ព្រះសង្ឃខ្មែរក្រោមគង់នៅវត្តស្ទឹងមានជ័យទាមទារឲ្យមន្ត្រីសង្ឃសងកុដិឲ្យព្រះអង្គវិញ
2015.12.10
ព្រះតេជព្រះគុណ គឹម សិលា ផ្ដល់បទសម្ភាសន៍ដល់អ្នកកាសែតនាវត្តស្ទឹងមានជ័យ រាជធានីភ្នំពេញ កាលពីថ្ងៃទី៨ ខែធ្នូ ឆ្នាំ២០១៥។
RFA/Yeang Socheametta
ព្រះសង្ឃខ្មែរក្រោម គង់នៅវត្តចង្ក្រានតាព្រហ្ម ហៅវត្តស្ទឹងមានជ័យ ក្នុងរាជធានីភ្នំពេញ ទាមទារឲ្យថ្នាក់ដឹកនាំសង្ឃវត្តស្ទឹងមានជ័យ ប្រគល់កុដិដែលព្រះអង្គបានជាវចំនួន ៥ម៉ឺនដុល្លារនៅក្នុងវត្តនេះ កាលពីខែវិច្ឆិកា ឆ្នាំ២០១៥ មកឲ្យព្រះអង្គវិញ។ ការទាមទារនេះ ធ្វើឡើងបន្ទាប់ពីមន្ត្រីសង្ឃវត្តស្ទឹងមានជ័យ បានចាក់សោមិនឲ្យព្រះអង្គចូលកុដិ ហើយមានបំណងរឹបអូសយកកុដិនេះ ដោយចោទប្រកាន់ថា ព្រះអង្គទិញដូរកុដិនេះ គឺជារឿងខុសច្បាប់វត្ត។
ព្រះសង្ឃខ្មែរក្រោមព្រះនាម គឹម សិលា ហៅ គង់ ដែលអះអាងថា កុដិរបស់ព្រះអង្គត្រូវបានមន្ត្រីសង្ឃវត្តស្ទឹងមានជ័យ ប៉ុនប៉ងរំលោភយក ប្ដេជ្ញាថានឹងប្រើគ្រប់មធ្យោបាយស្របច្បាប់ ដើម្បីប្តឹងប្តល់ទាមទារយកកុដិរបស់ព្រះអង្គមកវិញ។
ព្រះតេជព្រះគុណ គឹម សិលា មានថេរដីការៀបរាប់ដំណើរដើមទងនៃសាច់រឿងថា កាលពីថ្ងៃទី៥ ខែធ្នូ ព្រះអង្គត្រូវបានព្រះចៅអធិការស្តីទីវត្តស្ទឹងមានជ័យ ព្រះនាម ថៃ ប៊ុនធឿន ចោទប្រកាន់ថា បានយកព្រះពុទ្ធរូបមួយចំនួនបោះចោលទៅក្នុងស្រះទឹកស្អុយក្បែរកុដិរបស់ព្រះអង្គ។ ក្រោយមក មន្ត្រីសង្ឃក្នុងវត្ត បានបើកកិច្ចប្រជុំសម្ងាត់ ដោយសម្រេចថាចាប់ព្រះអង្គផ្សឹកតែម្តង។ ប៉ុន្តែព្រះតេជព្រះគុណ គឹម សិលា ថាការចោទប្រកាន់នេះជារឿងមិនពិតនោះទេ។
លុះដល់ថ្ងៃទី៦ ខែធ្នូ នៅវេលាម៉ោងប្រមាណ ៦ និង ៣០នាទីល្ងាច ព្រះចៅអធិការស្តីទី គ្រូសូត្រស្តាំ ឆ្វេង និងមន្ត្រីសង្ឃក្នុងវត្ត រួមជាមួយកងកម្លាំងប៉េអិមផង បាននាំគ្នាមកប៉ុនប៉ងទម្លុះទ្វារចូលចាប់ព្រះអង្គផ្សឹក តែពេលនោះព្រះអង្គកំពុងគង់នៅក្នុងកុដិ។ លុះមួយថ្ងៃបន្ទាប់មកទៀត ពោលគឺនៅថ្ងៃទី៧ ខែធ្នូ ព្រះចៅអធិការស្តីទី និងព្រះគ្រូសូត្រស្តាំ បានបើកកិច្ចប្រជុំមួយ ដោយមានការនិមន្តចូលរួមពីព្រះអនុគណ និងព្រះវិន័យធម៌ខណ្ឌមានជ័យ ព្រមទាំងមានមន្ត្រីមកពីធម្មការរាជធានីភ្នំពេញ និងនគរបាលប៉ុស្តិ៍សង្កាត់ស្ទឹងមានជ័យ ផងដែរ។
