ເຈົ້າໜ້າທີ່ລາວຖືເບົາ ກົດໝາຍ ຕ້ານ ສໍ້ຣາສ

ສຸພັດຕາ
2018-01-25
ອີແມວລ໌
ຄໍາເຫັນ
Share
ພິມ
ທາງການລາວມີຫລາຍໜ່ວຍງານ ທີ່ມີໜ້າທີ່ຕິດຕາມ ກໍາຈັດການສໍ້ຣາສບັງຫຼວງ ໃນວົງຣັຖການ
ທາງການລາວມີຫລາຍໜ່ວຍງານ ທີ່ມີໜ້າທີ່ຕິດຕາມ ກໍາຈັດການສໍ້ຣາສບັງຫຼວງ ໃນວົງຣັຖການ
RFA/LX

ສາເຫຕສຳຄັນທີ່ເຮັດໃຫ້ບັນຫາ ສໍ້ຣາສບັງຫຼວງໃນລາວ ຍັງມີຢູ່ແລະແກ້ໄຂຍາກນັ້ນ ແມ່ນຍ້ອນ ເຈົ້າໜ້າທີ່ຣັຖ ຫຼາຍຄົນ ຍັງຖືເບົາກົດໝາຍ ຕ້ານການສໍ້ຣາສບັງຫຼວງ ສົ່ງຜົນໃຫ້ເຈົ້າໜ້າທີ່ຣັຖ ຈຳນວນນຶ່ງມັກຊອກຫາຊ່ອງທາງ ຫາເງິນເຂົ້າຖົງໂຕເອງ, ດັ່ງອະດີດເຈົ້າໜ້າທີ່ທາງການ ລາວ ທ່ານນຶ່ງ ທີ່ບໍ່ປະສົງອອກຊື່ ກ່າວຕໍ່ເອເຊັຍເສຣີວ່າ ໃນວັນທີ 25 ມົກຣາ ນີ້ວ່າ:

”ອັນຄວາມຈິງຫັ້ນນະ ເຣື່ອງສໍ້ຣາສບັງຫຼວງ ໂດຍສະເພາະຢູ່ລາວ ພວກເຮົານີ້ ມັນກະທຸກຍ່ອມຫຍ້າເນາະ ກົດໝາຍນິ ຂຽນ ແຕ່ວ່າຄົນ ບໍ່ຄ່ອຍ ປະຕິບັດກົດໝາຍ ມີຢູ່ປາບສໍ້ຣາສບັງຫຼວງຫັ້ນນະ ແຕ່ວ່າຄົນມັນບໍ່ຄ່ອຍໄດ້ ປະຕິບັດ ຄັນເຈົ້າໜ້າທີ່ ມີແຕ່ບັງຄັບ ປະຊາຊົນ ແລະເຈົ້າໜ້າທີ່ ບໍ່ປະຕິບັດກົດໝາຍ ມັນກະບໍ່ສົ່ງຜົນສັກສິດ.”

ທ່ານກ່າວຕື່ມວ່າ ຕົວຢ່າງ ການສໍ້ຣາສບັງຫຼວງ ທີ່ເຫັນໃນປັດຈຸບັນນີ້ ເຫັນໄດ້ຈະແຈ້ງກໍຄື ເວລາທີ່ປະຊາຊົນ ໄປເຮັດໜັງສື ຫຼືເອກກະສານ ຕ່າງໆນຳຫ້ອງການຂອງຣັຖ ປະຊາຊົນຕ້ອງໄດ້ຈ່າຍເງິນພິເສດໃຫ້ ເພື່ອໃຫ້ການແລ່ນເອກກະສານ ນັ້ນໄວຂຶ້ນ ຊື່ງກາຍເປັນເຣື່ອງປົກກະຕິ ໄປແລ້ວ.

ບັນຫາການສໍ້ຣາສບັງຫຼວງ ທີ່ເຫັນໄດ້ຢ່າງຈະແຈ້ງ ເມື່ອປີກາຍຄືການຍຶດຣົດໄມ້ 27 ຄັນ ຢູ່ບໍຣິເວນດ່ານພູເກືອ ແຂວງອັດຕະປື ຊື່ງພົບວ່າ ມີເຈົ້າໜ້າທີ່ຣັຖ ຈຳນວນນຶ່ງ ມີສ່ວນກ່ຽວຂ້ອງ ກັບໄມ້ດັ່ງກ່າວ.

ທ່ານກ່າວອີກວ່າ ການລົບລ້າງການສໍ້ຣາສບັງຫຼວງ ໃນລາວ ຈຳເປັນຕ້ອງເຣີ້ມຈາກເຈົ້າໜ້າທີ່ ຣະດັບສູງກ່ອນ ແລະເຈົ້າໜ້າທີ່ ຮອງລົງມາ ກໍຈະໄດ້ປະຕິບັດຕາມ ແລະການສໍ້ຣາສບັງຫຼວງ ນັ້ນຈະຫລຸດຜ່ອນລົງ.

ແຕ່ເຖິງຢ່າງໃດກໍຕາມ ເຈົ້າໜ້າທີ່ຣະດັບສູງ ຂອງທາງການລາວທ່ານນືຶ່ງ ກໍ່ໄດ້ກ່າວຕໍ່ວິທຍຸເອເຊັຍເສຣີ ວ່າ ຣັຖບານລາວ ໄດ້ເຂັ້ມງວດ ໃນການແກ້ໄຂ ການສໍ້ຣາສບັງຫຼວງ ນັບມື້ນັບເຂັ້ມງວດຂຶ້ນ. ຜ່ານມາກໍໄດ້ລົງໂທດ ແລະໃສ່ວິນັຍ ພະນັກງານ ທີ່ກະທຳຜິດຫຼາຍຄົນ ແຕ່ຈື່ຈຳນວນບໍ່ໄດ້, ດັ່ງທ່ານກ່າວ:

“ຈຳນວນນຶ່ງ ກະອອກຈາກການນະ ຈຳນວນນຶ່ງ ກະຍັງສືບຕໍ່ເຮັດວຽກຢູ່ ແຕ່ກະປົດຊັ້ນປົດຕໍາແໜ່ງ ບາງຄົນກະຖືກປົດອອກຈາກການຊື່ໆ ໂດຍທີ່ບໍ່ໄດ້ຮັບອິຫຍັງ ເປັນປະຊາຊົນທັມມະດາແລ້ວໄປ ບາງຄົນກະຕ້ອງໄດ້ຕິດຄຸກ."

ກອງປະຊຸມວຽກງານກວດກາທົ່ວປະເທສ ປີ 2017 ໄດ້ເປີດເຜີຍວ່າ ປີ 2017 ຣັຖບານລາວ ພົບເຫັນເງິນຈຳນວນ 400 ຕື້ກີບທີ່ເສັຍຫາຍ ຈາກການສໍ້ຣາສບັງຫຼວງ ແລະສາມາດເກັບຄືນໄດ້ແລ້ວ ຫຼາຍກວ່າ 317 ຕື້ກີບ ໃນນັ້ນ ມີຄະດີສໍ້ຣາສບັງຫຼວງ ທີ່ກ່ຽວກັບການຊໍາຣະໜີ້ສິນ ໂຄງການທີ່ບໍ່ມີຕົວຕົນ 3 ກໍຣະນີ ແລະ ຈ່າຍເງິນຊໍ້າຊ້ອນ ຢູ່ 12 ແຂວງ, ນະຄອນວຽງຈັນ ແລະ ໃນກະຊວງນື່ງ.

ເຕັມຫນ້າ