សកម្មជនខ្មែរកម្ពុជាក្រោមដាក់ញត្តិទៅវៀតណាម ដើម្បីឱ្យខ្មែរក្រោមអាចឈប់សម្រាកថ្ងៃបុណ្យជាតិ
2020.01.12
នាយករដ្ឋមន្ត្រីវៀតណាម លោក ង្វៀន ស៊ុងហ៊្វុក (Nguyen Xuan Phuc) [ឆ្វេង] និងលោកនាយករដ្ឋមន្ត្រី លោក ហ៊ុន សែន ថតរូបរួមគ្នានាខេត្តសៀមរាប កាលពីថ្ងៃទី២៣ ខែវិច្ឆិកា ឆ្នាំ២០១៦។
Photo: RFA
ខ្មែរកម្ពុជាក្រោមដែលកំពុងរស់នៅក្នុងស្រុកកំណើត ដែលវៀតណាមកំពុងត្រួតត្រា បានដាក់ញត្តិទៅរដ្ឋាភិបាលវៀតណាមស្នើឱ្យរដ្ឋាភិបាលកុម្មុយនិស្តនេះ អនុញ្ញាតឱ្យខ្មែរក្រោមដែលធ្វើការងារនៅទីក្រុង អាចឈប់សម្រាកពេលបុណ្យជាតិសំខាន់ៗដូចជា បុណ្យចូលឆ្នាំថ្មី និង បុណ្យសែនដូនតា ជាដើម។
ញត្តិដាក់ទៅរដ្ឋាភិបាលវៀតណាមបញ្ជាក់ថា ខ្មែរកម្ពុជាក្រោម ជាជនជាតិដើម មានវប្បធម៌ ទំនៀមទម្លាប់ និងពិធីបុណ្យជាតិផ្សេងពីជនជាតិវៀតណាម ប៉ុន្តែកន្លងមករដ្ឋាភិបាលវៀតណាមមិនអនុញ្ញាតឱ្យខ្មែរក្រោមឈប់សម្រាកក្នុងពិធីបុណ្យជាតិ ឱ្យបានទូលំទូលាយនោះទេ។ ញត្តិបញ្ជាក់ទៀតថា វៀតណាមឱ្យពលរដ្ឋខ្មែរក្រោមឈប់សម្រាកក្នុងរយៈពេលខ្លី នៅក្នុងខេត្ត ៣ រួមមាន ខេត្ត ព្រះត្រពាំង ឃ្លាំង និងពលលាវ ចំណែកខេត្ត ១៨ទៀតខ្មែរក្រោមមិនបានឈប់សម្រាកឡើយ។
ញត្តិបន្ថែមទៀតថា កម្មករខ្មែរគ្មានកាលបរិច្ឆេទឈប់សម្រាកក្នុងកម្មវិធីរបស់រដ្ឋាភិបាលវៀតណាម ជាមូលហេតុបណ្ដាលឱ្យប៉ះពាល់ ការលើកតម្កើងវប្បធម៌ និងប្រពៃណីជាតិ ដោយសារតែវប្បធម៌និងប្រពៃណីជាតិខ្មែរ ត្រូវពលរដ្ឋបង្ហាញក្នុងឱកាសបុណ្យចូលឆ្នាំថ្មី និងបុណ្យសែនដូនដា។ ញត្តិស្នើឱ្យវៀតណាមផ្ដល់យុត្តិធម៌ដល់ខ្មែរក្រោម និងចេញបញ្ជាឱ្យក្រុមហ៊ុន និងរោងចក្រអនុញ្ញាតឱ្យខ្មែរក្រោមបានឈប់សម្រាកពេលបុណ្យជាតិ។
តំណាងពលករខ្មែរក្រោម ដែលបានដាក់ញត្តិទៅរដ្ឋាភិបាលវៀតណាម លោក ថាច់ កឿង មានប្រសាសន៍ប្រាប់អាស៊ីសេរីថា ដោយសារតែបញ្ហាជីវភាពបានបង្ខំយុវជននិងយុវនារីខ្មែរក្រោមចាកចេញពីស្រុកកំណើតទៅធ្វើការងារនៅតាមក្រុមហ៊ុន និងរោងចក្រនៅទីក្រុង។ លោកបន្តថា ពេលបុណ្យទានសំខាន់ៗម្ដងយុវជនទាំងនោះ មិនអាចឈប់សម្រាកមកលេងស្រុកកំណើតឡើយ ដោយសារតែរដ្ឋាភិបាលវៀតណាមមិនអនុញ្ញាតឱ្យពួកគេឈប់សម្រាក។ ពលរដ្ឋខ្មែរក្រោមមួយចំនួន បានបង្ខំចិត្តបាត់បង់ប្រាក់ខែ និងប្រាក់ចំណូលដើម្បីអាចមកលេងស្រុកបាន៖ «ប្រទេសជាតិឥឡូវជឿនលៀនដែរ គេរក្សាវប្បធម៌ ជនជាតិរបស់គេ ជនជាតិណាក៏ដោយ។ គេសម្រេចវាសនាដោយខ្លួនឯងដើម្បីរក្សាវប្បធម៌ខ្មែរ»
លោក ថាច់ កឿង បញ្ជាក់ថា មូលហេតុដែលលោកធ្វើជាតំណាងឱ្យខ្មែរក្រោមដាក់ញត្តិកាលពីចុងខែធ្នូ ឆ្នាំ ២០១៩នោះ ដើម្បីឆ្លើយតបទៅនឹងលិខិតរបស់ សហព័ន្ធពលកម្មទីក្រុងព្រៃនគរវៀតណាមចេញកាលពីខែមេសា ឆ្នាំ ២០១៩ ដែលបញ្ជាក់ថា មាត្រាទី១១៥ នៃច្បាប់ឈប់សម្រាកក្នុងទិវាបុណ្យជាតិ និងពិធីបុណ្យប្រពៃណី វៀតណាម មិនមែនរាប់បញ្ជូនបុណ្យចូលឆ្នាំថ្មីខ្មែរនោះទេ ដូច្នោះ សហព័ន្ធពលកម្មទីក្រុងព្រៃនគរវៀតណាម គ្មានមូលដ្ឋានច្បាប់ដើម្បីដោះស្រាយ សំណូមពរខ្មែរក្រោមឡើយ។ លោក ថាច់ កឿង អះអាងថា សេចក្ដីសម្រេចរបស់វៀតណាមនេះ ជាការរើសអើងពូជសាសន៍យ៉ាងអយុត្តិធម៌។
