ក្រុមហ៊ុន Facebook បញ្ចេញឱ្យប្រើប្រាស់នូវទំព័រ និងមុខងារថ្មីចំនួនពីរ

ដោយ សន ចាន់រដ្ឋា
2018-08-04
អ៊ីម៉ែល
មតិ
Share
បោះពុម្ព
រូប​នៃ​មុខងារកំណត់ពេលវេលា​នៅលើកម្មវិធី​ Facebook (រូបភាពពី​ www.newsroom.fb.com)
រូប​នៃ​មុខងារកំណត់ពេលវេលា​នៅលើកម្មវិធី​ Facebook (រូបភាពពី​ www.newsroom.fb.com)
Photo/www.newsroom.fb.com

ក្រុម​ហ៊ុន​នាំ​មុខ​គេ​ខាង​ផ្នែក​បណ្ដាញ​សង្គម គឺ​ក្រុមហ៊ុន Facebook ​នៅ​តែ​បន្ត​កែ​សម្រួល ​និង​អភិវឌ្ឍន៍​​នូវ​មុខងារថ្មីៗ​បន្ថែម​ទៀត​ សម្រាប់​​​អ្នក​ប្រើប្រាស់ និង​បន្ថែម​ទៅ​លើ​កម្មវិធី​ទាំងឡាយ​របស់​ខ្លួន​រួមមាន​ Facebook, Instagram និង WhatsApp ជាដើម

នៅ​ពេល​ថ្មីៗ​ក្រុម​ហ៊ុន​នេះ​ក៏​បាន​ប្រកាសនូវ​ការ​ដាក់​ចេញ​ឲ្យ​ប្រើប្រាស់​នូវ​ទំព័រ និង​មុខងារ​ថ្មី​ចំនួន​ពីរ​បន្ថែម​ទៀត

ក្រុម​ហ៊ុន​ហ្វេសប៊ុក​​ទើប​តែ​ប្រកាស​ដាក់​ឱ្យ​ប្រើប្រាស់​នូវ​ ទំព័រ​បណ្ណាល័យ​ចំណេះ​ដឹង​ផ្នែ​ក​​ប្រព័ន្ធ​ឌីជីថល និង​គ្រោង​បញ្ចេញ​មុខងារ​ថ្មី​មួយ​ទៀត​សម្រាប់​កម្មវិធី Facebook និង Instagram គឺ​ទាក់​ទង​​នឹង​​មុខងារ​កំណត់​ពេល​វេលា​ដែល​បាន​ចំណាយ​លើ​​ Facebook និង Instagram។

មុខងារ​សម្រាប់​កំណត់​ពេលវេលា​ដែលបានចំណាយ​លើ​​ហ្វេសប៊ុក និងអ៊ីនស្តាក្រាម ដែល​ក្រុមហ៊ុន​ហ្វេសប៊ុក​បាន​ប្រកាស​កាល​ពី​ថ្ងៃ​ទី ០១ ខែ​សីហា​ថា​ នឹង​​បង្ហាញ​ពី​ពេល​វេលាដែល​អ្នក​ប្រើប្រាស់​បាន​ចំណាយ​ជា​មធ្យម និង​មុខងារ​គ្រប់គ្រង​ពេលវេលា តាមរយៈ​ការកំណត់ម៉ោង​សម្រាប់​ខ្លួន​ឯង និងកំណត់​​សារ​ជូន​ដំណឹងចេញ​ពី​កម្មវិធី ទាំង Facebook និង Instagram។

អ្នក​ប្រើប្រាស់​កម្មវិធី​Facebook និង Instagram​នឹង​បាន​ឃើញ​មុខងារថ្មីនេះ នៅ​ក្នុង​Settings” របស់​កម្មវិធី​​ទាំង​ពីរ​នេះសម្រាប់​កម្មវិធី​ Instagram នឹង​បង្ហាញ​នូវ​ពាក្យ​មួយ​ឃ្លាថា “Your Activity” ចំណែក​ក្នុង​កម្មវិធី​ Facebook នឹង​បង្ហាញ​នូវ​ពាក្យ​មួយ​ឃ្លាថា “Your time on Facebook”។

ក្នុង​ផ្ទាំង​មុខងារថ្មីនេះ អ្នក​ប្រើប្រាស់​កម្មវិធី​ទាំងពីរ​អាច​ធ្វើ​ការ​កំណត់​ពេល​វេលា​ជាក់​លាក់​ណា​មួយ ដើម្បី​ឲ្យ​កម្មវិធី​រម្លឹកអ្នក​ប្រើប្រាស់​ថា​ដល់​ម៉ោងត្រូវ​ឈប់​ហើយ និង​កំណត់​ចំនួន​ម៉ោង​ ដែល​កម្មវិធី ត្រូវ​បិទ​រាល់​ការជូនដំណឹង​ទាំង​ឡាយ ដែល​បាន​ផ្ញើ​មក រហូត​ដល់​ពេល​វេលា​ដែល​អ្នក​បាន​កំណត់

បើ​ទោះ​បី​ជាអ្នក​ប្រើប្រាស់​បាន​បិទការ​ជូនដំណឹងទាំង​នោះ​ក្តី ក៏​ប៉ុន្តែ​ការ​ជូន​ដំណឹងទាំង​នោះនៅ​តែ​រក្សាទុក​នៅ​ដដែលនៅ​ត្រង់​ចំណុច Notification។

ក្រុមហ៊ុន​បណ្ដាញ​សង្គម​ហ្វេសប៊ុក បាន​ឱ្យដឹង​តាមរយៈ​ការ​ចេញ​ផ្សាយ​របស់​ខ្លួន កាល​ពី​ថ្ងៃទី ០១ ខែ​ សីហា ថា​ការ​បង្កើត​មុខងារ​ថ្មី ដើម្បី​ជួយ​ឲ្យ​អ្នក​ប្រើប្រាស់​ចេះ​គ្រប់គ្រង​ពេល​វេលា​របស់​ខ្លួនដែល​ចំណាយនៅ​លើ​Facebook និង Instagram​នេះ ដោយ​មាន​ការ​ជំរុញ​ និង​សហការ​ជា​មួយ​​អ្នក​ជំនាញ​ផ្នែក​សុខភាព​ផ្លូវ​ចិត្ត និង​ក្រុម​អង្គការ អ្នក​សិក្សា​ស្រាវ​ជ្រាវ​ ដែល​បាន​ផ្ដល់​ជា​យោបល់នៅ​ក្នុង​សហគមន៍​​។ ក្រុមហ៊ុនហ្វេសប៊ុក​មានបំណងចង់​ឲ្យ​ ពេល​វេលារបស់​អ្នក​ប្រើប្រាស់​ដែល​បាន​ចំណាយ​ទៅ​លើកម្មវិធី​Facebook និង Instagram​ត្រូវ​តែ​គោល​បំណង ភាព​វិជ្ជមាន និង​មាន​ការ​ជំរុញ​លើក​ទឹក​ចិត្ត។

របាយការណ៍​ត្រី​មាស​របស់​ក្រុមហ៊ុន​ Facebook បង្ហាញ​ថារៀង​រាល់​ថ្ងៃ​មាន​អ្នកបើក​ប្រើប្រាស់​ហ្វេសប៊ុក​ជា​មធ្យម​ជាង មួយ​ពាន់​លាន។ ចំណែក​នៅ​កម្ពុជាមាន​អ្នក​បើក​ប្រើប្រាស់​សកម្ម​ជាង​ប្រាំពីរ​លាន​គណនី។

កំណើន​នៃ​អ្នក​ប្រើប្រាស់​កម្មវិធី​Facebook និង Instagram​យ៉ាង​ច្រើន ជា​រៀង​រាល់​ឆ្នាំ​នេះ បាន​ធ្វើ​ឲ្យ ក្រុមហ៊ុនហ្វេសប៊ុកបានក្លាយជា​ក្រុមហ៊ុន​ដែលនាំមុខគេខាង​ផ្នែកកម្មវិធី​បណ្ដាញ​សង្គមនៅ​លើ​ពិភព​លោក។

ស្រប​ពេល​ដែល​ក្រុមហ៊ុនមួយនេះ​ទទួល​បាន​ប្រជាប្រិយភាព និង​មានអ្នក​ប្រើប្រាស់​នាំ​មុខ​គេ​នេះ​ ក្រុមហ៊ុន​ Facebook ​​បាន យល់​ថាខ្លួន​មាន​ទំនួល​ខុស​ត្រូវក្នុង​ការ​ជួយ​ដល់​អ្នក​ប្រើ​ប្រាស់ ​ឱ្យ​បាន​យល់​ដឹង​ថា​តើ ពេល​វេលា​ច្រើន​ប៉ុណ្ណា​ដែល​អ្នក​ប្រើប្រាស់​បាន​ចំណាយនៅ​លើកម្មវិធី​ដែល​ពួក​គេ​បាន​បង្កើត។

ចំណែក​ទំព័របណ្ណាល័យ​ចំណេះដឹងផ្នែ​ក​​ប្រព័ន្ធឌីជីថល ដែល​បាន​ប្រកាសដំណើរ​ការ​ជា​ផ្លូវការ​កាល​ពី​ថ្ងៃ​ទី ០២ ខែ​សីហា​នេះគឺ​ជា​បណ្ដុំ​នៃ​មេរៀនដែល​ជួយ​ដល់​យុវជនក្នុង​ការ​គិត​ឱ្យ​​បាន​ស៊ី​ជម្រៅ និង​ចែកចាយ​អ្វី​មួយ​នៅ​លើ​អ៊ីនធឺណិតដោយ​មាន​ការ​ពិចារណា។

ទំព័រ​ថ្មី​នេះមាន​មេរៀន​ចំនួន​១៨ ដែល​ផ្ដោត​ទៅ​លើឯក​ជន​ភាព និង​កេរ្តិ៍ឈ្មោះ ការ​រុករក​អត្តសញ្ញាណ ឥរិយាបថ​ជា​វិជ្ជមាន សុវត្ថិភាព និង​ការ​ចូល​រួម​ក្នុង​សហគមន៍។

មេរៀន​ទាំង ១៨ ដែល​មាននៅ​លើ​ទំព័របណ្ណាល័យ​ចំណេះ​ដឹង​ផ្នែក​ប្រព័ន្ធ​ឌីជីថល​នេះ បច្ចុប្បន្ន​កំពុង​ដំណើរ​ជា​ភាសា​អង់គ្លេស និង​គ្រោង​ដំណើរការ​ជា​ភាសា​ផ្សេង​ទៀត​ចំនួន ៤៥ភាសា​ក្នុង​ពេល​ឆាប់ៗ​។

ការ​ចុះផ្សាយ​របស់​ក្រុមហ៊ុន​ Facebookបាន​ឱ្យ​ដឹង​ថា ទំព័រ​បណ្ណាល័យ​ចំណេះ​ដឹង​ផ្នែក​ប្រព័ន្ធ​ឌីជីថល​នេះ​គឺ​ជាទំព័រ​ចុង​ក្រោយ​បំផុត ដែល​បាន​បន្ថែម ទៅ​ក្នុង​ទំព័រ​ មជ្ឈមណ្ឌល​ចំណេះដឹង​ផ្នែក​សុវត្ថិភាព។ ទំព័រ​ថ្មី​នេះ​ត្រូវ​បាន​បញ្ចូល​ទៅ​ក្នុង​មជ្ឈមណ្ឌល​ចំណេះដឹង​ផ្នែក​សុវត្ថិភាព​ ទំព័រ​​ព័ត៌មាន និង​ចំណេះ​ដឹង​សម្រាប់​យុវជន ឬ​ហៅថា Youth Portal

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល