ຊາວບ້ານ 41 ຄອບຄົວ ຢູ່ແຂວງອຸດົມໄຊ ໄດ້ຮັບຜົນກະທົບ ຈາກນໍ້າປ່າໄຫລຊຸ

ຝົນຕົກໜັກຫລາຍຊົ່ວໂມງ ໃນອາທິດທີ່ຜ່ານມາ ເຮັດໃຫ້ເກີດນ້ໍາປ່າ ໄຫລຊຸເຂົ້າຖ້ວມເຮືອນ ແລະ ນາເຂົ້າ ຂອງປະຊາຊົນ ໃນເຂດບ້ານລາງ ແລະ ບ້ານນາງາມ ເມືອງໄຊ ແຂວງ ອຸດົມໄຊ. ສະເພາະຢູ່ບ້ານລາງ ມີ 39 ຄອບຄົວ ທີ່ໄດ້ຮັບຜົນກະທົບ ລວມມູນຄ່າເສັຍຫາຍ ທັງໝົດ 418,877,000 ລ້ານກີບ.

ໃນນີ້ເປັນນາ ໜອງປາ, ເຮືອນ, ລົດຈັກ, ລົດຖີບ, ໂຮງສີເຂົ້າ, ສັດລ້ຽງ, ເຄື່ອງນຸ່ງຫົ່ມ ແລະ ອຸປະກອນ ຈໍານວນໜຶ່ງ, ສ່ວນບ້ານນາງາມ ໄດ້ຮັບຜົນກະທົບ 6 ຄອບຄົວ. ກ່ຽວກັບເລື້ອງນີ້ ວິທຍຸ ເອເຊັຽເສຣີ ໄດ້ພະຍາຍາມຕິດຕໍ່ ໄປຍັງຊາວບ້ານ ຜູ້ໄດ້ຮັບຜົນກະທົບ ຢູ່ບ້ານລາງ ແລະ ບ້ານນາງາມ ແຕ່ບໍ່ສາມາດ ຕິດຕໍ່ໄດ້ ຍ້ອນ ເປັນເຂດພື້ນທີ່ ຫ່າງໄກຫລາຍ.

ເຖິງຢ່າງໃດກໍຕາມ ຊາວບ້ານຢູ່ ບ້ານຫ້ວຍຂຸມ ເຊິ່ງໄດ້ຮັບຜົນກະທົບ ຈາກນ້ໍາປ່າໄຫລຊຸ ເທື່ອນີ້ນໍາ ກ່າວວ່າ ຝົນເລີ່ມຕົກ ຕັ້ງແຕ່ປະມານຄືນ ວັນທີ 18 ຈົນຮອດວັນທີ 19 ກໍລະກົດ ທີ່ຜ່ານມາ, ເຮັດໃຫ້ນ້ໍາປ່າໄຫລຊຸ ແລະ ເຂົ້າຖ້ວມພື້ນທີ່, ແຕ່ເມື່ອຮອດວັນທີ 20 ກໍລະກົດ ນໍ້າໃນເຂດ ບ້ານຫວ້ຍຂຸມ, ບ້ານລາງ ແລະ ບ້ານນາງາມ ກໍເລີ່ມແຫ້ງແລ້ວ.

ສະເພາະຢູ່ໃນເຂດບ້ານຫ້ວຍຂຸມ ຄວາມເສັຍຫາຍສ່ວນຫລາຍ ແມ່ນກວມພື້ນທີ່ ທົ່ງນາ ແລະໜອງປາ. ປັດຈຸບັນ ພາກສ່ວນທີ່ກ່ຽວຂ້ອງ ໄດ້ລົງປະເມີນ ກວດກາຄວາມເສັຍຫາຍ ໃນເຂດບ້ານນາງາມ ແລະບ້ານລາງແລ້ວ ແຕ່ໃນເຂດບ້ານຫ້ວຍຂຸມ ຍັງບໍ່ມີ ເຈົ້າໜ້າທີ່ລົງມາກວດເທື່ອ.

ດັ່ງຊາວບ້ານຢູ່ບ້ານຫວ້ຍຂຸມ ເມືອງໄຊ ແຂວງອຸດົມໄຊ ທ່ານໜຶ່ງ ກ່າວຕໍ່ ວິທຍຸ ເອເຊັຽເສຣີ ໃນມື້ວັນທີ 24 ກໍລະກົດ 2024 ນີ້ວ່າ:

“ເສັຍຫາຍນີ້ ນາມີ 0.5 ເຮັກຕ້າຣ໌ເນາະ ຫລືວ່າ 3 ໄຮ່ປາຍໜ້ອຍໜຶ່ງເນາະ ແລ້ວກໍໜອງປານີ້ 300 ແມັດກະເລ ເນາະ ສັດລ້ຽງອັນອື່ນ ບໍ່ເສັຍຫາຍ ມີແຕ່ປາຫັ້ນແຫລະ ປາ 3,000 ໂຕ ນ້ໍາຖ້ວມແລ້ວກໍ ປາກໍຫາຍໝົດແລ້ວ ປາ ອອກໜົດ. ໂອ ທາງນາຂອງອ້າຍ ຍັງບໍ່ມີ ພະນັກງານຫຍັງ ກໍບໍ່ມີລົງມາເນາະ ແຕ່ວ່າເຫັນ ເຂົາເຈົ້າລົງຢູ່ນາງາມ.”

ເຂດບ້ານລາງ ແລະບ້ານນາງາມ ແມ່ນເປັນເຂດບ້ານໃນເຂດນອກ ຫ່າງຈາກເຂດຕົວເມືອງປະມານ 16-17 ກິໂລແມັດ ຊາວບ້ານ ປະກອບອາຊີບເຮັດນາ ລ້ຽງສັດໃຫຍ່ ເປັນຕົ້ນ ງົວ, ຄວາຍ ແລະ ປູກສວນສາລີ ເປັນຫລັກ. ດັ່ງ ເຈົ້າໜ້າທີ່ ຫ້ອງການປົກຄອງ ຢູ່ເມືອງໄຊ ແຂວງອຸດົມໄຊ ທ່ານໜຶ່ງກ່າວວ່າ:

“ໂອ ເຂດນອກ ປະມານ 10 ປາຍກິໂລນີ່ແຫລະ ປະມານ 16-17 ກິໂລ ເປັນຕົ້ນກໍເຮັດນາ ກັບລ້ຽງສັດ ແມ່ນແລ້ວ ລ້ຽງສັດໃຫຍ່ ເຮັດງົວບໍ່ ແລ້ວກໍຈໍານວນໜຶ່ງ ກໍເຮັດສວນສາລີ ສວນສາລີ ເຂົາຂາຍ ເຂົ້າໂພດຫັ້ນນ່າ.”

ຢູ່ເມືອງໄຊ ແຂວງອຸດົມໄຊ ຫາກບ່ອນໃດມີຝົນຕົກໜັກ ຕໍ່ເນື່ອງ ກໍຈະມີນ້ໍາປ່າໄຫລຊຸ ເກີດຂຶ້ນ ເປັນປະຈໍາທຸກປີ ສະເພາະຢູ່ບ້ານນາງາມ ແລະ ບ້ານລາງ ເປັນເຂດບ້ານ ທີ່ຢູ່ບໍລິເວນພູ ເມື່ອຝົນຕົກໜັກ ກໍເກີດນ້ໍາໄຫລຊຸ ແລະ ເຂົ້າຖ້ວມໄຮ່ສາລີ ແລະ ນາເຂົ້າເປັນປະຈໍາ. ດັ່ງ ຊາວບ້ານຢູ່ ບ້ານນ້ໍາແຫງ ເຊິ່ງຢູ່ໃກ້ຄຽງກັບ 2 ບ້ານດັ່ງກ່າວ ເມືອງໄຊ ແຂວງອຸດົມໄຊ ທ່ານໜຶ່ງ ກ່າວວ່າ:

“ຫລາຍເທື່ອແລ້ວໄດ໋ ຫລາຍປີແລ້ວເດ້ ຖ້າປີໃດນ້ໍາຝົນຫລາຍ ແລ້ວກໍນ້ໍາຖ້ວມ ເປັນຕະຫລອດ ສ່ວນຫລາຍແມ່ນນ້ໍາຖ້ວມໃສ່ສາລີ ກັບຖ້ວມນາ ຫັ້ນແຫລະ ບ່ອນແຖວນາງາມ ບ້ານລາງ ເປັນພູເປັນຜາ ນ້ໍາຫ້ວຍບໍ່ໃຫຍ່ ເວລາຝົນຕົກເນາະ ມັນຊິມາແຕ່ພູພຸ້ນ ໄຫລລົງມາ ແລ້ວກໍຖ້ວມ ເວລຝົນເຊົາ ມັນຈະຫາຍໄປ.” 

