ໂຮງງານປຸຍອິນຊີ ສົ່ງກິ່ນ ເໝັນ

ຈໍາປາທອງ
2018.04.27
F-Xaythany ກິ່ນເໝັນ ຈາກໂຮງງານຜລິດ ປຸຍອິນຊີ ຂອງຈີນ ທີ່ເມືອງໄຊທານີ ທີ່ຍັງສົ່ງກິ່ນເໝັນຢູ່ ຊາວບ້ານຈຶ່ງພາກັນ ອອກມາຮ້ອງທຸກ
Screen captured FB friend page

ຈົນມາເຖິງປັດຈຸບັນ ໂຮງງານຜລິດປຸຍອິນຊີຂອງຈີນ ທີ່ນິຄົມອຸດສາຫະກັມ ຫລັກ 21 ເມືອງໄຊທານີ ນະຄອນຫລວງວຽງຈັນ ຍັງສົ່ງກິ່ນ ເໝັນໃສ່ປະຊາຊົນ ເຂດອ້ອມຂ້າງ ເປັນຕົ້ນຕໍ່ຊາວບ້ານສະພັງຄະນົງ 200 ປາຍຄອບຄົວ. ດັ່ງຊາວບ້ານສະພັງຄະນົງ ກ່າວຕໍ່ວິທຍຸເອເຊັຍ ເສຣີ ໃນມື້ວັນທີ 27 ເມສາ ນີ້ວ່າ:

"ປະໂທ ມາມື້ລະແຮງຮ້າຍເພາະຝົນ ຫາກໍ່ຕົກສອງມື້ຫລັງນໍ ລົມພັດໄປທາງໃດທາງນັ້ນເໝັນ ເອີຕາມແບບສເນີນໍ ກໍເດືອນ 12 ພຸ້ນແຫລະ ປີ 2017 ໄດ້ສີ່ຫ້າເດືອນນີ້ແຫຼະ ບໍ່ເຫັນມີຫຍັງປ່ຽນແປງ ໃນບົດບັນທຶກກໍໄດ້ອ່ານຢູ່ວ່າ ໃຫ້ເຂົາປ່ຽນແປງແນວນັ້ນແນວນີ້ ເຈົ້າຂອງໂຮງງານ ກໍເຊັນ ວ່າສິປ່ຽນແປງ ແຕ່ມາເບິ່ງຮອດມື້ນີ້ ຄືເກົ່າ ບໍ່ໄດ້ມີຫຍັງປ່ຽນ."

ທ່ານກ່າວຕື່ມວ່າ ໄດ້ຣາຍງານຜົລກະທົບທີ່ເກີດຂຶ້ນ ຕໍ່ຣັຖມົນຕຣີກະຊວງອຸດສາຫະກັມແລະການຄ້າ ເມື່ອວັນທີ 8 ມົກກະຣາ 2018 ນີ້ ໂດຍມີຂໍ້ສເນີ ໃຫ້ທາງໂຮງງານນັ້ນ ຍຸຕິການຜລິດປຸຍອິນຊີ ຫລືໃຫ້ຍ້າຍໂຮງງານໄປຕັ້ງ ຢູ່ບ່ອນອື່ນ ທີ່ຫ່າງຈາກຊຸມຊົນ ພາຍໃນ 3 ເດືອນ ນັບແຕ່ມື້ສເນີນັ້ນໄປ. ແຕ່ມາເຖິງປັດຈຸບັນ ກໍຍັງບໍ່ເຫັນວ່າຈະຍ້າຍອອກໜີ.

ດັ່ງນັ້ນ ປະຊາຊົນຈຶ່ງໄດ້ສົ່ງຣາຍງານກ່ຽວກັບຜົລກະທົບໃຫ້ ຍານາງ ສຸວັນເພັງ ບຸບຜານຸວົງ ຣັຖມົນຕຣີປະຈໍາ ສໍານັກງານ ນາຍົກຣັຖມົນຕຣີ ແລະຫ້ອງວ່າການ ສູນກາງພັກ ປະຊາຊົນ ປະຕິວັດລາວ ເພື່ອພິຈາຣະນາ; ດັ່ງເຈົ້າໜ້າທີ່ ກະຊວງອຸດສາຫະກັມ ແລະການຄ້າ ກ່າວໃນມື້ ດຽວກັນນັ້ນວ່າ:

"ດຽວ ນີ້ໄທເຮົາກໍປະສານນໍາກະຊວງ ເພາະວ່າຕົວນີ້ກະຊວງອະນຸຍາດເດ ທັງປະສານກໍາລັງ ປະສານຢູ່ເພື່ອໃຫ້ເພີ່ນລົງມາສົມທົບ ເພາະວ່າ ໄດ້ເຮັດຜ່ານມາແລ້ວ ຜ່ານມານັ້ນແມ່ນກົມອຸດສາຫະກັມໄທເຮົາ ກໍໄດ້ຣາຍງານໃຫ້ຫ້ອງວ່າການ ສູນກາງພັກ ແລ້ວເດ."

ສາເຫດທີ່ພາໃຫ້ເກີດກິ່ນເໝັນ ກໍຍ້ອນວ່າທາງໂຮງງານນໍາເອົາ ຂີ້ໄກ່ ຂີ້ແກບ, ເສດເຫລືອມັນຕົ້ນ ແລະເຊື້ອລາມາປະສົມເຂົ້າກັນ ແລະປະໄວ້ ປະມານ 30-40 ມື້ ຈຶ່ງສົ່ງອອກຂາຍ ແລະທາງໂຮງງານບໍ່ໄດ້ ຕິດຕັ້ງເຄື່ອງຈັກ ແລະຣະບົບດູດກິ່ນທີ່ໄດ້ ມາຕຖານ.

ໂຮງງານຜລິດປຸຍອິນຊີຂອງຈີນນີ້ ເລີ່ມການຜລິດມາຕັ້ງແຕ່ເດືອນທັນວາປີກາຍ. ໂຮງງານແຫ່ງນີ້ ເຄີຍເປັນໂຮງງານປຸງແຕ່ງເຫລັກ ຂອງ ບໍຣິສັດລາວ ຊິລິຄອນມາກ່ອນ ໂດຍໄດ້ຮັບໃບອະນຸຍາດ ໃຫ້ດໍາເນີນທຸຣະກິດ ຈາກກະຊວງອຸດສາຫະກັມ ແລະການຄ້າໂດຍກົງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.