ຍັງມີການລັກລອບ ຂາຍຜົງບີໝີ ທີ່ຜະລິດຈາກໝີດຳ ທີ່ລ້ຽງຢູ່ລາວ

ໃນຮອບ 10 ປີມານີ້ ທາງການລາວ ແລະ ພາກສ່ວນທີ່ກ່ຽວຂ້ອງ ໄດ້ລົງພື້ນທີ່ກວດກາ ແລະ ສະກັດກັ້ນບໍ່ໃຫ້ມີການຊື້-ຂາຍຜົງບີໝີຊະນິດແປ້ງ ທີ່ຜະລິດຈາກໝີດຳລ້ຽງຢູ່ທາງພາກເໜືອຂອງປະເທດ ເຊິ່ງຈັດຈໍາໜ່າຍໂດຍບໍລິສັດຂອງນັກລົງທຶນຊາວຈີນຫຼາຍບໍລິສັດ ໃຫ້ແກ່ຊາວຈີນທີ່ອາໄສຢູ່ຫຼາຍເມືອງ ແລະ ຫຼາຍແຂວງທົ່ວປະເທດລາວ. ດັ່ງເຈົ້າໜ້າທີ່ເຮັດວຽກກ່ຽວກັບການກວດກາປ່າໄມ້ ຢູ່ແຂວງພາກເໜືອກ່າວຕໍ່ວິທຍຸເອເຊັຽເສຣີ ໃນວັນທີ 03 ກັນຍາ 2024 ວ່າ:

“ແມ່ນຢູ່ຕາມຮ້ານອາຫານ ຢູ່ຕາມໜ້າຮ້ານຮ້ານຂາຍເຄື່ອງພວກເຮົາ ກໍ່ໄດ້ສະກັດກັ້ນຢູູ່ແມ່ນອັນນ່າໝີລ້ຽງຢູ່ອັນນ່າຫຼວງນໍ້າທາ ແຂວງບໍ່ແກ້ວປະມານນີ້ແຫຼະຕອນນີ້ສະກັດກັ້ນ ແລ້ວຕອນນີ້ໃຫ້ເຊົາແລ້ວແຕ່ຈຳນວນເພິ່ນຍັງອັນນັ້ນຢູ່ຂາຍມາດົນແລ້ວດົນໆ ເກີດມານີ້ໃຫ້ຢຸດເຊົາມາປະມານ 10 ປີມາແລ້ວກ່ອນໜ້ານີ້ປະມານ 2014 ລົງໄປທາງຫຼັງນີ້ກໍ່ປະມານ 2-3 ປີນີ້ແຫຼະຈາກນັ້ນມາພວກເຮົາກໍ່ຕ້ານສະກັດກັ້ນເນາະ ຈັບຜູ້ທີ່ມາຂາຍຜົງຜະລິດຕະພັນບີໝີນີ້ແມ່ນໆ ຄົນຈີນຄົນຈີນເປັນຜູ້ອັນນັ້ນ.”

ຈາກການລົງພື້ນທີ່ທີ່ກວດກາ ແລະ ປາບປາມການຊື້-ຂາຍ ຜົງບີໝີໃນໄລຍະບໍ່ດົນມານີ້ເຈົ້າໜ້າທີ່ທີ່ກ່ຽວຂ້ອງສາມາດຍຶດຜະລິດຕະພັນ ຜົງບີໝີຊະນິດແປ້ງຂອງສະຖາບັນຄົ້ນຄ້ວາ ຊິງຫຼົງລ້ຽງໝີປ່າປະເທດລາວ ຢູ່ແຂວງຫຼວງນໍ້າທາ ຂອງ ບໍລິສັັດ ບໍ່ເຕັນແດນຄຳລາວ ຈຳກັດຜູ້ດຽວ ແລະ ບໍລິສັດ ສຽວພາງ ການຄ້າ ສາກົນ ຂາເຂົ້າ-ຂາອອກ ຈຳກັດຜູ້ດຽວ ຢູ່ເມືອງສີໂຄດຕະບອງ ນະຄອນຫຼວງວຽງຈັນ ຂອງນັກລົງທຶນຊາວຈີນຢູ່ສະໜາມບີນວັດໄຕ, ຫ້າງຮ້ານ, ຮ້ານອາຫານ ແລະ ຮ້ານຂາຍເຄື່ອງຍົກ-ເຄື່ອງຫຍ່ອຍໃນເຂດເທດສະບານຢູ່ນະຄອນຫຼວງວຽງຈັນ, ຮ້ານຂາຍເຄື່ອງ ແລະ ສະຖານທີ່ທ່ອງທ່ຽວຢູ່ນະຄອນຫຼວງພະບາງ ແລະ ສະຖານີລົດໄຟ ລາວ-ຈີນ ໄດ້ຈໍານວນໜຶ່ງ. ດັ່ງເຈົ້າໜ້າທີ່ກ່າວຕື່ມວ່າ:

“ຜົງບີໝີບໍ່ທັນໄດ້ຮັບອະນຸຍາດ ຈາກທາງການລາວອົງການສາກົນ ທີ່ຈັດຕັ້ງຢູ່ລາວກໍ່ບໍ່ ໄດ້ອະນຸຍາດບໍ່ໃຫ້ຂາຍແລ້ວດຽວນີ້ແຕ່ທາງພວກເຮົາ ກໍ່ຍັງສືບຕໍ່ປາບປາມຢູ່ 10 ປີລົງຫຼັງໄປນີ້ພວກຂະເຈົ້າເຮັດຂາຍເດ້ແຕ່ວ່າ 10 ປີຂຶ້ນມານີ້ພວກເຮົາປາບຢູ່ປັດຈຸບັນກໍ່ 10 ປີນີ້ແລ້ວໂຕນີ້ນ່າ. ແມ່ນອັນຫຼາຍບໍລິສັດ ບາງເທື່ອກໍ່ນໍາເຂົ້າມາຈາກຈີນກໍ່ມີສ່ວນຫຼາຍມັນຈະເປັນພາສາຈີນໝົດ. ບໍ່ທັນໄດ້ແນະນໍາຊື້ນັກທ່ອງທ່ຽວຍ້ອນໝີດຳເປັນສັດຫວງຫ້າມ.”

ທ່ານກ່າວຕື່ມວ່າປັດຈຸບັນທາງການລາວ ແລະ ພາກສ່ວນທີ່ກ່ຽວຂ້ອງໄດ້ເລັ່ງປາບປາມບໍ່ໃຫ້ມີການຜະລິດ-ຈຳໜ່າຍ ແລະ ຊື້-ຂາຍ ຜົງບີໝີຕື່ມອີກ ແລະ ຈາກຂໍ້ມູນຂອງທາງການລາວໃນເບື້ອງຕົ້ນ ລະບຸວ່າບໍ່ທັນໄດ້ມີການຜະລິດສິນຄ້າດັ່ງກ່າວນີ້ ຢູ່ພາຍໃນປະເທດລາວແລ້ວ ແລະ ຜົງບີໝີທີ່ຍັງຖືກ ຊື້-ຂາຍ ໃນປັດຈຸບັນສ່ວນຫຼາຍແມ່ນເປັນການລັກລອບນໍາເຂົ້າ ມາແຕ່ປະເທດຈີນ. ທັງນີ້ສຳລັບກັບບັນຈຸຜົງບີໝີຈຳນວນໜຶ່ງທີ່ຍັງຄົງລະບຸແຫຼ່ງຜະລິດ ຢູ່ພາຍໃນປະເທດລາວເປັນຕົ້ນນະຄອນຫຼວງວຽງຈັນ ແລະ ແຂວງຫຼວງນໍ້າທາ ແມ່ນເປັນກັບບັນຈຸພັນເກົ່າ.

ຂະນະດຽວກັນທາງດ້ານຜູ້ຜະລິດ ແລະ ຕົວແທນຈໍາໜ່າຍຜະລິດຕະພັນຜົງບີໝີ ຢູ່ປະເທດລາວບາງສ່ວນໃຫ້ຂໍ້ມູນວ່າແມ່ນຍັງມີການຜະລິດຜົງບີໝີ ຊະນິດແປ້ງບາງສ່ວນຢູ່ພາຍໃນປະເທດລາວ. ດັ່ງປະຊາຊົນນະຄອນຫຼວງວຽງຈັນ ທີ່ຮູ້ກ່ຽວກັບເລື່ອງນີ້ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ແມ່ນ ເຈົ້າໆ ເປັນຜະລິດຕະພັນຂອງບີໝີຫັ້ນເລີຍ ເຈົ້າອືມັນກໍດີຫຼາຍຢ່າງແກ້ຮ້ອນແກ້ໃນອີ່ຫຍັງຕ່າງໆ ສັບພະຄຸນມັນມີຫຼາຍອັນຢູ່ ເຈົ້າອັນນີ້ຜະລິດຕະພັນຂອງບ້ານເຮົານີ້ແຫຼະ ເຈົ້າອືໂດຍນິຍົມຢູ່ເຈົ້າແມ່ນໆ ເຮົາວາງຜະລິດຕະພັນຂາຍເຈົ້າຫຼາຍຈຸດຢູ່ ເຈົ້າແຫຼ່ງທ່່ອງທ່ຽວຢູ່ຕາມຫ້າງຊັບພະສິນຄ້າມີເຈົ້າ.”

ອີງຕາມຂໍ້ມູນເທີງກັບຜົງບີໝີລະບຸວ່າ ແມ່ນເປັນຢາພື້ນເມືອງຈີນສະກັດຈາກບີໝີແທ້ 100% ຜະລິດດ້ວຍເທັກໂນໂລຢີທີ່ທັນສະໄໝ ເປັນຜະລິດຕະພັນຊະນິດຝຸ່ນອັດກ້ອນສີເຫຼືອງ ແລະ ສີນໍ້າຕານເຂັ້ມ. ມີກິ່ນຫອມແຕ່ອາດຄາວເລັກໜ້ອຍ, ມີລົດຊາດຂົມແຕ່ອອກຫວານໜ້ອຍໜຶ່ງ, ມີຄຸນສົມບັດບໍາລຸງສ່ວນຕ່າງໆ ຂອງຮ່າງກາຍເປັນຕົ້ນແກ້ຮອ້ນໃນ, ອະນາໄມຕັບ, ຮັກສາບີ, ສາຍຕາ, ລົດຄວາມດັນເລືອດ, ໂລກເບົາຫວານ, ເຈັບຄໍ, ລະບາຍລໍາໃສ້ ແລະ ອື່ນໆ . ສາມາດນໍາໃຊ້ໄດ້ເປັນເວລາດົນເຖິງ 3 ປີ ແລະ ບາງບໍລິສັດມີການຮັບປະກົນສິນຄ້າຮອດ 10 ປີ.

ທີ່ຜ່ານມາຜົງບີໝີເປັນທີ່ຮູ້ຈັກ ແລະ ແຜ່ຫຼາຍແຕ່ສະເພາະຊາວຈີນ ບາງກຸ່ມທີ່ອາໄສຢູ່ພາຍໃນປະເທດລາວເທົ່ານັ້ນແຕ່ໃນໄລຍະ 1-2 ປີມານີ້ຜົງບີໝີເປັນທີ່ຕ້ອງການ ແລະ ແຜ່ຫຼາຍທັງໃນກຸ່ມຄົນຈີນທີ່ອາໄສຢູ່ລາວລວມເຖິງຄົນລາວ ແລະ ນັກທ່ອງທ່ຽວບາງກຸ່ມໃນລາຄາກັບລະປະມານ 280,000 ຫາ 350,000 ກີບ. ດັ່ງປະຊາຊົນທີ່ຮູ້ຈັກກ່ຽວກັບເລື່ອງນີ້ ຢູ່ແຂວງພາກເໜືອກ່າວວ່າ:

“ຜ່ານມານີ້ອັນຄົນຈີນເຂົາມາຊອກຕະຫຼອດ ແຕ່ວ່າເອື້ອຍກໍຊອກໃຫ້ເຂົາເຈົ້າ ບໍ່ໄດ້ຫັ້ນນ່າເນາະດຽວນີ້ເຂົາເຮັດສຳເລັດຮູບອອກມາເລີຍ ເອື້ອຍຂາຍ 280,000 ກີບສ່ວນຫຼາຍລູກຄ້າແມ່ນຫຼາຍກ່ວາໝູ່ ແມ່ນຈີນແລ້ວກໍ່ຄົນລາວສ່ວນໜຶ່ງ ແຕ່ວ່າພັດມີໜ້ອຍກ່ວານ່າຄົນລາວຫັ້ນນ່າອ່າ ສ່ວນໜຶ່ງພວກຂະເຈົ້າມາຢູ່ລາວແລ້ວສ່ວນໜຶ່ງກໍ່ຢູ່ຈີນຫັ້ນແຫຼະແລ້ວກໍ່ນໍາເຂົ້າ.”

ຂະນະດຽວກັນເມື່ອສິນຄ້າ ດັ່ງກ່າວເປັນທີນິຍົມຫຼາຍຂຶ້ນຈຶ່ງເຮັດໃຫ້ທາງບໍລິສັດ ຂອງນັກລົງທຶນຊາວຈີນເລີ່ມເປີດຮັບຕົວແທນຈຳໜ່າຍ ຢູ່ແຂວງຕ່າງໆ ທັງນີ້ບາງສ່ວນແມ່ນລັກຂາຍຢູ່ຕາມຮ້ານຄ້າ ແລະ ບາງສ່ວນແມ່ນເປັນການປະກາດ ຂາຍຜ່ານຊ່ອງທາງອ໋ອນລາຍນ໌. ດັ່ງຕົວແທນຈຳໜ່າຍຜົງບີໝີຄຳຢູ່ແຂວງພາກເໜືອກ່າວວ່າ:

“ຂາຍຢູ່ນໍາອ໋ອນລາຍນ໌ເຈົ້າຍັງມີຢູ່ເດີ້ເຈົ້າ ພວກເຮົາຫັ້ນອັນເປັນຂອງລາຍເລີຍເຈົ້າ ໂຕນີ້ເອົາປະສົມເປັນຢາເນາະເຈົ້າເນາະຜົງບີໝີເລີຍເຂົາເອົາມາ ແຕ່ນໍ້າບີໝີເຂົາເອົາມາປະສົມເປັນຢາ ແລ້ວແຕ່ເຮົາເອົາໃສ່ນໍ້າອຸ່ນກກິນເຈົ້ານໍ້າອຸ່ນຫຼືວ່າ ໃສ່ເຫຼົ້າໃສ່ຫຍັງກິນກິນປະມານປາຍນີ້ເຮົາໃສ່ປະມານສໍ່າເມັດເຂົ້າສານນີ້ ຖ້າເຮົາກິນໄດ້ຂົມເຮົາກໍ່ໃຊ້ຫຼາຍແຕ່ເຮົາກໍ່ບໍ່ເຄີຍຂາຍອອກ ຕ່າງປະເທດຈັກເທື່ອເຈົ້າມີຂາຍດົນແລ້ວເຈົ້າໂອ້ຍຫຼາຍໆ ຫຼາຍປີແລ້ວເຈົ້າ.”

ອີງຕາມການແຈ້ງການຂອງກົມກວດາປ່າໄມ້ ກະຊວງກະສິກໍາ ແລະ ປ່າໄມ້ ສະບັບເລກທີ 0638/ກກປມ ລະບຸວ່າໃນໄລຍະທີ່ຜ່ານມາທາງການລາວ ແລະ ພາກສ່ວນທີ່ກ່ຽວຂ້ອງຍັງພົບເຫັນການຄ້າຂາຍສັດປ່າ, ຊີ້ນສ່ວນ ແລະ ຜະລິດຕະພັນຈາກສັດປ່າຕາມສະຖານທີ່ຕ່າງໆ ບໍ່ວ່າຈະເປັນຕະຫຼາດ, ໂຮງແຮມ, ຮ້ານອາຫານ, ຫ້າງຮ້ານ, ສະຖານທີ່ທ່ອງທ່ຽວ, ຖະໜົນຫົນທາງ ແລະ ອື່ນໆ ອີກທັງຍັງມີການປະກາດ ຊື້-ຂາຍ ແລະ ສ້າງສື່ໂຄສະນາແບບວີດີໂອ, ຖ່າຍຮູບພາບການລ່າສັດປ່າປະເພດຫວງຫ້າມຜ່ານສື່ສັງຄົມອ໋ອນລາຍ໌ໂດຍບໍ່ຢ້ານຕໍ່ກົດໝາຍ.

ສໍາລັບຜູ້ດໍາເນີນການຊື້-ຂາຍ, ຄອບຄອງ, ນໍາເຂົ້າ-ສົ່ງອອກສັດປ່າ, ຊາກ, ຊີ້ນສ່ວນ ແລະ ຜະລິດພັນສັດປ່າປະເພດບັນຊີຫວງຫ້າມຈະຖືກລົງໂທດຕາມປະມວນກົດໝາຍອາຍາ ໝວດທີ 9 ມາດຕາ 334, 335 ແລະ 337 ເຊິ່ງຈະຖືກຕັດອິດສະລະພາບແຕ່ 6 ເດືອນ ຫາ 3 ປີ ຫຼືດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໄໝແຕ່ 10 ລ້ານ ຫາ 50 ລ້ານກີບ.