សហព័ន្ធខ្មែរកម្ពុជាក្រោមស្នើកុំឱ្យខ្មែរក្រោម ចាញ់សម្លុតអាជ្ញាធរវៀតណាមពេលទៅលេងស្រុកកំណើត
2020.02.23
ព្រះតេជគុណ សឺន ទី ព្រះសង្ឃខ្មែរក្រោម ដែលអាជ្ញាធរវៀតណាមដកលិខិតឆ្លងដែនខ្មែររបស់ព្រះអង្គ កាលពីថ្ងៃទី២ ខែកុម្ភៈ ឆ្នាំ២០២០។
រូប៖ ពលរដ្ឋ
មន្ត្រីសហព័ន្ធខ្មែរកម្ពុជាក្រោមអះអាងថា អាជ្ញាធរវៀតណាមបន្តធ្វើទុក្ខបុកម្នេញពលរដ្ឋខ្មែរក្រោម ដែលធ្វើដំណើរទៅលេងស្រុកកំណើត តាមរយៈការបង្ខំឱ្យធ្វើកិច្ចសន្យាមិនប្រឆាំងទាមទារវៀតណាម ដើម្បីរំដោះទឹកដីកម្ពុជាក្រោមវិញ។
មន្ត្រីព័ត៌មានសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិកឱ្យដឹងថា វៀតណាមបានចាប់ផ្តើមធ្វើយុទ្ធនាការ គំរាមកំហែងពលរដ្ឋខ្មែរក្រោម ដែលធ្វើដំណើរទៅសួរសុខទុក្ខបងប្អូន និងឪពុកម្ដាយដែលកំពុងរស់នៅលើទឹកដីកំណើតលើទឹកដីកម្ពុជាក្រោម។ កាលពីថ្ងៃទី២០ ខែកុម្ភៈ អាជ្ញាធរវៀតណាម នៅខេត្តឃ្លាំង ដែលក្រោយមកវៀតណាមប្តូរឈ្មោះទៅជាខេត្តសុកត្រាំង បានកោះហៅពលរដ្ឋខ្មែរក្រោមម្នាក់ ជាខ្មែរអាមេរិកាំង ទៅសួរចម្លើយពេលលោកទៅលែងស្រុកកំណើត។ មន្ត្រីវៀតណាមបានសាកសួរ លោកអស់រយៈពេល ប្រមាណ ៣ម៉ោង និងបង្ខំឱ្យលោកធ្វើកិច្ចសន្យាមិនប្រឆាំងនឹងរដ្ឋាភិបាលវៀតណាម ទើបអាចវិលត្រឡប់ទៅផ្ទះវិញបាន។
ព្រះភិក្ខុ សឺង យ៉ឹងរតនា មន្ត្រីព័ត៌មានសហព័ន្ធខ្មែរកម្ពុជាក្រោម និងជាព្រះចៅអធិការវត្តខេមររង្សី នៅទីក្រុងសាន់ហូស្សេ រដ្ឋកាលីហ្វ័រញ៉ា (California) មានថេរដីកាថា អាជ្ញាធរវៀតណាមបានបង្ខំនិងលួងលោមខ្មែរក្រោមមកពីកម្ពុជា និងសហរដ្ឋអាមេរិកកុំឱ្យធ្វើសកម្មភាពប្រឆាំង នឹងវៀតណាម ដោយសន្យាឱ្យផលប្រយោជន៍។ ព្រះអង្គបន្ត ទង្វើរបស់វៀតណាមជា ការរំលោភបំពានសិទ្ធិមនុស្ស ពីព្រោះពលរដ្ឋខ្មែរក្រោមមិនបានបង្កអំពើហិង្សា ឬប្រើប្រាស់មធ្យោបាយហិង្សាដើម្បីទាមទារសិទ្ធិស្វ័យសម្រេចនោះទេ៖ «ការធ្វើទៅលើពលរដ្ឋខ្មែរក្រោមយើង ដែលធ្វើដំណើរពីអាមេរិក ក្រៅប្រទេស ក៏ដូចពីកម្ពុជា ចុះទៅស្រុកកំណើតសួរសុខទុក្ខឪពុកម្ដាយ ឬវត្តអារាមនៅលើទឹកដីកម្ពុជាក្រោម ហើយរដ្ឋអំណាចវៀតណាមតែងតែកោះហៅ និងគំរាមកំហែង ហៅទៅសួរចម្លើយជាការរំលោភសិទ្ធិមនុស្សចំពោះពលរដ្ឋខ្មែរក្រោម»។ព្រះអង្គបន្តទៀតថា វៀតណាមចាប់ផ្ដើមលាបពណ៌សហព័ន្ធខ្មែរកម្ពុជាក្រោម ដែលជាអង្គការនយោបាយស្របច្បាប់ដែលមានមូលដ្ឋាននៅអាមេរិកដើម្បីតស៊ូមតិ ទាមទារសិទ្ធិស្វ័យសម្រេចឱ្យពលរដ្ឋខ្មែរក្រោមទៅថ្ងៃអនាគត៖ «និយាយរួមគេរៀបរាប់ អំពីសកម្មភាពរបស់សហព័ន្ធខ្មែរកម្ពុជាក្រោម នៅក្រៅប្រទេសហ្នឹង គេទាញយកហេតុផលផ្សេងៗរបស់សហព័ន្ធ ហើយគេពន្យល់ថា សហព័ន្ធធ្វើហ្នឹងដើម្បីប្រឆាំងប្រទេសវៀតណាម ដើម្បីរំដោះទឹកដី»។
សហព័ន្ធខ្មែរកម្ពុជា កាលពីខែមិថុនាកន្លងទៅ បានរៀបចំបុណ្យរំលឹកការបាត់បង់ទឹកដីខ្មែរក្រោម លើកទី ៧០ឆ្នាំ ហើយប្រកាសនឹងធ្វើយុទ្ធនាការទាមទារសិទ្ធិស្វ័យសម្រេចឱ្យខ្មែរក្រោមទៅថ្ងៃអនាគត។
ការបង្ខំរបស់វៀតណាមឱ្យពលរដ្ឋខ្មែរក្រោម ដែលមានលិខិតឆ្លងដែនអាមេរិកធ្វើកិច្ចសន្យាមិនប្រឆាំងនឹងវៀតណាមនេះ កើតឡើងប៉ុន្មានថ្ងៃក្រោយពេល វៀតណាមបានរឹបអូសលិខិតឆ្លងខ្មែរពី ព្រះសង្ឃខ្មែរក្រោមមួយអង្គ ដែលនិមន្តពីកម្ពុជាទៅចូលរួមមង្គលការបងប្អូន។
កាលពីពាក់កណ្តាលខែកុម្ភៈនេះ ព្រះសង្ឃខ្មែរក្រោមព្រះនាម សឺន ទី ត្រូវបានអាជ្ញាធរវៀតណាម នៅខេត្តព្រះត្រពាំង ចោទប្រកាន់ថា ប្រព្រឹត្តបទល្មើសប្រឆាំងច្បាប់អ៊ីនធឺណិត (Cyber law) ដោយសារតែព្រះអង្គ បានចែកចាយព័ត៌មានស្ដីពីការប្រារព្ធខួប ៧០ឆ្នាំ នៃថ្ងៃបាត់បង់ទឹកដីខ្មែរក្រោមទៅឱ្យវៀតណាម និងខ្លឹមសារកិច្ចសម្ភាសន៍មន្ត្រីសហព័ន្ធខ្មែរក្រោមរបស់វិទ្យុអាស៊ីសេរីនៅតាមបណ្ដាញសង្គម (Facebook) ពេលព្រះអង្គគង់នៅកម្ពុជា។ ប៉ុន្តែដោយសារតែព្រះអង្គ សឺន ទី និងសហព័ន្ធខ្មែរកម្ពុជាក្រោមតស៊ូមតិលើឆាកអន្តរជាតិ ទើបអាជ្ញាធរវៀតណាម ប្រគល់លិខិតឆ្លងដែនព្រះអង្គវិញ និងសូមទោសព្រះអង្គ ដោយអាជ្ញាធរវៀតណាមអះអាងថា ការរឹបអូសលិខិតឆ្លងដែននេះ ធ្វើឡើងដោយសារតែការយល់ច្រឡំ។ ព្រះអង្គ សឺន ទី មានថេរដីកាថា វៀតណាមចង់បំបាក់ស្មារតីខ្មែរក្រោម ទើបធ្វើយុទ្ធនាការបង្ខំឱ្យខ្មែរសារភាព និងធ្វើកិច្ចសន្យា មិនប្រឆាំងនឹងរដ្ឋាភិបាលវៀតណាម។
