ປະຊາຊົນ ຫຼາຍແຂວງ ຂາດເຂີນ ອາຫານ

ປະຊາຊົນຢູ່ແຂວງຄຳມ່ວນ, ສວັນນະເຂດ ແລະ ສາຣະວັນ ປະສົບບັນຫາຂາດເຂີນສະບຽງອາຫານ ຍ້ອນມາຕການລ໊ອກດາວ ເພື່ອ ປ້ອງກັນໂຄວິດ-19 ເປັນເວລາດົນນານ ຈົນຮອດທ້າຍເດືອນກັນຍາ.

ມາຕການດັ່ງກ່າວເຮັດໃຫ້ຕລາດສົດ, ຮ້ານຂາຍອາຫານ ແລະ ຮ້ານຂາຍເຄື່ອງຍ່ອຍ ປິດກິຈການຊົ່ວຄາວ ຕາມຄຳສັ່ງຂອງທາງການ ລາວ.

ປະຊາຊົນຢູ່ແຂວງຄຳມ່ວນ ໄດ້ມີການັກຕຸນອາຫານແຫ້ງ ເຊັ່ນ ໝີ່ໄວໄວ, ປາກະປ໋ອງ ແລະ ໄຂ່ໄກ່ ສ່ວນວ່າພືດຜັກ ແລະ ຊີ້ນໝູ ບາງຄົນທີ່ຢູ່ໄກຈາກຕລາດ ກໍອອກໄປຊື້ບໍ່ທັນ. ຊາວເມືອງທ່າແຂກ ແຂວງຄຳມ່ວນ ໄດ້ກ່າວຕໍ່ເອເຊັຽເສຣີ ໃນວັນທີ 16 ກັນຍາ ວ່າ:

“ບ້ານລຸງນີ້ ດຽວນີ້ນິ ກຳລັງລ໊ອກດາວເລີຍ ບໍ່ໃຫ້ອອກຈາກເຮືອນເລີຍ ແລ້ວປິດຕລາດໝົດເລີຍ ບໍ່ໃຫ້ມີ ຊື້ຈາກຮ້ານທີ່ເຂົາຂາຍ ເຄື່ອງແຫ້ງນີ້ນ່າ ອາຫານແຫ້ງເປັນໄວໆ ຂອງແຫ້ງ ຂອງອີ່ສັງໄປ ບໍ່ຢາກກະໄດ້ກິນຫັ້ນແຫຼະ, ລ້ຽງໄກ່ ກະມາເກີດແນວນີ້ຂຶ້ນ ກະບໍ່ມີຮອດ ຮຳເກືອດຽວນີ້ນິ ຈັກຊິເຮັດແນວໃດກັບໄກ່.”

ຊາວເມືອງທ່າແຂກທ່ານນີ້ ກ່າວຕື່ມອີກວ່າ ປະຊາຊົນຢູ່ເຮືອນໃຜເຮືອນມັນ ບໍ່ສາມາດອອກໄປໃສມາໃສ ໄດ້ຄືເກົ່າ ຕາມເສັ້ນທາງ ຕ່າງໆ ກໍຈະມີເຈົ້າໜ້າທີ່ຕຳຣວດ ທະຫານ ຊອມເບິ່ງຕລອດເວລາ ຖ້າຄົນໃດອອກຈາກເຮືອນ ໂດຍບໍ່ໄດ້ຮັບອະນຸຍາດ ກໍຈະຖືກ ກ່າວເຕືອນ ແລະ ປັບໃໝ, ຖ້າຄອບຄົວໃດ ກັກຕຸນອາຫານສົດ ອາຫານແຫ້ງ ໄວ້ບໍ່ພຽງພໍ ກໍຈະໄດຮັບຜົລກະທົບຫຼາຍສົມຄວນ.

ຢູ່ແຂວງຄຳມ່ວນ ກ່ອນຈະມີການປະກາດລ໊ອກດາວ 15 ວັນ ທາງການແຂວງ ໄດ້ແຈ້ງເຕືອນປະຊາຊົນໄປແລ້ວ ເພື່ອໃຫ້ກຽມພ້ອມ ໃນການນັກຕຸນສະບຽງອາຫານໃຫ້ພຽງພໍ ສຳລັບ 15 ວັນ ເພາະວ່າ ຕລາດສົດ ແລະ ຮ້ານຄ້າຕ່າງໆ ຈະຖືກປິດໝົດ.

