ຝົນຕົກໜັກ ນໍ້າຖ້ວມກະທັນຫັນ ພາກກາງ-ພາກໃຕ້

ຝົນຕົກລົງມາຢ່າງຕໍ່ເນື່ອງ ກັນຫຼາຍວັນ ນັບແຕ່ທ້າຍເດືອນກໍຣະກະດາ ເປັນຕົ້ນມາຈົນຮອດວັນທີ 02 ສິງຫາ 2023 ແລະ ຕົກເປັນເວລາດົນ ຢູ່ເຂດພາກກາງ ແລະ ພາກໃຕ້ ເຊັ່ນ ແຂວງຄຳມ່ວນ, ແຂວງສວັນນະເຂດ ແລະ ແຂວງສາລະວັນ ເຮັດໃຫ້ເກີດນໍ້າຖ້ວມກະທັນຫັນ ສົ່ງຜົລເຮັດໃຫ້ເຮືອນຊານ, ທົ່ງນາ ແລະ ສັດລ້ຽງ ຂອງປະຊາຊົນຖືກນ້ຳຊຸໄຫຼ ໄດ້ຮັບຄວາມເສັຍຫາຍ ຈຳນວນຫຼາຍ. ສະເພາະຢູ່ເມືອງໄຊພູທອງ ແຂວງສວັນນະເຂດ ຝົນຕົກໜັກ ຕິດຕໍ່ກັນໄດ້ຫຼາຍມື້ ຈົນຮອດວັນທີ 02 ສິງຫາ 2023 ເຮັດໃຫ້ນໍ້າຖ້ວມທົ່ງນາ ທີ່ຫາກໍດຳແລ້ວ ປະມານ 215 ເຮັກຕ້າຣ໌ ຢູ່ 7 ບ້ານ 128 ຄອບຄົວ ຍ້ອນເຂດດັ່ງກ່າວເປັນອ່າງກະທະ ຢູ່ລຸ່ມ ແລະຖືຶກນ້ຳຖ້ວມທຸກປີ. ນອກນັ້ນພາກສ່ວນທີ່ກ່ຽວຂ້ອງ ຍັງບໍ່ທັນໄດ້ໃຫ້ການຊ່ອຍເຫຼືອປະຊາຊົນ ທີ່ທົ່ງນາຖືກນໍ້າຖ້ວມ ຍ້ອນຕ້ອງໄດ້ລໍຖ້າ ນໍ້າຫຼຸດລົງ ເພື່ອປະເມີນຄວາມເສັຍຫາຍ ພ້ອມສນອງແນວພັນເຂົ້າ ຄືປີຜ່ານມາ ເປັນອັນດັບຖັດໄປ.

ດັ່ງເຈົ້າໜ້າທີ່ ທີ່ກ່ຽວຂ້ອງ ເມືອງໄຊພູທອງ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 03 ສິງຫາ ນີ້ວ່າ:

“ຄັນຝົນຕົກແບບນີ້ ຖ້ວມທຸກປີເພາະວ່າ ມັນເປັນອັນນ່ານາອ່າງກະທະ ເມືອງກໍຫາວິທີແກ້ໄຂຢູ່ກັບແຂວງເວລາຝົນຕົກ ມັນໄຫຼລົງມາໂຮມ ມັນຫາທາງອອກ ມີຢູ່ທາງອອກແຕ່ວ່າ ມັນໜ້ອຍ ມັນຊ້າ ມັນກໍເລີຍເຮັດໃຫ້ນໍ້າຖ້ວມຂັງ ໄປບໍ່ໄດ້ແລ້ວ ທົ່ງນານ່າໄປ ແລ້ວຖືວ່າເປັນນໍ້າແອ່ງ ເປັນທະເລເລີຍຫັ້ນນ່າ ກັບໜອງປານີ້ກໍປາກໍໄປໝົດ ຜູ້ໃດປ່ອຍປາ ຢູ່ແຖວທົ່ງນາພານນີ້ໄປໝົດ.”

ທ່ານກ່າວຕື່ມວ່າ ເມື່ອເບິ່ງສະຖານະການ ລະດັບນໍ້າຂອງ ໃນປັດຈຸບັນຢູ່ເມືອງໄຊພູທອງ ຍັງບໍ່ເຖິງຂີດອັນຕະຣາຍ ຈຶ່ງເຮັດໃຫ້ເຮືອນປະຊາຊົນ ຕິດແຄມຂອງ ຈຳນວນ 12 ບ້ານ ຍັງບໍ່ຖືກນໍ້າຖ້ວມເທື່ອ ແລະ ປັດຈຸບັນ ເມືອງໄຊພູທອງ ຍັງບໍ່ມີຣາຍງານນໍ້າຖ້ວມເຮືອນປະຊາຊົນເທື່ອ ມີແຕ່ຖ້ວມທົ່ງນາ ຈຶ່ງກ່າວໄດ້ວ່ານໍ້າຖ້ວມຍັງບໍ່ໄດ້ໜັກກ່ວາປີຜ່ານມາ ແຕ່ຕ້ອງລໍຖ້າເບິ່ງ ໃນວັນທີ 03 ສິງຫາ 2023 ຫາກຝົນຕົກຕື່ມກໍອາດສົ່ງຜົລເສັຍຫາຍຕື່ມ.

ເມືອງອາດສະພັງທອງ ແຂວງສວັນນະເຂດຝົນຕົກຕິດຕໍ່ກັນຫຼາຍວັນ ແລະເປັນເວລາດົນ ຈຶ່ງເຮັດໃຫ້ ລະດັບນໍ້າເຊຈຳພອນ ເພີ່ມຂຶ້ນຢ່າງວ່ອງໄວ ສູງເຖິງ 11.16 CM (11 ແມັດ 16 ຊັງຕີແມັດ) ແລ້ວ ເຊິ່ງເປັນລະດັບນໍ້າ ເຂດອັດຕະຣາຍ ນໍ້າລົ້ນຝັ່ງໄຫຼເຂົ້າຖ້ວມເຮືອນປະຊາຊົນ ແລະທົ່ງນາ ທີ່ປັກດຳແລ້ວຈຳນວນ 2,000 ປາຍເຮັກຕ້າຣ໌, ໜອງປາ 20 ປາຍໜອງ.

ດັ່ງເຈົ້າໜ້າທີ່ ທີ່ກ່ຽວຂ້ອງເມືອງອາດສະພັງທອງ ກ່າວໃນມື້ດຽວກັນນີ້ວ່າ:

“ດຽວນີ້ນໍ້າຂຶ້ນສູງ 11.16 cm ເນາະ ປະເມີນໃນບ່ອນເນື້ອທີ່ ທີ່ຖ້ວມນີ້ຖ້ວມ ເນື້ອທີ່ນາຫັ້ນນ່າ ກໍປະມານ 2,000 ປາຍເຮັກຕ້າຣ໌. ຝົນຕົກແຮງ ແລ້ວມັນຈັ່ງຖ້ວມ ນໍ້າເຊຈຳພອນ. ໜອງປາກໍມີຄືກັນ ປະເມີນເບື້ອງຕົ້ນນີ້ ກໍປະມານ 20 ໜອງນີ້ແຫຼະ. ສຳລັບເຮືອນນີ້ກໍບໍ່ຫຼາຍປານໃດເນາະ ສ່ວນຫຼາຍກໍມີແຕ່ເຂດນີ້ແຫຼະ ໃນເທສບານນີ້ນ່າ ມັນບໍ່ຖ້ວມຮອດຫຼັງຄາດອກ ເຮືອນບ້ານເຂົາເຈົ້າ ຢູ່ສູງຫັ້ນນ່າ ເພາະວ່າເຂົາເຈົ້າ ກໍເອົາຂຶ້ນທັນຫັ້ນນ່າ.”

ຍານາງກ່າວຕື່ມວ່າ ອ້າຍນ້ອງທະຫານຈຳນວນ 300 ຄົນກຽມພ້ອມຊ່ອຍເຫຼືອ ພໍ່-ແມ່ ປະຊາຊົນຫາກບ່ອນໃດ ຕ້ອງການຂົນເຄື່ອງຂອງ ໜີນໍ້າ ແລະພາກສ່ວນທີ່ກ່ຽວຂ້ອງ ກຽມຊ່ອຍເຫຼືອເປັນນໍ້າດື່ມ ແລະອາຫານແຫ້ງ ປະເພດປອງປາ ໝີ່ໄວໄວ ໃຫ້ປະຊາຊົນທີ່ ບໍ່ສາມາດເດີນທາງໄປມາໄດ້. ສ່ວນເຣື່ອງຄວາມຊ່ອຍເຫຼືອທົ່ງນາ ຂອງປະຊາຊົນທີ່ ໄດ້ຮັບຜົລກະທົບ ຈະໄດ້ປະສານງານກັບຂັ້ນແຂວງຕື່ມ ພາຍຫຼັງນໍ້າແຫ້ງ. ດ້ານຊາວນາຢູ່ເມືອງອາດສະພັງທອງ ແຂວງສວັນນະເຂດ ກ່າວວ່າ ປະຊາຊົນພາຍໃນເມືອງບາງຄອບຄົວ ເກັບເຄື່ອງຂອງໃຊ້ ແລະສັດລ້ຽງໜີນໍ້າ ບໍ່ທັນ ເນື່ອງຈາກນໍ້າໄຫຼເຂົ້າຖ້ວມ ຕອນກາງຄືນ ເຊິ່ງເປັນເວລານອນ ຈຶ່ງເຮັດໃຫ້ສັດລ້ຽງ ຂອງປະຊາຊົນຕາຍ ແລະໄຫຼໄປກັບນໍ້າ, ສ່ວນເນື້ອທີ່ນາໃນເຂດເມືອງອາດສະພັງທອງ ຍອມຮັບວ່າ ຈະບໍ່ໄດ້ເຂົ້າເຕັມເມັດເຕັມໜ່ວຍ ຍ້ອນເນື້ອທີ່ນາເປັນບ່ອນເຄີຍຖືກນໍ້າຖ້ວມ ເກືອບທຸກປີ.

ດັ່ງທ່ານໄດ້ກ່າວ ໃນມື້ດຽວກັນວ່າ:

“ບາງສ່ວນນີ້ທັນເນາະ ເຄື່ອງຂອງໃຊ້ ແຕ່ວ່າສັດນີ້. ໂອ້ ມື້ກ່ອນນີ້ມັນມາໜັກ ຄືວັນທີ 2 ບໍ່ທັນຄືມັນມາແຮງ ນໍ້າມັນມາແຮງ ເປັນໝູເປັນງົວນີ້ແຫຼະໄຫຼນໍ້າເລີຍ ບາງເທື່ອຜູ້ເຈົ້າເພິ່ນນອນບໍ່ຮູ້ເມື່ອ ຜູກໄວ້ແລ້ວກໍຕາຍໄປ ຊ່ວງເຊົ້າທີ່ວ່າຝົນມັນເລັ່ງກາງຄືນຫັ້ນນ່າ ປະມານ 3-4 ໂມງ. ຄົນກຳລັງນອນລັບ ຂອງສ່ວນໂຕນີ້ ໜອງກໍຄືເຮົາປ່ອຍປາ ມັນກໍໄປເລີຍ ເຮົາກໍບໍ່ຮູ້ວ່າ ກໍຍອມຮັບໄວ້ແລ້ວ ດຳນາ ບ່ອນນີ້ ກໍອາດຈະ 50/50 ໄດ້ ຫຼື ບໍ່ໄດ້.”

ສ່ວນຢູ່ເມືອງຫິນບູນ ແຂວງຄຳມ່ວນ ລະດັບນໍ້າຫິນບູນ ແລະ ນໍ້າປະກັນຂຶ້ນກາຍເຂດເຕືອນພັຍ ແຕ່ຍັງບໍ່ເຖິງເຂດອັນຕະຣາຍ. ພາກສ່ວນທີ່ກ່ຽວຂ້ອງຈຶ່ງໄດ້ອອກແຈ້ງການ ໃຫ້ພໍ່ແມ່ປະຊາຊົນ ກຽມຄວາມພ້ອມຮັບມືໃນ 1-2 ວັນຂ້າງໜ້າ ເນື່ອງຈາກໄລຍະ 1-2 ວັນຜ່ານມາຝົນຕົກໜັກ ເຮັດໃຫ້ທາງເຂົ້າບ້ານໃນບາງບ້ານ ຖືກນໍ້າຖ້ວມ ແລະນໍ້າໄຫຼຖ້ວມເຮືອນ, ທົ່ງນາ ແລະ ສວນມັນຕົ້ນ ຂອງປະຊາຊົນ ໄປຈຳນວນໜຶ່ງແລ້ວ.

ດັ່ງເຈົ້າໜ້າທີ່ ທີ່ກ່ຽວຂ້ອງ ເມືອງຫິນບູນ ແຂວງຄຳມ່ວນ ກ່າວໃນມື້ດຽວກັນວ່າ:

“ມື້ວານນີ້ກໍໄທຍເຮົາ ກໍໄປໝົດມື້ເນາະ ຖ້ວມຢູ່ຈຸດເຂດມັນເຄີຍຖ້ວມເນາະ ເປັນຖ້ວມນໍ້າ ທາງເຂົ້າບ້ານແລ້ວປະຊາຊົນ ອອກໄປມາບໍ່ໄດ້ ໄທເຮົາກໍໄດ້ເອົານໍ້າເອົາໃນໄປຊ່ອຍເບື້ອງຕົ້ນ ມື້ວານນີ້ແຫຼະ ກໍຖ້ວມເຮືອນຂອງປະຊາຊົນ ກໍປະມານຫຼັງໜຶ່ງສອງຫຼັງ ຕິບ້ານນໍ້າດີກໍຖ້ວມໄຮ່ນາກ້າຕົ້ນຫຼາຍກ່ວາເນາະ ອັນນີ້ຍ້ອນຝົນຕົກໜັກເບາະ ແບບມັນໄຫຼບໍ່ທັນມີຫຍັງຫັ້ນນ່າ ເຂື່ອນນີ້ເພິ່ນກໍໄດ້ປ່ອຍນໍ້າເທົ່າໃດເນາະ ນໍ້າຫິນບູນ ເຮົາກໍຍັງບໍ່ໄດ້ຂຶ້ນເຂດອັນຕະຣາຍເນາະ ເຂດນໍ້າຂອງເຮົາກໍຍັງບໍ່ທັນໄດ້ຂຶ້ນ ເຂດນໍ້າປະກັນນີ້ ກໍຍັງບໍ່ໄດ້ຂຶ້ນເນາະ.”

ວັນທີ 03 ສິງຫາ 2023 ຢູ່ເມືອງຄົງເຊໂດນ ແຂວງສາຣະວັນ ລະດັບນໍ້າແມ່ນໍ້າເຊໂດນ ຍັງຂຶ້ນສູງ ແລະເຂົ້າຖ້ວມວັດໂພໄຊ ສີສັຕນາຣາມ ພ້ອມທັງຖ້ວມທົ່ງນາ ຂອງພໍ່ແມ່ປະຊາຊົນຫຼາຍບ້ານ ທີ່ຢູ່ຕິດກັບ ສາຍນໍ້າເຊໂດນນໍາດ້ວຍ ອີງຕາມເຟສບຸກ ວັດໂພໄຊສີສັຕນາຣາມ ບ້ານນາຫິນ ເມືອງຄົງເຊໂດນ.

ປັດຈຸບັນແຂວງສວັນນະເຂດ ຢູ່ເມືອງອາດສະພອນ ກໍເກີດຜົລກະທົບນໍ້າຖ້ວມເນື້ອທີ່ນາ 1,356 ເຮັກຕ້າຣ໌ ໃນ 28 ບ້ານ 5,110 ຄອບຄົວ ແລະ ເມືອງພະລານໄຊ ແຂວງສວັນ ນະເຂດມີບ້ານທີ່ຖືກນໍ້າຖ້ວມ 10 ບ້ານ, ບ້ານທີ່ບໍ່ສາມາດສັນຈອນ ຫາເມືອງໄດ້ປົກກະຕິ, ມີ 23 ບ້ານ ແລະ ບ້ານທີ່ຖືກນໍ້າຖ້ວມ ເນື້ອທີ່ນາມີ 12 ບ້ານ, ສ່ວນເມືອງຈໍາພອນ ແຂວງສວັນນະເຂດ ມີບ້ານຖືກນໍ້າຖ້ວມ 5 ບ້ານ 270 ຫຼັງ, ເນື້ອທີ່ນາຖືກນໍ້າຖ້ວມ 48 ບ້ານ, ມີ 3,498 ຄອບຄົວ ອີງຕາມການຣາຍງານ ຂອງເຟສບຸກ ວິທຍຸ ຊາວໜຸ່ມລາວ.

ນອກຈາກນີ້ ຍັງມີຣາຍງານເພີ່ມວ່າ ວັນທີ 03 ສິງຫາ 2023 ເກີດເຫດດິນເຈື່ອນ ຢູ່ເສັ້ນທາງຜູຜາມ່ານ ເມືອງຄູນຄຳ ແຂວງຄຳມ່ວນ ເຮັດໃຫ້ຣົຖຕໍ່າ ບໍ່ສາມາດສັນຈອນໄປ-ມາ ໄດ້ ແລະເກີດເຫດດິນເຈື່ອນທັບເຮືອນນອນ ທະຫານແຂວງໄຊສົມບູນ ຍ້ອນຝົນຕົກຕິດຕໍ່ກັນຫຼາຍວັນ.

ກົມອຸຕຸນິຍົມວິທຍາ ແລະ ອຸທົກກະສາດ ພະຍາກອນອາກາດ ປະຈໍາວັນທີ 03 ສິງ 2023 ໄດ້ເຕືອນໃຫ້ປະຊາຊົນ ທີ່ອາໄສຢູ່ລຽບແຄມນໍ້າເຊຈຳພອນ ແລະ ຂົວເຊບັ້ງໄຟ ໃຫ້ມີສະຕິລະວັງໂຕ ຕໍ່ສະພາບຝົນຕົກໜັກ.