ព្រះតេជព្រះគុណ គឹម សិលា មានថេរដីកាថា ក្នុងកិច្ចប្រជុំនោះ មិនបាននិយាយពីរឿងដែលចោទប្រកាន់ព្រះអង្គថា បានបោះព្រះពុទ្ធរូបចោលក្នុងស្រះនោះទេ តែបែរទៅជានិយាយពីការជាវកុដិ និងគំរាមដកហូតយកកុដិរបស់ព្រះអង្គដែលទើបជាវទៅវិញ ដោយចោទប្រកាន់ថា ជាវកុដិខុសច្បាប់។
យ៉ាងណាក៏ដោយ ព្រះតេជព្រះគុណ គឹម សិលា អះអាងថា ការទិញ ឬការជាវកុដិនៅក្នុងវត្តស្ទឹងមានជ័យ នេះ គឺកើតមានឡើងជាទូទៅហើយ។ ព្រះអង្គមានថេរដីកាថា ការជាវកុដិនេះ គឺព្រះអង្គយកបច្ច័យផ្ទាល់ខ្លួនដែលបានសន្សំទុកជាយូរ ហើយការជាវនេះ គឺក្នុងគោលបំណងប្រគេនព្រះសង្ឃ និងនិស្សិតដែលមានជីវភាពខ្វះខាត ដើម្បីគង់ និងស្នាក់នៅបន្តការសិក្សារៀនសូត្រដោយមិនមានការរើសអើង ហើយកុដិនេះនឹងទុកជាសម្បត្តិសង្ឃរហូត គឺមិនមានការលក់ដូរបន្តទៀតឡើយ។
ព្រះតេជព្រះគុណ គឹម សិលា ដែលមានស្រុកកំណើតនៅទីរួមខេត្តព្រះត្រពាំង ដែនដីកម្ពុជាក្រោម ហើយដែលបាននិមន្តមកគង់នៅវត្តស្ទឹងមានជ័យ តាំងពីឆ្នាំ២០១១ យល់ឃើញថា អ្វីដែលមន្ត្រីសង្ឃវត្តស្ទឹងមានជ័យ កំពុងធ្វើលើព្រះអង្គ គឺបង្ហាញនូវការរើសអើង និងជាចេតនាដាក់សម្ពាធទៅលើព្រះអង្គ ដែលជាសង្ឃខ្មែរក្រោមមួយអង្គនៅក្នុងវត្តស្ទឹងមានជ័យ នេះ។ ព្រះអង្គនៅតែអះអាងថា អ្វីដែលព្រះអង្គបានធ្វើ គឺមិនមានអ្វីខុសច្បាប់នោះឡើយ៖ «អាត្មាចង់និយាយថា ហេតុអីព្រះសង្ឃដទៃទិញបានមិនខុស ចំណែកអាត្មាទិញកុដិនេះលោកថាខុស ខុសវិន័យត្រង់កន្លែងណា? ព្រោះអាត្មាទិញទៅ អាត្មាទុកជាសម្បត្តិរួមវត្តស្ទឹងមានជ័យ ដដែល ហើយអាត្មានៅតែជ្រកក្រោមចៅអធិការដដែល ដូចជាកូនចៅរបស់ចៅអធិការដដែល»។
នៅក្នុងលិខិតផ្ទេរសិទ្ធិគ្រប់គ្រងកុដិ ធ្វើឡើងរវាងព្រះមេកុដិចាស់ និងព្រះតេជព្រះគុណ គឹម សិលា ចុះថ្ងៃទី២១ ខែវិច្ឆិកា ឆ្នាំ២០១៥ ក៏ឃើញមានការចុះហត្ថលេខាឯកភាពពីព្រះចៅអធិការស្តីទីវត្តស្ទឹងមានជ័យ ព្រះតេជព្រះគុណ ថៃ ប៊ុនធឿន និងព្រះគ្រូសូត្រស្តាំផងដែរ។ ត្រង់ចំណុចនេះហើយដែលព្រះតេជព្រះគុណ គឹម សិលា បញ្ជាក់ថា ប្រសិនបើការជាវកុដិរបស់ព្រះអង្គខុស ឬប្រាសចាកវិន័យ ហេតុអ្វីបានជាព្រះចៅអធិការស្តីទី និងព្រះគ្រូសូត្រស្តាំវត្ត ចុះហត្ថលេខាលើលិខិតផ្ទេរសិទ្ធិគ្រប់គ្រងកុដិរបស់ព្រះអង្គ?៖ «កុដិអាត្មាជាវពេញសិទ្ធិ ឥឡូវទៅកិបសោអត់ឲ្យអាត្មាចេញចូលបាន អាត្មាឈឺចាប់មែនទែន! ពីព្រោះទឹកលុយអាត្មាសន្សំ អាត្មាអត់មានប្រាក់ខែ ឬបើកអាជីវកម្មអ្វីឡើយ តែអំណោយធម្មជាតិដែលអាត្មាខំសិក្សារៀនសូត្រតាមផ្លូវព្រះពុទ្ធសាសនា ធម៌អារ្យព្រះវិន័យ ដើម្បីប្រោសព្រហ្មសត្វលោកសូត្រមន្តរំដោះគ្រោះតាមគេហដ្ឋាន ធ្លាប់ចេញទៅប្រទេសអូស្ត្រាលី ប្រទេសបារាំង អាមេរិក ដើម្បីបានលុយតិចតួចយកមកទំនុកបម្រុងនិស្សិតរៀនសូត្រ»។
ចាប់តាំងពីមានផ្ទុះរឿងចោទប្រកាន់ព្រះតេជព្រះគុណ គឹម សិលា ថាបានបោះព្រះពុទ្ធរូបចោលក្នុងស្រះ រហូតដល់ពេលគេចាក់សោបិទទ្វារកុដិរបស់ព្រះអង្គមក ព្រះសង្ឃ ពលរដ្ឋខ្មែរក្រោម និងសកម្មជនសង្គមមួយចំនួន បានទៅចូលរួមការពារព្រះអង្គក្រែងមានការចាប់ផ្សឹកដោយមន្ត្រីសង្ឃវត្ត ឬអាជ្ញាធរ។ ពួកគេ ក៏បានទាមទារឲ្យមន្ត្រីសង្ឃប្រគល់កុដិទៅឲ្យព្រះតេជព្រះគុណ គឹម សិលា វិញ។
ព្រះចៅអធិការស្តីទីវត្តសាមគ្គីរង្សី និងជាប្រធានសមាគមព្រះសង្ឃខ្មែរកម្ពុជាក្រោម ព្រះតេជព្រះគុណ ថាច់ ហារសំអាង។ ព្រះអង្គមានថេរដីកាក្នុងពេលទៅចូលរួមតវ៉ាកាលពីថ្ងៃទី៨ ធ្នូ ថា ថ្នាក់ដឹកនាំសង្ឃវត្តស្ទឹងមានជ័យ មានចេតនារឹបអូសយកកុដិពីព្រះសង្ឃខ្មែរក្រោម។ លើសពីនេះ ពួកគេក៏មានចេតនាបំបែកបំបាក់រវាងព្រះសង្ឃខ្មែរក្រោម និងព្រះសង្ឃដទៃទៀតនៅក្នុងវត្ត និងមានចេតនាកម្ចាត់ព្រះសង្ឃខ្មែរក្រោម កុំឲ្យលេចធ្លោខ្លាំងនៅក្នុងវត្តស្ទឹងមានជ័យ៖ «ដើម្បីកម្ទេចលោកដើម្បីយកកុដិលោក គេហ៊ានបង្កើតរហូតដល់យកព្រះពុទ្ធរូបបោះចោលក្នុងទឹកស្អុយ ហើយដើម្បីកម្ទេចលោកតា គឹម សិលា នេះចោល ដោយសារគេគិតថា លោកតា គឹម សិលា នេះ គឺជាព្រះសង្ឃខ្មែរក្រោមមួយអង្គដែលមានប្រជាប្រិយក្នុងវត្តស្ទឹងមានជ័យ។ ចឹងគេគិតថា ត្រូវតែកម្ទេចលោកតានេះចោលមុនសិន រឿងព្រះសង្ឃខ្មែរក្រោមផ្សេងៗនៅវត្តស្ទឹងមានជ័យ មិនមានជាបញ្ហាសម្រាប់គេទេ ហើយរហូតឈានដល់ចង់ចាប់លោកផ្សឹក ចង់ដេញលោកចេញពីវត្ត ធ្វើហ្នឹងដើម្បីគំរាមកំហែងយើង ធ្វើឲ្យយើងភ័យ យើងតក់ស្លុត ដើម្បីរត់ចេញដោយខ្លួនឯង»។
កន្លងមក ព្រះសង្ឃខ្មែរក្រោមព្រះនាម សឺន ហាយ ដែលត្រូវបានអាជ្ញាធរចាប់ព្រះកាយផ្សឹកកាលពីខែវិច្ឆិកា ឆ្នាំ២០១៤ និងកាត់ទោសឲ្យជាប់ពន្ធនាគារ ១ឆ្នាំ ដោយសារព្រះអង្គបានចូលរួមទាមទារឲ្យតុលាការដោះលែងសកម្មជនការពារដីធ្លីតំបន់បឹងកក់ ក៏ធ្លាប់គង់នៅវត្តស្ទឹងមានជ័យ មួយរយៈពេលដែរ។ ក្នុងពេលគង់នៅនោះ ព្រះតេជព្រះគុណ សឺន ហាយ និងព្រះសង្ឃខ្មែរក្រោមមួយអង្គផ្សេងទៀត ធ្លាប់ត្រូវបានសាច់ញាតិរបស់ព្រះចៅអធិការស្តីទីវត្តស្ទឹងមានជ័យ វាយឲ្យរបួស។
