ສັນເຂື່ອນໄຟຟ້າເມືອງແປກ ຖືກນ້ຳເຊາະ ເຈື່ອນ

ອະວາຣີ
2019.08.07
F-Kengkhouan-dam ສະພາບ ຂອງເຂື່ອນແກ້ງຄວັນ ເມືອງແປກ ແຂວງຊຽງຂວາງ ພາຍຫຼັງຝົນຕົກໜັກ ຫຼາຍມື້ຕິດຕໍ່ກັນ
ຮູບພາບຖ່າຍຖອນ : ຈາກ ຊຽງຂວາງ ໂທຣະພາບ ວີດີໂອ

ສັນເຂື່ອນໄຟຟ້າຂນາດນ້ອຍ ຢູ່ເມືອງແປກ ແຂວງຊຽງຂວາງ ຖືກນ້ຳເຊາະ ແລ້ວກໍເຈື່ອນ ປ່ອຍນ້ຳໄຫລລົງ ສ້າງຄວາມເສັຽຫາຍ ຫລາຍ ສົມຄວນ. ພະນັກງານບໍຣິສັດນຳທ່ຽວ ແຫ່ງນຶ່ງ ຢູ່ເມືອງແປກ ເລົ່າສູ່ວິທຍຸ ເອເຊັຽເສຣີ ຟັງ ໃນວັນທີ່ 7 ສິງຫາ 2019 ນີ້ວ່າ

“ກະໂຕເຂື່ອນນັ້ນ ບໍ່ໄດ້ແຕກ ແຕ່ຍ້ອນຝົນຕົກ ນ້ຳຍູ້ ສັນເຂື່ອນທັງສອງຂ້າງຈຶ່ງເຈື່ອນ ແລ້ວນ້ຳກໍໄຫລລົງທາງສອງຂ້າງ ຂອງເຂື່ອນ.”

ຊາວບ້ານຄົນນຶ່ງ ທີ່ຢູ່ໃກ້ເຂື່ອນ ໃຫ້ຣາຍລະອຽດຕໍ່ ວິທຍຸເອເຊັຽເສຣີຕື່ມ ໃນມື້ດຽວກັນວ່າ:

“ຝົນຕົກໜັກ ນ້ຳຫລາຍ ເຂື່ອນຮັບບໍ່ໄຫວ ແລ້ວມັນກໍພັງ ເສັຽຫາຍຫຼາຍ ນ້ຳໄຫຼລົງຖ້ວມທົງນາ 30 ເຮັກຕາ ແລະໜອງປາຂອງປະຊາຊົນ ຫລາຍບ່ອນ.”

ຮອງປະທານບໍຣິສັດສົມພູ ກໍ່ສ້າງຂົວທາງ ຊຶ່ງເປັນເຈົ້າຂອງເຂື່ອນແກ້ງຄວນ ຢູ່ບ້ານລາດບວກເມືອງແປກ ແຫ່ງນີ້ ກ່າວຕໍ່ນັກຂ່າວໂທຣະພາບ ແຂວງຊຽງຂວາງວ່າ:

“ພັຍທັມມະຊາດ ຝົນຕົກຕິດຕໍ່ກັນເປັນເວລາ 2-3 ມື້; ເຣື່ອງຜົນກະທົບ ມັນບໍ່ແມ່ນເຂື່ອນແຕກ ນ້ຳມາບາດດຽວ ນ້ຳໄຫລເຂົ້າເຮືອນຈັກ ບໍ່ສາມາດລະບາຍທັນ; ຜົນກະທົບຕໍ່ປະຊາຊົນ ຢູ່ທາງເທິງແລະລຸ່ມເຂື່ອນ ບໍ່ມີຫຍັງ ແຕ່ລວມຜົນເສັຍຫາຍປະມານ 3 ຕື້ປາຍ.”

ປັດຈຸບັນ ເຈົ້າໜ້າທີ່ ກຳລັງສຳຣວດຜົນກະທົບ ແລະ ເສັຍຫາຍທັງໝົດຢູ່່. ສັນເຂື່ອນຂນາດ 1 ເມກາວັດ ແຫ່ງນີ້ ຫລຸເມື່ອເວລາ ປະມານ 10 ໂມງເຊົ້າຂອງວັນທີ່ 4 ເດືອນສິງຫາ ປີ 2019ນີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.