ຈີນ ປ່ອຍນໍ້າຈາກເຂື່ອນຈິ່ງຫົງ

ຈໍາປາທອງ
2020-01-24
ອີແມວລ໌
ຄໍາເຫັນ
Share
ພິມ
ທ່ານ ນິວັດ ຣ້ອຍແກ້ວ ປະທານກຸ່ມຮັກຊຽງຂອງ
ທ່ານ ນິວັດ ຣ້ອຍແກ້ວ ປະທານກຸ່ມຮັກຊຽງຂອງ
RFA/PP

ທາງການຈີນ ປ່ອຍນໍ້າອອກຈາກເຂື່ອນຈິ່ງຫົງ ໃນເຂດເມືອງສິບສອງປັນນາ ແຂວງຍູນານ ລົງມາເພື່ອໃຫ້ຣະດັບນໍ້າ ຂອງສູງຂຶ້ນ ຍ້ອນວ່າ ເຮືອຂົນສົ່ງສິນຄ້າຂອງຕົນ ແລ່ນບໍ່ໄດ້ສະດວກ ເພາະນໍ້າຂອງຢູ່ທາງລຸ່ມບົກແຫ້ງລົງຫຼາຍຍ້ອນໄພທໍາມະຊາດ ແລະເຂື່ອນໃຫຍ່ຂອງຈີນ ກັກນໍ້າເອົາໄວ້ ເຮັດໃຫ້ມີຜົນກະ ທົບຫລາຍຕໍ່ປະເທດເຂດລຸ່ມແມ່ນໍ້າຂອງ.

ກ່ຽວກັບເຣຶ່ອງທີ່ວ່ານີ້ ເຈົ້າໜ້າທີ່ຂແນງຊັພຍາກອນນໍ້າ ຢູ່ສູນຄວບຄຸມນໍ້າແຂວງບໍ່ແກ້ວກ່າວ ຕໍ່ວິທຍຸເອເຊັຍເສຣີ ໃນມື້ວັນທີ 24 ມົກກະຣາ ນີ້ວ່າ ຫລັງຈາກຈີນ ປ່ອຍນໍ້າລົງມາເພິ່ມຂຶ້ນ ກໍໄດ້ມີການເຝົ້າລະວັງເຣຶ່ອງຜົນກະທົບ ທີ່ອາດຈະເກີດຂຶ້ນ:

"ຮັບຂ່າວ ເພິ່ນກໍປ່ອຍ ປ່ອຍດຽວນີ້ນະ ເພິ່ນກໍເບິ່ງສະພາບນໍ້າຫລຸດລົງແລ້ວເພິ່ນກໍປ່ອຍ ແຕ່ຜົນສະທ້ອນກໍທາງເມືອງກໍໄດ້ກ່າວເຕືອນໝົດ ແລ້ວ ແຕ່ຣະດັບນໍ້າບໍ່ຫລາຍ ເພິ່ນໄດ້ປ່ອຍ ເພິ່ນໄດ້ປ່ອຍຮັກສາລະດັບນໍ້າໃຫ້ມັນຢູ່ຄົງທີ່ ບໍ່ໃຫ້ມັນຂຶ້ນເກີນເຫດ ຖ້າມັນເກນຂອບເຂດ ທາງເມືອງກໍເຝົ້າລະວັງຢູລອດ 24 ຊົ່ວໂມງ."

ທ່ານກ່າວຕື່ມອີກວ່າ ຕັ້ງແຕ່ມື້ວັນທີ 1 ຫາວັນທີ 3 ມົກກະຣານີ້ ເຂື່ອນໄຟຟ້າຈິ່ງຫົງຂອງຈີນ ໄດ້ຫລຸດປະລິມານການປ່ອຍນໍ້າລົງມາຈາກ 1,500 ແມັດກ້ອນ ຕໍ່ວິນາທີ ລົງມາເປັນ 800 ແມັດກ້ອນ ແລະຫຼັງຈາກມື້ວັນທີ 4 ມາເຖິງວັນທີ 20 ມົກກະຣານີ້ ກໍຫຼຸດລົງຕື່ມອີກ ຄື ປ່ອຍນໍ້າລົງມາພຽງ 600 ແມັດກ້ອນຕໍ່ວິນາທີ ໂດຍທີ່ຈີນໃຫ້ເຫດຜົນວ່າ ຕ້ອງການທົບສອບເຄຶ່ອງຈັກພາຍໃນເຂື່ອນນັ້ນ.

ຈົນມາເຖິງມື້ວັນທີ 21 ມົກກະຣານີ້ ຈີນຈຶ່ງໄດ້ເພິ່ມປະລິມານການປ່ອຍນໍ້າລົງມາເປັນ 1,250 ແມັດກ້ອນຕໍ່ວິນາທີ ເຮັດໃຫ້ຣະດັບນໍ້າຂອງ ສູງຂຶ້ນ.