ເຈົ້າໜ້າທີຜແນກອຸດສາຫະກຳ ແລະ ການຄ້າ ແຂວງຄຳມ່ວນໄດ້ກ່າວຕໍ່ເອເຊັຽເສຣີ ໃນວັນທີ 16 ກັນຍາ ວ່າ:

“ປິດໝົດເລີຍດຽວນີ້ ຮ້ານຂາຍເຄື່ອງ ຮ້ານອີ່ສັງໆ ກະປິດເລີຍ 2-3 ຕລາດປິດໝົດແລ້ວ ແມ້ກະທັ້ງລົດສິນຄ້າ ເພິ່ນກະຍັງໃຫ້ໂຈະ ຊົ່ວຄາວໄດ໋ ເພິ່ນແຈ້ງກ່ອນໜ້ານັ້ນເດ້ ໃຫ້ຊື້ເຄື່ອງກັກຕຸນໄວ້.”

ຢູ່ແຂວງສວັນນະເຂດ ຮ້ານຂາຍຂອງກິນສຸກປິດກິຈການ ປະຊາຊົນຕ້ອງອອກໄປຊື້ອາຫານສົດມາແຕ່ກິນເອງ ໃນຂນະທີ່ ຊີ້ນໝູ, ໄກ່ ແລະ ອາຫານທະເລ ກໍຫາຊື້ຍາກ.

ຊາວເມືອງນະຄອນໄກສອນ ພົມວິຫານ ແຂວງສວັນນະເຂດ ໄດ້ກ່າວຕໍ່ເອເຊັຽເສຣີ ໃນວັນທີ 16 ກັນຍາ ວ່າ:

“ຊື້ວັດຖຸດິບຫັ້ນ ເຂົາກະຍັງເປີດຢູ່ ຕ່າງແຕ່ວ່າ ເຈົ້າຊິມີເວລາເຮັດຫຼືບໍ່ ແລ້ວເຈົ້າຊິດຸໄດ້ສ່ຳໃດ ມັນບໍ່ຄືຂະເຈົ້າເປີດຮ້ານຄ້າ ເຂົາເຮັດ ຮຽບຮ້ອຍແລ້ວ ເຮົາໄປຊື້ລະມັນງ່າຍ ແຕ່ວ່າຖືກລ໊ອກດາວ ມັນຊື້ບໍ່ໄດ້ນີ້ແຫຼະ ໂຕທີ່ຂອງກິນສຸກຫັ້ນ ອັນໃສ່ຖົງກໍຍັງບໍ່ໃຫ້ເປີດ ໃຫ້ ປິດເລີຍນິ ກິນຫຍັງກະກິນໄປກ່ອນວະ ມີໝີ່ໄວໄວ ກະກິນກ່ອນ ໃຜຊິໄດ້ ໄດ້ເຂົ້າທ່ຽງແລງ 3 ມື້ ປິດເປັນເດືອນພຸ້ນໄດ໋.”

ຊາວເມືອງນະຄອນໄກສອນ ພົມວິຫານ ທ່ານນີ້ ກ່າວຕື່ມວ່າ ຫຼາຍຄອບຄົວທຸກຍາກ ຜູ້ຫາເຂົ້າກິນຄ່ຳ ບໍ່ມີເງິນເດືອນ ກໍຈະໄດ້ຮັບ ຜົລກະທົບໜັກໜ່ວງແທ້ ເພາະຂະເຈົ້າ ຈະບໍ່ມີເງິນຊື້ອາຫານກັກຕຸນ ແລະ ເຄື່ອງໃຊ້ທີ່ຈຳເປັນ ສຳລັບການລ໊ອກດາວ 15 ວັນ.

ຢູ່ແຂວງສາຣະວັນ ປະຊາຊົນກໍໄດ້ຮັບຜົລກະທົບ ຍ້ອນວ່າ ຕລາດສົດ ແລະ ຮ້ານຂາຍຂອງກິນສຸກ ປິດກິຈການຈົນໝົດ ເຮັດໃຫ້ ສະບຽງອາຫານບໍ່ພຽງພໍ ຍ້ອນວ່າ ທາງການອະນຸຍາດ ໃຫ້ຕລາດສົດເປີດພຽງແຕ່ 1 ແຫ່ງ. ຊາວແຂວງສາຣະວັນ ທ່ານນຶ່ງ ໄດ້ກ່າວ ຕໍ່ເອເຊັຽເສຣີ ໃນວັນທີ 16 ກັນຍາ ວ່າ:

“ເພິ່ນລ໊ອກດາວແຕ່ວ່າ ກະເຂົ້າ-ອອກ ໄດ້ຢູ່ ເພິ່ນເຣີ່ມໃຫ້ຂາຍແລ້ວ ໃຫ້ຂາຍວານນີ້ (15 ກັນຍາ) ເຣີ່ມເປີດຕລາດໃໝ່ກະຜ່ອນຜັນ ໄປໜ້ອຍນຶ່ງ ແຕ່ວ່ຫ້າງຮ້ານບໍ່ໄດ້ເປີດ ຂາຍເຂົ້າ ເຂົາກະຍັງບໍ່ໃຫ້ຂາຍ, ມື້ວານນີ້ ກະເຫັນລົດສິນຄ້າມາແຕ່ປາກເຊແກ່ເຄື່ອງມາ.”

ຢູແຂວງສາຣະວັນ ມີຕລາດສົດ 3 ແຫ່ງ ແຕ່ອະນຸຍາດໃຫ້ເປີດພຽງແຕ່ 1 ແຫ່ງເທົ່ານັ້ນ. ເຈົ້າໜ້າທີ່ຜແນກອຸດສາຫະກຳ ແລະ ການຄ້າ ແຂວງສາຣະວັນ ໄດ້ກ່າວຕໍ່ເອເຊັຽເສຣີ ວ່າ:

“ຕອນນີ້ເພິ່ນຍັງປິດຂ້າເຊື້ອຢູ່ ເພິ່ນເປີດແຕ່ຕລາດ ເອບີໂຊກໄຊ ເຣື່ອງຂົນສົ່ງນີ້ ເຮົາບໍ່ແນ່ໃຈເດີ ເພາະວ່າ ເພິ່ນຈະມີການກວດ ຢ່າງເຂັ້ມງວດຫັ້ນນ່າ ມີແຕ່ຂາຍທາງພາຍໃນເອງ.”

ເຈົ້າໜ້າທີ່ຍັງກ່າວຕື່ມອີກວ່າ ສ່ວນການຂົນສົ່ງສິນຄ້າພາຍໃນແຂວງ ຫາກເປັນອາຫານສົດ ແລະ ພືດຜັກຕ່າງໆ ຈະຕ້ອງໄດ້ຮັບ ອະນຸຍາດຈາກທາງການແຂວງເທົ່ານັ້ນ ເຖິງຈະເຂົ້າມາສົ່ງສິນຄ້າໄດ້ ສ່ວນສິນຄ້າປະເພດອື່ນໆ ຍັງບໍ່ທັນອະນຸຍາດ ໃຫ້ເດີນທາງ ເຂົ້າມາແຂວງສາຣະວັນ ໄດ້ເທື່ອ. ຖ້າເຈົ້າໜ້າທີ່ກວດພົບ ຜູ້ປະກອບການລະເມີດຄຳສັ່ງ ເຈົ້າໜ້າທີ່ຈະປັບໃໝ ຜູ້ປະກອບການນັ້ນ 1 ແສນກີບ ຕ່ຳສຸດ ແລະ ສູງສຸດ 10 ລ້ານກີບ ຕໍ່ຄົນຕໍ່ຄັ້ງ.

ສຳລັບມາຕການລ໊ອກດາວຂັ້ນສູງສຸດ ທາງການລາວຫ້າມປະຊາຊົນອອກເຮືອນໄປໃສເພື່ອປ້ອງກັນ, ຄວບຄຸມ ແລະ ສະກັດກັ້ນ ການຣະບາດຂອງໂຄວິດ-19 ປະກອບມີ ແຂວງຄຳມ່ວນ ລ໊ອກດາວແຕ່ວັນທີ 14-27 ກັນຍາ 2021, ແຂວງສວັນນະເຂດ ລ໊ອກດາວແຕ່ວັນທີ 11-21 ກັນຍາ 2021, ແລະ ແຂວງສາຣະວັນ ລ໊ອກດາວແຕ່ວັນທີ 14-28 ກັນຍາ 2021.

ຫຼ້າສຸດ ໃນວັນທີ 16 ກັນຍາ, ທາງການແຂວງຈຳປາສັກ ກໍໄດ້ປະກາດລ໊ອກດາວ ແຕ່ເວລາ 8 ໂມງກາງຄືນ ຂອງວັນທີ 16 ກັນຍາ ເປັນຕົ້ນໄປ ໂດຍ ຫ້າມເດີນທາງເຂົ້າ-ອອກ ແຂວງ ແລະ ໃຫ້ປະຊາຊົນພາຍໃນແຂວງກັກຕຸນສະບຽງອາຫານໃຫ້ພຽງພໍ.

ຂນະທີ່ ຫ້ອງການສຳນັກງານນາຍົກຣັຖມົນຕຣີ ໄດ້ອອກແຈ້ງການໃນວັນທີ 15 ກັນຍາ 2021 ທີ່ລະບຸວ່າ ໃຫ້ສືບຕໍ່ປະຕິບັດມາຕການ ປ້ອງກັນ, ຄວບຄຸມ ແລະ ສະກັດກັ້ນການຣະບາດຂອງໂຄວິດ-19 ໃນທົ່ວປະເທດ ລະຫວ່າງວັນທີ 16-30 ກັນຍາ ຢ່າງເຂັ້ມງວດ ແລະ ບໍ່ໃຫ້ຖືເບົາໃນການປ້ອງກັນໂຕເອງ.