ប៉ូលិស​និង​ប៉េអិម​នៅ​ខេត្ត​ស្វាយរៀង​ត្រូវ​បាន​ចោទ​ថា​ធ្វើ​ទារុណកម្ម​ពល​រដ្ឋ

មាន​ភ្នាក់ងារ​នគរបាល ឬ​កង​រាជ​អាវុធ​ហត្ថ​មួយ​ចំនួន បាន​ប្រើ​អំពើ​ហិង្សា​បង្ក​របួស​ស្នាម​លើ​ប្រជា​ពល​រដ្ឋ នៅ​ពេល​បំពេញ​តួនាទី។
ដោយ សុខ សេរី
2011.03.30
Share on WhatsApp
Share on WhatsApp

ប្រជា​ពល​រដ្ឋ​នៅ​ស្រុក​រមាស​ហែក ខេត្ត​ស្វាយរៀង បាន​ឲ្យ​ដឹង​នៅ​ថ្ងៃ​ទី​៣០ ខែ​មីនា ថា​ភ្នាក់ងារ​នគរបាល​ចរាចរណ៍ និង​កង​រាជ​អាវុធ​ហត្ថ​ខេត្ត​ស្វាយរៀង បាន​ធ្វើ​ទារុណកម្ម និង​វាយ​ដុំ​ប្រជា​ពល​រដ្ឋ​ឲ្យ​ដួល​សន្លប់ និង​បែក​ក្បាល នៅ​គ្រា​ដែល​បំពេញ​តួនាទី​ឃាត់​គោយន្ត​ប្រជា​ពល​រដ្ឋ​កំពុង​ធ្វើ​ដំណើរ និង​ផាក​ពិន័យ​ប្រជា​ពល​រដ្ឋ ដែល​មិន​ពាក់​មួក​សុវត្ថិភាព និង​គ្មាន​កញ្ចក់​មើល​ក្រោយ​ជា​ដើម។

ប្រជា​ពល​រដ្ឋ​ដែល​រង​ការ​វាយ​ដុំ និង​ធ្វើ​ទារុណកម្ម​នោះ គឺ​មាន​ឪពុក និង​កូនៗ សរុប​ចំនួន ៤​នាក់។ ប្រភព​បាន​អះអាង​ថា សមត្ថកិច្ច​ចម្រុះ​ដែល​ប្រើ​អំពើ​ហិង្សា​នោះ មាន​ចំនួន​ជាង ១០​នាក់ គឺ​ជា​នគរបាល​ចរាចរណ៍ និង​កង​រាជ​អាវុធ​ហត្ថ​ខេត្ត​ស្វាយរៀង។ មាន​ការ​បាញ់​គំរាម​ចំនួន ៣​គ្រាប់ និង​បាន​ដាក់​ខ្នោះ​ដៃ​ជា​ដើម។

ប្រជា​ពល​រដ្ឋ​រង​គ្រោះ​ឈ្មោះ យី ឡន អាយុ​៤៤​ឆ្នាំ ជា​កសិករ​នៅ​ក្នុង​ភូមិ​ថ្នល់​ទទឹង ឃុំ​មុខដា ស្រុក​រមាស​ហែក ខេត្ត​ស្វាយរៀង បាន​ថ្លែង​ប្រាប់​វិទ្យុ​អាស៊ី​សេរី​នៅ​ថ្ងៃ​ទី​៣០ ខែ​មីនា ថា​ភ្នាក់ងារ​សមត្ថកិច្ច​នៅ​មូលដ្ឋាន បាន​ប្រើ​អំពើ​ហិង្សា​យ៉ាង​កំរោល ៖ "ដាក់​ខ្នោះ​កូន​ខ្ញុំ​ដៃ​មក​ក្រោយ ហើយ​គេ​ដឹក​មក​ប៉េអិម​ទៀត កង​រាជ​អាវុធ​ហត្ថ​ស្រុក​ហ្នឹង។ កូន​ខ្ញុំ​សម្លប ដាក់​ខ្នោះ​ដៃ​មក​ក្រោយ។ ខ្ញុំ​សួរ​កូន​ខ្ញុំ​មាន​កំហុស​ប៉ុណ្ណា? ជា​ទោស​ឧក្រិដ្ឋ​ដែរ​អី ដាក់​ខ្នោះ​កូន​ខ្ញុំ​ម្នាក់។ មក​ដាក់​ខ្នោះ​ខ្ញុំ​ដែរ តែ​ខ្ញុំ​រើ​បម្រាស់ ខ្ញុំ​ថា​លោក​ឯង​មិន​ចាំ​បាច់​ដាក់​ខ្នោះ​ខ្ញុំ​ទេ"

