មនុស្ស​ស្លាប់ និង​របួស​ក្នុង​គ្រោះថ្នាក់​ចរាចរណ៍ ក្នុង​អំឡុង​ចូល​ឆ្នាំ​ខ្មែរ​ឆ្នាំ​នេះ កើន​លើស​ឆ្នាំ​មុន ២០នាក់

ដោយ អាស៊ីសេរី
2019-04-16
អ៊ីម៉ែល
មតិ
Share
បោះពុម្ព
ហេតុការណ៍​គ្រោះថ្នាក់​ចរាចរណ៍​រវាង​រថយន្ត​បុក​គ្នា​នៅ​លើ​ផ្លូវ​ជាតិ​លេខ៦ ត្រង់​ចំណុច​ភូមិ​កូប​លិច ឃុំ​កូប ស្រុក​អូរជ្រៅ ខេត្ត​បន្ទាយមានជ័យ នៅ​ថ្ងៃ​ទី១៣ ខែ​មេសា ឆ្នាំ២០១៩។
ហេតុការណ៍​គ្រោះថ្នាក់​ចរាចរណ៍​រវាង​រថយន្ត​បុក​គ្នា​នៅ​លើ​ផ្លូវ​ជាតិ​លេខ៦ ត្រង់​ចំណុច​ភូមិ​កូប​លិច ឃុំ​កូប ស្រុក​អូរជ្រៅ ខេត្ត​បន្ទាយមានជ័យ នៅ​ថ្ងៃ​ទី១៣ ខែ​មេសា ឆ្នាំ២០១៩។
រូប៖ ហ្វេសប៊ុក​អគ្គស្នងការ​នគរបាល​ជាតិ

មនុស្ស​ចំនួន ៥២នាក់​ស្លាប់ និង ១៨៣នាក់ របួស​ធ្ងន់​ស្រាល ដោយ​​គ្រោះ​ថ្នាក់​ចរាចរណ៍ ក្នុង​រយៈ​ពេល​ ៤ថ្ងៃ នៃ​កំឡុង​ពិធី​បុណ្យ​ចូល​ឆ្នាំ​ប្រពៃណី​ខ្មែរ ​ចាប់​ពី​ថ្ងៃ​ទី១៣ ដល់​ថ្ងៃ​ទី១៦ មេសា​។

របាយការណ៍​របស់​ការិយាល័យ​នគរបាល​ផ្លូវ​គោក ​នៃ​អគ្គ​ស្នងការ​នគរបាល​ជាតិ ចេញ​ផ្សាយ​នៅ​ថ្ងៃ​ទី១៦ មេសា បង្ហាញ​ថា ចំនួន​គ្រោះ​ថ្នាក់​ចរាចរណ៍ ៤ថ្ងៃ​ នៃ​កំឡុង​ពិធី​ចូល​ឆ្នាំ​ខ្មែរ​ឆ្នាំ​នេះ ចំនួន​អ្នក​ស្លាប់​កើន​ជាង​ឆ្នាំ​មុន ចំនួន ២០នាក់ គឺ​ឆ្នាំ២០១៨ ស្លាប់ ៣២នាក់ ឯ​ឆ្នាំ២០១៩ ស្លាប់ ៥២នាក់។

អ្នក​រង​របួស​ធ្ងន់​ និង​ស្រាល បាន​កើន​ឡើង​ចំនួន ៧៥ករណី គឺ​ឡើង​ពី ១០៨ករណី ក្នុង​ឆ្នាំ២០១៨ កើន​ដល់ ១៨៣ករណី ក្នុង​ឆ្នាំ២០១៩។ របាយការណ៍​ឱ្យ​ដឹង​ថា មូលហេតុ​នៃ​គ្រោះថ្នាក់​ចរាចរណ៍ គឺ​ដោយសារ​បើក​ហួស​ល្បឿន ច្រើន​ជាង​គេ (៤១ករណី) មិន​ប្រកាន់​ស្ដាំ (១៦ករណី) មិន​គោរព​សិទ្ធិ (១៦ករណី) បត់​គ្រោះ​ថ្នាក់ (១៤ករណី) ស្រវឹង​ស្រា (៨​ករណី) និង​កត្តា​យានយន្ត (២ករណី)។

ខេត្ត ដែល​កើត​គ្រោះ​ថ្នាក់​ច្រើន​ជាង​គេ គឺ​ខេត្ត​កំពង់​ឆ្នាំង ដែល​មាន​អ្នក​ស្លាប់​ចំនួន ៦នាក់ របួស ៨នាក់។ រី​ឯ​ខេត្ត​កំពង់ស្ពឺ​ ស្លាប់ ៥នាក់ ខេត្ត​កណ្ដាល ស្លាប់ ៤នាក់ របួស ១០នាក់ ខេត្ត​ត្បូងឃ្មុំ ស្លាប់ ៤នាក់ របួស ២នាក់ ភ្នំពេញ ស្លាប់ ៤នាក់ របួស ២០នាក់ ពោធិ៍សាត់ ស្លាប់ ៣នាក់ របួស ២២នាក់ ខេត្ត​ក្រចេះ ស្លាប់ ៣នាក់ របួស ៦នាក់ និង​ខេត្ត​បន្ទាយ​មានជ័យ ស្លាប់ ២នាក់ របួស ៨នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល