ເຫຕປາຕາຍຢູ່ນ້ຳຕອນ

ພູວົງສ໌
2018-11-21
ອີແມວລ໌
ຄໍາເຫັນ
Share
ພິມ
ປາຕາຍ ຢູ່ນໍ້າຕອນ ເຂດບ້ານໃຫຍ່ ນາຈະເຣີນ ເມືອງສັງທອງ ນະຄອນຫລວງວຽຈັນ ທີ່ ທາງການວິຈັຍແລ້ວ ແລະສັນນິຖານ ອາຈເປັນຍ້ອນ ປຸຍເຄມີ ຈາກສວນກ້ວຍ
ປາຕາຍ ຢູ່ນໍ້າຕອນ ເຂດບ້ານໃຫຍ່ ນາຈະເຣີນ ເມືອງສັງທອງ ນະຄອນຫລວງວຽຈັນ ທີ່ ທາງການວິຈັຍແລ້ວ ແລະສັນນິຖານ ອາຈເປັນຍ້ອນ ປຸຍເຄມີ ຈາກສວນກ້ວຍ
Citizen journalist

ຖື​ເປັນ​ເຫ​ຕ​ການ​ໃຫ​ຍ່ ​ທີ່​ມີ​ການ​ວິ​ພາກວິ​ຈານ​ກັນ​ຢ່າງກວ້າງ​ຂວາງ ພາຍຫຼັງ​ເກີດ​ເຫ​ຕ​ການ​ກັມ​ມະ​ກອນ ຈາກ​ສວນ​ກ້ວຍ​ຂອງນັກ​ລົງ​ທຶນ​ຈີນ ໄດ້​ລັກ​ລອບ​ປ່ອຍ ​ສານ​ເຄ​ມີ ຫຼື ນ້ຳ​ຢາ​ລ້າງ​ກ້ວຍ ລົງ​ສາຍ​ນ້ຳ​ຕອນ, ເຂດ​ບ້ານ​ໃຫ​ຍ່​ນາ​ຈະ​ເຣີນ, ບ້ານກົ້ວ ແລະ ບ້ານ​ເຕົາ​ໄຫ ເມືອງສັງ​ທອງ ນະ​ຄອນຫຼວງວຽງ​ຈັນ ໃນ​ຣະ​ຫວ່າງວັນ​ທີ 7 ຫ​າ 9 ພຶ​ສ​ຈິ​ກາ ທີ່​ຜ່ານ​ມາ ແລ້ວເຮັດ​ໃຫ້ມີ​ປາ​ຕາຍ ​ເປັນ​ຈຳ​ນວນຫຼວງຫຼາຍເຖິງ 300 ປາຍກິ​ໂລ, ຈົນ​ເຮັດ​ໃຫ້​ຊາວບ້ານ​ຜູ້​ໄປ​ພົບ​ເຫັນ​ ຕ່າງ​ກໍ​ຮູ້​ສຶກ​ຕື່ນ​ຕົກ​ໃຈ ​ເມື່ອ​ໄດ້​ພົບ​ເຫັນ​ປາ​ຕາຍ ແລະ ກຳ​ລັງ​ຈະ​ຂາດ​ໃຈ​ຕາຍ​ເຕັມ​ສາຍ​ນ້ຳ. ດັ່ງ​ປະ​ຊາ​ຊົນນາງ​ນຶ່ງ ​ໄດ້​ກ່າວ​ໃນ​ທຳ​ນອງ​ຕົກ​ໃຈ ​ຜ່ານ​ເຟ​ສ​ບຸກ​ຂອງ​ນາງ​ຕອນ​ນຶ່ງວ່າ:

“ສຽງ​ປະ​ຊາ​ຊົນ​ກ່າວ​ເຖິງ​ເຫ​ຕ​ການ​ປາ​ຕາຍ​ຢ່າງ​ໜ້າ​ຕົກ​ໃຈ”.

ຫຼັງຈາກ​ເກີດ​ເຫ​ຕໄດ້ບໍ່​ດົນ, ເຈົ້າ​ໜ້າ​ທີ່​ຈາກ​ພາກ​ສ່ວນ​ກ່ຽວ​ຂ້ອງ​ຕ່າງໆ, ໂດຍ​ສະ​ເພາະ​ຜ​ແນກ​ກະ​ສິ​ກັມ ແລະ ປ່າ​ໄມ້ ​ນະ​ຄອນຫຼວງວຽງ​ຈັນ ກໍ​ໄດ້​ລົງ​ພື້ນ​ທີ່ ເພື່ອ​ໄປ​ສຳຣວດ ແລະ ຊອກ​ຫາ​ສາ​ເຫ​ຕ ແລະ ຊອກ​ຫ​າຜູ້​ຮັບ​ຜິດ​ຊອບ​ຕໍ່​ເຫ​ຕ​ການ​ດັ່ງ​ກ່າວ ພ້ອມ​ທັງ​ໄດ້​ມີ​ການ​ແຈ້ງ​ການ ​ໃຫ້​ປະ​ຊາ​ຊົນ​ຫ້າມ​ນຳ​ປາ​ຕາຍ ​ຕາມ​ສາຍ​ນ້ຳ​ຕອນ ​ມາ​ປຸງ​ແຕ່ງ​ເປັນ​ອາ​ຫານ ແລະ ຫ້າມ​ໃຊ້​ນ້ຳ​ຕອນ ຈົນ​ກວ່າ​ຈະ​ມີ​ແຈ້ງ​ການ​ຕື່ມ ເມື່ອ​ຮູ້​ຜົ​ລ​ວິ​ຈັຍ​ນ້ຳ ແລະ ປາ​ທີ່​ຕາຍ​ວ່າ​ມີ​ຈາກ​ສາ​ເຫ​ຕ​ໃດກັນ​ແທ້. ດັ່ງ​ເຈົ້າ​ໜ້າ​ທີ່​ຫ້ອງ​ການ​ກະ​ສິ​ກັມ ແລະ ປ່າ​ໄມ້ ເມືອງ​ສັງ​ທອງ ໄດ້​ຢືນ​ຢັນ​ຕໍ່​ວິ​ທ​ຍຸ​ເອ​ເຊັຽ​ເສ​ຣີ​ໃນ​ມື້​ວານນີ້​ວ່າ:

“​ເຈົ້າ​ໜ້າ​ທີ່​ກ່າວ​ວ່າ ພາກ​ສ່ວນ​ກ່ຽວ​ຂ້ອງ​ລົງ​ມາ​ເບິ່ງ​ແລ້ວ ກຳ​ລັງ​ເອົາ​ນ້ຳ ແລະ ປາ​ໄປ​ວິ​ຈັຍ ແລະ ໄດ້​ແຈ້ງ​ການ​ໂຈະ​ຊົ່ວ​ຄາວ ບໍ່​ໃຫ້​ກິນ​ປາ ແລະ ໃຊ້​ນ້ຳ ຈົນ​ກວ່າ​ຜົ​ລ​ວິ​ຈັຍ​ອອກ​ມາ ຈຶ່ງ​ມີ​ແຈ້ງ​ການ​ຄືນ”.

ເຈົ້າ​ໜ້າ​ທີ່​ທ່ານນີ້​ຊີ້​ແຈງວ່າ ໃນ​ເບື້ອງ​ຕົ້ນ​ ​ບໍ​ຣິ​ສັດ​ປູກ​ກ້ວຍ​ຈີນ ທີ່ໄດ້​ຮັບ​ສັມ​ປ​ທານ ​ໃຫ້​ປູກ​ກ້ວຍ​ຕາມ​ສາຍ​ນ້ຳ​ຕອນ​ ຣະ​ຫວ່າງ​ແຂວງວຽງ​ຈັນ ແລະ ​ນະ​ຄອນຫຼວງວຽງ​ຈັນ ຈຳ​ນວນ 250 ເຮັກ​ຕ້ານີ້ ຍິນຍອມ​ຮັບ​ໃຊ້​ທຸກ​ຢ່າງ ແລະ ບໍ​ຣິ​ສັດ​ກໍ​ໄດ້​ມາ​ເຊັນ​ບົດ​ບັນ​ທຶກ​ໃນ​ການ​ຟື້ນ​ຟູ​ສາຍ​ນ້ຳ​ຕອນ ​ທັງ​ໃນ​ໄລ​ຍະ​ສັ້ນ ແລະ ໄລ​ຍະຍາວ, ໂດຍ​ວາງ​ແຜນ​ຈະ​ປ່ອຍ​ປາ​ລົງ​ສາຍ​ນ້ຳ​ຕອນ ປີ​ລະ​ ປະ​ມານ 100,000 ປາຍ​ໂຕ ເປັນ​ເວ​ລາ 3-5 ປີ.

“​ມັນ​ມີ 2 ບໍ​ຣິ​ສັດ, ຢູ່​ນະ​ຄອນຫຼວງ ແລະ ແຂ​ວງວຽງ​ຈັນ, ແລ້ວ​ປີ 2019 ຣະ​ດູ​ປ່ອຍ​ປາ​ຈະ​ມີ​ການ​ປ່ອຍ​ປາ​ຄືນ 3-5 ປີ, ປີ​ລະຫຼາຍ​ໂຕ​ຂຶ້ນ​ໄປ”.

ສ່ວນ​ວ່າ ​ເມື່ອກວດພົບ​ຮູ້​ແລ້ວ​ວ່າ​ບໍ​ຣິ​ສັດ​ປູກ​ກ້ວຍ​ຈີນໄດ້ ​ທຳ​ການ​ຣະ​ເມີດ​ກົດ​ໝາຍ​ ແລ້ວ​ຈະ​ນຳ​ໄປ​ສູ່​ການ​ຖອນ​ໃບ​ອະ​ນຸ​ຍາດ ​ສັ​ມ​ປ​ທານ ຫຼືບໍ່​ນັ້ນ, ເຈົ້າ​ໜ້າ​ທີ່​ໄດ້​ກ່າວ​ຕື່ມ​ວ່າ ທາງ​ສູນ​ກາງ​ຈະ​ເປັນ​ຜູ້​ພິ​ຈາ​ຣະ​ນາ ເຖິງວ່າ​ຈະ​ມີ​ການ​ກຳ​ນົດ​ໂທ​ສ​ໄວ້ ​ໃນຣະ​ບຽ​ບ​ກົດ​ໝາຍ​ແລ້ວກໍ່​ຕາມ, ແຕ່​ກໍ​ຕ້ອງ​ລໍ​ຖ້າ​ຜົ​ລ​ວິ​ຈັຍ​ນ້ຳ ແລະ ປາ​ທີ່​ຕາຍ​ກ່ອນ ເພື່ອ​ຈະ​ຫາ​ສາ​ເຫ​ຕ​ທີ່​ແທ້​ຈິງວ່າ​ຜິດ​ຖືກ​ແນວ​ໃດ.

“​ເພິ່ນ​ຈະ​ສ​ເນີ​ສູນ​ກາງ ເພື່ອ​ແກ້​ໄຂ​ພິ​ຈາ​ຣະ​ນາ​ວ່າ​ຈະ​ໃຫ້​ຖອນ​ໃບ​ອະ​ນຸ​ຍາດຫຼືບໍ່? ມີ​ຣະ​ບຽບ​ແລ້ວ​ຍັງ​ຣະ​ເມີດ, ການ​ນຳ​ໃຊ້​ປຸ໋ຍ​ກະ​ມີ​ກຳ​ນົດ​ແລ້ວ. ແຕ່​ກໍ​ຍັງ​ຢືນ​ຢັນ​ບໍ່​ໄດ້​ເທື່ອ​ວ່າ ​ເປັນ​ຍ້ອນ​ຫ​ຍັງ​ກັນ​ແທ້ ລໍ​ຖ້າ​ຜົ​ລ​ວິ​ຈັຍ​ກ່ອນ”.

ໃນ​ເວ​ລາ​ດຽວ​ກັນ, ຊາວ​ລາວ​ນາງນຶ່ງ ທີ່​ຕິດ​ຕາມ​ບັນ​ຫາ​ສະ​ພາບ​ແວດ​ລ້ອມ ແລະ ການ​ລົງ​ທຶນ​ຂອງ​ຕ່າງ​ປະ​ເທ​ສ​ຢູ່​ລາວ ກໍ​ໄດ້​ໃຫ້​ທັ​ສ​ນະ ​ຕໍ່​ເຫ​ຕ​ການ ການ​ລັກ​ລອບ​ຖອກສານ​ເຄ​ມີ​ຈາກ​ສວນ​ກ້ວຍ ລົງ​ສູ່​ສາຍນ້ຳ​ຕອນ​ທີ່​ເກີດ​ຂຶ້ນຫຼ້າ​ສຸດນີ້​ວ່າ ພາກສ່ວນກ່ຽວຂ້ອງ​ ຄວນ​ຮັກ​ສາ​ຜົ​ລ​ປ​ໂຍດ​ ຂອງ​ປະ​ຊາ​ຊົນ​ເປັນ​ບູ​ຣິ​ມະ​ສິ​ທ ແລະ ຖ້າ​ຫາກ​ກວດ​ພົບ​ເຫັນ​ວ່າ​ນັກ​ລົງ​ທຶນ ​ຣະ​ເມີດ​ຣ​ະບຽ​ບ​ກົດ​ໝາຍ​ບ້ານ​ເມືອງ ກໍ​ຄວນ​ໃຫ້​ໃບ​ອະ​ນຸ​ຍາ​ດ ດຳ​ເນີນ​ທຸ​ຣະ​ກິ​ຈ ຫຼື​ສັ​ມ​ປ​ທານ ເປັນ​ໂມ​ຄະ.

“​ຖ້າ​ຢາກ​ຮັກ​ສາ​ຜົ​ລ​ປ​ໂຍດ​ປະ​ຊາ​ຊົນ ຄວນ​ມີ​ບົດ​ບັນ​ທຶກ ຖ້າ​ຜິດ​ພາດ​ເທື່ອ​ທີ 2 ຄວນ​ໂມ​ຄະ ຖື​ວ່າ​ຜູ້​ລົງ​ທຶນ​ຜິດ​ສັນ​ຍາ ເຈົ້າ​ຕ້ອງ​ຍຸ​ຕິ​ການ​ປູ​ກ້ວຍ​ຢູ່​ເຂດນີ້ ເອົາ​ຜູ້​ໄດ້​ຄຸນ​ນະ​ພາບ​ມາ​ເຮັດ”.

​ຍາ​ນາງ​ກ່າວ​ຕື່ມ​ວ່າ ຖ້າ​ກຸ່ມ​ນັກ​ລົງ​ທຶນ​ຊາດ​ໃດ ຫາກ​ມີ​ທ່າ​ທີ​ມັກ​ລະ​ເລີຍ​ຕໍ່​ການ​ຮັກ​ສາ​ສິ່ງ​ແວດ​ລ້ອມ ຖື​ເປັນ​ພຶ​ຕ​ກັມ​ທີ່​ອັນ​ຕະ​ຣາຍ ແລະ ເຈ​ຕ​ນາ​ອັນ​ບໍ່​ດີ​ຕໍ່​ສິ່ງ​ແວດ​ລ້ອມ ແລະ ສັງ​ຄົມ​ໃນ​ທ້ອງ​ຖິ່ນນັ້ນ, ທາງ​ການ​ທ້ອງ​ຖິ່ນ ກໍ​ຄວນຫຼີກ​ລ້ຽງ ແລະ ຫາ​ທາງ​ເລືອກ​ອື່ນໃນ​ການ​ດຶງ​ດູດ ​ການ​ລົງ​ທຶນ ເພື່ອຫຼີກ​ລ້ຽງ​ບັນ​ຫາ​ເດີມໆ​ ທີ່​ເຄີຍ​ເກີດ​ຂຶ້ນ​ກັບ​ທ້ອງ​ຖິ່ນ​ອື່ນ​ໆແລ້ວ.

“​ຖ້າ​ບໍ​ຣິ​ສັດ​ມ​າ​ລົງ​ທຶນ ມີ​ນິ​ໄສ​ບໍ່​ຮັກ​ສາ​ສິ່ງ​ແວດ​ລ້ອມ ໃຫ້​ໂອ​ກາດ ບັນ​ຫາ​ກໍ​ຈະ​ກັບ​ຄືນ​ມາ. ນັກ​ລົງ​ທຶນ​ແບບນີ້ ທຳ​ຣາຍ​ສິ່ງ​ແວດ​ລ້ອມ ກະ​ຄື​ຂ້າ​ສັດ ສົ່ງ​ຜົ​ລ​ກະ​ທົບ​ຕໍ່​ຄົນ ມັນ​ຄື​ມີ​ເຈ​ຕ​ນາ​ຂ້າ”.

ປະ​ຈຸ​ບັນ, ເຈົ້າ​ໜ້າ​ທີ່​ກ່ຽວ​ຂ້ອງ​ກຳ​ລັງ​ຢູ່​ໃນ​ຂັ້ນຕອນ​ວິ​ຈັຍ​ໂຕ​ຢ່າງ​ນ້ຳ ແລະ ປາ​ຕາຍ ຈາກ​ສາຍ​ນ້ຳ​ຕອນ ເພື່ອ​ຫາ​ສາ​ເຫ​ຕ​ທີ່​ແທ້​ຈິງວ່າ ເຫ​ຕ​ການ​ປາ​ຕາຍ​ໃນ​ຄັ້ງ​ນີ້​ເກີດ ​ມາ​ຈາກ​ການນຳ​ໃຊ້​ສານ​ເຄ​ມີ​ຊ​ນິດ​ໃດ ແລະ ມີ​ຄວາມ​ຮຸນ​ແຮງ ​ທຳ​ຣາຍສ​ະພາບ​ແວດ​ລ້ອມ, ປາ ແລະ ມີ​ຄວາມ​ສ່ຽງຕໍ່ສຸ​ຂ​ພາບ​ຂອງປະ​ຊາ​ຊົນ ​ທີ່​ອາ​ໃສ​ຢູ່ໝູ່​ບ້ານ​ໃກ້​ຄຽງ ຫຼາຍ​ໜ້ອຍ​ພຽງ​ໃດ ເພື່ອ​ເຈົ້າ​ໜ້າ​ທີ່​ກ່ຽວ​ຂ້ອງ​ ຈະ​ໄດ້​ແຈ້ງ​ໃຫ້​ປະ​ຊາ​ຊົນ​ໄດ້​ຮັບ​ຮູ້ ແລະ ເອົາ​ຜົ​ລ​ວິ​ຈັຍ​ເປັນ​ບ່ອນ​ອີງ ໃນກຳ​ນົດ​ມາ​ຕ​ການ​ຕໍ່​ຜູ້​ຣະ​ເມີດໃນຄັ້ງ​ນີ້.

ເຕັມຫນ້າ