ເຂື່ອນຈີນປ່ອຍນໍ້າ ທາງການໄທຍ ເຕືອນຊາວບ້ານ ໃຫ້ຕຣຽມພ້ອມ

ໄຊຍາ
2022.05.13
Share on WhatsApp
Share on WhatsApp
ເຂື່ອນຈີນປ່ອຍນໍ້າ ທາງການໄທຍ ເຕືອນຊາວບ້ານ ໃຫ້ຕຣຽມພ້ອມ ຊາວບ້ານຂົນເຄື່ອງຂອງໜີນ້ຳ ເຫດການດັ່ງກ່າວ ເກີດຂຶ້ນຫຼັງຈາກທີ່ຈີນ ເພີ່ມປະຣິມານການປ່ອຍນ້ຳ ຈາກເຂື່ອນຈິ່ງຫົງ ຈາກ 970 ແມັດກ້ອນຕໍ່ວິນາທີ ເປັນ 1,626 ແມັດກ້ອນຕໍ່ວິນາທີ ນັບແຕ່ວັນທີ 21 ເມສາ 2022 ນີ.
RFA

ເຂື່ອນຈິ່ງຫົງຂອງຈີນໄດ້ປ່ອຍນໍ້າ ລົງທ້າຍເຂື່ອນລະຫວ່າງວັນທີ 9-11 ພຶສພານີ້ດ້ວຍປະຣິມານ 1,105 ແມັດກ້ອນຕໍ່ວິນາທີ ຊຶ່ງຈະສົ່ງຜົລໃຫ້ລະດັບແມ່ນໍ້າຂອງຢູ່ປະເທດລາວ ແລະ ໄທຍ ເພີ່ມສູງຂຶ້ນປະມານ 1.20 ຫາ 1.40 ແມັດ ລະຫວ່ງວັນທີ 11-19 ພຶສພາ 2022 ນີ້.

ຂະນະທີ່ຊາວບ້ານໃນເມືອງຫ້ວຍຊາຍ ແຂວງບໍ່ແກ້ວກ່າວວ່າຄືນວັນທີ 12 ແລະ ເຊົ້າວັນທີ 13 ພຶສພານີ້ຣະດັບແມ່ນໍ້າຂອງໄດ້ເພີ່ມສູງຂຶ້ນຢ່າງຜິດປົກກະຕິຊຶ່ງຊາວບ້ານໃນພື້ນທີ່ກໍຮູ້ດີວ່າຣະດັບນໍ້າທີ່ເພີ່ມສູງຂຶ້ນມາຈາກເຂື່ອນໃນປະເທດຈີນປ່ອຍນໍ້າ. ຢ່າງໃດກໍຕາມຊາວບ້ານໃນພື້ນທີ່ ບໍ່ໄດ້ຮັບການແຈ້ງເຕືອນ ຈາກທາງການລາວ ກ່ຽວກັບເຂື່ອນຂອງຈີນຈະປ່ອຍນໍ້າ ແຕ່ຊາວບ້ານຮູ້ວ່າແມ່ນໍ້າຂອງ ຂຶ້ນຍ້ອນປະສົບການແລະສັງເກດການໄຫຼຂອງນໍ້າ.

ດັ່ງຊາວບ້ານຜູ້ນຶ່ງ ໃນເມືອງຫ້ວຍຊາຍ ແຂວງບໍ່ແກ້ວ ກ່າວຕໍ່ວິທຍຸເອເຊັຽເສຣີໃນວັນທີ 13 ພຶສພາ ນີ້ວ່າ:

ນີ້ຂຶ້ນຫຼາຍເຕີບຢູ່ ມື້ນີ້ຂຶ້ນຫຼາຍຜິດປົກກະຕິ ບໍ່ມື້ນີ້ນ່າ ສ່ວນຫຼາຍປະຊາຊົນມັນບໍ່ຮູ້ອີ່ໂນ່ອີ່ເນ່ຫຍັງຫັ້ນ ກໍບໍ່ໄດ້ຕິດຕາມ ມັນກາບໍ່ຮູ້ຫຍັງແທ້ ແຕ່ວ່າບໍ່ແກ້ວເຮົາກໍເຂົາມີພູມີອັນນັ້ນຫຼາຍ.

ຊາວບ້ານຜູ້ນີ້ໄດ້ກ່າວຕື່ມວ່າ ຫາກເຂື່ອນຈີນຈະປ່ອຍນໍ້າ ກໍຢາກສເນີໃຫ້ພາກສ່ວນທີ່ກ່ຽວຂ້ອງ ໂດຍສະເພາະທາງການລາວ ຄວນຈະແຈ້ງເຕືອນຊາວບ້ານ ໃຫ້ວ່ອງໄວເພື່ອໃຫ້ຊາວບ້ານ ໄດ້ຮັບຮູ້ຂໍ້ມູນຂ່າວສານ ແລະຕຣຽມພ້ອມທີ່ຈະຮັບມື ເພາະທີ່ຜ່ານມາຊາວບ້ານ ສ່ວນຫຼາຍມັກຈະໄດ້ຍິນສື່ຈາກໄທຍທີ່ຣາຍງານ ຜ່ານໂທຣະທັດ ແລະສື່ສັງຄົມອ໋ອນລາຍນ໌.