យុវតីម្នាក់ សុំមិនបញ្ចេញឈ្មោះ ដែលបច្ចុប្បន្នកំពុងធ្វើការងារនៅទីក្រុង មានប្រសាសន៍ថា កញ្ញាសោកស្ដាយណាស់ ដែលកញ្ញាមិនបានទៅស្រុកកំណើតដើម្បីជួបជុំគ្រួសារក្នុងពេលបុណ្យជាតិនោះទេ។ កញ្ញាថា ពេលបុណ្យជាតិម្តងៗ កញ្ញាបង្ខំចិត្តធ្វើការងារ។ កញ្ញាសំណូមពរចង់ឈប់សម្រាកពេលបុណ្យទាន ប៉ុន្តែកញ្ញាមិនសង្ឃឹមថា វៀតណាមនឹងអនុញ្ញាតឱ្យខ្មែរក្រោម អាចឈប់សម្រាកថ្ងៃបុណ្យជាតិនោះទេ៖ «សំណូមពរឱ្យបានឈប់ បានទៅជួបជុំគ្រួសារ ប៉ុន្តែគេមិនឱ្យទេ»។
កាលពីខែមេសា ឆ្នាំ ២០១៩ ក្នុងពិធីបុណ្យចូលឆ្នាំខ្មែរ នាយករដ្ឋមន្ត្រីវៀតណាម ធ្លាប់បានសរសេរលិខិតជូនពរឆ្នាំថ្មីដល់ខ្មែរកម្ពុជាក្រោម ដែលរស់លើទឹកដីកំណើត ប៉ុន្តែមិនបានទទួលស្គាល់ថា ខ្មែរកម្ពុជាក្រោមជាជនជាតិដើមកំណើត និងមិនអនុញ្ញាតឱ្យខ្មែរកម្ពុជាក្រោមឈប់សម្រាកក្នុងថ្ងៃចូលឆ្នាំថ្មីនោះទេ។
បច្ចុប្បន្នខ្មែរកម្ពុជាក្រោម ជាច្រើនលាននាក់ កំពុងរស់នៅក្នុងខេត្ត២១ ដែលជាទឹកដីកំណើតរបស់ខ្មែរ។ ពួកគេបន្តប្រតិបត្តិ វប្បធម៌ សាសនា និងទំនៀមទម្លាប់បន្សល់ទុកទាំងពីដូនតាមក ទោះបីបារាំងបានកាត់ទឹកដីខ្មែរក្រោមទាំងខុសច្បាប់ទៅឱ្យវៀតណាមរយៈ ៧០ឆ្នាំ មកហើយក៏ដោយ។ ប្រធាន សហព័ន្ធខ្មែរកម្ពុជាក្រោម លោក ប្រាក់ សេរីវុឌ្ឍ មានប្រសាសន៍ប្រាប់អាស៊ីសេរីថា លោកគាំទ្រ ញត្តិខ្មែរក្រោមទាមទារ ឱ្យវៀតណាមអនុញ្ញាតឱ្យកម្មករខ្មែរក្រោមឈប់សម្រាក ពីការងារពេលមានបុណ្យជាតិ។ កន្លងមក សហព័ន្ធខ្មែរកម្ពុជាក្រោម ក៏បានជំរុញឱ្យខ្មែរក្រោមបង្កើតជាសហជីពការងារដើម្បីអាចតវ៉ាទាមទារឱ្យកម្មករអាចឈប់សម្រាកទៅថ្ងៃក្រោយ៖ «ពីព្រោះវាជាបុណ្យប្រពៃណីខ្មែរយើង។ តាមច្បាប់អន្តរជាតិ ដែលវៀតណាមចុះហត្ថលេខា វៀតណាមត្រូវគោរពសិទ្ធិជនជាតិដើមកំណើត។ បុណ្យភ្ជុំបិណ្ឌ និងចូលឆ្នាំ ខ្មែរយើងមិនសូវបានឈប់សម្រាកទេ ជាពិសេសកម្មករ»។
លោក ប្រាក់ សេរីវុឌ្ឍ មានប្រសាសន៍បន្តទៀតថា ប្រតិភូសហព័ន្ធខ្មែរកម្ពុជាក្រោម គ្រោងនឹងជួបមន្ត្រីក្រសួងការបរទេសអាមេរិក និងគណៈកម្មការអន្តរជាតិ ទទួលបន្ទុកអន្តរសាសនា របស់អាមេរិកនៅចុងសប្ដាហ៍នេះ ដើម្បីជជែកអំពីបញ្ហាទាំងឡាយដែលខ្មែរកម្ពុជាក្រោមកំពុងរស់នៅលើទឹកដីកំណើតកំពុងជួបប្រទះនៅពេលបច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- សង្គមស៊ីវិលបារម្ភពីករណីបង្ខាំងមនុស្ស និងចាប់ជំរិតផ្ទុះឡើងវិញនៅកម្ពុជា
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក