ຜູ້ອຳນວຍການໄຟຟ້າ ຄົນໃຫມ່ ຈະແກ້ໄຂ ບັນຫາເກົ່າ

ສິດນີ
2020-06-17
ອີແມວລ໌
ຄໍາເຫັນ
Share
ພິມ
ຣັດວິສາຫະກິດໄຟຟ້າລາວ ສູນຮັບແຈ້ງບັນຫາ ໃບບິນ ຄ່າໄຟຟ້າ
ຣັດວິສາຫະກິດໄຟຟ້າລາວ ສູນຮັບແຈ້ງບັນຫາ ໃບບິນ ຄ່າໄຟຟ້າ
ນັກຂ່າວພົລເມືອງ

ກະຊວງການເງິນ ແລະ ກະຊວງພລັງງານແລະບໍ່ແຮ່ ໄດ້ແຕ່ງຕັ້ງ ທ່ານ ຈັນທະບູນ ສຸກອາລຸນ ອະດີດຫົວຫນ້າກົມ ແຜນການ ແລະ ການ ຮ່ວມມື ກະຊວງພະລັງງານແລະບໍ່ແຮ່ ເຂົ້າຮັບຕຳແໜ່ງຜູ້ອຳນວຍການ ຣັດວິສາຫະກິດໄຟຟ້າລາວ ຄົນໃຫມ່ ໃນຕອນບ່າຍຂອງມື້ວັນທີ 16 ມິຖຸນາ ປີ 2020 ຊຶ່ງເປັນໄປຕາມວາຣະຕຳແໜ່ງ ແຕ່ປະຊາຊົນຢາກເຫັນການປ່ຽນແປງ ທີ່ດີກວ່າເກົ່າ. ດັ່ງ ເຈົ້າຫນ້າທີ່ ຣັດວິສາຫະກິດ ໄຟຟ້າລາວ ທ່ານນືຶ່ງ ຜູ້ທີ່ບໍ່ປະສົງອອກຊື່ ແລະສຽງ ກ່າວຕໍ່ເອເຊັຍເສຣີ ໃນມື້ວັນທີ 16 ມິຖຸນາ ນີ້ວ່າ:

“ທີ່ຈີງແລ້ວ ເຣື້ອງປ່ຽນນີ້ ມັນກະເປັນໄປຕາມວາຣະ ຜູ້ເກົ່ານີ້ ເພີ່ນຕ້ອງກະສຽນ ແຕ່ປີ 2018 ພຸ້ນນ່າ, ແຕ່ທາງການກະຊວງ ໃຫ້ເພີ່ນຢູ່ຕໍ່ລໍ ຊ່ວງປັບປຸງໂຄງສ້າງມາ 2 ປີແລ້ວ ພໍດີເພິ່ນທາບທາມ ເອົາຄົນຢູ່ໃນ ກະຊວງພະລັງງານມາເປັນ ມັນອາດຈະມາຖືກຊ່ວງທີ່ວ່າ ໄຟຟ້າກຳລັງ ຖືກໂຈມຕີເຣື້ອງຄ່າໄຟຟ້າແພງວ່າຊິຫຼຸດຄ່າໄຟ ບັງເອີນຢູໃນຊ່ວງການປັບປຸງແນ່ ກະເລີຍວ່າບັນຈົບກັນເຮັດໃຫ້ສັງຄົມຕີຣາຄາໄປທາງ ໃໝ່."

ທ່ານວ່າ ການຮັບ-ມອບ ຕຳແຫນ່ງເທື່ອນີ້ ມາບັນຈົບກັບບັນຫາ ເຣື້ອງມາຕການຫລຸດຜ່ອນຄ່າໄຟຟ້າ ໃຫ້ປະຊາຊົນ ຜູ້ທີ່ໄດ້ຮັບຜົລກະທົບ ຈາກໂຄວີດ-19 ຣະບາດ ຈົນເຮັດໃຫ້ປະຊາຊົນມີຄວາມຄິດເຫັນ ໄປໃນ ຫລາຍທິດທາງ ແຕ່ຄວາມຈີງແລ້ວ ທ່ານ ບຸນອຸ້ມ ສີວັນເພັງ, ຜູ້ ອຳນວຍການຣັຖວິສາຫະກິດໄຟຟ້າລາວ ຜູ້ເກົ່ານັ້ນ ມີກຳໜົດອອກບຳນານແຕ່ປີ 2018 ແຕ່ຣັຖບານລາວ ໃຫ້ທ່ານຮັກສາຕຳແໜ່ງໄວ້ກ່ອນ ເພື່ອຢູ່ປັບປຸງຣະບົບໂຄງສ້າງພາຍໃນ ຣັຖວິສາຫະກິດໄຟຟ້າລາວ ຣະຫວ່າງ ປີ 2019-2020.

ສຳລັບ ອັດຕຣາຄ່າໄຟຟ້າຄືນໃຫມ່ ເພື່ອຫລຸດຜ່ອນຄ່າໄຟຟ້າໃຫ້ແກ່ປະຊາຊົນ ຜູ້ທີ່ໄດ້ຮັບຜົລກະທົບຈາກການຣະບາດ ຂອງໂຄວິດ-19 ນັ້ນ ປັດຈຸບັນ ຣັຖວິສາຫະກິດໄຟຟ້າລາວ ຍັງບໍ່ມີຂໍ້ສລຸບ ຢ່າງແຈ່ມແຈ້ງ ເທື່ອ.

ກ່ຽວກັບເຣື້ອງນີ້ ຊາວລາວທ່ານນຶ່ງ ຢູ່ນະຄອນຫລວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 16 ມິຖຸນາ ວ່າ ການແຕ່ງຕັ້ງຜູ້ ອຳນວຍ ການຣັຖວິສາຫະກິດຄົນໃຫມ່ເທື່ອນີ້ ຕ້ອງປະຕິບັດຫນ້າທີ່ ເຮັດວຽກໃຫ້ ປະຊາຊົນເຫັນວ່າ ການເຂົ້າມາຮັບຕຳແໜ່ງ ແມ່ນເພື່ອຕ້ອງການ ຊ່ອຍເຫລືອປະຊາຊົນຢ່າງແທ້ຈິງ.

“ຂື້ນກັບຄຸນນະສົມບັດ ຂອງຜູ້ທີ່ມາປ່ຽນໃຫມ່ນີ້ແຫລະ ຖ້າວ່າຂະເຈົ້າໃຫ້ແນວຄິດເພື່ອຊາດ ເພື່ອປະຊາຊົນ ມັນກະຄວນຊິສັ່ງປ່ຽນແປງ, ຄັນ ຖ້າວ່າຄິດເຫັນແກ່ແຕ່ຜົລປະໂຫຍດສ່ວນຕົວ ຂອງພັກພວກມັນກະບໍ່ ຖືກຕ້ອງແຫຼະ ຄັນຖ້າວ່າປ່ຽນຄົນແລ້ວແນວຄິດ ຍັງບໍ່ທັນປ່ຽນມັນກະ ໃຊ້ການບໍ່ໄດ້ຫັ້ນແລ້ວ."

ທ່ານວ່າ ຖ້າຫາກຣັຖບານ ແຕ່ງຕັ້ງ ຜູ້ອຳນວຍການຣັດວິສາຫະກິດໄຟຟ້າລາວ ຄົນໃຫມ່ ຕ້ອງບໍ່ເຫັນແກ່ຜົລປະໂຍດສ່ວນຕົວ ຫລື ພັກພວກ ຂອງໂຕເອງ ແຕ່ຖ້າເຂົ້າມາບໍຣິຫານງານ ແບບເກົ່າ ບໍ່ມີການ ປະຕິຮູບຫນ້າທີ່ວຽກງານ ບັນຫາເດີມກໍຈະບໍ່ຫມົດໄປ ເປັນຕົ້ນການຄິດໄລ່ຄ່າ ໄຟຟ້າ, ອັດຕຣາຄ່າໄຟຟ້າແພງ ແລະອື່ນໆ ແຮ່ງຈະເຮັດໃຫ້ປະຊາຊົນລາວ ວິພາກວິຈານຕື່ມອີກ.

ຊາວລາວອີກຜູ້ນື່ງຢູ່ແຂວງຈຳປາສັກ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າໄລຍະ 1 ຫາ 2 ເດືອນຜ່ານມານີ້ ຈ່າຍໄຟຟ້າແພງຫລາຍ ຊາວລາວຫລາຍຄອບຄົວ ກໍຈົ່ມຄືກັນວ່າຄ່າໄຟຟ້າ ແພງຂຶ້ນ ຢາກເຫັນຜູ້ອຳນວຍການຣັຖວິສາຫະກິດ ຄົນໃຫມ່ ເຂົ້າມາແກ້ໄຂ ຄ່າໄຟຟ້າ ໃຫ້ດີກ່ວານີ້.

“ຄ່າໄຟຟ້າກະເຂົາໄລ່ 700 ດຽວນີ້ ແພງໂພດຫັ້ນນ່າ, ເດືອນນື່ງກໍແສນປາຍ ເພີ້ມຂຶ້ນຫນ້ອຍນຶ່ງ ຢາກໃຫ້ຫລຸດຫັ້ນແລ້ວ ປະຊາຊົນນີ້ແລ້ວ ຢາກໃຫ້ຫຼຸດ."

ມາຮອດປັດຈຸບັນ ຊາວລາວສ່ວນຫລາຍ ຍັງຄາດຫວັງແລະເຊື່ອຫມັ້ນ ກັບຣັຖບານລາວວ່າຈະໄດ້ ຮັບການຊ່ອຍເຫລືອ ການລຸດຄ່າໄຟຟ້າ ໃນໄລຍະ ປະຊາຊົນ ແລະ ຫົວຫນ່ວຍທຸຣະກິດ ໄດ້ຮັບຜົລກະທົບ ຈາກການຣະບາດຂອງໂຣຄ ໂຄວິດ-19 ຢູ່ ແຕ່ກະຊວງພລັງງານ ແລະບໍ່ແຮ່ ກ່າວຕໍ່ວິທຍຸເອເຊັຽເສຣີ ໃນສັປດາຜ່ານມາວ່າ ກຳລັງປຶກສາຫາລື ກັບພາກສ່ວນທີ່ກ່ຽວຂ້ອງຢູ່ ແຕ່ປະຊາຊົນຍັງຕ້ອງໄດ້ຈ່າຍ ຄ່າໄຟຟ້າ ຕາມອັດຕຣາເດີມ ຈົນກວ່າຈະມີການປ່ຽນແປງ.

ເຕັມຫນ້າ