​សួនច្បារ​ក្នុង​ទីប្រជុំ​ខេត្ត។

«​បាទ​ខ្លួន​ខ្ញុំ​ផ្ទាល់​ក៏​មាន​ការ​សោកស្ដាយ​ដែរ ហើយ​ខេត្ត​គួរតែ​ពិនិត្យ​ទៅលើ​ទីតាំង​ដី​ទំនេរ​នៅ​កន្លែង​ផ្សេងទៀត ដែល​អាច​ធ្វើ​ផ្សារ​រាត្រី។ អ៊ីចឹង​ករណី​នេះ ឯកឧត្ដម​អភិបាល​ខេត្ត លោក​គួរតែ​គិតគូរ​ឡើងវិញ ដោយ​ស្ដាប់​នូវ​មតិ​លើកឡើង​របស់​ប្រជាពលរដ្ឋ និង​សំណូមពរ​របស់​គាត់​។ ការ​យកចិត្តទុកដាក់​របស់​ឯកឧត្តម​ក្នុង​ការ​កែលំអ​សោភ័ណភាព​សម្រស់​ទីក្រុង​ហ្នឹង កន្លងមក​ពិតជា​មាន​ភាព​ស្រស់​ត្រកាល​ហើយ ទាក់ទាញ​ភ្ញៀវ​ទេសចរណ៍ ប្រជាពលរដ្ឋ​នៅ​តាម​ជនបទ ចូល​មកលេង​កម្សាន្ត​នៅ​ក្នុង​ពេល​រាត្រី»

កន្លងមក​ផ្សារ​រាត្រី​ក្នុង​ខេត្ត​បាត់ដំបង​មាន​ស្រាប់​ហើយ​នៅ​ទល់មុខ​សួន​នាគ​បាញ់​ទឹក ប៉ុន្តែ​ផ្សារ​នោះ​មិន​សូវ​មាន​ការចាប់អារម្មណ៍​ពី​មហាជន​នោះ​ទេ ព្រោះ​មាន​ផ្សារ​ក្បែរៗ​គ្នា​ច្រើន​នៅក្នុង​ខេត្ត​នេះ​។ សួនច្បារ​ផ្កាចំប៉ី ត្រូវ​បាន​កសាង​ឡើង​ក្នុង​អាណត្តិ លោក អ៊ុង សាមី នៅ​ជា​អភិបាលខេត្ត​បាត់ដំបង និង​លោក សេរី កុសល ជា​អភិបាលរង​ខេត្ត។ សួនផ្កា​ចំប៉ី​មាន​ផ្ទៃដី​ប្រមាណ​ជិត ៤​ពាន់​ម៉ែត្រការ៉េ​(៤០០០)

ប្រជាពលរដ្ឋ និង​មន្ត្រី​សង្គម​ស៊ីវិល ស្នើ​ដល់​រដ្ឋាភិបាល និង​ស្ថាប័ន​ពាក់ព័ន្ធ ពិសេស​អាជ្ញាធរ​ខេត្តបាត់ដំបង ពិចារណា​អភិរក្ស និង​កែលំអ​សួនផ្កា​ចំប៉ី​បន្ថែម​ទៀត និង​បញ្ឈប់​ការ​កាប់​ដើម​ផ្កាចំប៉ី ដើម្បី​ទុក​បន្សាយ​ក្លិនក្រអូប​ក្នុង​ទីក្រុង​ឱ្យ​មាន​ខ្យល់​បរិសុទ្ធ និង​ទាក់ទាញ​ភ្ញៀវ​ទេសចរណ៍៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។