ຂີ້ເຫຍື້ອຕາມແຄມທາງ ສົ່ງກິ່ນ ສ້າງບັນຫາ

ສຸພັດຕາ
2018.07.20
F-Trash ສະພາບຂອງກອງຂີ້ເຫຍື້ອ ທີ່ປະຊາຊົນບ້ານປ່າຄາ ແລະບ້ານໂພນສຳພັນ ເມືອງລອງ, ແຂວງຫຼວງນໍ້າທາ ໄດ້ຮັບຜົນກະທົບ ຈາກ ກິ່ນເໝັນ
RFA/VD

ປະຊາຊົນບ້ານປ່າຄາ ແລະບ້ານໂພນສຳພັນ ເມືອງລອງ ແຂວງຫຼວງນໍ້າທາ ໄດ້ຮັບຜົນກະທົບຈາກກິ່ນເໝັນ ຂອງກອງຂີ້ເຫຍື້ອທີ່ທາງເມືອງ ເອົາມາຖິ້ມ ເຊິ່ງສະຖານທີ່ບ່ອນຖິ້ມຂີ້ເຫຍື້ອນີ້ ຕິດກັບເສັ້ນທາງ ຢູ່ຣະຫວ່າງກາງບ້ານປ່າຄາ ແລະ ບ້ານໂພນສຳພັນ ແລະເປັນເສັ້ນທາງທຽວ ຂອງປະຊາຊົນຫຼາຍບ້ານນຳອີກ ເລີ້ມແຕ່ເມືອງລອງໄປຫາ ບ້ານຊຽງກົກ ຊາຍແດນລາວ-ພະມ້າ ເຮັດໃຫ້ປະຊາຊົນເຂດບ້ານດັ່ງກ່າວໄດ້ຮັບ ຜົນກະທົບ ດັ່ງປະຊາຊົນບ້ານປ່າຄາ ຜູ້ນຶ່ງ ກ່າວຕໍ່ວິທຍຸ ເອເຊັຍເສຣີ ໃນມື້ວັນທີ 10 ກໍຣະກະດາ ວ່າ:

“ເວລາເຮົາກາຍທາງມັນກະເໝັນ ຊ່ວງນີ້ແຫ່ງເປັນຊ່ວງຍາມຝົນແດ່ ຂີ້ເຫຍື່ອມັນປຽກກະແຮງເໝັນ ຢາກໃຫ້ທາງຂັ້ນເທິງເພິ່ນ ຈັດບ່ອນຖິ້ມ ຂີ້ເຫຍື່ອ ໃຫ້ໄກຈາກບ່ອນຢູ່ ປະຊາຊົນແດ່ແລະກະເຮັດບ່ອນຖິ້ມຂີ້ເຫຍື່ອ ບໍ່ໃຫ້ມັນມີກິ່ນເໝັນ ອີກຢ່າງນື່ງບ່ອນຖິ້ມ ຂີ້ເຫຍື່ອ ໃນປະຈຸບັນ ມັນກະໃກ້ແຫລ່ງນໍ້າແດ່ ຢ້ານມັນມີເຊື້ອພຍາດໄຫລລົງນໍ້າ.”

ກ່ຽວກັບເຣື້ອງນີ້ ວິທຍຸເອເຊັຍເສຣີ ໄດ້ສອບຖາມໄປຍັງ ເຈົ້າໜ້າທີ່ ສິ່ງແວດລ້ອມ ປະຈຳເມືອງລອງ ທ່ານນຶ່ງ ແຕ່ທ່ານ ບໍ່ປະສົງອອກຊື່ ແລະສຽງແທ້ ໂດຍທ່ານກ່າວວ່າ:

“ບັນຫາໃນການຈັດສັນບ່ອນຖິ້ມຂີ້ເຫຍື້ອ ຂອງເມືອງເຮົານີ້ ຜ່ານມາແມ່ນບໍ່ທັນມີງົບປະມານ ທີ່ຈະຈັດສັນ ພວກເຮົາກໍ່ໄດ້ສະເໜີໄປຫາທາງ ເມືອງແລ້ວ ແຕ່ວ່າບໍ່ມີງົບປະມານ ດຽວນີ້ ກະມີແຕ່ຖິ້ມຢູ່ເຂດນີ້ໄປກ່ອນ ເພາະວ່າ ມັນບໍ່ມີບ່ອນຖິ້ມ ລໍຖ້າການຈັດສັນ ໃໝ່.”

ສ່ວນຫຼາຍແລ້ວ ຂີ້ເຫຍື້ອທີ່ເອົາມາຖິ້ມນັ້ນ ແມ່ນບໍ່ໄດ້ແຍກປະເພດ ຖິ້ມຮວມກັນເລີຍ ຊຶ່ງອາຈສົ່ງຜົນກະທົບ ຕໍ່ສິ່ງແວດລ້ອມ ໃນໄລຍະຍາວ ນອກຈາກນີ້ ກໍອາຈສົ່ງຜົນກະທົບ ຕໍ່ສຸຂພາບຂອງປະຊາຊົນ ທີ່ອາສັຍຢູ່ໃກ້ເຂດ ດັ່ງກ່າວ.

ເຖິງຢ່າງໃດກໍ່ຕາມ ປະຊາຊົນທັງ 2 ບ້ານ ຢາກຮຽກຮ້ອງໃຫ້ທາງພາກສ່ວນ ທີ່ກ່ຽວຂ້ອງ ລົງມາແກ້ໄຂ ຈັດສັນບ່ອນຖິ້ມຂີ່ເຫຍື້ອ ໃຫ້ເປັນ ຣະບຽບ ແລະໃຫ້ຫ່າງໄກຈາກໝູ່ບ້ານ ເພື່ອປ້ອງກັນຜົນກະທົບຕ່າງໆ ທີ່ຈະເກີດຂຶ້ນ ໃນອະນາຄົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.