ນາຍົກລັດຖະມົນຕີ ຮຽກຮ້ອງໃຫ້ປະຊາຊົນ ຢຸດທໍາລາຍປ່າໄມ້

ວັນທີ 5 ເດືອນມິຖຸນາ ຂອງທຸກປີ ແມ່ນວັນສິ່ງແວດລ້ອມໂລກ ແລະເປັນວັນສິ່ງແວດລ້ອມແຫ່ງຊາດ, ໃນໂອກາດດັ່ງກ່າວ ທ່ານ ສອນໄຊ ສີພັນດອນ ນາຍົກລັດມົນຕີ ໄດ້ສົ່ງສານ ແລະຮຽກຮ້ອງໃຫ້ຫຼາຍພາກສ່ວນ ຍຸຕິການຕັດໄມ້ທໍາລາຍປ່າ ແລະຈູດປ່າແບບຊະຊາຍ ຜ່ານຄໍາຂວັນ ວັນສິ່ງແວດລ້ອມ ໃນປີນີ້ ວ່າ:

“ຮ່ວມກັນຢຸດທໍາລາຍປ່າໄມ້, ຈູດປ່າແບບຊະຊາຍ ເພື່ອຟື້ນຟູດິນ, ຕ້ານໄພແຫ້ງແລ້ງ ແລະໄພນໍ້າຖ້ວມ.”

ໂດຍຂໍ້ຄວາມຕອນໜຶ່ງ ຂອງນາຍົກລັດຖະມົນຕີ ກ່າວວ່າ:

“ປັດຈຸບັນນີ້, ບັນຫາການບຸກລຸກ ທໍາລາຍປ່າໄມ້, ທີ່ດິນ ປ່າໄມ້, ການຖາງປ່າ, ຈູດປ່າ ແບບຊະຊາຍ ແລະໄຟໄໝ້ລາມປ່າ ຢູ່ປະເທດພວກເຮົາ ກຳລັງເປັນຂະບວນແຜ່ລາມ, ເປັນບໍລິເວນກວ້າງ ແລະ ມີທ່າອ່ຽງ ເພີ່ມຂຶ້ນໃນແຕ່ລະປີ. ສະນັ້ນ, ເພື່ອແນ່ໃສ່ ການຄຸ້ມຄອງ ປົກປັກຮັກສາ ປ່າໄມ້ ແລະເພີ່ມເນື້ອທີ່ປົກຫຸ້ມປ່າໄມ້ ໃຫ້ໄດ້ 70% ຂອງເນື້ອທີ່ທົ່ວປະເທດ, ຮັບປະກັນໄດ້ ຄວາມຍືນຍົງ ຂອງຊັບພະຍາກອນທຳມະຊາດ ແລະ ສິ່ງແວດລ້ອມ ໄວ້ໃຫ້ລູກຫຼານ ໃນອະນາຄົດ, ພວກເຮົາ ຕ້ອງພ້ອມພຽງກັນ ແກ້ໄຂບັນຫາດັ່ງກ່າວນີ້ ໃຫ້ໄດ້ຢ່າງເດັດຂາດ."

ກ່ຽວກັບເລື່ອງນີ້ ຊາວບ້ານຢູ່ທາງແຂວງພາກໃຕ້ ທ່ານໜຶ່ງ ກ່າວວ່າ ການລັກລອບຕັດໄມ້ ຍັງມີຢູ່ຫຼາຍ, ບໍ່ໄດ້ຫຼຸດລົງແຕ່ຢ່າງໃດ ໂດຍສະເພາະ ຢູ່ໃນເຂດເມືອງສະໜາມໄຊ ແຂວງອັດຕະປື ທີ່ຍັງເຫັນມີການຕັດໄມ້ຢູ່ ໂດຍສະເພາະ ບໍລິເວນທີ່ຖືກນໍ້າຖ້ວມ ຈາກເຫດການເຂື່ອນແຕກ ນອກຈາກນີ້ ຍັງມີການຖາງປ່າ ຈູດປ່າເພື່ອເຮັດສວນ ແລະເຮັດໄຮ່ຄືກັນ.

ດັ່ງທ່ານກ່າວ ຕໍ່ວິທຍຸເອເຊັຽເສຣີ ໃນວັນທີ 3 ມິຖຸນາ 2024 ນີ້ວ່າ:

“ບໍ່ຫຼຸດ ຖ້າໄປເຫັນແຕ່ເຂດນີ້ລົງມານີ່ ແມ່ນບໍ່ຫຼຸດເລີຍຫັ້ນນ່າ. ມັນແຫ່ງເພີ່ມທະວີຂຶ້ນ ໄລຍະທຸກມື້ນີ້. ໂອ້ ຢູ່ຫັ້ນ ມັນມີບ່ອນທີ່ໃຫ້ຕັດ ທີ່ບ່ອນເຂດນໍ້າຖ້ວມ, ແຕ່ກໍໍ່ບໍ່ຮູ້ວ່າເຂົາເຈົ້າ ເຮັດແນວໃດຫັ້ນນ່າ ແຕ່ຢູ່ຫັ້ນມັນເປັນບ່ອນ ເຂົາເຈົ້າຖາງໄວ້ວົງກວ້າງເລີຍ. ແບບຕັດຖິ້ມຫັ້ນນ່າ. ໄມ້ໂຕລໍາໃຫຍ່ໆ ແລ້ວກໍ່ຕັດໆ ຕັດຈູດຫັ້ນນ່າ ຖືກຢືນຕາຍ ແລ້ວກໍ່ຖືກຖາງແບບຕັດຖິ້ມ.”

ຂະນະທີ່ ຊາວບ້ານ ຢູ່ເມືອງແບງ ແຂວງອຸດົມໄຊ ທ່ານໜຶ່ງ ກ່າວວ່າ ໃນລະດູແລ້ງ ທີ່ຜ່ານມາ ໃນເຂດເມືອງແບງ ແລະເມືອງອື່ນໆ ຂອງແຂວງອຸດົມໄຊ ກໍ່ມີການຈູດໄຮ່ຢູ່ຫຼາຍ ໂດຍເປັນໄຮ່ສາລີ ລ້ຽງສັດ. ຢ່າງໃດກໍ່ຕາມ ການຖາງປ່າໃຫຍ່ ຫຼື ປ່າສະຫງວນນັ້ນ ກໍ່ບໍ່ຄ່ອຍມີຫຼາຍປານໃດແລ້ວ.

ດັ່ງທ່ານ ກ່າວໃນມື້ດຽວກັນນີ້ວ່າ:

“ຍັງຈູດຢູ່ ປີນີ້ນິ່ກໍ່ຫຼາຍຢູ່ໃດ໋ ເພາະວ່າ ສ່ວນຫຼາຍຈະເປັນ ທີ່ເຂົາເຮັດສວນສາລີ, ເຂົ້າໂພດເນາະ. ເຂົາກໍ່ຈະມີການຖາງ ແລ້ວກໍ່ຈູດທຸກປີຫັ້ນນ່າ. ທຸກລະດູເລີຍ ທີ່ມີການຈູດ ແຕ່ວ່າສໍາລັບໄຮ່ ທີ່ວ່າເປັນຖາງປ່າໃຫຍ່ ປ່າແກ່ຫັ້ນ. ມັນບໍ່ຄ່ອຍມີຫຼາຍແລ້ວແຖວນີ້.”

ສໍາລັບລະດູແລ້ງ ທີ່ຜ່ານມາ ຢູ່ແຂວງຫົວພັນ ກໍ່ມີການຈູດປ່າຊະຊາຍຢູ່ຫຼາຍ ໂດຍເມືອງສົບເບົາ ແຂວງຫົວພັນ ແມ່ນເປັນເມືອງ ທີ່ມີການຈູດປ່າຫຼາຍກວ່າໝູ່.

ສ່ວນມາດຕະການສະກັດກັ້ນ ການທໍາລາຍປ່າໄມ້ ແລະຈູດປ່າ ແບບຊະຊາຍນັ້ນ ທາງຫ້ອງການປ່າໄມ້ເມືອງ ແລະແຂວງ ໄດ້ສົມທົບກັນ ສະກັດກັ້ນ ແລະໂຄສະນາໃຫ້ຊາວບ້ານຮັບຮູ້ເຖິງ ລະບຽບກົດໝາຍທີ່ກ່ຽວຂ້ອງ ຫາກຜູ້ໃດຈູດປ່າ ເຮັດໃຫ້ເກີດໄຟໄໝ້ລາມປ່າ ກໍ່ຈະຕ້ອງຖືກປັບໃໝ.

ດັ່ງເຈົ້າໜ້າທີ່ ພະແນກກະສິກໍາ ແລະປ່າໄມ້ ຂັ້ນເມືອງ ຢູ່ແຂວງຫົວພັນ ນາງໜຶ່ງ ກ່າວວ່າ:

“ເຂົາກໍ່ລະວັງຫັ້ນເນາະ ເພາະວ່າເຮົາໄດ້ເຮັດແຈ້ງການໄປ ຖ້າຜູ້ໃດເລີ່ມຫັ້ນນ່າ ຈະໄດ້ປັບໃໝ. ທາງແຂວງເພິ່ນກໍ່ລົງມາໂຕນີ້ເນາະ. ເຂົາຈະລົງພື້ນທີ່ເນາະ ໄປເບິ່ງໂຕທີ່ວ່າ ມີການລະເມີດຫັ້ນນ່າ. ເບິ່ງພື້ນທີ່ໂຕຈິງຫັ້ນນ່າ. ເຂົາເອີ້ນເຈົ້າຂອງມາ ຂອງຜູ້ທີ່ວ່າ ເຂົາສົງໄສວ່າຈູດ ຫັ້ນນ່າເນາະ.”

ທີ່ຜ່ານມາ ລັດຖະບານລາວ ໄດ້ອອກຄໍາສັ່ງ ແລະມາດຕະການ ຫຼາຍຮູບແບບ ເພື່ອປົກປັກຮັກສາປ່າໄມ້ ແລະສະກັດກັ້ນ ການລັກລອບຕັດໄມ້ ເປັນຕົ້ນ ການອອກຄໍາສັ່ງ ເລກທີ 15/ນຍ ວ່າດ້ວຍການຫ້າມສົ່ງອອກໄມ້ຂ້າມແດນ ເພື່ອສະກັດກັ້ນ ການທໍາລາຍປ່າໄມ້ຊະຊາຍ ແລະການລັກລອບຂຸດຄົ້ນໄມ້ ແລະສົ່ງອອກໄມ້ ທີ່ບໍ່ຖືກຕ້ອງຕາມກົດໝາຍ ຕໍ່ມາ ທ່ານ ສອນໄຊ ສີພັນດອນ ກໍ່ໄດ້ອອກຄໍາສັ່ງເລກທີ 11/ ນຍ ວ່າດ້ວຍ ການເພີ່ມຄວາມເຂັ້ມງວດ ໃນການຄຸ້ມຄອງ ພັດທະນາ ແລະນໍາໃຊ້ປ່າໄມ້.

ຢ່າງໃດກໍ່ຕາມ ໃນການປະບັດໂຕຈິງ ກໍ່ຕ້ອງປະເຊີນກັບຂໍ້ທ້າທາຍ ຍ້ອນປັດຈຸບັນ ກໍ່ຍັງມີການລັກລອບຕັດໄມ້ຢູ່ ແຕ່ໃນປັດຈຸບັນ ຈະຕັດໄມ້ຕາມຂະໜາດ ທີ່ຕະຫຼາດຕ້ອງການເທົ່ານັ້ນ ບໍ່ໄດ້ຕັດຖິ້ມທັງຕົ້ນ.  ນຂະນະດຽວກັນ ກໍ່ຍັງມີການລຸກລຸກປ່າ ຈາກຊາວບ້ານ ເພື່ອໃຊ້ພື້ນທີ່ໃນການປູກມັນຕົ້ນ ເຊິ່ງເປັນພືດເສດຖະກິດ ທີ່ສົ່ງອອກສໍາຄັນ ໃນປັດຈຸບັນ.

ການຮຽກຮ້ອງໃຫ້ປະຊາຊົນ ຢຸດຕັດໄມ້ ຢຸດບຸກລຸກພື້ນທີ່ປ່າ ແລະຢຸດຈູດປ່າ ແບບຊະຊາຍ ຈຶ່ງເປັນເລື່ອງທ້າທາຍຫຼາຍ ຍ້ອນປະຊາຊົນສ່ວນຫຼາຍ ຍັງມີອາຊີບກະສິກໍາ ທຸກຍາກ ແລະປະເຊີນກັບ ສະພາບເສດຖະກິດຍໍ້ທໍ້ ເຊິ່ງເປັນປັນຫາ ທີ່ລັດຖະບານລາວ ຍັງບໍ່ສາມາດແກ້ໄຂໄດ້ເທື່ອ.

ດັ່ງຜູ້ຊ່ຽວຊານ ດ້ານການສິ່ງແວດລ້ອມ ແລະການພັດທະນາແບບຍືນຍົງ ທ່ານໜຶ່ງ ກ່າວວ່າ:

“ຍັງເຫັນລັກລອບຕັດຫັ້ນນ່າ ເຂົາເຈົ້າບໍ່ໄດ້ຕັດເປັນດົງ ແຕ່ວ່າ ໄມ້ຍັງຢືນຕົ້ນຢູ່ ແຕ່ວ່າທາງມັນ ຕັດບາກເອົາໄປເຄິ່ງໜຶ່ງແລ້ວ ຕັດເອົາແຕ່ຄວາມຕ້ອງການ ຂອງຕະຫຼຸດ. ເຂົາເອີ້ນວ່າໄມ້ຕັດ ເອົາໄປປະມານ 50% ຍັງ 50% ຢືນຕົ້ນຢູ່ ກໍ່ຖືວ່າ ໄມ້ກໍ່ຕາຍຫັ້ນແຫຼະ ແລ້ວກໍ່ໃສ່ລົດຈັກບໍ ແບກຂ້າມພູໄປຂາຍເລີຍຊີ້ນ່າ ຄືກັນ. ເພິ່ນກໍ່ອອກຄໍາສັ່ງ ວ່າຫ້າມ ບໍ່ໃຫ້ຖາງປ່າ ປູກມັນຕົ້ນ ຫ້າມຄືເກົ່າແຫຼະ ມັນມີໂຮງງານເນາະ. ມີຜູ້ຮັບຊື້ ຊິຫ້າມແນວໃດ ປາກທ້ອງປະຊາຊົນ.”

ໃນວັນປູກຕົ້ນໄມ້ ແຫ່ງຊາດ ວັນທີ 1 ເດືອນມິຖຸນາ ປີ 2024 ລັດຖະບານລາວ ປະກາດແຜນຈະປູກຕົ້ນໄມ້ເຖິງ 34 ລ້ານຕົ້ນ ໃນພື້ນທີ່ 42 ພັນເຮັກຕ້າຣ໌ ພາຍໃນປີນີ້.