សហព័ន្ធ​ខ្មែរ​កម្ពុជា​ក្រោម​ពិភពលោក​បង្កើត​យុទ្ធនាការ​ផ្តល់​សៀវភៅ​ដល់​កូន​ខ្មែរ​ក្រោម​នៅ​លើ​ទឹកដី​កំណើត

ដោយ យន់ សាមៀន
2020-03-01
អ៊ីម៉ែល
មតិ
Share
បោះពុម្ព
ព្រះសង្ឃ​ខ្មែរ​ក្រោម ទទួល​បាន​សៀវភៅ​សម្រាប់​បង្រៀន​អក្សរ​ខ្មែរ នៅ​ខ្មែរ​ក្រោម។
ព្រះសង្ឃ​ខ្មែរ​ក្រោម ទទួល​បាន​សៀវភៅ​សម្រាប់​បង្រៀន​អក្សរ​ខ្មែរ នៅ​ខ្មែរ​ក្រោម។
រូបភាព​ពី សហព័ន្ធ​ខ្មែរ​កម្ពុជា​ក្រោម​ពិភពលោក

សហព័ន្ធ​ខ្មែរ​កម្ពុជា​ក្រោម​ពិភព​បាន​បង្កើត​យុទ្ធនាការ​ផ្តល់​សៀវភៅ​សិក្សា​អក្សរ​ខ្មែរ​ដល់​កូន​ខ្មែរ​ក្រោម នៅ​ទឹកដី​ខ្មែរ​កម្ពុជា​ក្រោម ដើម្បី​អាច​ឱ្យ​ពួកគេ​អាច​រៀន​ភាសា និង​អក្សរ​ខ្មែរ​បាន​។ យុទ្ធនាការ​នេះ បាន​ចាប់ផ្តើម​តាំងពី​ឆ្នាំ​២០១៨​ មក ហើយ​បាន​បង្រៀន​កូន​ខ្មែរ​កម្ពុជា​ក្រោម​រាប់ពាន់​នាក់​ឱ្យ​ចេះ​ភាសា និង​អក្សរ​ខ្មែរ​។ នៅ​ដើម​ឆ្នាំ​២០២០​នេះ សហព័ន្ធ​ខ្មែរ​កម្ពុជា​ក្រោម​ពិភព​បាន​ផ្ញើ​សៀវភៅ​សិក្សា​ចំណោះ​ដឹង​ទូទៅ​បាន ៥​ពាន់​ក្បាល​ទៅដល់​សិស្ស​ខ្មែរ​ក្រោម។

មន្ត្រី​ជាន់ខ្ពស់ សហព័ន្ធ​ខ្មែរ​កម្ពុជា​ក្រោម​ពិភពលោក​ឱ្យ​ដឹង​ថា តាមរយៈ​យុទ្ធនាការ​ប្រមូល​ថវិកា​ទិញ​សម្ភារៈ​សិក្សា និង​សៀវភៅ​ជូន​សិស្ស​នៅ​កម្ពុជា​ក្រោម​រយៈពេល​ពីរ​ឆ្នាំនេះ កូន​ខ្មែរ​ក្រោម​រាប់​ម៉ឺន​នាក់ បាន​សិក្សា​អក្សរសាស្ត្រ និង​ភាសា​ខ្មែរ​។ ប្រធាន​ប្រតិបត្តិ​សហព័ន្ធ​ខ្មែរ​កម្ពុជា​ក្រោម​ពិភពលោក ​លោក ថាច់ ង៉ុកថាច់ មាន​ប្រសាសន៍​ប្រាប់​អាស៊ីសេរី​ថា អង្គការ​របស់​លោក បាន​ចំណាយ​ថវិកា​ក្នុង​មួយ​ឆ្នាំ ប្រមាណ ៨​ពាន់​ដុល្លារ ចាប់ពី​ឆ្នាំ​២០១៨ ហើយ​គ្រោង​នឹង​បង្កើន​ថវិកា រហូតដល់​មួយ​ម៉ឺន​ដុល្លារ​សម្រាប់​ឆ្នាំ២០២០​ នេះ​។ លោក ថាច់ ង៉ុកថាច់ មាន​ប្រសាសន៍​ថា ការ​ផ្ដល់​ចំណោះ​ដឹង​ផ្នែក​ភាសា​ដល់​កុមារ​ខ្មែរ​ក្រោម នឹង​ជំរុញ​ឱ្យ​ខ្មែរ​ក្រោម​អាច​រក្សា​អត្តសញ្ញាណ​ខ្មែរ​ក្រោម​ទៅ​ថ្ងៃ​អនាគត​បាន​៖ «​ភាសា​ខ្មែរ​ខ្ញុំ​គិត​ថា មិន​អាច​បាត់បង់​បានទេ ព្រោះ​ពីមុន​រដ្ឋាភិបាល​យួន​ហ្នឹង​បាន​គាបសង្កត់​គ្រប់​ជ្រុងជ្រោយ​ទាំងអស់​នៅតែ​ភាសា​ហ្នឹង​មិន​បាត់បង់​។ រដ្ឋាភិបាល​វៀតណាម​ឥឡូវនេះ ត្រូវការ​ជំនួយ​ពី​អន្តរជាតិ​ដើម្បី​ស្ដារ​សេដ្ឋកិច្ច ដូច្នោះ​ត្រូវតែ​គោរព​សិទ្ធិ​ជនជាតិ​នីមួយៗ»

កម្មវិធី​ផ្ដល់​សៀវភៅ​របស់​សហព័ន្ធ​ខ្មែរ​កម្ពុជា​ក្រោម​ពិភពលោក ដល់​កុមារ​ខ្មែរ​ក្រោម​នេះ គឺ​ចាប់ពី​ថ្នាក់​ទីមួយ​រហូតដល់​ឆ្នាំ​ទី៧ នៅ​ខេត្ត​ចំនួន​៥​។ សៀវភៅ​សិក្សា​ទាំងអស់​នោះ គឺជា​សៀវភៅ​បង្រៀន​​ចំណេះដឹង​ទូទៅ​របស់​ក្រសួង​អប់រំ​នៅ​ព្រះរាជាណាចក្រ​កម្ពុជា​។ ការ​ផ្តល់​សៀវភៅ​នេះ ធ្វើឡើង​តាមរយៈ​ព្រះសង្ឃ ដែល​ជា​គ្រូ​បង្គោល​នៅ​តាម​វត្ត​ចំនួន ៣០​វត្ត​។ ក្រៅពី​ផ្ដល់​សៀវភៅ​សិក្សា សហព័ន្ធ​ខ្មែរ​កម្ពុជា​ក្រោម​ពិភពលោក​ក៏​ផ្ដល់​អាហារូបករណ៍​ដល់​ព្រះសង្ឃ​ខ្មែរ​ក្រោម​ដើម្បី​អាច​ទៅ​សិក្សា​នៅ​បរទេស​ទៀត​ផង។

លោក ថាច់ ង៉ុកថាច់ សង្ឃឹម​ថា តាមរយៈ​ការ​ផ្តល់​សៀវភៅ​សិក្សា​នេះ អក្សរសាស្ត្រ​ខ្មែរ​នឹង​មិន​បាត់បង់​នៅ​លើក​ទឹកដី​កម្ពុជា​ក្រោម​ឡើយ​៖ «បើ​កុមារ​ខ្មែរ​យើង​មិន​ចេះ​ភាសា​កំណើត​យើង តើ​យើង​សម្រេច​យ៉ាង​ម្ដេច ដូច្នោះ​យើង​ត្រូវ​កុមារា និង​កុមារី ព្រះសង្ឃ​ត្រូវ​មាន​ជំហរ​ដដែល ខ្ញុំ​ជឿ​ថា កាលណា​កូនៗ​ខ្មែរ​ក្រោម មានការ​ចេះដឹង លទ្ធិ​ប្រជាធិបតេយ្យ​នៅ​ប្រទេស​វៀតណាម​ក៏​មាន​ក៏​មានការ​ទូលំទូលាយ»

ព្រះសង្ឃ​មួយ​អង្គ​គង់នៅ​ខេត្ត​ព្រះ​ត្រពាំង មាន​ថេរ​ដីកា​ថា កូន​ខ្មែរ​កម្ពុជា​ក្រោម​ចូលចិត្ត​រៀន​ភាសា​ខ្មែរ​។ ពួកគេ​តែង​តែ​មក​រៀន​ជា​រៀងរាល់ថ្ងៃ​។ ព្រះអង្គ​កត់សំគាល់​ថា ឪពុកម្ដាយ​កុមារ​ខ្មែរ​ក្រោម​ក៏​ជំរុញ​ឱ្យ​កូនៗ របស់​ពួកគេ​មក​សិក្សា​ផង​ដែរ ហើយ​កុមារា និង​កុមារី បាន​មក​សិក្សា​អក្សរ​ខ្មែរ​ដូចគ្នា​៖ «​សំខាន់​យើង​ត្រូវ​សិក្សា​រៀន​សូត្រ អក្សរសាស្ត្រ​ខ្មែរ​យើង​ខាងដើម​។ កូន​ខ្មែរ​យើង​ចាំបាច់​ត្រូវតែ​រៀន​តាំងពី​ថ្នាក់​ទីមួយ ពីរ និង​បី​រហូត​។ យើង​ការរៀនសូត្រ​ឱ្យ​ចេះ​ច្បាស់​ហ្នឹង គឺ​យើង​រក្សា​អត្តសញ្ញាណ​ជាតិ​របស់​យើង​ហើយ​»​។​

ព្រះសង្ឃ​ស្នើ​ឱ្យ​ពលរដ្ឋ​ខ្មែរ​ក្រោម​ចូលរួម​បរិច្ចាគ​ថវិកា ទិញ​សម្ភារៈ​សិក្សា​ដល់​កូន​ខ្មែរ ដើម្បី​រក្សា​អក្សរសាស្ត្រ​ខ្មែរ​ទៅ​អនាគត​៖ «​បើ​យើង​រៀន​គ្មាន​សៀវភៅ យើង​រៀន​មិន​ចេះ​។ អាត្មា​សង្ឃឹមថា យើង​នឹង​ចេះ​ជួយ​ជ្រោមជ្រែង​គ្នា»

លោក ថាច់ ង៉ុកថាច់ អះអាង​ថា ទោះបី​អាជ្ញាធរ​វៀតណាម​ហាក់​បន្ធូរបន្ថយ​ការ​រឹតត្បិត​លើ​សិទ្ធិ​សេរីភាព​សិក្សា​ភាសា​ខ្មែរ​ក៏ដោយ ប៉ុន្តែ ការ​ចែកចាយ​សៀវភៅ​ភាសា​ខ្មែរ​នេះ ធ្វើឡើង​ក្នុង​លក្ខណៈ​លាក់លៀម​នៅឡើយ​ទេ​។ លោក​ថា នៅ​តាម​ព្រំដែន​អាជ្ញាធរ​វៀតណាម​នៅតែ​បន្ត​ហាមឃាត់​មិន​ឱ្យ​យក​សៀវភៅ​ខ្មែរ​ចូល​ដដែល​។ លោក ថាច់ ង៉ុកថាច់ ឱ្យ​ដឹង​ថា អង្គការ​របស់​លោក​នឹង​ធ្វើ​កម្មវិធី​មួយ​ក្នុង​ឱកាស​បុណ្យ​ឆ្នាំ​ថ្មី នៅ​ថ្ងៃទី១២ ​ខែ​មេសា​ខាងមុខ នៅ​ទីក្រុង​ឡងប៊ិច ​ដើម្បី​អំពាវនាវ​រក​ថវិកា​ទិញ​សៀវភៅ​ភាសា​ខ្មែរ​ជួយ​ដល់​កូនចៅ​ខ្មែរ​ក្រោម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល