ລັດຖະບານ ຍອມຮັບ ປ່າໄມ້ໃນຫຼາຍພື້ນທີ່ ຖືກທຳລາຍ

ທາງການລາວ ປະກາດວ່າ ຈະເພີ່ມຄວາມເຂັ້ມງວດ ໃນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທຳລາຍປ່າໄມ້ ແລະ ໄຟໄໝ້ລາມປ່າ ກວ່າເກົ່າ ຊຶ່ງເປັນໄປຕາມຄຳສັ່ງເລກທີ 11/ນຍ ທີ່ວາງອອກໃນໄລຍະກາງປີ 2023. ອີງຕາມການຖະແຫຼງຂ່າວ ກອງປະຊຸມລັດຖະບານ ປະຈຳເດືອນພຶດສະພາ ປີ 2024 ໂດຍທ່ານ ດຣ. ບົວຄົງ ນາມມະວົງ, ລັດຖະມົນຕີ, ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ ໃນວັນທີ 24 ພຶດສະພາ 2024 ທີ່ຜ່ານມາ ຊຶ່ງໃນໄລຍະປັດຈຸບັນ, ຍັງພົບຂໍ້ຫຍຸ້ງຍາກຫຼາຍ ທີ່ເຮັດໃຫ້ການປົກປັກຮັກສາປ່າໄມ້ ບໍ່ສາມາດປະຕິບັດໄດ້ດີ ເປັນຕົ້ນ ຍັງມີກຸ່ມຄົນຈຳນວນນຶ່ງ ຍັງສືບຕໍ່ ເຂົ້າໄປຕັດໄມ້ທຳລາຍປ່າ ແລະ ຖາງປ່າເຮັດໄຮ່ ໃນຫຼາຍພື້ນທີ່ ທົ່ວປະເທດລາວ ໂດຍບໍ່ໄດ້ຫົວຊາຕໍ່ກົດໝາຍ ບ້ານເມືອງ.

ກ່ຽວກັບການຕັດໄມ້ ທໍາລາຍປ່າ ປະຊາຊົນຢູ່ນະຄອນຫຼວງວຽງຈັນ ຊຶ່ງບໍ່ປະສົງອອກຊື່ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 27 ພຶດສະພານີ້ວ່າໃນໄລຍະຜ່ານມາ ກໍ່ໄດ້ພົບເຫັນການລັກລອບຕັດໄມ້ແປກ ຢູ່ຕີນພູກອງເຂົ້າ ໃນເຂດອຸທິຍານແຫ່ງຊາດ ພູເຂົາຄວາຍ ເມືອງທຸລະຄົມ ແຂວງວຽງຈັນ ຢ່າງຫຼວງຫຼາຍ ໂດຍບໍ່ມີການປົກປິດ ເຮັດໃຫ້ປ່າໄມ້ທຳມະຊາດ ຂອງຕີນພູກອງເຂົ້າ ທີ່ເຄີຍອຸດົມສົມບູນ ໄປດ້ວຍປ່າແປກທີ່ສວຍສົດງົດງາມ ຖືກທຳລາຍຈົນຮາບກ້ຽງ.

“ຈຸດທີ່ມັນຕັດໜັກສຸດຊິເປັນບ່ອນຕີນພູກອງເຂົ້າຫັ້ນ ຈະໜັກສຸດ. ມັນຈະຕັດກັນເປີດເຜີຍເລີຍ ບໍ່ໄດ້ມີປິດບົງປິດບັງຫຍັງ ນອນຕັດຄາຫັ້ນແຫຼະໂລດ. ຕອນຂ້ອຍໄປຫັ້ນເດືອນ 1 ລະຂ້ອຍກະບໍ່ໄດ້ໄປບ່ອນນີ້ອີກເລີຍ ເພາະວ່າມັນຮ້ອນ. ແຕ່ຮູ້ແຕ່ວ່າຕອນເດືອນ 1 ຂ້ອຍໄປກະແບບວ່າ ຫາຍໄປຫຼາຍແລ້ວແຫຼະ ເພາະວ່າລົດຈະເຂົ້າ-ອອກ ຢູ່ແບບຫຼາຍສິບຄັນຕໍ່ມື້.”

