ລາວ ກຽມອອກວີຊ້າໂດຍບໍ່ເສັຍຄ່າ ໃຫ້ກຸ່ມນັກທ່ອງທ່ຽວຈີນ

ລັດຖະບານລາວ ກຽມອອກນະໂຍບາຍໃໝ່ ເພື່ອອອກວີຊ້າແບບບໍ່ເສັຍຄ່າ ຫຼື Free Visa ແກ່ນັກທ່ອງທ່ຽວຈີນ ທີ່ຜ່ານບໍລິສັດທ່ອງທ່ຽວ ເພື່ອສະໜັບສະໜູນ ການທ່ອງທ່ຽວລາວ 2024.

ທ່ານ ນາງ ອາລານີ ພົມມະວົງສາ, ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວຕໍ່ນັກຂ່າວ ເພື່ອຢືນຢັນນະໂຍບາຍດັ່ງກ່າວ.

ໃນການໃຫ້ວີຊ້າແບບບໍ່ເສັຍຄ່າ ຫຼື Free Visa ນັ້ນ ເຈົ້າໜ້າທີ່ຝ່າຍລາວ ກໍຈະມີການກວດສອບ ກ່ອນ ເພື່ອປ້ອງກັນບຸກຄົນທີ່ໜີຄະດີ ເຂົ້າມາປະເທດລາວ.

ເຈົ້າໜ້າທີ່ ປ້ອງກັນຄວາມສະຫງົບ ທ່ານໜຶ່ງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 27 ມິຖຸນາ ວ່າ:

“ນັກທ່ອງທ່ຽວຈີນ ທ່ຽວເປັນກຸ່ມເນາະ ທ່ຽວເປັນກຸ່ມ ທີ່ມີບໍລິສັດທ່ອງທ່ຽວ ເຂົ້າມາທ່ຽວລາວ ຟຼີ 15 ວັນ ຖ້າວ່າ ມາດ້ວຍຕົນເອງແລ້ວ ຈະບໍ່ໄດ້ ຕ້ອງຜ່ານຕົວໂທນທ່ອງທ່ຽວ ມີແຜນການທ່ອງທ່ຽວລະອຽດ ຈຶ່ງຈະໄດ້ບູລິມະສິດ ນະໂຍບາຍໂຕນີ້ ເຂົາຕ້ອງສົ່ງລີສລາຍຊື່ມາກ່ອນ ແລ້ວຊິສົ່ງໃຫ້ເຈົ້າໜ້າທີ່ກວດຄົນເຂົ້າເມືອງເຊັກໃຫ້ ປະເທດໃດກໍມີໝົດ ຊິທ່ອງທ່ຽວ ຫຼື ບໍ່ທ່ອງທ່ຽວມາ ເຂົາກໍເຊັກ ກວດກາ ກ່ອນຈະເຂົ້າປະເທດ ຮວຍ ເຈົ້າມີຄະດີ ເຈົ້າຈະໄປທ່ຽວຢູ່ຫວະ ເຂົາກໍຈັບຫົວເຈົ້າດໍາເນີນຄະດີ ຊາກ່ອນ.”

ໃນຂະນະທີ່ ທ່ານ ນາງ ດາລານີ ພົມມະວົງສາ, ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວຕໍ່ນັກຂ່າວອາຊຽນ ແລະ ຈີນ ວ່າ ລັດຖບານລາວ ຈະຢືນນະໂຍບາຍດັ່ງກ່າວ ໃນທ້າຍເດືອນມິຖຸນາ 2024.

ການໃຫ້ຟຼີວີຊ້າ ຈະໃຫ້ສະເພາະແຕ່ນັກທ່ອງທ່ຽວຈີນ ທີ່ມາເປັນກຸ່ມ ກັບບໍລິສັດທ່ອງທ່ຽວ ເຊິ່ງເປັນໄລຍະສັ້ນ ສະເພາະໃນໄລຍະປີທ່ອງທ່ຽວລາວ ແຕ່ຖ້າໝົດປີທ່ຽວທ່ຽວແລ້ວ ກໍຈະມີການຍົກເລີກ.

ເຈົ້າໜ້າທີ່ ກະຊວງການຕ່າງປະເທດລາວ ໄດ້ກ່າວວ່າ:

“ມັນຈະເປັນກຸ່ມທົວນະເຈົ້າ ມັນຕ້ອງເປັນບໍລິສັດ ເປັນກຸ່ມທົວເຂົ້າມາເນາະ ເປັນບຸກຄົນບໍ່ໄດ້ວີຊ້າ ມັນໄລຍະສັ້ນນ່າ ຊ້ວງປີທ່ອງທ່ຽວນີ້ຊື່ໆ ໝົດປີທ່ອງທ່ຽວ ເພິ່ນກໍຍົກເລີກຄືເກົ່າ ສ່ວນຫຼາຍມັນເປັນກຼຸບທົວ ມັນເປັນບໍລິສັດທົວໃຫຍ່ໆ. ເພິ່ນຈະສັ່ງອະນຸຍາດໃຫ້ໄດ້ ຕ້ອງມີເງື່ອນໄຂຄົບຖ້ວນຄັກແນ່ ເຂົາຈຶ່ງຍົກເວັ້ນໃຫ້ເນາະ ທົວເຂົ້າມາແລ້ວຕ້ອງໄດ້ກັບອອກໄປເດ້ ຕ້ອງມີປີ້ຍົນ ມີຈອງຫຍັງອອກມາ. ຄັນຟຼີວີຊ້າ ມັນໝົດເລີຍ ຄົນຈີນຫຼັ່ງເຂົ້າມາເນາະ ເພິ່ນບໍ່ໃຫ້ດອກ ບໍ່ເຄີຍຍົກເວັ້ນໃຫ້ຄົນຈີນ ໝົດແລ້ວ ປະເທດລາວ. ທາງ ຕ.ມ ທາງກະຊວງປ້ອງກັນປະເທດເພິ່ນບໍ່ໃຫ້ ຈີນເຂົ້າມາລົ້ວຫຼາຍໂພດ ຈີິນນ່າ 10 ປະເທດອາຊຽນຍົກເວັ້ນເນາະ ຄົນໄທ ປົກກະຕິເຈົ້າ 30 ມື້ເຈົ້າ.”

ໃນວັນທີ 11 ມິຖຸນາ 2024 ທີ່ຜ່ານມາ, ທ່ານ ສາຍທອງ ໄຊຍະວົງ, ສະມາຊິກສະພາແຫ່ງຊາດ ຈາກແຂວງຈໍາປາສັກ ໄດ້ສະເໜີຕໍ່ກອງປະຊຸມສະພາ ວ່າ ໃຫ້ລັດຖະບານພິຈາລະນາການໃຫ້ວີຊ້າ ນັກທ່ອງທ່ຽວບາງປະເທດ ທີ່ເຫັນວ່າ ມີຄວາມຈໍາເປັນ ໂດຍການຍົກເວັ້ນວີຊ້າ ຄວນພິຈາລະນາ, ຄົ້ນຄວ້າຕື່ມ ວ່າ ຈະໃຫ້ປະເທດໃດ ຈະໃຫ້ນັກທ່ອງທ່ຽວກຸ່ມໃດ ແລະ ຈະໃຫ້ຮູບແບບໃດ.

ບັນຫາທີ່ເກີດຂຶ້ນກໍຄື ຄົນຈີນຈໍານວນໜຶ່ງທີ່ໜີຄະດີ ແລ້ວມາແບບສ່ວນໂຕ ມາຢູ່ເຂດຊັງຈຽງ ຫຼື ບາງກໍລະນີ ກໍມາຊອກເອົາເມັຍຄົນລາວ. ຊາວບ້ານ ທີ່ຢູ່ໃກ້ເຂດຕະຫລາດຊັງຈ້ຽງ ເມືອງສີໂຄດຕະບອງ ໄດ້ກ່າວວ່າ: 

“ເອີປອດໄພ ໂຕນີ້ກະດາຍ ກໍສ່ວນຫຼາຍ ມັນມາໃນນາມສ່ວນໂຕ ຫັ້ນຫຼາຍກວ່າກຼຸບທົວລົງ ມັນກໍລົງດົນໆ ຈັ່ງຄ່ອຍເຫັນມາເທື່ອໜຶ່ງ ແຕ່ວ່າໃນນາມສ່ວນໂຕ ເຂົາມາໃນນາມສ່ວນໂຕ. ຂີ່ຍົນມາ, ຂີ່ລົດໄຟມາລົງ ເຂົ້າມາໃນຊັງຈ້ຽງເລີຍ, ແຕ່ສ່ວນຫຼາຍບໍສູ້ເຫັນ ເຂົາຂາຍຢາມາແລ້ວ ຢາກໄດ້ເມັຍລາວບໍ່ ແນວນີ້. ເອີ ກໍເຫັນຫຼາຍຢູ່ ຫຼາຍກໍເຫັນຢູ່ ມາລົມກັນມັກຄົນລາວ ແລ້ວກໍມາແຕ່ງດອງກັນ.”

ຖ້າເປັນຄົນຈີນທີ່ມາກັບກຸ່ມບໍລິສັດທົວ ກໍຈະກວດກາໄດ້ງ່າຍຂຶ້ນກວ່າ ພວກທີ່ມາແບບສ່ວນໂຕ. ຊາວແຂວງຫລວງພຣະບາງ ໄດ້ກ່າວວ່າ:

“ກໍໄດ້ຢູ່ແລ້ວ ຖ້າເປັນແຂກທົວໄປ ກໍບໍ່ເປັນຫຍັງດອກ ບໍ່ເປັນຫຍັງ ເອົາພາສປອດໄປແລ້ວ ກໍໄດ້ ບໍ່ເປັນຫຍັງ ກໍປອດໄດຢູ່ ຖ້າວ່າໄປຮອດຫັ້ນ ມັນມີເຈົ້າໜ້າທີ່ກວດຫັ້ນແຫຼະ ເພາະວ່າ ແຕ່ລະບ່ອນ ມັນມີເຈົ້າໜ້າທີ່.”

ເຈົ້າໜ້າທີ່ກ່ຽວຂ້ອງເນັ້ນຢໍ້າວ່າ ການທີ່ຄົນຈີນເຂົ້າມາ ຕ້ອງເບິ່ງພຶດຕິກໍາ ວ່າ ມາເຮັດຫຍັງກັນແທ້ ແລະ ມາເພື່ອຈຸດປະສົງຫຍັງ.

ເຈົ້າໜ້າທີ່ປ້ອງກັນຄວາມສະຫງົບ ໄດ້ກ່າວວ່າ:

“ແຕ່ວ່າ ເວລາເຂົາເຈົ້າມາທ່ຽວ ພຶດຕິກໍາການເຄື່ອນໄຫວຂອງເຈົ້າ ເຂົ້າກັບນິຍົມໄປຕົວຍົວະຫຼອກລວງ ໄປຫຍັງເຂົາຈັບເຈົ້າແລ້ວ ຄັນເຈົ້າມາທ່ຽວໃຫ້ເຈົ້າໄປຕາມແຜນການທ່ອງທ່ຽວຫັ້ນ. ໄປຊົມດອກໄມ້ ປ່າໄມ້ ເຈົ້າກໍເປັນຊົມ ເຂົາຊິໄປຈັບ ໄປເຈີບຫຍັເຈົ້າ ມັນຂຶ້ນກັບພຶດຕິກໍາ ເລື່ອງປົກກະຕິ. ຄັນວ່າ ເຈົ້າມາໃນນາມທ່ອງທ່ຽວ ຖ້າເຈົ້າເຫັນຜູ້ສາວງາມ ເຈົ້າກະມາມັກ, ເຈົ້າຮັກ, ເຈົ້າລົມກັນຕາມກົດໝາຍ. ຄອບຄົວກໍານົດ ເລື່ອງຄວາມຮັກ ເຈົ້າເອົາກັນແລ່ນໜັງສືໃຫ້ມັນຖືກຕ້ອງ. ມັນກໍບໍ່ມີບັນຫາ ຢູ່ໃນຂັ້ນ ເລີ່ມມັກຮັກນີ້ ມັນກໍເບິ່ງພຶດຕິກໍາວ່າ ເຈົ້າຊິເອົາຜູ້ຍິງນີ້ ໄປໃສໄປໃສ ມັນກໍມີດອກ ມັນຫາກສະແດງອອກຢູ່ຫັ້ນດອກ.​”

ສໍາລັບນະໂຍບາຍໃໝ່ ທີ່ຈະໃຫ້ວີຊ້າແບບບໍ່ເສັຍຄ່າ ຫຼື ຟຼີວີຊ້າ ແກ່ນັກທ່ອງທ່ຽວຈີນ ທີ່ຈອງຜ່ານໂຕແທນທ່ອງທ່ຽວ ພາຍໃຕ້ການຮັບຮອງຂອງທາງການນີ້ ເປັນຄວາມຄິດລິເລີ່ມຂອງລັດຖະບານລາວ ທີຈະເພີ່ມຈໍານວນນັກທ່ອງທ່ຽວຈີນມາລາວ.

3 ເດືອນຕົ້ນປີ 2024 ປະເທດລມາວ ມີນັກທ່ອງທ່ຽວເຂົ້າມາປະມານ 240,000 ຄົນ ເຮັດໃຫ້ນັກທ່ອງທ່ຽວຈີນ ເປັນກຸ່ມນັກທ່ອງທ່ຽວ ຕ່າງປະເທດ ອັນດັບທີ 3 ຮອງຈາກນັກທ່ອງທ່ຽວໄທ ແລະ ຫວຽດນາມ.

ໃນປີ 2023 ປະເທດລາວ ມີິນັກທ່ອງທ່ຽວຈີນ ເຂົ້າມາທັງໝົດປະມານ 640,000 ຄົນ, ອີງຕາມຂໍ້ຈາກເວບໄຊ້ຂ່າວ “The Laotian Times” ທີ່ເຜີຍແຜ່ໃນວັນທີ 25 ມິຖຸນາ 2024.​