ចំពោះរឿងរ៉ាវកើតឡើងនៅពេលនេះវិញ ព្រះចៅអធិការស្តីទីវត្តស្ទឹងមានជ័យ ព្រះតេជព្រះគុណ ថៃ ប៊ុនធឿន មានថេរដីកាឆ្លើយតបថា អ្វីដែលព្រះអង្គធ្វើ មិនមែនជាការរើសអើង ឬជាការធ្វើបាបទៅលើព្រះសង្ឃខ្មែរក្រោមដូចការចោទប្រកាន់នោះឡើយ ប៉ុន្តែព្រះតេជព្រះគុណថា វាគ្រាន់តែជាការអនុវត្តច្បាប់វត្ត ដែលមិនមានការអនុញ្ញាតឲ្យទិញដូរពីមួយទៅមួយប៉ុណ្ណោះ៖ «ពេលដែលយកមកឲ្យព្រះចៅអធិការវត្ត គ្រូសូត្រឆ្វេងស្តាំសម្រួលឲ្យ អត់មាននិយាយរឿងលុយកាក់ទេ និយាយពីការផ្លាស់ប្ដូរស្នាក់នៅបន្តវេនពីមួយទៅមួយ ដោយមិនមានការលក់ដូរឡើយ ប៉ុន្តែបែរជាបង្ហោះថា លក់ដូរកុដិតម្លៃ ៥ម៉ឺនដុល្លារ ពីព្រោះថា គ្រប់កុដិទាំងអស់នៅពេលលោកសង្ឃមួយអង្គសឹកទៅ ម្ចាស់កុដិសុំផ្ទេរឲ្យព្រះសង្ឃមួយអង្គទៀតមកគ្រប់គ្រងបន្ត អ៊ីចឹងជាធម្មតាទេកុដិនីមួយៗត្រូវមានអ្នកគ្រប់គ្រងបន្តចឹងហើយ តែមិនអាចទិញដូរបានទេ គឺវត្តមិនអនុញ្ញាតឲ្យឡើយ»។
ព្រះតេជព្រះគុណ ថៃ ប៊ុនធឿន ចាត់ទុកការចោទប្រកាន់ដែលថា មានការទិញលក់កុដិក្នុងវត្តស្ទឹងមានជ័យ គឺជាការបំប៉ោងសភាពការណ៍ដើម្បីបំភ្លៃការពិតប៉ុណ្ណោះ។ ចំពោះកុដិដែលចាក់សោបិទទ្វារវិញ ព្រះអង្គថាត្រូវរក្សាទុកមួយរយៈសិន ដើម្បីរង់ចាំការដោះស្រាយ។
ព្រះសង្ឃខ្មែរក្រោមម្ចាស់កុដិបញ្ជាក់ថា បើមន្ត្រីសង្ឃវត្តចង់រឹបអូសយកកុដិពីព្រះអង្គ មន្ត្រីសង្ឃត្រូវប្រគល់ប្រាក់ចំនួន ៥ម៉ឺនដុល្លារទៅឲ្យព្រះអង្គវិញ ហើយព្រះអង្គនឹងយកប្រាក់នេះទៅធ្វើសកម្មភាពមនុស្សធម៌ផ្សេងវិញ។ ប៉ុន្តែព្រះតេជព្រះគុណ ថៃ ប៊ុនធឿន អះអាងថា វត្តមិនបានទទួលប្រាក់ ៥ម៉ឺនដុល្លារនោះទេ ហើយបើចង់ទារទៅទារពីអ្នកលក់កុដិវិញទៅ។
ចំណែកតំណាងសហព័ន្ធខ្មែរកម្ពុជាក្រោមប្រចាំកម្ពុជា លោក តាំង សារៈ កត់សម្គាល់ថា ក្នុងមួយរយៈពេលចុងក្រោយនេះ ព្រះសង្ឃខ្មែរក្រោមត្រូវបានអាជ្ញាធរខ្មែរចាប់ផ្សឹក និងធ្វើទុក្ខបុកម្នេញជាបន្តបន្ទាប់។ លោកស្នើឲ្យអាជ្ញាធរ និងព្រះសង្ឃនៅកម្ពុជា បញ្ឈប់ការធ្វើបាបលើព្រះសង្ឃខ្មែរក្រោម និងស្នើឲ្យភាគីពាក់ព័ន្ធ ជួយរកយុត្តិធម៌ឲ្យព្រះសង្ឃខ្មែរក្រោមព្រះនាម គឹម សិលា នៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត