ແຂວງອັດຕະປື ມອບດິນ 1,530 ເຮັກຕ້າຣ໌ ໃຫ້ບໍລິສັດຈີນ ສໍາປະທານ

ທາງການແຂວງອັດຕະປື ໄດ້ອະນຸຍາດ ໃຫ້ກຸ່ມບໍລິສັດ ຮົງກົງ ທຽນຊີຈໍາກັດ ຊຶ່ງເປັນຂອງນັກລົງທຶນຈີນ ສໍາປະທານທີ່ດິນ ໃນເນື້ອທີ່ 1,530 ເຮັກຕ້າຣ໌ ຢູ່ເຂດປ່າຜະລິດແຫ່ງຊາດ ເຊຄໍາພໍ-ແບ່ງວິໄລ ເມືອງສະໜາມໄຊ ເມື່ອວັນທີ 29 ພຶດສະພາ ທີ່ຜ່ານມາ ເພື່ອປູກໝາກໄມ້ ເປັນຕົ້ນ ໝາກຖົ່ວລຽນ, ໝາກມີ້ ແລະອື່ນໆ ແລະໃຫ້ປະຊາຊົນ ທີ່ປູກມັນຕົ້ນ ອອກຈາກເຂດນັ້ນໄປ ແບບບໍ່ໃຫ້ຄ່າຊົດເຊີຍຄວາມເສຍຫາຍຫຍັງ ໂດຍໃຫ້ເຫດຜົນວ່າ ເປັນດິນຂອງລັດ, ປະຊາ ຊົນ ໄດ້ບຸກລຸກເຂດນັ້ນ ປູກມັນຕົ້ນ.

ກ່ຽວກັບເລື້ອງນີ້ ເຈົ້າໜ້າທີ່ເມືອງສະໜາມໄຊ ນາງໜຶ່ງ ກ່າວຕໍ່ວິທຍຸເຊັຽເສຣີ ໃນມື້ວັນທີ 5 ກໍລະກົດນີ້ວ່າ ບໍລິສັດຈີນດັ່ງ ກ່າວ ກໍາລັງເລີ້ມຕົ້ນປູກໝາກຖົ່ວລຽນ ແລະໝາກໄມ້ອື່ນໆແລ້ວ. ສ່ວນຊາວສວນ ທີ່ປູກມັນຕົ້ນ ຢູ່ໃນເຂດນັ້ນ ຈໍາເປັນຕ້ອງໄດ້ຍ້າຍອອກໄປ ຍ້ອນພວກເຂົາເຈົ້າ ໄດ້ປູກໃສ່ດິນຂອງລັດ ມາຕັ້ງແຕ່ດົນແລ້ວ ແຕ່ທາງການກໍບໍ່ໄດ້ເອົາຜິດ ເຂົາເຈົ້າແຕ່ຢ່າງໃດ.

“ປະຊາຊົນກະແມ່ນທໍາການຜະລິດກະແມ່ນຮື້ ໄດ້ຮື້ອອກຈາກເຂດແດນນັ້ນນ່າ ກະຍັງປູກໄດ້ຢູ່ ແຕ່ມັນເປັນດິນຂອງລັດຊື່ໆ ບໍລິສັດຫຍັງຫັ້ນນ່າ ເພິ່ນກະບໍ່ໃຫ້ຊື່ໆນ່າ ແບບວ່າມັນດິນ ບໍ່ເຂົ້າໃຈກັນ ເວົ້າກັນຍັງບໍ່ທັນແລ້ວ ເພາະວ່າບໍລິສັດສ່ວນຫລາ ມັນເປັນບໍລິສັດໃດໜຶ່ງສໍາປະທານ ແລ້ວບໍ່ໃຫ້ປະຊາຊົນບຸກລຸກ ແຕ່ວ່າປະຊາຊົນຫັ້ນກະບຸກລຸກນ່າ ແຕ່ວ່າເປັນເຂດແດນຂອງບໍລິສັດ.”

ເພື່ອຂໍຮູ້ກ່ຽວກັບເລື້ອງນີ້ຕື່ມ ວິທຍຸເອເຊັຽເສຣີ ໄດ້ພະຍາຍາມຕິດຕໍ່ ໄປຫາຊາວບ້ານຢູ່ເມືອງສະໜາມໄຊ ທີ່ເຄີຍປູກມັນຕົ້ນໃນເຂດດັ່ງກ່າວ, ແຕ່ຍັງບໍ່ສາມາດຕິດຕໍ່ໄດ້.

ແຕ່ເຖິງຢ່າງໃດກໍຕາມ ຊາວບ້ານຢູ່ເມືອງສະໜາມໄຊ ນາງໜຶ່ງ ກໍເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ປັດຈຸບັນ ບໍລິສັດຈີນທີ່ວ່ານັ້ນ ໄດ້ເລີ່ມປູກຖົ່ວລຽນ, ໝາກມີ້ແລະໝາກໄມ້ອື່ນໆ ໃນເຂດສໍາປະທານທີ່ວ່ານັ້ນແລ້ວ ມັນເປັນດິນຂອງລັດ, ຊາວບ້ານໄປຢູ່ ແລະທໍາມາຫາກິນ.

“ເອີ ແມ່ນລະເພິ່ນປູກແລ້ວເດ້ ປູກຖົ່ວລຽນ ໂຕນີ້ເພິ່ນບໍ່ໄດ້ໄລ່່ຊາວບ້ານອອກ ມັນເປັນດິນສໍາປະທານຂອງລັດ ປະຊາຊົນໄປຢູ່ແລ້ວກະທໍາມາຫາກິນ ກະເປັນດິນລັດແລ້ວເພິ່ນໃຫ້ຍ້າຍອອກເຊຄໍາພໍນີ້ ກໍປະມານ 25 ກິໂລ.”

ແລະຊາວບ້ານອີກຜູ້ໜຶ່ງ ກໍເວົ້າຕໍ່ວິທຍຸເອເຊັຽເສຣີວ່າ ຢູ່ເມືອງມະຫາໄຊ ບໍລິສັດຈີນທີ່ວ່ານັ້ນ ກໍາລັງເລີ້ມປູກຖົ່ວລຽນ ແລະໝາກໄມ້ອື່ນໆ ໃສ່ດິນທີ່ຊາວບ້ານ ເຄີຍໃຊ້ເປັນສວນມັນຕົ້ນນັ້ນ, ແຕ່ບໍ່ຮູ້ລາຍລະອຽດ ກ່ຽວກັບເລື່ອງດັ່ງກ່າວ ຍ້ອນບໍ່ໄດ້ຖາມຜູ້ຮູ້ເລື່ອງນີ້ດີ ດັ່ງນັ້ນຈຶ່ງບໍ່ຮູ້ຂໍ້ມູນຫລາຍ.

“ໂອ້ ສະໜາມໄຊ ເຂົາເຈົ້າກໍາລັງເລີ້ມປູກ ແມ່ນຊາວບ້ານປູກມັນຕົ້ນ ບາດນີ້ເຂົາເຈົ້າສໍາປະທານດິນໄປແລ້ວ ລະກະເຂົາເຈົ້າສິປູກທົ່ວລຽນໃສ່.”

ໃນຂະນະດຽວກັນ ຊາວບ້ານອີກຜູ້ໜຶ່ງ ກໍເວົ້າວ່າ ໂຄງການປູກໝາກຖົ່ວລຽນ ແລະໝາກໄມ້ອື່ນໆ ຂອງນັກລົງທຶນຈີນ ຈະປູກໃສ່ແຕ່ໃນເຂດ ທີ່ດິນຂອງລັດ ເທົ່ານັ້ນ, ບໍ່ໄດ້ກວມເອົາດິນຂອງຊາວບ້ານຫຍັງ. ແລະວ່າ ນອກຈາກບໍລິສັດດັ່ງກ່າວແລ້ວ ທີ່ຜ່ານມາ ກໍເຄີຍເຫັນມີນັກລົງທຶນຈີນ ອີກຈໍານວນໜຶ່ງ ໄດ້ມາລົງທຶນປູກຖົ່ວລຽນ ກ່ອນແລ້ວ ຊຶ່ງບາງບ່ອນ ຕົ້ນຖົ່ວລຽນ ກໍເລີ້ມອອກດອກອອກຜົນແລ້ວ.

“ແມ່ນ ມັນກະເປັນຊ້ວງຢູ່ ມັນກໍຈະແບ່ງກັນ ໂຕໃດດິນລັດ ເພິ່ນກະເປັນ ຈີນເຂົາກະສໍາປະທານນໍາລັດ ໂຕໃດເປັນຂອງປະຊາຊົນ ເພິ່ນກະບໍ່ໄດ້ແຕະຕ້ອງນ່າ ປະຊາຊົນເຂົາກະປູກມັນປົກກະຕະເຂົາ ບໍ່ຮອດເຊຄໍາພໍກະມີນ່າ ກາຍປິ່ນດົງໄປນີ້ ອອກແຕ່ສະໜາມໄຊປະມານ 10 ປາຍຫລັກ ກະມີສວນທົ່ວລຽນຈີນ ຄືກັນ ເຫັນເປັນໝາກກະມີ.”

ແລະເຈົ້າຂອງສວນຖົ່ວລຽນ ນາງໜຶ່ງ ຢູ່ເມືອງສະໜາມໄຊ ກໍເຊື່ອວ່າ ໃນອະນາ ຄົດ ອາດຈະມີນັກລົງທຶນຈີນ ເຂົ້າມາສໍາປະທານດິນລັດ ເພີ່ມຂຶ້ນ ເພື່ອປູກ   ໝາກຖົ່ວລຽນ ສົ່ງໄປຂາຍທີ່ປະເທດຈີນ ເນື່ອງຈາກຢູ່ເຂດເມືອງສະໜາມໄຊນີ້ ດິນຂ້ອນຂ້າງດີ ແລະເໝາະສໍາລັບປູກຖົ່ວລຽນ.

“ໜ້າຈະຫລາຍຂຶ້ນນ່າ ດິນມັນດີ ເຂົາກະຍັງປູກຢູ່ ຫາກໍເລີ້ມເປັນໜ້ອຍໜຶ່ງ ບໍ່ໄກເຂົາກໍາລັງເລີ້ມປູກນ່າ ຂອງຄົນລາວຫາກໍ່ເລີ້ມເປັນປີທໍາອິດ ເປັນໜ້ອຍໜຶ່ງ.”

ກ່ອນໜ້ານີ້ ເມື່ອປີ 2021 ທາງການແຂວງອັດຕະປື ກໍໄດ້ອະນຸຍາດໃຫ້ບໍລິສັດ ເຈ່ຍລັນ ພັດທະນາກະສິກຳ ຂອງຈີນ ເຂົ້າມາສໍາປະທານທີ່ດິນ ປູກ ໝາກໄມ້ ປະເພດຕ່າງໆ ເປັນຕົ້ນ ໝາກກ້ວຍ, ຖົ່ວລຽນ ໃນຮູບແບບ 2+3 ໃນເນື້ອທີ່ທັງໝົດ 162 ເຮັກຕາ ຢູ່ບ້ານຫີນລາດ ແລະບ້ານຕາມະຍອດ ເມືອງສະໜາມໄຊ, ອາຍຸສໍາປະທານ 30 ປີ, ມູນຄ່າການລົງທຶນ 10 ຕື້ກີບ.

ແລະເມື່ອກ່ອນນັ້ນ ບໍລິສັດ ຄູນທະວີຊັບ ຮ່ວມມືພັດທະນາ ຄົບວົງຈອນຈໍາກັດຜູ້ດຽວ ຂອງນັກລົງທຶນຈີນ ທີ່ຕັ້ງຢູ່ບ້ານຕາມະຍອດ ກໍໄດ້ລົງທຶນປູກກ້ວຍ, ຖົ່ວ ລຽນ, ໝາກສົ້ມໂອ, ໝາກມີ້ ໃນເນື້ອທີ່ປະມານ 200 ເຮັກຕາ ແລະມາຮອດປີ 2023 ກໍໄດ້ຂະຫຍາຍເນື້ອທີ່ ເພີ້ມຂຶ້ນຕື່ມອີກ 103 ເຮັກຕ້າຣ໌.