ປັດຈຸບັນຜະແນກແຮງງານ ແລະ ສະຫວັດດີການສັງຄົມ ແຂວງອຸດົມໄຊ ຮັບຮູ້ກ່ຽວກັບ ສະຖານະການນ້ໍາປ່າ ໄຫລຊຸ ເມືອງໄຊແລ້ວ ແຕ່ຍັງລໍຖ້າ ພາກສ່ວນທີ່ກ່ຽວຂ້ອງ ໃນຂັ້ນເມືອງ ເກັບກໍາຂໍ້ມູນ ຜົນກະທົບທັງໝົດ ຈຶ່ງຈະສາມາດ ເຮັດການຊົດເຊີຍ ທີ່ເໝາະສົມ ໄດ້. 

ໃນການຊ່ວຍເຫລືອ ຂັ້ນພື້ນຖານນັ້ນ ແມ່ນຄື ການແຈກຈ່າຍຂ້າວສານ ນ້ໍາດື່ມ ແລະ ອາຫານແຫ້ງຕ່າງໆ ໃຫ້ປະຊາຊົນ ທີ່ໄດ້ຮັບຜົນກະທົບ ຫລັງຈາກນັ້ນ ຫາກປະເມີນແລ້ວວ່າ ເຮືອນໄດ້ຮັບການເສັຍຫາຍ ຊາວບ້ານກໍຈະໄດ້ຮັບຈັດສັນທີ່ດິນ ເພື່ອສ້າງເຮືອນໃໝ່ ຫາກນາເຂົ້າເສັຍຫາຍ ກໍຈະໄດ້ຮັບເປັນເງິນຊົດເຊີຍ ແລະຂ້າວສານທີ່ໃຊ້ໄດ້ປະມານ 4-6 ເດືອນ. ດັ່ງ ເຈົ້າໜ້າທີ່ ຜະແນກແຮງງານ ແລະ ສະຫວັດດີການສັງຄົມ ຢູ່ແຂວງອຸດົມໄຊ ທ່ານໜຶ່ງ ກ່າວວ່າ:  

“ຖ້າຫາກເຮືອນນັ້ນເປ່ເພເນາະ ໄທເຮົາຊິຈະຈັດສັນທີ່ດິນໃຫ້ເນາະ ຖ້າວ່າເຮືອນເປ່ເພ ພວກເຮົາກໍຊິມີປະກອບສ່ວນປູນຊີເມັນ ສັງກະສີໃຫ້ເນາະ ແຕ່ວ່າເຂົ້າສານ ອາຫານແຫ້ງ ນ້ໍາດື່ມນີ້ ໄພພິບັດເບື້ອງຕົ້ນ ເຮົາຕ້ອງໄດ້ມີ ຖ້າເປັນທຸ່ງນານີ້ ຊົດເຊີຍເປັນເງິນ ແຕ່ພວກເຮົາຕ້ອງຕີລາຄາ ວ່າຄວາມເສັຍຫາຍ ແລ້ວກໍຂ້າວ ທີ່ເຂົາເຈົ້າ ໄດ້ຮັບຕໍ່ປີນັ້ນເທົ່າໃດ ແມ່ນ ສັດລ້ຽງຄືກັນ.” 

ຍ້ອນສະພາບຝົນຕົກໜັກ ແລະ ຕົກຕິດຕໍ່ກັນ ເປັນເວລາຫລາຍຊົ່ວໂມງ ເຮັດໃຫ້ລະດັບນ້ໍາສູງຂຶ້ນ ຢ່າງຕໍ່ເນື່ອງ ເຮັດໃຫ້ມື້ວັນທີ 19 ກໍລະກົດ 2024 ຜະແນກຊັບພະຍາກອນ ທໍາມະຊາດ ແລະ ສິ່ງແວດລ້ອມ ແຂວງອຸດົມໄຊ ອອກແຈ້ງການເຕືອນພັຍ ລະດັບນ້ໍາ ເຖິງປະຊາຊົນ ທີ່ອາໄສຢູ່ເຂດພື້ນທີ່ຕ່ໍາ ເຂດແຄມແມ່ນ້ໍາ ແລະ ເຂດທີ່ມີຄວາມສ່ຽງ ຕໍ່ ການເກີດ ໄພພິບັດ ແລະ ມີລະມັດລະວັງຕໍ່ ສະພາບນ້ໍາຖ້ວມ ແລະດິນເຈື່ອນ ທີ່ຈະເກີດຂຶ້ນ ພ້ອມທັງຂໍໃຫ້ ກະກຽມ ຍ້າຍຂອງຈໍາເປັນ ແລະ ສັດລ້ຽງ ໄປໄວ້ທີ່ສູງ.