ປະຊາຊົນ ຢູ່ແຂວງວຽງຈັນ ກ່າວວ່າກໍ່ເຫັນເຫດການກຸ່ມຄົນ ຈໍານວນໜຶ່ງ ເຂົ້າມາຖາງປ່າເຮັດໄຮ່ ໃນເຂດປ່າສະຫງວນແຫ່ງໜຶ່ງ ເຖິງແມ່ນວ່າຊາວບ້ານ ຈະໄດ້ໄປແຈ້ງໃຫ້ອຳນາດການປົກຄອງບ້ານ ລົງໄປກວດກາແຕ່ເຈົ້າໜ້າທີ່ກ່ຽວຂ້ອງ ບໍ່ໄດ້ໃສ່ໃຈແກ້ໄຂບັນຫາດັ່ງກ່າວພໍເທົ່າໃດ.

“ຕອນເຫັນເຂົາຖາງ ກະບອກການຈັດຕັ້ງໃຫ້ເຂົາເຈົ້າໄປກວດເບິ່ງ ເຂົາເຈົ້າກະບໍ່ໃສ່ໃຈ ບອກວ່າບໍ່ໃຫ້ຖາງຕໍ່ ລະກະໃຫ້ຢຸດ ເຂົາເຈົ້າກະບໍ່ຍອມ. ທາງການຈັດຕັ້ງເຂົາເຈົ້າກະບໍ່ຂຶ້ນໄປດູແລຫວ່າງນີ້ ເຫັນເຂົາຈູດຫວ່າງນີ້. ເຂົາຈູດແລ້ວກະໄປຫ້າມເຂົາແມ້ ບໍ່ໃຫ້ຈູດແມ້ ບໍ່ໃຫ້ອັ່ນປູກຝັງແມ້, ຄັນປູກຝັງແລ້ວ ມັນຊິຍາກເດ້ ຄັນປ່ອຍໃຫ້ເຂົາປູກພືດມານັ້ນນ່າ ມັນກະເລີຍເປັນເຍື່ອໃຍມາ.”

ຊາວບ້ານ ຢູ່ແຂວງສະຫວັນນະເຂດ ກ່າວວ່າຕົນເອງຍັງມີຄວາມຈຳເປັນ ໃນການຖາງປ່າເຮັດໄຮ່ເພື່ອຂະຫຍາຍພື້ນ ທີ່ປູກຝັງມັນຕົ້ນ ແລະ ເພີ່ມລາຍໄດ້ລ້ຽງຄອບຄົວ ໃຫ້ຫຼາຍຂຶ້ນ ເຖິງແມ່ນວ່າ ຈະຮູ້ຜົນຮ້າຍ ທີ່ເກີດຂຶ້ນ ຈາກການຖາງປ່າເຮັດໄຮ່ ແລ້ວກໍຕາມ.

“ເຖິງແມ່ນຊິຮູ້ຂໍ້ເສຍຂອງມັນ ຄືແນວນັ້ນກະແມ່ນຢູ່ເນາະ ແຕ່ວ່າກະຄົງຕ້ອງເຮັດຄືເກົ່ານີ້ແຫຼະ ເພາະວ່າການຖາງປ່າເຮັດໄຮ່ນີ້ນ່າ ກະເພື່ອທີ່ວ່າ ຈະໄດ້ມີບ່ອນປູກຝັງ ເພື່ອວ່າມາຈຸນເຈືອຄອບຄົວ ມາຫາລ້ຽງຄອບຄົວເນາະ.”

ເຈົ້າໜ້າທີ່ກ່ຽວຂ້ອງ ບໍ່ປະສົງອອກຊື່ ແລະ ຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ທາງເຈົ້າໜ້າທີ່ກ່ຽວຂ້ອງກໍບໍ່ໄດ້ລະເລີຍ ຕໍ່ກັບບັນຫາການອະນຸລັກປ່າໄມ້ ໂດຍສະເພາະໃນເຂດອຸທິຍານແຫ່ງຊາດ ຕາມນະໂຍບາຍຂອງລັດຖະບານ ຊຶ່ງເຈົ້າໜ້າທີ່ກໍມີບັນດາ ໂຄງການສົ່ງເສີມການອະນຸລັກປ່າໄມ້ ແລະ ສັດປ່າ ຫຼາຍໂຄງການ ແລະ ໄດ້ມີການລາດຕະເວນ ພາຍໃນເຂດປ່າອະນຸລັກພິເສດ ເພື່ອປ້ອງກັນການຕັດໄມ້ທຳລາຍປ່າ ພາຍໃນເຂດອຸທິຍານແຫ່ງຊາດ.

