ຫຼາຍໂຮງງານບໍ່ບໍາບັດ ນໍ້າເສັຽ

ສິດນີ
2017.04.09
f-pollution ໂຮງງານ ຜລິດເຈັ້ຽ ໃນເຂດ ບຶງທາຕຫລວງ ວຽງຈັນ ປ່ອຍນໍ້າເສັຽ ປະສົມສີ ສານເຄມີ ລົງູສູ່ ຫ້ວຍຮ່ອງ ອອກເວີນກວ້າງ ຂອງບຶງ.
Screen captured from WWT Consulting video

ໂຮງງານອຸດສາຫະກັມ ຫຼາຍແຫ່ງ ໃນເຂດ ນະຄອນຫຼວງວຽງຈັນ ຍັງປ່ອຍນ້ຳເສັຽລົງສູ່ ແຫລ່ງນ້ຳທັມມະຊາດ ແລະຊຸມຊົນຢູ່ ຈຶ່ງສົ່ງ ຜົລກະທົບ ຕໍ່ ສີ່ງແວດລ້ອມ ແລະ ຊີວິດການເປັນຢູ່ ຂອງປະຊາຊົນ ທ້ອງຖິ່ນ, ຈາກການກວດສອບ ໂຮງງານ 81 ແຫ່ງ ຈຶ່ງພົບວ່າ ມີພຽງແຕ່ 3 ໂຮງງານເທົ່ານັ້ນ ທີ່ປະຕິບັດຕາມ ກົດຣະບຽບ ຂອງທາງການ. ເປັນຕົ້ນ ບໍຣິສັດເບັຽລາວ, ບໍຣິສັດ Lao soft drink ແລະບໍຣິສັດ ອຸໄລພານິດ ຈຳກັດ. ດັ່ງເຈົ້າຫນ້າທີ່ ອຸດສາຫະກັມ ແລະການຄ້າລາວ ທ່ານນຶ່ງກ່າວຕໍ່ ເອເຊັຽເສຣີ ໃນວັນທີ 6 ເມສາ ນີ້ວ່າ:

"ສະເພາະເຣື້ອງນ້ຳເສັຽ ເຮົາກໍມີມາຕການ ໃນການຄຸມຄອງ ກໍຄືວ່າ ຖ້າໂຮງງານໃດ ສົ່ງຜົລກະທົບຕໍ່ ສັງຄົມ ແລະ ສິ່ງແວດລ້ອມ ເຮົາກໍ ໃຫ້ເຂົາປັບປຸງ ເອີ້ນມາເຕືອນ ຫລືວ່າໃຫ້ເຂົາ ປັບປຸງ ແລ້ວເປັນຫຍັງ ຈຶ່ງຮ້ອງມາຟ້ອງອີກ ທີ່ວ່າບໍ່ໄດ້ ມາຕຖານ ຖ້າຮ້ອງຟ້ອງມາອີກ ເຮົາກໍຈະໃຫ້ເຂົາ ຢຸດຊົ່ວຄາວ ໃຫ້ເຂົາປັບປຸງ".

ທ່ານວ່າຜ່ານມາ ສະພາຫໍການຄ້າລາວ ໄດ້ຮັບງົບປະມານ 2 ລ້ານປາຍໂດລາ ເພື່ອກວດກາ ໂຮງງານ ອຸດສາຫະກັມ ເຂດນະຄອນຫຼວງ ວຽງຈັນ ທັງໝົດປະມານ 2 ພັນ 4 ຮ້ອຍປາຍແຫ່ງ ໃນລະຍະ ສາມປີ ທີ່ເລີ້ມດຳເນີນ ການກວດກາ ມາແຕ່ປີ 2014 ພົບວ່າຍັງມີຫຼາຍ ໂຮງງານ ບໍ່ໄດ້ມາຕຖານ ຍັງປ່ອຍນ້ຳເສັຽ ແລະ ສົ່ງກິ່ນເໝັນ ໄປສູ່ຊຸມຊົນຢູ່:

"ນອກຈາກນ້ຳເສັຽແລ້ວ ຍັງມີກິ່ນເໝັນ ຈາກໂຮງງານເນາະ ກິ່ນໂຕນີ້ ບາງໂຮງງານ ຂຶ້ນກັບໂຮງງານ ທີ່ໃຊ້ເນາະ ຄືສົມມຸດວ່າ ໂຮງງານ ຜລິດເຈັ້ຽ ໂຮງງານ ຜລິດມັນຕົ້ນບໍ່".

ທ່ານກ່າວຕື່ມວ່າ ຫາກການກວດສອບພົບວ່າ ໂຮງງານໃດ ຍັງບໍ່ໄດ້ມາຕຖານ ຄັ້ງທຳອິດ ຈະຖືກຕັກເຕືອນ ຖ້າກວດເທື່ອ ທີສອງ ຍັງພົບ ເຫັນບັນຫາເກົ່າ ຕ້ອງອອກຄຳສັ່ງໃຫ້ ປັບປຸງແລະບຳບັດ ແຕ່ຍັງຝ່າຝຶນຢູ່ ກໍຈະສັ່ງໃຫ້ປິດ ໂຮງງານຈົນກວ່າ ຈະມີການ ປັບປຸງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.