ຍັງມີການລັກລອບ ປູກກັນຊາ ໃນແຂວງບໍຣິຄຳໄຊ

ມີກຸ່ມຄົນບໍ່ດີ ຢູ່ແຂວງ ບໍຣິຄຳໄຊ ລັກລອບປູກກັນຊາເປັນຈຳນວນຫລາຍເປັນຕົ້ນໃນເຂດພື້ນທີ່ຫ່າງໄກສອກຫລີິກໃນເມືອງໄຊຈຳພອນ ເມືອງວຽງທອງ ແລະເມືອງຄຳເກີດ ຊຶ່ງງກວມເອົາເນື້ອທີ່ 20 ປາຍເຮັກຕາຣ໌ ເນື່ອງຈາກເປັນສິນຄ້າ ທີ່ຂາຍໄດ້ລາຄາດີ.

ລ່າສຸດໃນວັນທີ 12-23 ຜ່ານມາເຈົ້າໜ້າທີ່ຕຳຣວດ-ທະຫານແຂວງບໍຣິຄຳໄຊ ໄດ້ຈູດເຝົາ ທຳລາຍສວນກກັນຊາຖີ້ມ ທັງໝົດ 53 ສວນ ຈຳນວນ 2 ແສນປາຍຕັນ ຢູ່ບ້ານຄຳພູນາ ເມືອງໄຊຈຳພອນ.  ດັ່ງເຈົ້າໜ້າທີ່ກ່ຽວຂ້ອງ ທ່ານນຶ່ງກ່າວຕໍ່ເອເຊັຽເສຣີ ໃນວັນທີ 30 ທັນວາ ນີ້ວ່າ:

“ແມ່ນໂຕນີ້ເປັນຂອງປະຊາຊົນລັກປູກ ກໍຢາກວ່າຂ້ອນຂ້າງຫລາຍຫັ້ນແຫລ້ວ ເຂົາລົງຊຸດນຶ່ງກໍເກືອບ 40 ປາຍເຮັກຕາ ເພີ່ນບໍ່ທັນໄດ້ໃຫ້ປູກຫັ້ນນ່າ ລັກປູກເອງ ເຂົາປູກລະແບບລັກສນະເປັນສິນຄ້າ ໃນຄອບຄົວເລີຍຫັ້ນນ່າ ລັກປູກແລ້ວ ກະລັກຂາຍໂຕນີ້ກະບໍ່ຮູ້ວ່າ ຂະເຈົ້າຊີ່ສົ່ງໄປທາງໃດຫັ້ນນ່າ.”

ທ່ານກ່າວຕື່ມວ່າ ການປູກຕົ້ນກັນຊາ ແມ່ນໄດ້ຮັບຄວາມນິຍົມສູງ ໃນໄລຍະຫລາຍປີຜ່ານມາ ເພາະສາມາດຂາຍໄດ້ລາຄາດີ  ໂດຍກັນຊາດິບແລະລຳຕົ້ນລາຄາຈະຢູ່ປະມານ 2-3 ແສນກີບຕໍ່ກິໂລກຣາມ, ໃບຊາແຫ້ງແລະຮາກ ລາຄາຈະປະມານ 3-5 ແສນກີບຕໍ່ກິໂລກຣາມ.

ສວນຊາທີ່ເຈົ້າໜ້າທີ່ລົງໄປຈູດແລະທຳລາຍນັ້ນເປັນສວນ ຂອງກຸ່ມຄົນບໍ່ດີ ທີ່ປູກເປັນທຸຣະກິດ ແຕ່ສົ່ງໄປຂາຍໃຫ້ນາຍທຶນຄົນໃດຫລືສົ່ງອອກໄປປະເທດໃດນັ້ນ ທາງການຍັງສືບສວນຢູ່,.

ນອກຈາກນີ້ ກໍຍັງມີຊາວບ້ານອີກນວນນຶ່ງປູກກັນຊາປະມານ 2-3 ຕົ້ນເພື່ອໃຊ້ພາຍໃນຄອບຄົວ ກໍຖືວ່າຜິດກົດຫມາຍເໝືອນກັນ ແຕ່ທາງການມີແຕ່ຕັກເຕື່ອນຊຶ່ງໆ ບໍ່ມີການລົງໂທດແຕ່ຢ່າງໃດ.

ເຈົ້າໜ້າທີ່ໂຮງໝໍຢູ່ແຂວງບໍຣິຄຳໄຊ ທ່ານນຶ່ງກ່າວວ່າ ຕາມການສັງເກດໃນປັດຈຸບັນເຫັນວ່າ ມີຊາວບ້ານພາກັນປູກກັນຊາຈຳນວນບໍ່ໜ້ອຍໃນເຂດຫ່າງໄກສອກຫລີກ ປູກເພື່ອໃຊ້ໃນຄອບຄົວ ຍັງບໍ່ເຖີງຂັ້ນເປັນທຸຣະກິດແລະເປັນອັນຕຣາຍ ແຕ່ກໍເຮັດໃຫ້ຜູ້ເສບແລະຜູ້ກິນ ຕິດໄດ້ຄືກັນ. ດ່ັງທ່ານກ່າວໃນຕອນນຶ່ງວ່າ:

“ມັນກໍມີແຕ່ວ່າ ບໍ່ເຖີງອັນຕຣາຍ ປະຊາຊົນເຂດຫ່າງໄກສອກຫລີກ ບໍ່ໄດ້ເວົ້າຫຍັງຫລາຍນ່າ ກະຄືຢາສູບນີ້ນ່າ ສານເສບຕິດເນາະ.”

ຊາວລາວຜູ້ນຶ່ງຢູ່ແຂວງບໍຣິຄຳໄຊເວົ້າວ່າ ດຽວນີ້ ມີຊາວບ້ານພາກັນປູກກັນຊາຫລາຍແທ້  ແຕ່ປູກເພື່ອໃຊ້ພາຍໃນຄອບຄົວເທົ່ານັ້ນ ບໍ່ໄດ້ເຮັດເປັນສິນຄ້າ ແຕ່ຖ້າທາງການອະນຸຍາດໃຫ້ປູກກັນຊາແບບຖືກຕ້ອງຕາມກົດໝາຍ ກໍເຊຶ່ງອວ່າ ຈະມີຊາວບ້ານພາກັນປູກຫລາຍຂື້ນເພາະຂາຍໄດ້ລາຄາດີ. ດັ່ງທ່ານເວົ້າວ່າ:

“ກັນຊານີ້ປູກຊ່ຳຕົ້ນນຶ່ງສອງຕົ້ນນີ້ມີ ຢູ່ໃນບ້ານນີ້ກໍມີ ມັນຫາກເຂົາບໍ່ໄດ້ປູກເປັນສິນຄ້າຕິ ມັນກະບໍ່ຜິດນ່າ ຜິດກໍບໍຮຸ່ນແຮງດອກຢູ່ລາວເຮົານີ້ນ່າ ຄັນບໍ່ແມ່ນເຮັດເປັນສິນຄ້າ.”

ຊາວບ້ານອີກຜູ້ນຶ່ງຢູ່ແຂວງບໍຣິຄຳໄຊ ເວົ້າວ່າ ຊາວບ້ານລັກປູກກັນຊາສ່ວນໃຫຍ່ໃນເຂດພູດອຍ ບ່ອນທີ່ເຈົ້າໜ້າທີ່ເຂົ້າໄປບໍ່ເຖີງ ຊຶ່ງງໃນໄລຍະນີ້ ທາງການກໍຂ້ອນຂ້າງເຂັ້ມງວດຕິດຕາມກວດກາຫລາຍຂື້ນ ແລະບາງບ່ອນກໍຖືກຈູດທຳລາຍ ຍ້ອນຖືວ່າກັນຊາ ເປັນຢາເສບຕິດປະເພດນຶ່ງ ຢາກໃຫ້ທາງການລາວ ຮັບຮອງໃຫ້ກັນຊາ ເປັນພືດເສຖກິຈເພື່ອສ້າງລາຍໄດ້ໃຫ້ຊຸມຊົນ ແທນທີ່ຈະທຳລາຍຖີ້ມ. ສຳລັບກັນຊາທີ່ປູກຂາຍ ຈະມີນາຍທືນຈາກປະເທດໄທຍເຂົ້າມາຊື້ຫລືຈ້າງຊາວລາວຂ້າມຂອງສົ່ງໄປໃຫ້. ດ່ັງຊາວບ້ານທ່ານນີ້ເວົ້າວ່າ:

“ຂະເຈົ້າປູກເອງຍັງບໍ່ທັນຖືກກົດໝາຍ ຍັງລັກລອບຢູ່ ຍ້ອນວ່າເຈົ້າໜ້າທີ່ສກັດກັ້ນ ເວົ້າເຣື່ອງປາບປາຢາເສບຕິດນີ້ລະໂອ້ ປູກຢູ່ພຸ້ນໃດ ຍອດພູຍອດຫົວພຸ້ນເດ ຄົນບໍ່ຮູ້ພຸ້ນແຫລະ ບໍ່ມີທາງໂຄງການມາປູກຍູ້ໃຫ້ປະຊາຊົນຫັ້ນບໍ່ມີ.”

ກ່ອນໜ້ານີ້ ເມື່ອດືອນ ພຶສຈິກຜ່ານມາ ສເພາະເມືອງຄຳເກີດເມືອງດຽວ ເຈົ້າໜ້າທີ່ຕຳຣວດ-ທະຫານແຂວງບໍຣີຄຳໄຊ ໄດ້ທຳການຈູດເຝົາທຳລາຍ ສວນຊາເຖີງ 4 ຄັ້ງ ຈຳນວນ 140 ສວນ ຮວມເນື້ອທີ່ 135 ເຮັກຕາ. ສຳລັບວຽກງານ ການສກັດກັ້ນແລະແກ້ໄຂບັນຫາຢາເສບຕິດໃນລາວ ຖືເປັນ 1 ໃນວາຣະສຳຄັນຣະດັບຊາກ ຂອງຣັຖບານລາວໂດຍ ທ່ານພັນຄຳ ວິພາວັນ ນາຍົກຣັຖມົນຕຣີລາວໄດ້ກ່າວຕໍ່ກອງປະຊຸມສພາບແຫ່ງຊາດຄັ້ງລ່າສຸດວ່າ ຈະເອົາໃຈໃສ່ເພີ່ມຕື່ມ ໃນການຕິດຕາມກວດກາເພື່ອສກັດກັ້ນ ປອ້ງກັນແລະປາບປາມ ຂບວນການຄ້າຢາເສບຕິດໃຫ້ເປັນຣະບົບ ໄປພ້ອມໆກັນກັບການແກ້ໄຂຄະດີໃຫ້ເປັນໄປຕາມຂບວນການຍຸດຕິທັມແລະຕາມກົດໝາຍ ໃຫ້ເຂັ້ມງວດ ແລະ ໂປ່ງໄສ. ປັດຈຸບັນກົດໝາຍລາວຍັງບໍ່ມີການຮັບຮອງໃຫ້ກັນຊາ ເປັນພືດທີ່ຖືກກົດໝາຍ ສນັ້ນກັນຊາ ຍັງຖືວ່າ ເປັນພືດທີ່ຕ້ອງຫ້າມ ແລະເປັນຢາເສບຕິດ ປະເພດຮ້າຍແຮງ ຫ້າມປູກແລະຫ້າມຂາຍ ຖ້າພົບເຫັນຜູ້ໃດມີກັນຊາໃນການຄອບຄົວ ຈະຖືກປັບໄໝແລະລົງໂທດຕາມກົດໝາຍ.

ໃນປັດຈຸບັນ ມີ 33 ປະເທດໃນໂລກ ທີ່ອະນຸຍາດໃຫ້ນຳກັນຊາມາໃຊ້ເປັນປະໂຍດທາງແພດໄດ້ ເປັນຕົ້ນປະເທດ ອາເຢັນຕີນາ, ການາດາ ຟິນແລນ ອັງກິດ ສຫະຣັດ ອີຕາລີ ເຢັຽຣະມັນ ອອສເຕເຣັຽແລະໄທຍ.