ຕໍ່ການເພິ່ມປະຣິມານການປ່ອຍນໍ້າລົງມາ ຂອງຈີນນີ້ ເຈົ້າໜ້າທີ່ປົກຄອງບ້ານ ຢູ່ເມືອງຕົ້ນເຜິ້ງ ແຂວງບໍ່ແກ້ວທ່ານນຶ່ງເວົ້າວ່າ, ຈີນເພິ່ມການ ປ່ອຍນໍ້າລົງມາ ຍ້ອນວ່າເຮືອຂົນສົ່ງສິນ ຄ້າຂນາດໃຫຍ່ຂອງຈີນ ແລ່ນຜ່ານເຂດສາມຫລ່ຽມຄໍາ ບໍ່ໄດ້:

"ແຫ້ງຕີ ເຂົາອັດນີ້ ແຫ້ງແຫລະ ຖືວ່າຣະບົບເດີນເຮືອນີ້ໄປບໍ່ໄດ້ແລ້ວ ກໍຄາວນີ້ເຂົາປ່ອຍກໍສິມີຄືທໍາມະຊາດຫັ້ນແຫລະ ຄັນປ່ອຍທໍາມະດາ ກໍຄືທໍາມະຊາດຫັ້ນແຫລະ ເຮືອເຮົານີ້ກໍໄປໄດ້ ຫລຸດລົງກໍບໍ່ລົງຫລາຍແລ້ວ."

ທ່ານ ນິວັດ ຣ້ອຍແກ້ວ ປະທານກຸ່ມຮັກຊຽງຂອງ ແຂວງຊຽງຮາຍຂອງໄທກ່າວວ່າ ການທີ່ຈີນເພິ່ມການປ່່ອຍນໍ້າລົງມານັ້ນກໍເພື່ອຜົນປໂຍດ ຂອງຈີນ ທັງເຣຶ່ອງການປັ່ນກະແສໄຟຟ້າ ແລະການເດີນເຮືອ:

"ໃຊ້ຄໍາວ່າ ເປັນການຊ່ອຍເຫລືອຄົນລຸ່ມນໍ້າ ເມື່ອປະເທດລຸ່ມ ນໍ້າແລ້ງ ປະເທດຕົ້ນນໍ້າຈະປ່ອຍນໍ້າໃຫ້ ແຕ່ໃນຄວາມຈິງແລ້ວ ບັນຫາໃນແມ່ ນໍ້າຂອງບົກແຫ້ງມັນບໍ່ແມ່ນເກີດຈາກ ສະພາບດິນຟ້າອາກາດປ່ຽນແປງຢ່າງດຽວເທົ່ານັ້ນ ບັນຫາໃຫຍ່ຂອງ ແມ່ນໍ້າຂອງ ກໍຄືເຣຶ່ອງ ເຂື່ອນ ທາງຕອນບົນ ການທີ່ຈີນບອກວ່າ ນໍ້າບົກແຫ້ງຕ້ອງປ່ອຍນໍ້າມາ ມັນເປັນເຣຶ່ອງຂອງຜົນປະໂຫຍດຂອງເຂົາ ເຣຶ່ອງປັ່ນກະແສໄຟຟ້າ ຂອງ ການເດີນເຮືອ."

ແຕ່ເຖິງຢ່າງໃດກໍຕາມ ການຫລຸດປະລິມານການປ່ອຍນໍ້າ ອອກຈາກເຂຶ່ອນຈິ່ງຫົງ ຂອງຈີນ ຊຶ່ງເປັນເຂື່ອນໄຟຟ້າຂນາດໃຫຍ່ກັ້ນແມ່ນໍ້າຂອງ ມາຕັ້ງແຕ່ມື້ວັນທີ  1 ເຖິງວັນທີ 20 ມົກກະຣາ ນັ້ນ ສົ່ງຜົນກະທົບຢ່າງຮຸນແຮງ ຕໍ່ປະຊາຊົນໃນເຂດ ລຸ່ມ ແມ່ນໍ້າຂອງ ຫລາຍແຂວງ ຂອງລາວ ແລະໄທ ຄືຕັ້ງແຕ່ແຂວງບໍ່ແກ້ວລົງມາ ຍ້ອນນໍ້າຂອງບົກແຫ້ງ, ຂາດເຂີນນໍ້າ ສໍາລັບການປູກຝັງ, ລ້ຽງສັດ, ການທໍາມາຫາກິນ ກໍລໍາບາກ ແລະການເດີນເຮືອກໍບໍ່ໄດ້ຕາມປົກກະຕິ.

ເຕັມຫນ້າ