“ແມ່ນແລ້ວ, ເພາະວ່າອັ່ນ ອຸທິຍານຂອງເຮົາຂຶ້ນກັບກະຊວງກະສິກໍາ ແລະ ປ່າໄມ້ ຂອງລັດຖະບານເຈົ້າ. ລັດຖະບານເປັນຜູ້ຄຸ້ມຄອງເຈົ້າ. ແລ້ວເຮົາຈະມີໂຄງການສົ່ງເສີມອີ່ຫຍັງຕ່າງໆ ຫຼາຍຢ່າງເຈົ້າ. ເຮົາຈະເນັ້ນໜັກ ອະນຸລັກປົກປັກຮັກສາປ່າໄມ້ ໃນເຂດທີ່ວ່າ ອະນຸລັກພິເສດເນາະ ຢູ່ໃນປ່າ, ຢູ່ໃນອຸທິຍານແຫຼະ ໃນປ່າດົງດິບພຸ້ນເນາະ, ແຕ່ວ່າເຮົາຈະເນັ້ນໂຕນັ້ນເປັນພິເສດ ໂດຍການອັ່ນເຮົາຈະອອກລາດຕະເວນ ຕະຫຼອດເນາະ ບໍ່ວ່າຊິເປັນສັດປ່າ ແລະກະປ່າໄມ້ໃນຫັ້ນ.”

ໃນລະຫວ່າງເດຶອນພຶດສະພາ ຜ່ານມາ, ທາງເຈົ້າໜ້າທີ່ ກົມປ່າໄມ້, ກະຊວງກະສິກຳ ແລະ ປ່າໄມ້ ໄດ້ມີການລົງໄປກວດກາ ໃນເຂດອຸທິຍານແຫ່ງຊາດ ນາກາຍ-ນ້ຳເທີນ ເມືອງນາກາຍ ແຂວງຄຳມ່ວນ. ທາງເຈົ້າໜ້າທີ່ ໄດ້ກວດພົບຮ່ອງຮອຍ ການລັກລອບຕັດເຄືອແຫມ ແລະ ການລ່າສັດປ່າ ໃນເຂດອຸທິຍານແຫ່ງຊາດ ຈຳນວນໜຶ່ງ ແຕ່ກໍບໍ່ທັນຮູ້ຄັກແນ່ວ່າ ເປັນສີມືຂອງກຸ່ມຄົນໃດແດ່.

ພ້ອມນີ້ເຈົ້າໜ້າທີ່ກ່ຽວຂ້ອງ ຂັ້ນທ້ອງຖິ່ນ ແລະ ອົງການພາກປະຊາສັງຄົມ ແຫ່ງນຶ່ງ ຢູ່ແຂວງເຊກອງ ໄດ້ລົງກວດກາລາດຕະເວນ ເຂດຄຸ້ມຄອງປ່າໄມ້ ບ້ານທົ່ງຫວາຍ ເມືອງທ່າແຕງ ແຂວງເຊກອງ ກໍໄດ້ພົບຮ່ອງຮອຍ ການຕັດໄມ້ທຳລາຍປ່າ ເຊັ່ນດຽວກັນ.

ອີງຕາມຂໍ້ມູນ ຂອງອົງການສິ້ງຊອມ ປ່າໄມ້ໂລກ ຫຼື Global Forest Watch ລະບຸວ່າ ສະເພາະໃນປີ 2023, ລາວຍັງຄົງມີປ່າດັ້ງເດີມເຫຼືອຢູ່ ປະມານ 86% ຂອງປ່າໄມ້ທັງໝົດ ໂດຍພື້ນທີ່ປ່າດັ້ງເດີມ ຫຼຸດລົງເຖິງ 137,000 ເຮັກຕ້າຣ໌, ຂະນະທີ່ ພື້ນທີ່ປ່າປົກຫຸ້ມ ຫຼຸດລົງ 445,000 ເຮັກຕ້າຣ໌ ໃນນັ້ນ, ມີພື້ນທີ່ ທີ່ຖືກຖາງປ່າເຮັດໄຮ່ ມີຈຳນວນເຖິງ 164,000 ເຮັກຕ້າຣ໌ ແລະ ພື້ນທີ່ ທີ່ຖືກຕັດໄມ້ທຳລາຍປ່າ ມີຢູ່ເຖິງ 94,700 ເຮັກຕ້າຣ໌.