ຕໍ່ມາໃນວັນທີ 22 ກໍລະກົດ ກົມອຸຕຸນິຍົມ ແລະ ອຸທົກກະສາດ ກໍໄດ້ອອກແຈ້ງເຕື່ອນ ໄພນ້ໍາຖ້ວມ ໃນລະຫວ່າງ ວັນທີ 22-23 ກໍລະກົດ ນີ້ ຍ້ອນຊວງວັນດັ່ງກ່າວ ມີພາຍຸໝຸນເຂດຮ້ອນ ພຣະພິຣຸນ (Prapiroon) ໄດ້ເຄື່ອນຜ່ານ ພາກກາງ ແລະ ພາກໃຕ້ ຂອງລາວ ແລະ ອາດເຮັດໃຫ້ ນ້ໍາສາຂາມີລະດັບນ້ໍາເພີ່ມຂຶ້ນ ຈຶ່ງຂໍໃຫ້ປະຊາຊົນ ໃນບັນດາ ແຂວງພາກກາງ ແລະ ພາກໃຕ້ ໂດຍສະເພາະປະຊາຊົນ ທີ່ອາໄສ ຢູ່ລຽບຕາມນ້ໍາເຊຈໍາພອນ ເມືອງຈໍາພອນ ແຂວງສວັນນະເຂດ ແລະລຽບນ້ໍາເຊໂດນ ເມືອງຊະນະສົມບູນ ແຂວງຈໍາປາສັກ ລະມັດລະວັງ ແລະ ກຽມພ້ອມ ຮັບມືຕໍ່ໄພນ້ໍາຖ້ວມ ທີ່ອາດເກີດຂຶ້ນ.

ພ້ອມກັນນັ້ນ ເກີດເຫດນໍ້າຖ້ວມ ກະທັນຫັນ ຢູ່ບ້ານເມືອງໝ້ວຍ ເມືອງວຽງຄໍາ ແຂວງຫລວງພະບາງ. ຊຶ່ງຫ້ອງການ ຖວທ ເມືອງວຽງຄໍາ ແຂວງຫລວງພະບາງ ລາຍງານວ່າ ຕອນກາງຄືນຂອງວັນທີ 23 ຫາ ຕອນເຊົ້າຂອງວັນທີ 24 ກໍລະກົດ, 2024 ໄດ້ເກີດມີຝົນຕົກໜັກ ຫຼາຍຊົ່ວໂມງຕິດຕໍ່ກັນ ເຮັດໃຫ້ປະລິມານນໍ້າເຊືອງ, ນໍ້າຫ້ວຍໂກນ, ຫ້ວຍມ້າ ແລະ ນໍ້າຫ້ວຍຫວີງ ເພີ່ມຂຶ້ນຫລາຍ  ແລະ ໄຫຼຖ້ວມ ບ້ານເຮືອນປະຊາຊົນ ຢູ່ ກຸ່ມບ້ານເມືອງໝ້ວຍ ເມືອງວຽງຄໍາ ເຊັ່ນ ບ້ານເມືອງໝ້ວຍ, ບ້ານຫ້ວຍໂກນ ແລະ ບ້ານໃກ້ຄຽງ, ສ້າງຜົນກະທົບ ຕໍ່ ປະຊາຊົນທີ່ດຳລົງຊີວິດ ຢູ່ເຂດແຄມນ້ຳ,

ປັດຈຸບັນ,​ ອົງການປົກຄອງເມືອງ ໄດ້ລະດົມກໍາລັງ ຊ່ວຍເຫລືອບັນເທົາທຸກໃນເບື້ອງຕົ້ນ; ທັງໄດ້ແຈ້ງໃຫ້ປະຊາຊົນ ທີ່ດຳລົງຊີວິດ ຢູ່ຕາມແຄມນໍ້າເຊືອງ ຈົ່ງມີສະຕິ ແລະ ມ້ຽນເຄື່ອງຂອງທີ່ມີຄ່າ ໄວ້ບ່ອນປອດໄພ, ສ່ວນຂໍ້ມູນເສຍຫາຍຕົວຈິງ ຈະລາຍງານໃຫ້ຮູ້ ພາຍຫຼັງ ສຳເລັດການເກັບກຳຂໍ້ມູນ.