សមាជិក​ក្រុម​ប្រឹក្សា​ស្រុក​រមាស​ហែក ខេត្ត​ស្វាយរៀង លោក ឃឹម សា​ផាត អាយុ​៤៧​ឆ្នាំ បាន​មាន​ប្រសាសន៍​ថា លោក​ជំរុញ​ឲ្យ​ជន​រង​គ្រោះ​ដាក់​ពាក្យ​បណ្ដឹង​ទៅ​តុលាការ​ខេត្ត​ស្វាយរៀង នៅ​ពេល​ឆាប់ៗ នេះ ដើម្បី​ផ្ដន្ទា​ទោស​ជន​ល្មើស​ប្រើ​អំពើ​ហិង្សា បង្ក​របួស​ស្នាម ៖ "រឿង​កើត​ហេតុ​ដល់​នេះ​ហើយ មាន​តែ​រឿង​តុលាការ​វិនិច្ឆ័យ ពីព្រោះ​នៅ​ក្នុង​នីតិ​វិធី​ច្បាប់ អត់​មាន​រឿង​ណា​ច្បាប់​ឲ្យ​កម្លាំង​សមត្ថកិច្ច​មក​គំរាម​កំហែង និង​ចាប់​វាយ​ប្រជា​ពល​រដ្ឋ។ យើង​ជា​អ្នក​អនុវត្ត​ច្បាប់ មិន​គួរ​អី​យើង​មក​ចាប់​ចង​ប្រជា​ពល​រដ្ឋ"

សមត្ថកិច្ច​ដែល​ប្រជា​ពល​រដ្ឋ​បាន​ស្គាល់​នោះ មាន​ឈ្មោះ វឿន ភ័ក្រ ជា​កង​រាជ​អាវុធ​ហត្ថ​ខេត្ត​ស្វាយរៀង ជា​ជន​ដៃ​ដល់ និង​ភ្នាក់ងារ​នគរបាល និង​កង​រាជ​អាវុធ​ហត្ថ​ចំនួន ១០​នាក់​ទៀត។

វិទ្យុ​អាស៊ី​សេរី​មិន​ទាន់​អាច​ទាក់ទង​សុំ​សេចក្ដី​ប្រតិកម្ម​បាន​នៅ​ឡើយ ពី​ភ្នាក់ងារ​នគរបាល​ចរាចរ និង​កង​រាជ​អាវុធ​ហត្ថ​ខេត្ត​ស្វាយរៀង ដែល​រង​ការ​ចោទ​ប្រកាន់​នោះ។ ស្នង​ការ​នគរបាល​ខេត្ត​ស្វាយរៀង លោក ប្រាជ្ញ រឹម បាន​បិទ​ទូរស័ព្ទ។ វិទ្យុ​អាស៊ី​សេរី​មិន​អាច​ទាក់​ទង​បាន​ដើម្បី​សុំ​ការ​បំភ្លឺ។

មន្ត្រី​អ្នក​នាំ​ពាក្យ​នៃ​អគ្គ​ស្នងការដ្ឋាន​នគរបាល​ជាតិ​កម្ពុជា លោក ឧត្ដម សេនីយ៍​ឯក គាត ចន្ថារិទ្ធិ បាន​មាន​ប្រសាសន៍​ថា លោក​មិន​ទាន់​បាន​ដឹង​រឿង​នេះ​នៅ​ឡើយ​ទេ។ លោក​បន្ត​ថា ៖ "ឯកឧត្ដម ឧប​ក៏​ដូច​ជា​ឯកឧត្ដម​អគ្គ​ស្នងការ បាន​ផ្ដាំ​ផ្ញើ​ហើយ​ផ្ដាំ​ផ្ញើ​ទៀត ដំបូន្មាន​សូម្បី​តែ​ម្សិល​មិញ​នេះ មាន​ប្រជុំ​វេទិកា​ភូមិ​ឃុំ​សុវត្ថិភាព ក៏​យើង​និយាយ​រឿង​ហ្នឹង​ដែរ។ ធ្វើ​ម៉េច​ឲ្យ​មន្ត្រី​យើង​ហ្នឹង​យក​ចិត្ត​ទុក​ដាក់​ចំពោះ​សុខ​ទុក្ខ​ប្រជា​ពល​រដ្ឋ ថែ​រក្សា​ប្រជា​ពល​រដ្ឋ។ យើង​ការ​ពារ​ប្រជា​ពល​រដ្ឋ យើង​និយាយ​រឿង​ហ្នឹង។ សូម្បី​តែ​សំណូមពរ​ប្រជា​ពល​រដ្ឋ លោក​មាន​សំណូមពរ​អ្វី ត្រូវ​តែ​យក​ចិត្ត​ទុក្ខ​ដាក់​ស្ដាប់"

ជន​រង​គ្រោះ​កំពុង​តែ​សម្រាក​ព្យាបាល​នៅ​មន្ទីរ​ពេទ្យ​ស្រុក​រមាស​ហែក ខេត្ត​ស្វាយរៀង៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។