ຂ.ຫຼວງພຣະບາງ ເສັຽ 6 ຊີວິດ ຍ້ອນນ້ຳຖ້ວມ

ອຸ່ນແກ້ວ ສຸກສະຫວັນ
2018-08-30
ອີແມວລ໌
ຄໍາເຫັນ
Share
ພິມ
ວັນທີ 29 ສິງຫາ 2018 ສະພາບພັຍພິບັດ ນໍ້າຖ້ວມ ໃນເຂດນະຄອນຫລວງພະບາງ
ວັນທີ 29 ສິງຫາ 2018 ສະພາບພັຍພິບັດ ນໍ້າຖ້ວມ ໃນເຂດນະຄອນຫລວງພະບາງ
Screen captured ; https://tinyurl.com/y8wd6fgh

ໃນວັນທີ 29 ສິງຫາ ທີ່ຜ່ານມາ ຢູ່ແຂວງຫລວງພຣະບາງ ເກີດມີສະພາບຝົນຕົກໜັກ ແລະນ້ຳປ່າໄຫລຊຸ ເຮັດໃຫ້ມີຜູ້ເສັຍຊີວິດ 6 ຄົນ.

ຜູ້ເສັຍຊີວິດເປັນປະຊາຊົນເມືອງນ້ຳບາກ 2 ຄົນ, ຊຽງເງິນ 1 ຄົນ, ນະຄອນຫລວງພຣະບາງ 1 ຄົນ, ເມືອງງອຍ 1 ຄົນ ແລະອີກ 1 ຄົນ ນັ້ນຍັງບໍ່ທັນມີການຢືນຢັນວ່າ ຢູ່ເມືອງໃດ, ດັ່ງເຈົ້າໜ້າທີ່ຜແນກແຮງງານ ແລະສວັດດີການສັງຄົມ ແຂວງຫລວງພຣະບາງ ໄດ້ກ່າວຕໍ່ວິທຍຸ ເອເຊັຍເສຣີ ວ່າ:

"6 ຄົນແລ້ວ ມັນຈະຢູ່ເມືອງນ້ຳບາກ 2, ຊຽງເງິນ 1, ນະຄອນຫຼວງພຣະບາງ 1, ແລະກໍເມືອງງອຍ 1, ແຕ່ມີເດັກນ້ອຍຜູ້ນຶ່ງຫັ້ນນ່າ ແຕ່ວ່າຣາຍງານ ຂະເຈົ້າບໍ່ຣາຍງານລະອຽດຕື່ມ ຕົວນີ້ ນ້ຳໄຫລຊຸເນາະ ສົມມຸດວ່າ ນ້ຳຫ້ວຍນ້ຳຮ່ອງ ແລ້ວ ເຂົາເຈົ້າໄປທຳມາ ຫາກິນ ຂ້າມມາບ້ານເຮືອນ ແລ້ວ ກໍຖືກນ້ຳໄຫລຊຸ."

ສະພາບນ້ຳຖ້ວມຂັງ ແລະ ລະດັບນ້ຳເພີ້ມຂຶ້ນເລື້ອຍໆ ເກີດຂຶ້ນມາເປັນເວລາຫລາຍມື້ ແຕ່ມາຮອດ ວັນທີ 29 ສິງຫາ ຝົນຕົກໜັກໝົດມື້ ເຮັດໃຫ້ນ້ຳຈາກບ່ອນສູງ ໄຫລຊຸລົງມາ ເຮັດໃຫ້ປະຊາຊົນ ບໍ່ສາມາດຂົນເຄື່ອງ ຈາກໄປຢູ່ບ່ອນສູງ ໄດ້ທັນເວລາ. ສຳລັບ ຜູ້ເສັຍຊີວິດ ຍາດພີ່ນ້ອງເຂົາເຈົ້າ ນໍາໄປເຮັດພິທີ ທາງສາສນາແລ້ວ ແລະຣາຍລະອຽດຜູ້ເສັຽຊີວິດ ເຈົ້າໜ້າທີ່ຈະມີການຣາຍງານເພີ້ມຕື່ມ, ດັ່ງທ່ານ ກ່າວວ່າ:

"ແຕ່ລະເມືອງເຂົາເຈົ້າລາຍງານບໍ່ລະອຽດ ເພາະວ່າ ມັນໄປບໍ່ຮອດເນາະ ທີ່ວ່າ ບາງບ້ານກໍເຂົ້າບໍ່ເຖິງ ເພາະວ່າ ເສັ້ນທາງໄປບໍ່ຮອດ ເພາະວ່າ ມັນມີປະເພດດິນເຈື່ອນ ມີຂອນໄມ້ຂອນຫຍັງ ທັບທາງ ທຸລຸເສັ້ນທາງຂຶ້ນໄປບໍ່ໄດ້ເດ້ ເພິ່ນກຳລັງລົງເກັບກຳ ຂໍ້ມູນຢູ່ ບາງບ້ານ ກໍເຂົ້າບໍ່ເຖິງ ເທື່ອເດີ ຍັງຫລາຍບ້ານຢູ່."