ព្រះភិក្ខុ សឺង យ៉ឹងរតនា អំពាវនាវឱ្យពលរដ្ឋខ្មែរក្រោមទាំងអស់ កុំចាញ់សម្លុតរបស់វៀតណាម ហើយបន្តតស៊ូមតិដើម្បីសិទ្ធិសេរីភាពទៅថ្ងៃអនាគត៖ «យើងកុំចុះហត្ថលេខាទទួលស្គាល់អ្វីមួយដែលរដ្ឋអំណាចដែលរដ្ឋអំណាចយួនគេចោទប្រកាន់»។
សហព័ន្ធខ្មែរក្រោមធ្លាប់ព្រមានរដ្ឋាភិបាលវៀតណាមថា ខ្មែរក្រោមនឹងតវ៉ាទៅប្រទេស មហាអំណាចសេដ្ឋកិច្ចនៅលើពិភពលោក កុំឱ្យបន្តជួយសេដ្ឋកិច្ចវៀតណាម ប្រសិនបើប្រទេសមួយនេះ បន្តធ្វើទុក្ខបុកម្នេញលើពលរដ្ឋខ្មែរក្រោម។ ប្រធានសហព័ន្ធខ្មែរកម្ពុជាក្រោម លោក ប្រាក់ សេរីវុឌ្ឍ មានប្រសាសន៍ថា វៀតណាមនឹងបាត់បង់ផលប្រយោជន៍ធំប្រសិនបើប្រទេសនេះ បន្តធ្វើទុក្ខបុកម្នេញដល់ពលរដ្ឋខ្មែរក្រោម ដែលទៅលេងស្រុកកំណើតជាបន្តទៀត។
រដ្ឋាភិបាលវៀតណាមកំពុងតែព្យាយាមចាប់ដៃនឹងសហភាពអឺរ៉ុប និងសហរដ្ឋអាមេរិក និងប្រទេសដទៃទៀត ដើម្បីធ្វើពាណិជ្ជកម្មជាមួយដោយមានការអនុគ្រោះពន្ធនាំចូល ជាថ្នូរនឹងការគោរពសិទ្ធិមនុស្ស។ កាលពីសប្ដាហ៍កន្លងទៅសហភាពអឺរ៉ុប បានយល់ព្រមលើកិច្ចព្រមព្រៀងពាណិជ្ជកម្មសេរីនឹងវៀតណាមឱ្យអនុគ្រោះពន្ធ ៩៩ភាគរយ លើទំនិញនាំចូលរបស់វៀតណាម។ ចំណែកសហរដ្ឋអាមេរិក ក៏គ្រោងនឹងបើកវេទិកា សន្ទនាអាមេរិក និងវៀតណាម ជុំវិញបញ្ហាសិទ្ធិមនុស្ស ដែលនឹងធ្វើនៅឆ្នាំ២០២០ខាងមុខ ពិនិត្យស្ថានភាពសិទ្ធិមនុស្សរបស់វៀតណាម ដើម្បីអាចធានាវៀតណាម អាចធ្វើពាណិជ្ជកម្មនឹងអាមេរិកលុះត្រាតែ ការគោរពសិទ្ធិមនុស្សមានលក្ខណៈរីកចម្រើន។ ទោះបីយ៉ាងណា អង្គការសិទ្ធិមនុស្សអន្តរជាតិ បានរិះគន់ថា វៀតណាមមិនសមនឹងទទួលបានការអនុគ្រោះពន្ធនោះទេ ដោយសារតែ វៀតណាមមិនបានស្ដារស្ថានភាពសិទ្ធិមនុស្សឱ្យល្អប្រសើរនោះទេ ពិសេស ការបន្តឃុំខ្លួនអ្នកទោសនយោបាយប្រមាណ ៣រយនាក់ក្នុងពន្ធនាគារ គាបសង្កត់សេរីភាពបញ្ចេញមតិជាដើម។ អង្គការសង្គមស៊ីវិលសង្ឃឹមថា ស្ថានភាពអាក្រក់ស្ដីពីសិទ្ធិមនុស្សនៅវៀតណាម នឹងជំរុញឱ្យសភាសហភាពអឺរ៉ុបនឹងដកសេចក្ដីទុកចិត្តពីកិច្ចព្រមព្រៀងពាណិជ្ជកម្មអឺរ៉ុប និងវៀតណាមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