ក្រសួងមហាផ្ទៃតៃវ៉ាន់ (Taiwan) បានដាក់ប្រទេសចំនួន ៥ នៅអាស៊ីអាគ្នេយ៍ ក្នុងបញ្ជីប្រទេសគោលដៅ ដែលមានងាយនឹងមានគ្រោះថ្នាក់សម្រាប់អ្នកដំណើរ ក្នុងនោះក៏មានកម្ពុជាដែរ។
ប្រទេស៤ទៀត ដែលក្រសួងមហាផ្ទៃតៃវ៉ាន់ដាក់ចូលក្នុងបញ្ជីដែរ នោះគឺប្រទេសថៃ (Thailand) វៀតណាម (Vietnam) មីយ៉ាន់ម៉ា (Myanmar) និងឡាវ (Laos)។
សារព័ត៌មានតៃវ៉ាន់រាយការណ៍ថា ក្រសួងមហាផ្ទៃរបស់តៃវ៉ាន់បានសម្រេចនឹងដាក់សេចក្ដីព្រមាននៅសំបុត្រយន្តហោះអំពីរឿងនេះ សម្រាប់អ្នកធ្វើដំណើរទៅប្រទេសទាំង៥នេះ។ ជាមួយគ្នានេះអ្នកដំណើរក៏គេតម្រូវឱ្យអ្នកដំណើរ ឬអ្នកទេសចរណ៍ទាញយកឯកសារណែនាំពីសុវត្ថិភាពអ្នកដំណើរពីអនឡាញថែមទៀត។
ក្រសួងមហាផ្ទៃតៃវ៉ាន់ដដែលបញ្ជាក់ថា នៅប៉ុន្មានឆ្នាំចុងក្រោយនេះ មានហេតុការណ៍អាក្រក់ពាក់ព័ន្ធនឹងជនជាតិតៃវ៉ាន់ជាច្រើនដែលត្រូវគេអូសទាញឱ្យចូលទៅក្នុងការងារឆបោកតាមអនឡាញ នៅកម្ពុជា ឬនៅប្រទេសមីយ៉ាន់ម៉ា។
បន្ថែមពីនេះ ទីភ្នាក់ងារជាតិអន្តោប្រវេសន៍តៃវ៉ាន់ និងការិយាល័យនគរបាលអាកាសចរណ៍នឹងឈានជំហានបន្ទាប់ទៀតគឺពួកគេនឹងបញ្ឈប់មិនឱ្យអ្នកដំណើរតៃវ៉ាន់ហោះហើរចេញទៅប្រទេសដែលស្ថិតក្នុងចង្កោមប្រទេសពាក់ព័ន្ធនឹងអំពើឆបោកតាមអនឡាញ ដើម្បីទៅចូលរួមជាមួយបណ្ដាញឆបោកតាមអនឡាញ។
កាលពីសប្ដាហ៍មុនអាជ្ញាធរប្រទេសមីយ៉ាន់ម៉ា បានរំដោះជនបរទេសចំនួន ២៦០នាក់ ពីមជ្ឈមណ្ឌលឆបោកតាមអនឡាញ ដែលក្នុងនោះក៏មានជនជាតិតៃវ៉ាន់ ចំនួន៧នាក់ដែរ ដែលត្រូវបានគេបញ្ជូនទៅកោះតៃវ៉ាន់វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។