ຜູ້ປະສົບໄພນໍ້າຖ້ວມ ຍັງຕ້ອງການຄວາມຊ່ວຍເຫຼືອ

ຊາວບ້ານທີ່ປະສົບໄພນໍ້າຖ້ວມ ຢູ່ນະຄອນຫລວງວຽງຈັນ ແລະ ຢູ່ແຂວງອື່ນໆ ກໍາລັງປະສົບກັບການຂາດແຄນອາຫານ ແລະ ນໍ້າດື່ມ ລວມເຖິງຍັງລໍຖ້າການຊ່ວຍເຫຼືອດ້ານອື່ນໆ ອີກ. ເມືອງຫາດຊາຍຟອງນະຄອນຫລວງວຽງຈັນ ເປັນນຶ່ງໃນຈໍານວນເມືອງ ທີ່ໄດ້ຮັບຜົນກະທົບ ເຖິງວ່າ ລະດັບນໍ້າຈະຫຼຸດລົງກໍຕາມ ແຕ່ ການຊ່ວຍເຫຼືອກໍຍັງບໍ່ສາມາດເຂົ້າໄປຫາຜູ້ປະສົບໄພ ໄດ້ຢ່າງທົ່ວເຖິງ.

ຊາວບ້ານເມືອງຫາຊາຍຟອງ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 16 ກັນຍາ ວ່າ: 

“ອໍ ຕ້ອງການຊ່ວຍເຫຼືອ ໃນດ້ານອາຫານການກິນນີ້ແຫຼະ ເພາະວ່າ ໄປໃສບໍ່ໄດ້້ເດ້ ມັນນໍ້າຖ້ວມ ທາງການຍັງບໍ່ມີໜ່ວຍງານໃດ ທີ່ລົງມາເທື່ອ ມີແຕ່ຊາວບ້ານຊ່ວຍເກັນ.”

ຜູ້ປະສົບໄພ ຍັງຕ້ອງການອາຫານ ແລະ ນໍ້າດື່ມຫຼາຍທີ່ສຸດ ເພື່ອມາຫຼຸດຜ່ອນຄວາມເດືອດຮ້ອນ ໃນແຕ່ລະຄອບຄົວ ແລະ ເຖິງວ່າ ເຈົ້າໜ້າທີ່ ໄດ້ມີການແຈກອາຫານ ແຕ່ ກໍຍັງບໍ່ພຽງພໍຕໍ່ຄວາມຕ້ອງການ.

ຊາວເມືອງຫາດຊາຍຟອງນາງນຶ່ງ ໄດ້ກ່າວວ່າ:

“ຕ້ອງການອາຫານເດີ ເພາະວ່າ ເຂົາເຈົ້າອາຫານບໍ່ພຽງພໍ ຂ້ອຍແຈກເຂົາເຈົ້າ 300 ຊຸດ ກະຍັງບໍ່ພໍ ອາຫານ ນໍ້າດື່ມເຂົາເຈົ້າຕ້ອງການຫຼາຍ ເພາະວ່າ ເຂົາເຈົ້າບໍ່ມີ ລາຍໄດ້ ທາງການເປັນຜູ້ໃຫ້ ຜູ້ຫຍັງກະມີ ແຕ່ວ່າມັນບໍ່ທົ່ວເຖິງ ເພາະວ່າ ປະສົບໄພຫຼາຍ.”

ບ້ານຫາດກັນຊາ ເມືອງຫາດຊາຍຟອງ ມີ 286 ຄອບຄົວ ຖືວ່າ ໄດ້ຮັບຜົນກະທົບຫຼາຍກວ່າທຸກໝູ່ບ້ານ ຖືກຕັດຂາດ ຍ້ອນນໍ້າຖ້ວມເສັ້ນທາງເຂົ້າ-ອອກບ້ານ ຊຶ່ງການຊ່ວຍເຫຼືອ ເຈົ້າໜ້າທີ່ຈະໃຊ້ເຮືອເທົ່ານັ້ນ.

ເຈົ້າໜ້າທີ່ທ້ອງຖິ່ນ ທ່ານນຶ່ງ ໄດ້ກ່າວວ່າ:

“ຖືວ່າຫຼັກໆ ພວກເຮົາກະຕ້ອງການເຄື່ອງອຸປະໂພກ ບໍລິໂພກແຫຼະ ເປັນອາຫານ ເຄື່ອງແຫ້ງແຫຼະ ເພາະວ່າ ອັດຈຸບັນນີ້ ກະຖືກຕັດຂາດການສັນຕອນເນາະ ຖືວ່າອອກຍາກເຂົ້າຍາກ ແລ້ວກໍໃຊ້ເຮືອເນາະ ພວກເຮົາກະມີຢູ່ 286 ຄອບຄົວ.”

ທ່ານ ກ່າວຕື່ມວ່າ ຈາກສະພາບນໍ້າຖ້ວມ ກໍເຮັດໃຫ້ຊາວບ້ານຫຼາຍຄົນ ເລີ່ມເປັນພະຍາດທີ່ມາກັບນໍ້າຖ້ວມ ເປັນຕົ້ນ ພະຍາດຕີນເປື່ອຍ ແລະ ອື່ນໆ ຜູ້ເຖົ້າ ມີໂອກາດເຈັບເປັນໄດ້ງ່າຍ ແຕ່ ເຈົ້າໜ້າທີ່ ກໍໄດ້ອົບພະຍົບຜູ້ສູງອາຍຸອອກມາແລ້ວ ແລະ ມີເຈົ້າໜ້າທີ່ສາທາລະນະສຸກເມືອງ ໃຫ້ການດູແລ ຢູ່ຕາມຈຸດບໍລິການທາງການແພດ.

ສ່ວນຢູ່ເມືອງຫລວງນໍ້າທາ ແຂວງຫລວງນໍ້າທາ ທີ່ເກີດນໍ້າຖ້ວມກະທັນຫັນໃນອາທິດທີ່ຜ່ານມາ ຈົນມາເຖິງປັດຈຸບັນ ລະດັບນໍ້າຢູ່ບາງເຂດ ກໍບົກແຫ້ງລົງແລ້ວ, ແຕ່ ເຮືອນຂອງຊາວບ້ານຫຼາຍຫຼັງ ຍັງບໍ່ທັນໄດ້ຮັບອານອະນາໄມ ແລະ ຍັງມີຂີ້ຕົມຢູ່ໃນເຮືອນ ສ່ວນວ່າ ຊາວບ້ານ ກໍຍັງຕ້ອງການຄວາມຊ່ວຍເຫຼືອດ້ານອາຫານເຊັ່ນດຽວກັນ.

ຊາວເມືອງຫລວງນໍ້າທາ ທ່ານ ນຶ່ງ ໄດ້ກ່າວວ່າ:

“ບ້ານທີ່ຖືກຜົນກະທົບນັ້ນມີເທົ່າໃດ 30 ປາຍບ້ານ ທາງເຈົ້າໜ້າທີ່ນີ້ ບໍ່ເຫັນເທື່ອໃດ ແຕ່ວ່າມີແຕ່ຄົນ ປະຊາຊົນທໍາມະດາ ຈຸ ບໍລິສັດ ຫ້າງຮ້ານ ເຂົາເຈົ້າມີຈິດໃຈມາຊ່ວຍເຫຼືອກັນແນວນັ້ນ ທາງເຈົ້າໜ້າທີ່ແທ້ ບໍ່ມີເທື່ອໃດ.”

ຜູ້ປະສົບໄພບາງຄົນຢູ່ເມືອງຫລວງນໍ້າທາ ກໍຍັງບໍ່ທັນອະນາໄມເຮືອນຂອງຕົນເອງ ແລະ ເຄື່ອງເຮືອນຫຼາຍຢ່າງ ກໍຖືກນໍ້າພັດເສັຍຫາຍ.

ຜູ້ປະສົບໄພນໍ້າຖ້ວມຢູ່ເມືອງຫລວງນໍ້າທາ ທ່ານນຶ່ງ ໄດ້ກ່າວວ່າ:

“ຖືວ່ານໍ້າຖ້ວມມັນກໍຜ່ອນຄາຍລົງແລ້ວ ແຕ່ວ່າ ເລື່ອງການບູລະນະ ເນາະ ຕ່າງໆ ຫັ້ນກະຍັງຫຍຸ້ງຍາກຫັ້ນແຫຼະ ການຢູ່ການກິນ ການນັ່ງການນອນ ກໍບໍ່ມີຫຍັງແຫຼະ ຜ້າກະບໍ່ມີມັນຖືກຖ້ວມທັງໝົດ ກະຍັງຫຍຸ້ງຍາກຢູ່.”

ນໍ້າເລີ່ມບົກແຫ້ງລົງ ແຕ່ ບັນຫາທີ່ຈະຕ້ອງແກ້ໄຂ ຄື ຂີ້ຕົມ ທີ່ຕິດຢູ່ຕາມບ້ານເຮືອນຂອງປະຊາຊົນ ສ່ວນວ່າ ທາງການແຂວງ ກໍເລີ່ມແຈກເຄື່ອງບັນເທົາທຸກ ແລະ ອາຫານການກິນ ແຕ່ ກໍຍັງບໍ່ທົ່ວເຖິງ. ເຈົ້າໜ້າທີ່ແຂວງຫລວງນໍ້າທາ ໄດ້ກ່າວວ່າ:

“ຖືວ່າ ນໍ້ານີ້ບົກ ແຕ່ວ່າ ດຽວນີ້ຍັງມີແຕ່ບັນຫາຂີ້ດົມ ອະນາໄທບໍ່ທັນ ໄດ້ເທື່ອ ຍັງຮັບບໍລິສັດຈາກ ຍັງອັນນັ້ນຢູ່ ແລ້ວກໍພວກເຮົາກະເລີ່ມຕົ້ນແຈກ ບັນດາການນໍາຂອງແຂວງ ເອົາໃສ່ລົດໃຫຍ່ແລ້ວກໍໄປແຕ່ລະບ້ານ ຫັ້ນແຫຼະ.”

ເຖິງຢ່າງໃດກໍຕາມ, ທາງການລາວ ຍັງບໍ່ທັນມີການປະເມີນຄວາມເສັຍຫາຍຈາກເຫດການໍ້າຖ້ວມໃນຄັ້ງນີ້​ ບໍ່ວ່າຈະຢູ່ນະຄອນຫລວງ ແລະ ແຂວງອື່ນໆ.

ໃນວັນທີ 16 ກັນຍາ, ກໍມີລາຍງານວ່າ ນໍ້າໄດ້ຖ້ວມເຂດບ້ານປ່າໄລ່ ແລະ ອີກຫຼາຍບ້ານ ຢູ່ເມືອງທ່າພະບາດ ແຂວງບໍລິຄໍາໄຊ ແລະ ຊາວບ້ານຫຼາຍຄອບຄົວ ກໍພາກັນອົບພະຍົບໄປພັກໂຮງຮຽນຊົ່ວຄາວ ເພື່ອຄວາມປອດໄພ.

ນອກຈາກນີ້ ກົມອຸຕຸນິຍົມ ແລ ອຸທຸກກະສາດ ໄດ້ອອກແຈ້ງເຕືອນ ໃຫ້ຊາວບ້ານ ທີ່ອາໄສ ຢູ່ຕາມແຄມນໍ້າຂອງ ແຂວງບໍລິຄໍາໄຊ, ແຂວງ ຄໍາມ່ວນ, ແຂວງ ສະຫວັນນະເຂດ, ແລະ ແຂວງຈໍາປາສັກ ໃຫ້ກຽມພ້ອມຮັບມືກັບນໍ້າຖ້ວມ.