ຊາວບ້ານອີກຜູ້ນຶ່ງໃນເມືອງຕົ້ນເຜິ້ງກ່າວວ່າຕອນເຊົ້າຂອງວັນທີ 13 ພຶສພາ ຣະດັບແມ່ນໍ້າຂອງໄດ້ເພີ່ມຂຶ້ນສູງແທ້ແລະຂ້ອນຂ້າງຈະໄຫຼແຮງແຕ່ຊາວບ້ານໃນພື້ນທີ່ກໍພາກັນເກັບມ້ຽນເຄື່ອງຂອງແລະເຮືອປະມົງໄວ້ບ່ອນປອດພັຍແລ້ວຍ້ອນຊາວບ້ານທຸກຄອບຄົວກໍອາສັຍປະສົບການໃນການທັມມາຫາກິນຕາມແມ່ນໍ້າຂອງຈຶ່ງຮູ້ສະຖານະການນໍ້າຂຶ້ນ-ນໍ້າລົງ.

ດັ່ງຊາວບ້ານຜູ້ນຶ່ງໃນເມືອງຕົ້ນເຜິ້ງ ແຂວງບໍ່ແກ້ວກ່າວຕໍ່ວິທຍຸເອເຊັຽເສຣີໃນວັນທີ 13 ພຶສພາ ນີ້ວ່າ:

ໂອ້! ຂຶ້ນຫຼາຍແທ້ເດ້ ທາງເຮົາແທ້ບໍ່ມີບັນຫາດອກ ໃຫຍ່ປານໃດກໍບໍ່ມີບັນຫາ ບໍ່ມີຜົລກະທົບ ແຕ່ທາງລຸ່ມບໍ່ແນ່ແຕ່ທາງເທິງ ເຮົານີ້ບໍ່ເປັນຫຍັງດອກຫຼາຍກາບໍ່ຖ້ວມດອກ.

ສ່ວນຄົນໄທຍທີ່ອາສັຍຢູ່ເມືອງຊຽງແສນ ແຂວງຊຽງຮາຍກ່າວວ່າກໍໄດ້ຮັບການແຈ້ງເຕືອນ ຈາກທາງການໄທຍແລ້ວວ່າ ລະດັບແມ່ນໍ້າຂອງຈະເພີ່ມສູງຂຶ້ນ ຍ້ອນເຂື່ອນຈີນປ່ອຍນໍ້າ ຊຶ່ງຊາວບ້ານ ແລະຜູ້ປະກອບການຕ່າງໆ ທີ່ອາສັຍຢູ່ຕາມແຄມແມ່ນໍ້າຂອງ ກໍພາກັນຕື່ນໂຕແລະ ເກັບມ້ຽນເຄື່ອງຂອງໄວ້ຢ່າງປອດພັຍ ຕາມການແຈ້ງເຕືອນ. ຂະນະທີ່ການປ່ອຍນໍ້າອອກຈາກເຂື່ອນຈີນ ໃນຄັ້ງນີ້ເຮັດໃຫ້ລະດັບແມ່ນໍ້າຂອງເພີ່ມສູງຂຶ້ນຫຼາຍ ແລະຂ້ອນຂ້າງຈະໄຫຼແຮງ ກວ່າຮອບທີ່ຜ່ານມາ ປະມານກາງເດືອນເມສານີ້.

ດັ່ງຊາວບ້ານໃນເມືອງຊຽງເສນ ແຂວງຊຽງຮາຍ ປະເທດໄທຍກ່າວຕໍ່ວິທຍຸເອເຊັຽເສຣີ ໃນວັນທີ 13 ພຶສພາ ນີ້ວ່າ:

ເພີ່ມເຈົ້າ ກຳລັງເພີ່ມຂຶ້ນເລື້ອຍໆ ແຕ່ຮູ້ສຶກວ່າຮອບນີ້ ຈະເພີ່ມຂຶ້ນຫຼາຍ ຫຼາຍກ່ວາຮອບທີ່ແລ້ວ ການຕຣຽມພ້ອມຮັບມື ຄືເກົ່າເຈົ້າ ຕ້ອງຄອຍສັງເກດຕລອດ.

ກ່ຽວກັບເຣື່ອງນີ້ກຸ່ມຮັກຊຽງຂອງ ແຂວງຊຽງຮາຍກ່າວວ່າ ການປ່ອຍນໍ້າຂອງເຂື່ອນຈີນ ແມ່ນໄດ້ສົ່ງຜົລກະທົບຕໍ່ປະຊາຊົນທ້າຍເຂື່ອນ ຢ່າງໜັກໜ່ວງທຸກຄັ້ງ ເພາະຄັ້ງຫຼ້າສຸດປ່ອຍອອກມາເມື່ອໄລຍະເດືອນເມສາທີ່ຜ່ານ ມາກໍໄດ້ສົ່ງຜົລກະທົບຕໍ່ຊາວບ້ານ ທີ່ທຳມາຫາກິນຢູ່ແຄມແມ່ນໍ້າຂອງ ຖືກນໍ້າຖ້ວມຊັບສິນເສັຽຫາຍໄປຈຳນວນນຶ່ງ.

ນອກຈາກນີ້ການປ່ອຍນໍ້າ ຂອງເຂື່ອນຈີນຍັງກະທົບຕໍ່ ວິຖີຊີວິດຂອງຊາວບ້ານ ແລະລະບົບນິເວດຂອງແມ່ນໍ້າຂອງ ທັງໄຄ, ປາ ແລະ ພືດຜັກຕ່າງໆ ທີ່ຊາວບ້ານປູກໄວ້ ຕ້ອງປະເຊີນກັບສະພາບນໍ້າ ຂຶ້ນ-ນໍ້າລົງຈາກເຂື່ອນຢ່າງຕໍ່ເນື່ອງ.

ດັ່ງຊາວບ້ານກຸ່ມຮັກຊຽງຂອງ ແຂວງຊຽງຮາຍ ປະເທດໄທຍກ່າວຕໍ່ວິທຍຸເອເຊັຽເສຣີ ວັນທີ 13 ພຶສພາ ນີ້ວ່າ:

ແທ້ຈິງແລ້ວ ມັນຕ້ອງໄປເບິ່ງເຣື່ອງຣະດູການ ແລ້ວກໍລະດັບນໍ້າໃນໄລຍະນັ້ນຄວນຈະໃຫ້ເຂື່ອນໂຕສຸດທ້າຍຫຼືເຂື່ອນຈິ່ງຫົງນີ້ເປັນຄວບຄຸມນໍ້າເພື່ອຈະໃຫ້ນໍ້າເປັນປົກກະຕິໃຫ້ໃກ້ຄຽງກັບທັມຊາດຫຼາຍທີ່ສຸດ.ພໍບໍ່ມີການເດີນເຮືອນໍ້າເປັນປົກກະຕິນໍ້າມັນນີ້ງຊາວບ້ານກໍມີລາຍໄດ້ຈາກໄຄ ຈາກປາ ແຕ່ພໍນໍ້າມັນສວິງ ຂຶ້ນລົງແບບນີ້ເຫັນເລີຍວ່າທຸກຢ່າງມັນຈົບເລີຍ.

ການປ່ອຍນໍ້າຂອງເຂື່ອນຈີນໃນຄັ້ງນີ້ ສຳນັກງານຊັບພະຍາກອນນໍ້າ ແຫ່ງຊາດຂອງໄທຍໄດ້ຣະບຸວ່າ ແຂວງຊຽງຮາຍ, ແຂວງບໍ່ແກ້ວ ແລະ ແຂວງຫຼວງພຣະບາງ ລະດັບຈະເພີ່ມສູງຂຶ້ນຕໍ່ເນື່ອງ ລະຫວ່າງວັນທີ 11-15 ພຶສພາ 2022 ປະມານ 1.20 – 1.40 ແມັດ. ສ່ວນ ແຂວງຕ່າງໆ ທັງໃນລາວ ແລະໄທຍທີ່ຢູ່ທ້າຍເຂື່ອນໄຊຍະບູຣີ ລົງໄປລະດັບນໍ້າຈະເພີ່ມສູງຂຶ້ນ ລະຫວ່າງວັນທີ 11-19 ພຶສພາ 2022 ປະມານ 1.20 – 1.50 ແມັດ ໂດຍຂຶ້ນກັບການບໍຣິຫານຈັດການ ຂອງເຂື່ອນໄຊຍະບູຣີ. ໂດຍໃຫ້ຊາວບ້ານທັງລາວ ແລະ ໄທຍ ເຝົ້າລະວັງ ຢ່າງໃກ້ຊິດແລະຕຣຽມພ້ອມ ຮັບມືກັບຜົລກະທົບ ທີ່ອາດຈະເກີດຂຶ້ນຈາກການປ່ຽນແປງ ຂອງລະດັບນໍ້າໃນໄລຍະເວລາດັ່ງກ່າວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