ໃນເບື້ອງຕົ້ນເຈົ້າໜ້າທີ່ ໄດ້ໃຫ້ຄວາມຊ່ວຍເຫລືອ ປະຊາຊົນຜູ້ທີ່ຖືກຜົນກະທົບ ໂດຍສະເພາະ ໄດ້ແຈກຢາຍອາຫານແຫ້ງ, ໝີ່, ປ໋ອງປາ ແລະນ້ຳດື່ມໄດ້ແລ້ວ ແຕ່ສຳລັບເຄື່ອງໃຊ້ ທີ່ຈຳເປັນອື່ນໆ ຍັງບໍ່ທັນມີແຈກເທື່ອ.

ປັດຈຸບັນມີທັງໝົດ 12 ເມືອງ ຢູ່ແຂວງຫຼວງພຣະບາງ ທີ່ໄດ້ຮັບຜົນກະທົບຈາກນ້ຳຖ້ວມ ແຕ່ເຈົ້າໜ້າທີ່ສາມາດສລຸບໄດ້ພຽງແຕ່ 5 ເມືອງ ເທົ່ານັ້ນ. ມີປະຊາຊົນໄດ້ຮັບຜົນກະທົບ ປະມານ 70 ບ້ານ ລວມມູນຄ່າ ຄວາມເສັຍຫາຍ ທີ່ເຈົ້າໜ້າທີ່ປະເມີນ ໃນເບື້ອງຕົ້ນ ແມ່ນ 8 ຕື້ ກີບ ອີງຕາມຂໍ້ມູນຈາກເຈົ້າໜ້າທີ່ ທາງການແຂວງຫລວງພຣະບາງ.

ຄໍາເຫັນ (2)
Share

(

ເກີດນໍ້າຖ້ວມຢູ່ລາວນັ້ນມັນຍັງຈະບໍ່ຈົບເທົ່ານີ້ ແລະຈະມີອີກໃນປີຕໍ່ໆໄປປີນີ້ສໍ່ານີ້ປີຕໍ່ໄປຈະໜັກກ່ວານີ້, ຄໍາຖາມໆວ່າມັນຄືເປັນແນວນັ້ນ? ຄໍາຕອບມີຢູ່ວ່າຜູ້ນໍາລາວແຕ່ຂັ້ນລຸ່ມຂື້ນໄປຮອດຂັ້ນເທິງ ບາງພາກສ່ວນກໍຮຽນຈົບດອກເຕີ້ມາ ແຕ່ບໍແມ່ນຝ່າຍວິຊາການໆສ້າງເຄື່ອນໄຟຟ້ານໍ້າຕົກຈັກຄົນ ມີແຕ່ຈົບຟ່າຍສໍ້ກົງ, ຟ່າຍປອມແປງເອກກະສານເພື່ອສໍ້ກົງ, ຟ່າຍສໍ້ລາດບັງຫຼວງແລະອື່ນໆ ທີ່ເປັນຜົນປະໂຍດໃຫ້ແກ່ຕົນເອງເທົ່ານັ້ນ, ຕາມທີ່ຂ້າພະເຈົ້າເຫັນຢູ່ຕາມໂທລະພາບແຫ່ງຊາດລາວ ທີ່ເອົາມາອອກຂ່າວໃຫ້ເຫັນນັ້ນ ມີຂັ້ນລັດຖະມົນຕຣີຮອງຖະມົນຕຣີ ແລະຖ້າເປັນເພດຍິງກໍພາກັນນຸ່ງສີ້ນ ແລະພາຍກະເປົາກັ້ງຄັນຮົ່ມຢ່າງກວດກາ ຢູ່ບ່ອນທີ່ຈະສ້າງເຄື່ອນນັ້ນໆ, ອັນນີ້ຖ້າຈະຕອບຕາມຄວາມຈິງແລ້ວ ມັນບໍ່ແມ່ນນັກວິຊາການ ໄປກວດສອບເຄື່ອນແຕ່ຢ່າງໃດ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 06, 2018 06:19 AM

(

I miss the Luangphrabang of before Today Lao commies don't even hear you call. You can jump,you can cry or do all you can. Lao government prefers hide its head in the sand.



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 06, 2018 06:17 AM

ເຕັມຫນ້າ